Povestʹ vremennyx let


Maintained by: David J. Birnbaum (djbpitt@gmail.com) [Creative Commons BY-NC-SA 3.0 Unported License] Last modified: 2016-10-30T22:15:36+0000


0,1 Повѣсть временьныхъ лѣтъ чьрноризьца Феодосиева
0,2 манастыря печерьскаго, отъкуду есть пошьла
0,3 русьская земля и къто въ неи почалъ пьрвѣе къняжити,
0,4 и отъкуду Русьская земля стала есть.
1,1 Се начьнемъ повѣсть сию.
1,2 По потопѣ 3-е сынове Ноеви раздѣлиша
1,3 землю, Симъ, Хамъ, Афетъ. И я ся въстокъ Симови:
1,4 Персида, Ватрь доже и до Индикия въ дълготу,
1,5 и въ широту и до Нирокурия, якоже
1,6 рещи отъ въстока доже и до полудьния, и Сурия, и
1,7 Мидия и Ефратъ рѣку и Вавилонъ, Кордуна,
1,8 Асуриане, Месопотамия, Аравия Старѣишая,
1,9 Елумаисъ, Индия, Аравия Сильная, Кулии, Колгини, Финикия вься.
1,10 Хамови же я ся полудьньная часть: Егупьтъ,
1,11 Ефиопия, прилежащия къ Индомъ, другая же
2,1 Ефиопия, из неяже исходить рѣка Ефиопьская
2,2 Чьрмьна, текущия на въстокъ, Фива, Лувуи,
2,3 прилежащи доже до Куриния, Мармария,
2,4 Сурити, Ливуи другая, Нумидия, Масурия,
2,5 Мавритания, противу сущи Гадирѣ. Сущимъ же
2,6 къ въстокомъ имать: Киликию, Памфилию, Писидию,
2,7 Мосию, Лукаонию, Фругию, Камалию
2,8 Ликию, Карию, Лудию, Масию другую, Троаду,
2,9 Солиду, Вифунию, Старую Фругию; и
2,10 островы пакы имать: Сарданию, Критъ,
2,11 Купръ и рѣку Гиону, зовемую Нилу.
3,1 Афетови же я ся полунощьная страна и
3,2 западьная: Мидия, Олъвания, Армения
3,3 Малая и Великая, Каподокия, Фефлагони,
3,4 Галатия Кольхисъ, Воспории, Меоти, Дереви,
3,5 Сармати, Тавриани, Скуфия, Фраци,
3,6 Македония, Далматия, Молоси, Фесалия,
3,7 Локрия, Пеления, яже и Полопонисъ наречеть ся
3,8 Аркадия, Ипирония, Илурикъ, Словѣне,
3,9 Лухития, Анъдриакия, Анъдриатиньска
3,10 пучина. Имать же и островы: Вританию,
3,11 Сикелию, Евию, Родона, Хиона, Лѣзвона,
3,12 Куфирана, Закунфа, Кефалиния, Ифакину,
3,13 Керькуру и часть вьсякоя страны и
3,14 нарицаемую Онию, и рѣку Тигру, текущюю
3,15 межи Миды и Вавилонъмь; до Поньтьского
3,16 моря на полунощьныа страны, Дунаи,
3,17 Дънепръ и Кавкасиискыя горы, рекъше
3,18 Угърьскыя, и отътуда доже и до Дънѣпра, и
4,1 прочая рѣкы: Десна, Припеть, Двина, Вълховъ,
4,2 Вълга, иже идеть на въстокъ въ часть Симову.
4,3 Въ Афетовѣ же части сѣдить Русь, Чюдь и
4,4 вьси языци: Меря, Мурома, Вьсь, Мърдва, Заволочьская
4,5 Чюдь, Пермь, Печера, Ямь, Югра,
4,6 Литъва, Зимѣгола, Кърсь, Сѣтьгола, Либь.
4,7 Ляхове же, и Пруси и Чюдь присѣдять къ морю Варяжьскому.
4,8 По семуже морю сѣдять Варязи
4,9 сѣмо къ въстоку до предѣла Симова. По тому
4,10 же морю сѣдять къ западу до земля Агляньски и
4,11 до Волошьскы. Афетово бо колѣно и то: Варязи,
4,12 Свеи, Урмане, Гъте, Русь, Агляне, Галичане
4,13 Волохове, Римляне, Нѣмьци, Корлязи,
4,14 Венедици, Фрягове и прочии, присѣдять
4,15 отъ запада къ полудьнью, и съсѣдять ся съ
4,16 племеньмъ Хамовъмь.
4,17 Симъ же и Хамъ и Афетъ, раздѣливъше
4,18 землю, и жребии метавъше, не переступати никому же
5,1 въ жребии братьнь, и живяху
5,2 къжьдо въ своеи части. И бысть языкъ единъ.
5,3 И умъноживъшимъ ся человѣкомъ на земли, и помыслиша
5,4 съзьдати стълпъ до небеси, въ дьни Нектана
5,5 и Фалека. И събьравъше ся на мѣстѣ Сенаръ
5,6 поле, зьдати стълпъ до небесе и градъ около
5,7 его Вавилонъ. И зьдаша стълпъ за 40 лѣтъ,
5,8 и не съвьршенъ бысть. И съниде Господь Богъ видѣти
5,9 градъ и стълпъ и рече Господь: “Се родъ единъ и языкъ
5,10 единъ”. И съмѣси Богъ языкы, и раздѣли на
5,11 70 и на дъва языка, и расъсѣя по вьсеи земли. По
5,12 размѣшеньи же языкъ Богъ вѣтръмь великъмь
5,13 раздруши стълпъ, и есть останъкъ его межи
5,14 Асура и Вавилона. И есть въ высоту
5,15 и въ ширину локътъ 5433 локътъ.
5,16 Въ лѣта мънога хранимъ останъкъ. По раздрушении
5,17 же стълпа и по раздѣлении языкъ прияша
5,18 сынове Симовы въсточьныя страны, а Хамови же
5,19 сынове полудьньныя страны. Афетови же сынове
5,20 западъ прияша и полунощьныя страны. Отъ сихъ
5,21 же 70 и дъву языку бысть языкъ Словѣньскъ, отъ
5,22 племени же Афетова нарицаемии Норци, иже суть Словѣне.
5,23 По мънозѣхъ же временѣхъ сѣли суть Словѣни
5,24 по Дунаеви, где есть нынѣ Угърьская
5,25 земля и Българьская. Отъ тѣхъ Словѣнъ
6,1 разидоша ся по земли, и прозъваша ся имены
6,2 своими, гдѣ сѣдъше на которомь мѣстѣ. Яко
6,3 пришьдъше сѣдоша на рѣцѣ именьмь Морава,
6,4 и прозъваша ся Морава, а друзии Чеси нарекоша ся.
6,5 А се ти же Словѣни: Хървати Бѣлии и Сьрбь
6,6 и Хорутане. Волохомъ бо нашьдъшимъ
6,7 на Словѣны на Дунаискыя, и сѣдъшимъ въ нихъ
6,8 и насилящимъ имъ, Словѣне же ови, пришьдъше,
6,9 сѣдоша на Вислѣ, и прозъваша ся Ляхове, а отъ
6,10 тѣхъ Ляховъ прозъваша ся Поляне, Ляхове друзии
6,11 Лютичи, ини Мазовъшане, а ини Поморяне.
6,12 Такоже и ти же Словѣне пришьдъше, сѣдоша по
6,13 Дънепру, и нарекоша ся Поляне, а друзии Деревляне,
6,14 зане сѣдоша въ лѣсѣхъ; а друзии сѣдоша
6,15 межи Припетью и Двиною и нарекоша ся
6,16 Дрьгъвичи; инии сѣдоша на Двинѣ, и нарекоша ся
6,17 Полочане, рѣчькы ради, яже течеть
6,18 въ Двину, именьмь Полота, отъ сея прозъваша ся
6,19 Полочане. Словѣне же, сѣдоша около озера
6,20 Илмеря, и прозъваша ся своимь именьмь, и
6,21 съдѣлаша градъ, и нарекоша и Новъгородъ.
6,22 А друзии сѣдоша на Деснѣ, и по Семи, и по Сулѣ,
6,23 и нарекоша ся Сѣверо. И тако разиде ся Словѣньскъ
6,24 языкъ, тѣмь же и прозъва ся Словѣньская грамота.
7,1 Поляномъ же живъшимъ особь по горамъ
7,2 симъ, и бѣ путь из Варягъ въ Грьки и из
7,3 Грькъ по Дънѣпру, и вьрхъ Дънѣпра волокъ до
7,4 Ловоти, и по Ловоти вънити въ Илмерь озеро
7,5 великое, из негоже озера потечеть Вълховъ, и
7,6 вътечеть въ озеро великое Нево, и того
7,7 озера вънидеть устие въ море Варяжьское. И по
7,8 тому морю вънити доже и до Рима, а отъ Рима прити по
7,9 томуже морю къ Цьсарюграду, и отъ Цьсаряграда
7,10 прити въ Понтъ море, въ неже вътечеть Дънѣпръ
7,11 рѣка. Дънѣпръ бо течеть из Воковьскаго лѣса,
7,12 и потечеть на полъдьне, а Двина ис тогоже
7,13 лѣса потечеть, и идеть на полуночие и вънидеть
7,14 въ море Варяжьское. Ис того же лѣса потечеть
7,15 Вълга на въстокъ, и вътечеть седмьюдесятъ
7,16 жерелъ въ море Хвалисьское. Тѣмь же
7,17 из Руси можеть ити по Вълзѣ въ Българы и
7,18 въ Хвалисы, и на въстокъ доити въ жеребии
7,19 Симовъ, а по Двинѣ въ Варягы, изъ Варягъ и
7,20 до Рима, отъ Рима же и до племени
7,21 Хамова. А Дънѣпръ вътечеть въ Поньтьское море трьми
7,22 жерелы, еже море словеть Русьское, по немуже
7,23 училъ святыи Андрѣи, братъ Петровъ, якоже
7,24 рекоша.
7,25 Андрѣю учащю въ Синопии и пришьдъшю
8,1 ему въ Кърсунь, увидѣ, яко ис Кърсуня близь
8,2 устие Дънѣпрьское, и въсхотѣ поити въ Римъ,
8,3 и прииде въ устие Дънѣпрьское, и отътолѣ
8,3a omitted
8,3b omitted
8,3c omitted
8,4 поиде по Дънѣпру горѣ. И по приключаю приде
8,5 и ста подъ горами на березѣ. И заутра
8,6 въставъ рече къ сущимъ съ нимь ученикомъ:
8,7 “Видите ли горы сия? яко на сихъ горахъ въсияеть
8,8 благодать Божия; имать градъ великъ
8,9 быти и цьркъви мъногы имать Богъ въздвигнути”.
8,10 И въшьдъ на горы сия, и благослови я, и постави
8,11 крьстъ. И помоливъ ся Богу, и сълѣзе съ
8,12 горы сея, идеже послѣже бысть Кыевъ, и поиде
8,13 по Дънѣпру горѣ. И приде въ Словѣны, идеже
8,14 нынѣ Новъгородъ, и видѣ люди ту сущая, какъ
8,15 ихъ обычаи, и како ся мыють и
8,16 хвощють ся, и удиви ся имъ. И иде въ Варяги,
8,17 и приде въ Римъ, и исповѣда, елико научи,
8,18 и елико видѣ, и рече имъ: “Дивьно видѣхъ землю
8,19 Словѣньску идущю ми сѣмо. Видѣхъ
8,20 банѣ древяны, и пережьгуть я вельми,
8,21 и съвлѣкуть ся, и будуть нази, и обольють ся
8,22 мытелью, и възьмуть {вѣтви | вѣникы}
8,23 и начьнуть {ся бити | хвостати ся}, и того ся добиють,
8,24 одъва вылезуть, лѣ живи, и облѣють ся водою студеною,
8,25 и тако оживуть. И тако творять по
9,1 вься дьни, не мучими никымьже, нъ сами ся мучать,
9,2 и творять не мытву себѣ, не мучение”.
9,3 И слышавьше дивляху ся. Андрѣи же, бывъ
9,4 въ Римѣ, приде въ Синопию.
9,5 Поляномъ же живущимъ о собѣ, и володѣющимъ
9,6 роды своими, яже и до сея братия бяху
9,7 Поляне, и живяху къжьдо съ родъмь своимь
9,8 на своихъ мѣстѣхъ, володѣюще къжьдо родъмь
9,9 своимь. И быша 3 брата:
9,10 единому имя Кыи, а другому Щекъ, а третиему
9,11 Хоривъ, и сестра ихъ Лыбедь. И сѣдяше
9,12 Кыи на горѣ, гдѣ ныне увозъ Боричевъ,
9,13 а Щекъ сѣдяше на горѣ, гдѣ нынѣ зоветь ся
9,14 Щековица, а Хоривъ на третиеи горѣ,
9,15 отъ нюду же прозъва ся Хоривица. Сътвориша
9,16 градъкъ въ имя брата ихъ старѣишаго, и нарекоша
9,17 и Кыевъ. И бяше около
9,18 града лѣсъ и боръ великъ, и бяху ловяще
9,19 звѣрь, бяхуть бо мудри и съмысльни, и
9,20 нарицаху ся Поляне, отъ нихъ же суть Поляне
9,21 Кыевѣ и до сего дьне.
9,22 Ини же, не вѣдуще, рекоша, яко Кыи
9,23 есть перевозьникъ былъ, у Кыева бо перевозъ бяше
10,1 тъгда съ оноя страны Дънѣпра, тѣмь
10,2 глаголаху: на перевозъ на Кыевъ. Аще бо бы
10,3 перевозьникъ Кыи, то не бы ходилъ къ Цьсарюграду;
10,4 нъ сь Кыи къняжаше въ роду своемь, и
10,5 приходивъшю ему къ цьсарю, не съвѣмы, нъ тъкъмо о семь вѣмы, якоже съказають,
10,6 яко велику чьсть приялъ есть отъ цьсаря, которого не вѣмъ и при
10,7 которомь приходи цьсари. Идущю же ему опять,
10,8 приде къ Дунаеви, и възлюби мѣсто, и съруби
10,9 градъкъ малъ, и хотяше сѣсти съ родъмь
10,10 своимь, и не даша ему близь живущии; еже и
10,11 донынѣ наричють Дунаици городище Кыевьць.
10,12 Кыеви же пришьдъшю въ свои градъ Кыевъ,
10,13 ту съконьча животъ свои; и брата его Щекъ
10,14 и Хоривъ и сестра ихъ Лыбедь ту съконьчаша ся.
10,15 И по сеи братьи почаша дьржати родъ
10,16 ихъ къняжение въ Поляхъ, а въ Деревляхъ
10,17 свое, а Дрьгъвичи свое, а Словѣне свое въ Новѣгородѣ,
10,18 а другое на Полотѣ, иже и Полочане.
10,19 Отъ {нихъ | сихъ} же и Кривичи, иже сѣдять на вьрхъ
10,20 Вълги, и на вьрхъ Двины и на вьрхъ Дънѣпра,
10,21 ихъже и градъ есть Смольньскъ; туда бо сѣдять
10,22 Кривичи. Таже Сѣверо отъ нихъ. На Бѣлѣозерѣ
10,23 сѣдять Вьсь, а на Ростовѣ озерѣ Меря,
11,1 а на Клѣщинѣ озерѣ сѣдять Меря же. А по Оцѣ
11,2 рѣцѣ, где вътечеть въ Вългу, языкъ
11,3 свои Мурома, и Черемись свои языкъ,
11,4 Мърдва свои языкъ. Се бо тъкъмо Словѣньскъ
11,5 языкъ въ Руси: Поляне, Деревляне,
11,6 Новъгородьци, Полочане, Дрьгъвичи, Сѣверо,
11,7 Бужане, зане седять по Бугу, послѣ же
11,8 Волыняне. И се суть инии языци,
11,9 иже дань дають Руси: Чюдь, Вьсь, Меря, Мурома,
11,10 Черемись, Мърдва, Пермь, Печера,
11,11 Ямь, Литъва, Зимѣгола, Кърсь, Нерома,
11,12 Либь. Си суть свои языкъ имуще, отъ колѣна
11,13/14 Афетова, иже живуть на странахъ полунощьныхъ.
11,15 Словѣньску же языку, яко же рекохомъ, живущю
11,16 на Дунаи, придоша отъ Скуфъ, рекъше отъ
11,17 Козаръ, рекомии Българе, и сѣдоша по Дунаеви,
11,18 насильници Словѣномъ быша. Посемь
11,19 придоша Угъре Бѣлии и наслѣдиша
11,20 землю Словѣньску прогънавъше Волохы, иже бѣша преже
11,20a прияли землю Словѣньску. Си бо Угъри почаша быти
11,21 при Ираклии цьсари, иже ходиша на Хоздроя,
11,22 цьсаря Персьскаго. Въ си же времена быша и
11,23 Объри, иже воеваша на цьсаря Ираклия и мало
11,24 его не яша. Си же Объри воеваша на Словѣны,
12,1 и примучиша Дулѣбы, сущая Словѣны,
12,2 и насилие творяху женамъ Дулѣбьскымъ: аще
12,3 поѣхати бяше Обърину, не дадяше въпрячи
12,4 коня ни волу, нъ веляше въпрячи 3 или,
12,5 4 ли, 5 женъ въ телѣгу, и повести Обърина,
12,6 и тако мучаху Дулѣбы. Бяху бо
12,7 Объри тѣлъмь велици, а умъмь гьрди, и потреби
12,8 я Богъ, и помьроша вьси, и не оста ни
12,9 единъ Объринъ. И есть притъча въ Руси и до
12,10 сего дьни: погыбоша акы Объри; ихъ же нѣсть племене
12,11 ни наслѣдъка. По сихъ бо придоша Печенѣзи; и
12,12 пакы идоша Угъри Чьрнии мимо Кыевъ,
12,13 послѣже при Ользѣ.
12,14 Поляномъ живущимъ о себѣ, якоже
12,15 рекохомъ, сущии отъ рода Словѣньска, и нарекоша ся
12,16 Поляне, а Деревляне отъ Словѣнъ же,
12,17 и нарекоша ся Древляне; Радимичи бо и Вятичи
12,18 отъ Ляховъ. Бяста бо дъва брата въ Лясѣхъ,
12,19 Радимъ, а другии Вятъко, и пришьдъша
12,20 сѣдоста Радимъ на Съжю, и прозъваша ся
12,21 Радимичи, а Вятъко сѣде своимь родъмь
12,22 по Оцѣ, отъ него прозъваша ся Вятичи. И
12,23 живяху въ мирѣ Поляне, и Деревляне, и Сѣверо,
12,24 и Радимичи и Вятичи и Хървати. Дулѣби
13,1 живяху по Бугу, гдѣ ныне Волыняне,
13,2 а Улучи Тиверьци сѣдяху по Бугу и по Дънѣпру, и
13,3 присѣдяху къ Дунаеви. И бѣ мъножьство ихъ, сѣдяху
13,4 бо по Бугу и Дънѣпру оли до моря и
13,5 суть гради ихъ и до сего дьне, да то ся зъвяху отъ
13,6 Грькъ Великая Скуфь.
13,7 Имяхуть бо обычая свои, и законы отьць своихъ
13,8 и предания къждо свои нравъ. Поляне бо своихъ
13,9 отьць обычаи имяху тихъ и кротъкъ и стыдѣние
13,10 къ снъхамъ своимъ и къ сестрамъ, къ
13,11 матерьмъ и снъхы къ свекръвамъ
13,12 и къ дѣверьмъ велико стыдѣние имуще; и брачьныи
13,13 обычаи имѣяху: не хожаше женихъ по
13,14 невѣсту, нъ привожаху вечеръ, а заутра
13,15 приношаху чьто на неи въдадуче. А Деревляне
13,16 живяху звѣриньскъмь образъмь, живуще
13,17 скотьскы: и убиваху другъ друга, ядуще
13,18 вьсе нечисто, и браченья въ нихъ не быша,
13,19 нъ умыкываху уводы дѣвиця. А Радимичи,
13,20 и Вятичи и Сѣверо одинъ обычаи
13,21 имяху: живяху въ лѣсѣ, яко же всякыи
13,22 звѣрь, ядуще вьсе нечисто, и срамословие
14,1 въ нихъ предъ отьци и предъ снъхами и
14,2 браци не бываху въ нихъ, нъ игрища межю
14,3 селы. Съхожаху ся на игрища, на плясания
14,4 и на вься бѣсовьскыя пѣсни, и ту умыкаху
14,5 жены собѣ, съ нею же къто съвѣщеваше ся; имяхуть
14,6 же по дъвѣ и по три жены. И аще къто
14,7 умьряше, творяху трызну надъ нимь, и по
14,8 семь творяху кладу велику, и възложать
14,9 на кладу мьртвьца и съжигаху, и посемь събьравъше
14,10 кости въложаху въ съсудъ малъ, и
14,11 поставляху на стълпѣ на путьхъ, иже творять
14,12 Вятичи и нынѣ. Си же обычаи творяху и
14,13 Кривичи и прочии погании, не вѣдуще
14,14 закона Божия, нъ творяху сами себѣ законъ.
14,15 Глаголеть Георгии въ лѣтописьцѣ: “Ибо комужьдо
14,16 языку овѣмъ законъ исписанъ есть, другымъ
14,17 же обычая, зане безаконьнымъ
14,18 отьчьствиемь мьнить ся. Отъ нихъ же пьрвое Сирии,
14,19 живущии на коньць земля, законъ имуть отьць
14,20 своихъ и обычая: не любодѣяти ни прелюбодѣяти,
14,21 ни красти, ни клеветати, ли убити, ли зъло
14,22 дѣяти вьсьма отинудь. Законъ же и у Ктириянъ, глаголемии
15,1 Върахмане и Островици, иже отъ прадѣдъ показаниемь
15,2 и благочьстиемь мясъ не ядуще, ни
15,3 вина пиюще, ни блуда творяще, никакоя же
15,4 зълобы творяще, страха ради мънога
15,5 ибо явѣ таче прилежащимъ къ нимъ Индомъ
15,6 убистводѣица сквьрнотворящии гнѣвливи
15,7 паче естьства; въ нутрьнѣиши же странѣ ихъ
15,8 человѣкы ядуще и страньствующихъ убиваху,
15,9 паче же ядять яко пьси. Етеръ же законъ Халдѣемъ
15,10 и Вавилоняномъ: матери поимати, съ
15,11 братьними чады блудъ дѣяти, и убивати.
15,12 Вьсяко бестудьное дѣяние, яко дѣтелие,
15,13 мьнять ся дѣюще, любо аще далече страны своея
15,14 будуть. Инъ же законъ Гилиомъ: жены у нихъ
15,15 орють, и храмы зижють и мужьскыя дѣла
15,16 творять, нъ любы творить, елико хощеть, не
15,17 въздьржаеми отъ мужии своихъ отъниудь, ни
15,18 зазьрять; въ нихъже суть храбры жены, ловити
15,19 звѣрѣ крѣпъкы. Владѣють жены, мужьми
15,20 своими и въдобляють ими. Въ Вритании же
15,21 мънози мужи съ единою женою съпять, такоже и мъногия
15,22 жены съ единѣмь мужьмь похотьствують, и
16,1 безаконьная законъ отьць творять
16,2 независтьно и не въздьржаньно. Амазоняне же
16,3 мужа не имуть, акы скотъ бесловесьныи но
16,4 единою лѣтъмь къ вешнимъ дьньмъ оземьствены
16,5 будуть; и съчетають ся съ окрьстьныхъ ибо
16,6 мужи, яко нѣкоторое имъ тържьство и велико
16,7 праздьньство время тѣмъ мьнять. Отъ нихъ
16,8 зачьнъшимъ въ чревѣ, и пакы разбѣгнуть ся отъсюду
16,9 вьси. Въ время же хотящимъ родити, аще родить ся
16,10 отроча, погубять. Аще ли дѣвичьскъ полъ,
16,11 то въздоять и прилѣжьно въспитають.
16,12 Якоже се и нынѣ при насъ Половьци законъ дьржать
16,13 отьць своихъ: кръвь проливати, а хваляще ся
16,14 о семъ, и ядуще мьртвьчину и вьсю нечистоту,
16,15 хомѣкы и сусълы, и поимають мачехы
16,16 своя и ятръви, и ины обычая отьць своихъ.
16,17 Нъ мы же хрьстияне, елико земль, иже
16,18 вѣрують въ святую Троицю, и въ едино крьщение, и въ
16,19 едину вѣру, законъ имамъ единъ, елико въ
16,20 Христа крьстихомъ ся и въ Христа облекохомъ ся.
16,21 По сихъ же лѣтѣхъ, по съмьрти братия сея
16,22 быша обидими Деревляны и инѣми окольными.
17,1 И наидоша я Козаре, сѣдящая на горахъ
17,2 въ лѣсѣхъ, и рекоша Козаре: “Платите намъ
17,3 дань”. Съдумавъше же Поляне и въдаша отъ
17,4 дыма мечь, и несоша Козаре къ кънязю своему
17,5 и къ старѣишинамъ своимъ, и рѣша имъ:
17,6 “Се, налѣзохомъ дань нову”. Они же рѣша имъ:
17,7 “Отъкуду?”. Они же рѣша: “Въ лѣсѣ на горахъ,
17,8 надъ рѣкою Дънѣпрьскою”. Они же рѣкоша: “Чьто суть
17,9 въдали?”. Они же показаша мечь. И рѣша
17,10 старьци Козарьстии: “Не добра дань, къняже. Мы доискахомъ
17,11 ся оружиемь единоя страны,
17,12 рекъше саблями, а сихъ оружие
17,13 обоюду остро, рекъше мечи. Си имуть имати
17,14 на насъ дань и на инѣхъ странахъ”. Се же събысть ся
17,15 вьсе: не отъ своея воля рекоша, нъ отъ Божия изволения.
17,16 Яко и при Фараонѣ, цьсари Егупьтьстѣмь,
17,17 егда приведоша Моисѣя предъ Фараона,
17,18 и рекоша старьци Фараони: “Сь хощеть
17,19 съмирити область Егупьтьску”. Якоже и
17,20 бысть: погыбоша Егупьтяне отъ Моисѣя, а пьрвѣе
17,21 бѣша работающе имъ. Тако и си пьрвѣе владѣша, а
17,22 послѣди самѣми владѣють; яко же и бысть:
17,23 владѣють бо Козары Русьстии кънязи и
17,24 до дньшьняго дьне.
17,25 Въ лѣто 6360, индикта 15, начьнъшю
17,26 Михаилу цьсарьствовати, нача ся прозывати Русьская
17,27 земля. О семь бо увѣдахомъ, яко при семь цьсари
17,28 приходиша Русь на Цьсарьградъ, яко же пишеть
17,29 въ лѣтописании Грьцьскомь. Тѣмь же и отъселе почьнемъ
18,1 и числа положимъ. Яко отъ Адама до потопа лѣтъ
18,2 2242; а отъ потопа до Аврама лѣтъ 1082;
18,3 отъ Аврама до исхожения Моисѣева лѣтъ
18,4 430; а отъ исхожения Моисѣова до Давыда
18,5 лѣтъ 601; а отъ Давыда и отъ начала цьрьства Соломоня
18,6 до плѣнения Иерусалимова лѣтъ 448; а отъ
18,7 плѣнения до Александра лѣтъ 318; а отъ Александра
18,8 до Христова рожьства лѣтъ 333; а отъ Христова
18,9 рожьства до Костянтина лѣтъ 318;
18,10 отъ Костянтина же до Михаила сего лѣтъ 542. А
18,11 отъ пьрваго лѣта Михаила сего до пьрваго лѣта
18,12 Ольгова, Русьскаго кънязя, лѣтъ 29; а отъ пьрваго
18,13 лѣта Ольгова, понелѣже сѣде въ Кыевѣ, до пьрваго
18,14 лѣта Игорева лѣтъ 31; а отъ пьрваго лѣта Игорева
18,15 до пьрваго лѣта Святославля лѣтъ 33;
18,16 а отъ пьрваго лѣта Святославля до пьрваго лѣта
18,17 Яропълча лѣтъ 28. Яропълкъ къняжи лѣтъ 8; а
18,18 Володимиръ къняжи лѣтъ 37; а Ярославъ къняжи
18,19 лѣтъ 40. Тѣмь же отъ съмьрти Святославля до съмьрти
18,20 Ярославли лѣтъ 85; а отъ съмьрти Ярославли до
18,21 съмьрти Яропълчи лѣтъ 60. Нъ мы на предълежащее
18,22 възвратимъ ся, и съкажемъ, чьто ся удѣяло
18,23 въ лѣта си, якоже преже почали бяхомъ пьрвое
18,24 лѣто Михаила, и по ряду положимъ числа.
18,25 Въ лѣто 6361.
18,26 Въ лѣто 6362.
18,27 Въ лѣто 6363.
18,28 Въ лѣто 6364.
18,29 Въ лѣто 6365.
19,1 Въ лѣто 6366. Михаилъ цьсарь изиде съ вои
19,2 берегъмь и морьмь на Българы. Българе же,
19,3 увидѣвъше, не могоша стати противу, крьстити ся
19,4 просиша и покоряти ся Грькомъ. Цьсарь же крьсти
19,5 кънязя ихъ и боляры вься, и миръ сътвори
19,6 съ Българы.
19,7 Въ лѣто 6367. Имаху дань Варязи,
19,8 из заморья, на Чюди и на Словѣнехъ, и на
19,9 Меряхъ и на вьсѣхъ Кривичехъ. А Козаре имаху
19,10 на Полянѣхъ, и на Сѣверѣхъ, и на Вятичихъ,
19,11 имаху по бѣлѣ и вѣверици отъ дыма.
19,12 Въ лѣто 6368.
19,13 Въ лѣто 6369.
19,14 Въ лѣто 6370. Изъгнаша Варягы за
19,15 море, и не даша имъ дани, и почаша сами
19,16 въ собѣ владѣти. И не бѣ въ нихъ правьды, и
19,17 въста родъ на родъ, и быша усобицѣ въ нихъ,
19,18 и воевати сами на ся почаша. И рѣша: “Поищемъ
19,19 сами въ собѣ кънязя, иже бы владѣлъ
19,20 нами и рядилъ по ряду по праву”. И идоша
19,21 за море къ Варягомъ, къ Руси. Сице бо зъвахуть
19,22 ты Варягы Русь, яко се друзии зовуть ся
19,23 Свее, друзии же Урмани, Англяне, инии и
19,24 Гъте, тако и си. Рѣша Русь, Чюдь, Словѣне,
20,1 Кривичи и Вься: “Земля наша велика и
20,2 обильна, а наряда въ неи нѣтъ. Да поидѣте къняжитъ
20,3 и владѣтъ нами”. И избьраша ся трие
20,4 братия съ роды своими, и пояша по собѣ
20,5 вьсю Русь, и придоша къ Словѣномъ. Пьрвое и сърубиша городъ Ладогу
20,6 и сѣде старѣишии въ Ладозѣ Рюрикъ, а другыи, Синеусъ, на
20,7 Бѣлѣозерѣ, а третии, Труворъ, въ Изборьсцѣ.
20,8 И отъ тѣхъ Варягъ прозъва ся Русьская
20,9 земля.
20,10 omitted
20,11 По дъвою же лѣту умьре Синеусъ
20,12 и братъ его Труворъ. И прия власть Рюрикъ вьсю единъ,
20,12a и пришьдъ къ Ильмерю и съруби градъ надъ Волховомь и
20,12b прозъваша Новъгородъ и сѣде ту къняжа
20,13 и раздая мужемъ своимъ волости и грады рубити, овому Полотьскъ,
20,14 овому Ростовъ, другому Бѣлоозеро.
20,15 И по тѣмъ градомъ суть находьници Варязи.
20,16 Пьрвии насельници въ Новѣгородѣ Словѣни,
20,17 въ Полотьскѣ Кривичи, въ Ростовѣ Меряне,
20,18 въ Бѣлѣозерѣ Вьсь, въ Муромѣ Мурома; и
20,19 тѣми вьсѣми обладаше Рюрикъ. И бяста у
20,20 него дъва мужа, не племени его, нъ болярина, и та
20,21 испросиста ся къ Цьсарюграду съ родъмь своимь. И поидоста
20,22 по Дънѣпру, идучи мимо и узьрѣста
20,23 на горѣ градъкъ. И въпрошаста рекуща:
20,24 “Чии сь градъ?” Они же рекоша: “Была суть
21,1 три братия, Кыи, Щекъ, Хоривъ, иже съдѣлаша
21,2 градъ сь, и изгыбоша, а мы сѣдимъ, и платимы
21,3 дань Козаромъ”. Асколдъ же и
21,4 Диръ остаста въ градѣ семь, и мъногы Варягы
21,5 съвъкуписта, и начаста владѣти Польскою
21,6 землею, Рюрику же къняжащу въ Новѣгородѣ.
21,7 Въ лѣто 6371.
21,8 Въ лѣто 6372.
21,9 Въ лѣто 6373.
21,10 Въ лѣто 6374. Иде Асколдъ и Диръ
21,11 на Грькы, и приде въ 14 лѣто Михаила
21,12 цьсаря. Цьсарю же отъшьдъшю на Агаряны, и дошьдъшю
21,13 ему Чьрныя рѣкы, вѣсть епархъ посъла
21,14 ему, яко Русь идеть на Цьсарьградъ, и
21,15 врати ся цьсарь. Си же, вънутрь Суду въшьдъше,
21,16 мъного убииство хрьстияномъ сътвориша, и въ
21,17 дъвою съту корабль Цьсарьградъ оступиша. Цьсарь
21,18 же одъва въ градъ въниде, и съ патриархъмь
21,19 Фотиемь къ сущии цьркъви святыя Богородица Влахернѣ
21,20 вьсю нощь молитву сътвориша; таже
21,21 божьствьную ризу святыя Богородиця съ пѣсньми изнесъше,
21,22 въ рѣку омочивъше, тишинѣ сущи, и морю
21,23 укротивъшю ся, абие буря съ вѣтръмь въста,
21,24 и вълнамъ великимъ въставъшимь засобь, и безбожьныхъ
21,25 Руси корабля съмяте, и къ брегу
22,1 привьрже, и изби я, яко малу ихъ отъ таковыя
22,2/3 бѣды избыти, и въ свояси възвратиша ся.
22,4 Въ лѣто 6375.
22,5 Въ лѣто 6376. Поча цьсарьствовати Василии.
22,7 Въ лѣто 6377. Крьщена бысть вься
22,8 земля Българьская.
22,9 Въ лѣто 6378.
22,10 Въ лѣто 6379.
22,11 Въ лѣто 6380.
22,12 Въ лѣто 6381.
22,13 Въ лѣто 6382.
22,14 Въ лѣто 6383.
22,15 Въ лѣто 6384.
22,16 Въ лѣто 6385.
22,17 Въ лѣто 6386.
22,18 Въ лѣто 6387. Умьръшю Рюрикови, предасть
22,19 къняжение свое Ольгови, отъ рода ему
22,20 сущю, въдавъ ему на руцѣ сынъ свои, Игоря;
22,21 {бысть | бѣ | бяше} бо {дѣтескъ | малъ | молодъ} вельми.
22,22 Въ лѣто 6388.
22,23 Въ лѣто 6389.
22,24 Въ лѣто 6390. Поиде Ольгъ, поимъ воя
22,25 мъногы: Варягы, Чюдь, Словѣны, Мерю, Вьсь,
23,1 Кривичѣ, и приде къ Смольньску и съ Кривичи, и
23,2 прея градъ, и посади мужь свои. Отътуда
23,3 поиде вънизъ, и възя Любьчь, и посади мужь
23,4 свои. И придоста къ горамъ Кыевьскимъ,
23,5 и увѣдѣ Ольгъ, яко Асколдъ и Диръ къняжита,
23,6 и похорони воя въ лодияхъ, а другыя
23,7 назади остави, а самъ приде, нося Игоря
23,8 {дѣтьска | молода}. И приступль подъ Угърьское, похоронивъ
23,9 воя своя, и посъла къ Асколду и Диру,
23,10 глаголя, яко “Гостие есмы, идемъ въ
23,11 Грькы отъ Ольга и отъ Игоря къняжича; да придѣта
23,12 къ роду своему къ намъ”. Асколдъ же и
23,13 Диръ придоста, и выскакаша вьси прочии
23,14 из лодии. И рече Ольгъ Асколду и Дирови:
23,15 “Вы нѣста кънязя, ни роду къняжа, нъ азъ есмь
23,16 роду къняжа”, и вынесоша Игоря, “А сь
23,17 есть сынъ Рюриковъ”. И убиша Асколда и Дира,
23,18 и несъша на гору, и погребоша на горѣ,
23,19 еже ся нынѣ зоветь Угърьское, идеже нынѣ
23,20 Олъминъ дворъ; на тои могылѣ поставилъ божницю
23,21 святаго Николу; а Дирова могыла за святою Ориною.
23,22 И сѣде Ольгъ, къняжа въ Кыевѣ. И рече Ольгъ:
23,23 “се, буди мати градомъ Русьскымъ”. И бѣша у
23,24 него Словѣни и Варязи, и прочии прозъваша ся
23,25 Русию. Сь же Ольгъ нача городы ставити, и
24,1 устави дани Словѣномъ и Кривичемъ и Мерямъ;
24,2 и устави Варягомъ дань даяти отъ Новагорода
24,3 300 гривьнъ на лѣто, мира дѣля, еже до
24,4 съмьрти Ярославлѣ даяше Варягомъ.
24,5 Въ лѣто 6391. Поча Ольгъ воевати на Деревляны,
24,6 и примучивъ я, поча на нихъ имати
24,7 по чьрнѣ кунѣ.
24,8 Въ лѣто 6392. Иде Ольгъ на Сѣверяны,
24,9 и побѣди Сѣверяны, и възложи на нь
24,10 дань льгъку, и не дастъ имъ Козаромъ дани
24,11 {платити | даяти}, рекъ: “Азъ имъ противьнъ, а вамъ
24,12 нѣ чему”.
24,13 Въ лѣто 6393. Посъла къ Радимичемъ,
24,14 рька: “Кому дань даете?” Они же рѣша: “Козаромъ”.
24,15 И рече имъ Ольгъ: “Не даваите Козаромъ, нъ
24,16 мънѣ даваите. И въдаша Ольгови по щьлягу,
24,17 якоже и Козаромъ даяху. И бѣ обладая
24,18 Ольгъ Деревляны Полями
24,19 и Радимичи, а съ Уличи и Тиверьци
24,20 имѣяше рать.
24,21 Въ лѣто 6394.
24,22 Въ лѣто 6395. Леонъ цьсарьствова, сынъ Василиевъ
24,23 иже Львъ прозъва ся, и братъ его Александръ,
24,24 иже цьсарьствоваста лѣть 26.
24,25 Въ лѣто 6396.
25,1 Въ лѣто 6397.
25,2 Въ лѣто 6398.
25,3 Въ лѣто 6399.
25,4 Въ лѣто 6400.
25,5 Въ лѣто 6401.
25,6 Въ лѣто 6402.
25,7 Въ лѣто 6403.
25,8 Въ лѣто 6404.
25,9 Въ лѣто 6405.
25,10 Въ лѣто 6406. Идоша Угъри мимо Кыевъ
25,11 горою, еже ся зоветь нынѣ Угърьское, и
25,12 пришьдъше къ Дънѣпру, сташа вежами;
25,13 бѣша бо ходяще, яко и Половьци. И пришьдъше
25,14 отъ въстока, и устрьмиша ся чересъ горы великыя,
25,15 яже прозъваша ся горы Угърьскыя, и почаша
25,16 воевати на живущая ту.
25,17 Сѣдяху бо ту преже Словѣни, и Волохове
25,18 преяша землю Словѣньску. Посемъ же Угъри прогънаша
25,19 Волохы, и наслѣдиша землю ту, и сѣдоша
25,20 съ Словѣньми, покоривъше я подъ ся; и
25,21 отътолѣ прозъва ся земля Угърьска. И начаша
25,22 воевати Угъри на Грьки, и поплѣниша землю
25,23 Фрачьску и Макидоньску доже и до Селуня;
25,24 и начаша воевати на Мораву и на Чехы.
25,25 Бѣ бо единъ языкъ Словѣньскъ: Словѣне, иже сѣдяху
25,26 по Дунаеви, ихъ же преяша Угъри, и Морава
25,27 и Чеси и Ляхове и Поляне, яже
26,1 нынѣ зовомая Русь. Симъ бо пьрвое преложены
26,2 кънигы, Моравѣ, яже прозъва ся грамота
26,3 Словѣньская, яже грамота есть въ Руси и
26,4 въ Българѣхъ Дунаискыхъ.
26,5 Словѣномъ бо живущемъ крьщенымъ и къняземъ
26,6 ихъ, Ростиславъ, и Святопълкъ, и Коцьлъ посълаша
26,7 къ цьсарю Михаилу, глаголюще: “Земля наша
26,8 крьщена, и нѣсть у насъ учителя, иже бы насъ
26,9 научилъ, и наказалъ, и протълковалъ
26,10 святыя кънигы; не разумѣемъ бо ни Грьчьску
26,11 языку, ни Латыньску; они бы ны инако
26,12 учать, а {они | друзии} инако; тѣмь же не
26,13 разумѣемъ кънижьнаго {образа | разума} ни силы ихъ; да
26,14 посълѣте ны учителя, иже могуть ны съказати
26,15 кънижьная словеса и разумъ ихъ”. Се слышавъ Михаилъ
26,16 цьсарь, съзъва философы вься, и съказа имъ
26,17 рѣчи вься Словѣньскыхъ кънязь. И рѣша философи:
26,18 “Есть мужь въ Селуни, именьмь Львъ, и
26,19 суть у него сынове разумиви языку Словѣньску, и
26,20 хытра дъва сына у него, философа”. Се слышавъ
26,21 цьсарь, посъла по ня въ Селунь къ Львови, глаголя:
26,22 “Посъли къ намъ сына своя, Мефодия и
26,23 Костянтина”. Се слышавъ Львъ, въскорѣ посъла я.
26,24 И придоста къ цьсареви, и рече има: “Се присъла ся
26,25 къ мънѣ Словѣньская земля, просяще
26,26 учителя себѣ, иже бы моглъ имъ истълковати
26,27 святыя къниги; сего бо желають”. И умолена
27,1 быста цьсаремъ, и посълаша я въ Словѣньскую
27,2 землю къ Ростиславу и Святопълку и Коцьлови.
27,3 Сима же пришьдъшема, начаста съставляти
27,4 писмена азъбукъвьная Словѣньскы, и
27,5 преложиста Апостолъ и Еуангелие. И ради быша
27,6 Словѣне, яко слышаша величия Божия своимь
27,7 языкъмь. Посемь же преложиста Псалтырь
27,8 и Охтаикъ и прочая кънигы. Нѣции же начаша
27,9 хулити Словѣньскыя кънигы, глаголюще, яко “Не достоить ни
27,10 которому же языку имѣти букъвъ своихъ,
27,11 развѣ Еврѣи и Грькъ и Латинъ, по Пилатову
27,12 писанию, еже на крьстѣ Господьни написа”. Се
27,13 же слышавъ папежь Римьскыи, похули тѣхъ, иже
27,14 ръпъщуть на кънигы Словѣньскыя, река: “Да ся
27,15 испълнить кънижьное слово, яко въсхвалять Бога
27,16 вьси языци”; другое же: “вьси възглаголють языкы различьными
27,17 величия Божия, якоже дасть имъ Святыи Духъ
27,18 отъвѣщевати”. Да аще къто хулить Словѣньскую
27,19 грамоту, да будеть отълученъ отъ цьркъве, доньде же
27,20 исправять ся; ти бо суть вълци, а не овьци, яже
27,21 достоить отъ плодъ познати я и хранити ся
27,22 ихъ. Вы же, чада, Божия послушаите учения, и
27,23 не отринѣте наказания цьркъвьнаго, яко же вы наказалъ
27,24 Мефодии, учитель вашь”. Костянтинъ
27,25 же, възрати ся въспять, и иде учити Българьска
28,1 языка, а Мефодии оста въ Моравѣ. Посемь
28,2 же Коцьлъ кънязь постави Мефодия епископа
28,3 въ Пании, на {столѣ | мѣстѣ} святаго апостола Андроника,
28,4 единого отъ 70, ученика святаго апостола Павьла. Мефодии
28,5 же посади 2 попа борзописьца {зѣло | вельми},
28,6 и преложи вься кънигы испълнь отъ Грьчьска
28,7 языка въ Словѣньскъ шестию мѣсяць, начьнъ
28,8 отъ марта мѣсяца до дъвоюдесяту и шестию дьнь октября
28,9 мѣсяца. Оконьчавъ же, достоиную хвалу и
28,10 славу Богу въздасть, дающему таку благодать
28,11 епископу Мефодию, настольнику Андроникову. Тѣмь же
28,12 Словѣньску языку есть учитель Андроникъ
28,13 апостолъ, въ Моравы бо доходилъ и апостолъ Павьлъ, и
28,14 училъ ту; ту бо есть Илюрикъ, егоже доходилъ апостолъ
28,15 Павьлъ; ту бо бѣша Словѣни
28,16 пьрвое. Тѣмь же Словѣньску языку
28,17 учитель есть Павьлъ, отъ негоже языка и мы
28,18 есмъ, Русь; тѣмь же и намъ, Руси, учитель есть Павьлъ,
28,19 понеже училъ есть языкъ Словѣньскъ, и
28,20 поставилъ есть епископа и намѣстьника по себѣ
28,21 Андроника Словѣньску языку. А Словѣньскъ
28,22 языкъ и Русьскыи единъ. Отъ Варягъ
28,23 бо прозъваша ся Русию, а пьрвѣе бѣша
28,24 Словѣни. Аще и Поляне зъваху ся, нъ Словѣньска
28,25 рѣчь бѣ. Полями же прозъваша ся,
29,1 зане въ поли сѣдяху, а языкъ Словѣньскыи бѣ имъ
29,2 единъ.
29,3 Въ лѣто 6407.
29,4 Въ лѣто 6408.
29,5 Въ лѣто 6409.
29,6 Въ лѣто 6410. Леонъ цьсарь ная Угъры на
29,7 Българы. Угьре же, нашьдъше, вьсю землю Българьскую
29,8 плѣноваху. Семеонъ же, увѣдѣвъ,
29,9 на Угъры възврати ся, и Угъри противу
29,10 поидоша, и побѣдиша Българы, яко одъва
29,11 Семеонъ въ Дересьтръ убѣжа.
29,12 Въ лѣто 6411. Игореви възрастъшю,
29,13 и хожаше по Ользѣ, и слушаше его, и приведоша
29,14 ему жену отъ Пльскова, именьмь
29,15 Ольгу.
29,16 Въ лѣто 6412.
29,17 Въ лѣто 6413.
29,18 Въ лѣто 6414.
29,19 Въ лѣто 6415. Иде Ольгъ на Грькы, Игоря
29,20 оставивъ Кыевѣ; поя же мъножьство
29,21 Варягъ и Словѣнъ и Чюдь и Кривичѣ
29,22 и Мерю и Поляны и Сѣверъ и
29,23 Деревляны и Радимичѣ и Хърваты и
29,24 Дулѣбы и Тиверьцѣ, яже суть тълковины:
29,25 си вьси зъвахуть ся Великая Скуѳь.
29,26 И съ сими вьсѣми поиде Ольгъ на конихъ
29,27 и въ кораблихъ, и бѣ числъмь корабль 2000.
30,1 И прииде къ Цьсарюграду, и Грьци замъкоша
30,2 Судъ, а градъ затвориша. И вылѣзе Ольгъ на
30,3a брегъ, и повелѣ воемъ извлещи корабля на брегъ;
30,3b и повоева около града, и мъного
30,4 убииство сътвори Грькомъ; и полаты
30,5 мъногы разбиша, и цьркъви пожьгоша; а ихъже
30,6 имяху плѣньникы, овы посѣкаху, другыя
30,7 же мучаху, иныя же растрѣляху, а другыя
30,8 въ море въмѣтаху; и ина мънога зъла
30,9 творяху Русь Грькомъ, еликоже ратьнии творять.
30,10 И повелѣ Ольгъ воемъ своимъ
30,11 колеса издѣлати и въставити корабля на
30,12 колеса. И бывъшю покосьну вѣтру, въспяша
30,13 пърѣ, и съ поля идоша къ граду. Видѣвъше же
30,14 Грьци, и убояша ся, и рѣша высълавъше
30,15 къ Ольгови: “Не погубляи града; имемъ ся
30,16 по дань, якоже хощеши”. И устави Ольгъ
30,17 воя. И вынесоша ему брашьно и вино; и
30,18 не прия его; бѣ бо устроено съ отравою. И
30,19 убояша ся Грьци, и рѣша: “Нѣсть сь Ольгъ, нъ
30,20 святыи Дьмитрии, посъланъ на ны отъ Бога”. И заповѣда
30,21 Ольгъ дань даяти на 2000 корабль,
30,22 по 12 гривьнѣ на человѣкъ, а въ корабли по
30,23 40 мужь. И яша ся Грьци по се, и почаша
30,24 Грьци мира просити, да бы не воевалъ Грьчьскыя
30,25 земля. Ольгъ же, мало отъступивъ отъ града,
30,26 нача миръ творити съ цьсарема Грьчьскыма, съ
30,27 Леонъмь и Александръмь, посъла къ нима въ
31,1 градъ Карла, Фарлофа, Вельмуда, Рулава и Стемида,
31,2 глаголя: “Имѣте ми ся по дань”. И рѣша Грьци:
31,3 “Чего хощеши, дамы ти”. И заповѣда Ольгъ дати
31,4 воемъ на 2000 корабль по 12 гривьнѣ на ключь,
31,5 и потомь даяти уклады на Русьскыя грады:
31,6 пьрвое на Кыевъ, таже на Чьрниговъ и на
31,7 Переяславль и на Полотьскъ и на Ростовъ
31,8 и на Любьчь и на прочая грады, по тѣмъ
31,9 бо градомъ сѣдяху кънязи, подъ Ольгъмь
31,10 суще. “Да приходять Русь съльбьное емлють,
31,11 елико хотящи; а иже придутъ гостие, да
31,12 емлють мѣсячину на 6 мѣсяць, и хлѣбъ и вино
31,13 и мясо и рыбы и овощь. И да творять
31,14 имъ мовь, елико хотять. И поидущи же Русь
31,15 домови, да емлють у цьсаря вашего на
31,16 путь брашьно и якоря и ужа и пърѣ,
31,17 и елико надобѣ”. И яша ся Грьци.
31,18 И рекоста цьсаря и боярьство вьсе: “Аще придуть
31,19 Русь бес купля, да не възимають мѣсячьна. Да
31,20 запретить кънязь словомъ своимъ и приходящимъ
31,21 Руси сьде, да не творять пакости въ селѣхъ и въ
31,22 странѣ нашеи; приходяще Русь да витають у
31,23 святаго Мамы, и посълеть цьсарьство наше, да
31,24 испишѹть имена ихъ, и тъгда възьмуть мѣсячьное
31,25 свое, пьрвое отъ града Кыева, и пакы ис
31,26 Чьрнигова и Переяславля и прочии гради. И да
31,27 въходять въ градъ единѣми враты съ цьсаревъмь
31,28 мужьмь, без оружия, мужь 50, и да творять
31,29 куплю, яко же имъ надобѣ, не платяще мыта ни въ
32,1 чемьже. Цьсарь же Леонъ съ Александръмь
32,2 миръ сътвориста съ Ольгъмь, имъше ся по дань
32,3 и ротѣ заходивъше межю собою, цѣловавъше
32,4 крьстъ, а Ольга водивъше и мужа его на
32,5 роту по Русьскому закону, кляша ся оружиемь
32,6 своимь, и Перунъмь, богъмь своимь, и Волосъмь,
32,7 скотиемь богъмь, и утвьрдиша миръ. И рече
32,8 Ольгъ: “Ищиите пърѣ паволочиты Руси, а Словѣномъ
32,9 кропиньныя”. И бысть тако. И повѣсиша
32,10 щиты своя въ вратѣхъ показающе побѣду, и поиде
32,11 отъ Цьсаряграда. И въспяша пърѣ
32,12 паволочитыя, а Словѣни кропиньныя, и раздьра
32,13 я вѣтръ. И рѣша Словѣни: “Имѣмъ ся своимъ тълстинамъ,
32,14 не даны суть Словѣномъ пърѣ”. И приде
32,15 Ольгъ къ Кыеву, неся злато и паволокы и
32,16 овощи и вина и вьсяко узорочие. И прозъваша
32,17 Ольга вѣщии: бяху бо людие погани и
32,18 невѣгласи.
32,19 Въ лѣто 6416.
32,20 Въ лѣто 6417.
32,21 Въ лѣто 6418.
32,22 Въ лѣто 6419. Яви ся звѣзда велика на западѣ
32,23 копиинъмь образъмь.
32,24 Въ лѣто 6420. Посъла Ольгъ мужи свои построитъ
32,25 мира и положитъ рядъ межю Грькы и
32,26 Русию, и посъла:
32,27 “Равьно другаго съвещания, бывъшаго при тѣхъ-
32,28 же цьсарихъ, Льва и Александра. Мы отъ рода
33,1 Русьскаго, Карлы, Иньгелдъ, Фарлофъ, Верьмудъ,
33,2 Рулавъ, Гуды, Руалдъ, Карнъ, Фрелавъ,
33,3 Рюаръ, Актеву, Труанъ, Лидуль, Фостъ, Стемидъ,
33,4 иже посълани отъ Ольга, великаго кънязя Русьскаго,
33,5 и отъ вьсѣхъ, иже суть подъ рукою его, свѣтлыхъ
33,6 боляръ, къ вамъ, Львови и
33,7 Александру и Костянтину, великымъ о Бозѣ
33,8 самодьржьцемъ, цьсаремъ Грьчьскымъ, на удьржание
33,9 и на извѣщение отъ мъногыхъ лѣтъ межю хрьстияны
33,10 и Русию бывъшюю любъвь, похотѣниемь нашихъ
33,11 кънязь и по повелѣнию отъ вьсѣхъ, иже
33,12 суть подъ рукою его сущихъ Руси. Наша
33,13 свѣтьлость, боле инѣхъ хотящи же о Бозѣ
33,14 удьржати и извѣстити такую любъвь, бывъшюю
33,15 межю хрьстияны и Русию, мъногашьды
33,16 право судихомъ, но тъчию просто словесы,
33,17 и писаниемь и клятвою твьрдою, кльнъше ся
33,18 оружиемь своимь, такую любъвь извѣстити и
33,19 утвьрдити по вѣрѣ и по закону нашему. Суть,
33,20 яко понеже мы ся имали о Божьи вѣре и о
33,21 любъви, главы таковыя. По пьрвому убо слову,
33,22 да умиримъ ся съ вами, Грькы, да любимъ
33,23 другъ друга отъ вьсея душа и изволения, и не въдадимъ,
33,24 елико наше изволение, быти отъ сущихъ подъ
33,25 рукою нашихъ свѣтьлыхъ никакомуже
33,26 съблазну или винѣ, нъ потъщимъ ся, елико по
33,27 силѣ, на съхранение прочихъ и вьсегда лѣтъ съ вами,
33,28 Грькы, исповѣданиемъ и написаниемь съ клятъвою
33,29 извѣщаемую любъвь непревратьну и непостыжьну.
34,1 Тако же и вы, Грьци, да храните такуже
34,2 любъвь къ къняземъ нашимъ свѣтьлымъ Русьскымъ
34,3 и къ вьсѣмъ, иже суть подъ рукою свѣтьлаго
34,4 кънязя нашего, несъблазньну и непреложьну вьсегда
34,5 и въ вься лѣта. А о главахъ, аже ся ключить проказа,
34,6 урядимъ сице: да елико явѣ
34,7 будеть показании явлеными, да имѣють вѣрьное
34,8 о тацѣхъ явление, а емуже начьнуть не яти
34,9 вѣры, да кльнеть ся часть та, иже ищеть неятию
34,10 вѣры; да егда кльнеть ся по вѣрѣ своеи,
34,11 будеть казнь, якоже явить ся съгрешение о семь.
34,12 Аще къто убьеть хрьстияна Русинъ или
34,13 хрьстиянъ Русина, да умьреть, идѣже аще
34,14 сътворить убииство. Аще ли убѣжить сътворивыи
34,15 убииство, аще есть имовитъ, да часть его, сирѣчь
34,16 еже его будеть по закону, да възьметь ближьнии
34,17 убиенаго, а и жена убивъшаго да имѣеть толицѣмь
34,18 же пребудеть, по закону. Аще ли есть неимовитъ
34,19 сътворивыи убои и убѣжавъ, да дьржить ся
34,20 тяжа, доньдеже обрящеть ся, да умьреть. Аще ли
34,21 ударить мечьмъ или биеть кацѣмь любо съсудъмь,
34,22 за то ударение или биение да въдасть
34,23 литръ 5 сьребра по покону Русьскому; аще ли не
34,24 имовитъ тако сътворивыи, да въдасть, елико можеть,
34,25 и да съиметь съ себе и ты самыя
34,26 пърты, въ нихъ же ходять, а опрочѣ да ротѣ
34,27 ходить своею вѣрою, яко никако же иному помощи
34,28 ему, да пребываеть тя жа отътолѣ не възискаема.
34,29 О семь, аще украдеть Русинъ чьто любо у хрьстияна,
35,1 или пакы хрьстиянинъ у Русина, и
35,2 ятъ будеть томь часѣ тать, егда татьбу сътворить,
35,3 отъ погубивъшаго чьто любо, аще приготовить ся татьбы
35,4 творяи, и убиенъ будеть, да не възищеть ся съмьрть
35,5 его ни отъ хрьстиянъ, ни отъ Руси, нъ паче убо
35,6 да възьметь свое, иже будеть погубилъ. Аще
35,7 въдасть руцѣ украдыи, да ятъ будеть тѣмьже,
35,8 у негоже будеть украдено, и съвязанъ будеть,
35,9 отъдасть то, еже смѣ сътворити, и сътворить
35,10 триичи. О семь. Аще къто отъ хрьстиянъ или
35,11 отъ Руси мучения образъмь искусъ сътворить, и насилиемь
35,12 явѣ възьметь чьто любо дружьне, да
35,13 въспятить трииче. Аще вывьржена будеть
35,14 лодия вѣтръмь великъмь на землю чюжю, и обращуть ся
35,15 тамо иже отъ насъ, Руси, да аще къто
35,16 идеть сънабъдѣти лодию рухлъмь своимь,
35,17 отъсълати пакы на землю хрьстианьскую; да
35,18 проводимъ ю сквозѣ вьсяко страшьно мѣсто,
35,19 доньдеже придеть въ бестрашьно мѣсто; аще ли
35,20 таковая лодия, ли отъ буря, или боронения
35,21 земьнаго боронима, не можеть възборонити ся въ
35,22 своя си мѣста, съпотружаемъ ся гребьцемъ тоя лодия
35,23 мы, Русь, допровадимъ ю съ куплею ихъ позъдраву;
35,24 ти аще ключить ся близъ земля Грьчкы аще ли
35,25 ключить ся такоже проказа лодии Русьстѣи, да проводимъ
35,26 ю въ Русьскую землю, да продають рухло
35,27 тоя лодия, аще чьто можеть продати отъ лодия,
35,28 влачимъ мы, Русь; да егда ходимъ въ Грькы
35,29 или съ куплею или въ съльбу къ цьсареви нашему,
35,30 да пустимъ я съ чьстию проданое рухло
36,1 лодия ихъ. Аще ли ключить ся кому отъ лодия убиену
36,2 быти, отъ насъ Руси, или възяти чьто любо, да повиньни
36,3 будуть то сътворьшии прежереченною
36,4 епитемиею. О тѣхъ, аще полоняникъ обою
36,5 страну дьржимъ есть или отъ Руси, или отъ Грькъ,
36,6 проданъ въ ину страну, аще обрящеть ся ли
36,7 Русинъ, ли Грьчинъ, да възвратять
36,8 искупленое лице въ свою страну, и възьмуть
36,9 цѣну его купящии, или мьнить ся въ куплю
36,10 надъ нь челядиная цѣна. Тако же аще отъ рати
36,11 ятъ будеть отъ тѣхъ Грькъ, тако же да възвратить ся
36,12 въ свою страну, и отъ дана будеть цѣна его,
36,13 якоже речено есть, якоже есть купля. Егда же требуеть
36,14 на воину, и си хотять почьстити цьсаря вашего,
36,15 да аще въ кое время елико ихъ придеть,
36,16 и хотять оставити ся у цьсаря вашего своею волею, да
36,17 будуть. О Руси о плѣненѣи. Мъногашьды отъ
36,18 коея {любо | убо} страны пришьдъшемъ въ Русь и продаемомъ
36,19 въ хрьстияны, и еще же и отъ хрьстиянъ
36,20 отъ плѣненыхъ, мъногашьды отъ коея любо страны приходящемъ
36,21 въ Русь, си продаеми бывають по 20 злата,
36,22 и да придуть въ Грькы. О томь. Аще украденъ
36,23 будеть челядинъ Русьскыи, или въскочить, или
36,24 по нужи проданъ будеть, и жаловати начьнуть Русь,
36,25 покажеть ся таковое о челядинѣ, да
36,26 поимуть и въ Русь; нъ и гостие, аще, погубивъше
36,27 челядинъ, и жалують, да ищуть, обрѣтаемое
36,28 да поимуть е. Аще ли къто искушения сего
36,29 не дасть сътворити мьстьнику, да погубить правьду
36,30 свою. О работающихъ въ Грьцѣхъ Руси у
37,1 хрьстияньскаго цьсаря. Аще къто умьреть, не урядивъ
37,2 своего имѣния, ци своихъ не имать, да
37,3 възвратять имѣние къ малымъ ближикамъ въ Русь.
37,4 Аще ли сътворить обряжение таковыи, възьметь
37,5 уряженое его; кому будеть писалъ наслѣдити
37,6 имѣние, да наслѣдить е. О възимающихъ куплю
37,7 Руси. Отъ различьныхъ ходящихъ, въ Грькы и удължающихъ.
37,8 Аще зълодѣи възратить ся въ Русь, да
37,9 жалують Русь хрьстияньскому цьсарьству, и ятъ будеть
37,10 таковыи, и възвращенъ будеть, не хотяи,
37,11 въ Русь. Си же вься да творять Русь Грькомъ,
37,12 идѣже аще ключить ся таково. На утвьржение же
37,13 и неподвижение быти межю вами, хрьстияны,
37,14 и Русию, бывъшии миръ сътворихомъ Ивановъмь
37,15 написаниемь на дъвою харатию, цьсаря вашего
37,16 и своею рукою, предълежащимь чьстьнымь
37,17 крьстъмь и святою единосущьною Троицею единого
37,18 истиньнаго Бога нашего, извѣсти и дасть нашимъ
37,19 съломъ. Мы же кляхомъ ся къ цьсарю вашему, иже
37,20 отъ Бога суще, яко Божию зьданию, по закону
37,21 и по покону языка нашего, не преступити намъ,
37,22 ни иному отъ страны нашея отъ уставленыхъ
37,23 главъ мира и любъве. И таково написание дахомъ
37,24 цьсарьства вашего на утвьржение обоему пребывати
37,25 таковому съвѣщанию, на утвьржение
37,26 и на извѣщение межю вами бывающаго
37,27 мира. Мѣсяца сентября 2, недѣли 15, въ лѣто съзьдания
37,28 миру 6420.
37,29 Цьсарь же Леонъ почьсти сълы Русьскыя даръми,
38,1 златъмь и паволоками и фофудиями, и пристави
38,2 къ нимъ мужа своя показати имъ цьркъвьную
38,3 красоту и полаты златыя и въ нихъ сущая
38,4 богатьства, злата мъного и паволокы и
38,5 камение драгое, и страсти Господьня вѣньць и гвоздие
38,6 и хламиду багъряную и мощи святыхъ, учаще
38,7 я къ вѣрѣ своеи, и показающе имъ истиньную
38,8 вѣру. И тако отъпусти я въ свою землю
38,9 съ чьстию великою.
38,10 Посълании же Ольгъмь посъли придоша къ Ольгови,
38,11 и повѣдаша вься рѣчи обою цьсарю, како сътвориша
38,12 миръ, и урядъ положиша межю Грьчьскою
38,13 землею и Русьскою, и клятвы не преступити
38,14 ни Грькомъ, ни Руси. И живяше Ольгъ
38,15 миръ имѣя къ вьсѣмъ странамъ, къняжа въ Кыевѣ.
38,16 И приспѣ осень, и помяну Ольгъ конь свои,
38,17 иже бѣ поставилъ кърмити и не въсѣдати на нь.
38,18 Бѣ бо преже въпрашалъ вълхвъ и кудесьникъ: “Отъ
38,19 чего ми есть умрети?” И рече ему единъ кудесьникъ:
38,20 “Къняже! Конь, егоже любиши и ѣздиши на немь, отъ
38,21 того ти умрети”. Ольгъ же, приимъ въ умѣ си, рече:
38,22 “Николиже въсяду на нь, ни вижю его боле того”. И
38,23 повелѣ кърмити и не водити его къ нему; и
38,24 пребы нѣколико лѣтъ, не дѣя его, доньдеже на
38,25 Грькы иде. И пришьдъшю ему къ Кыеву, и
38,26 пребывъшю 4 лѣта, на пятое лѣто помяну
38,27 конь, отъ негоже бяху рекли вълсви умрети, и
38,28 призъва старѣишину конюхомъ, река: “Къде есть конь
38,29 мои, егоже бѣхъ поставилъ кърмити и блюсти его?”
39,1 Онъ же рече: “Умьрлъ есть”. Ольгъ же посмѣя ся, и
39,2 укори кудесьника, река: “Тоть неправо молвять
39,3 вълсви, нъ вьсе лъжа есть: конь умьрлъ, а я
39,4 живъ”. И повелѣ осѣдьлати конь: “Атъ вижю
39,5 кости его”. И приѣха на мѣсто, идѣже бѣша лежаще
39,6 кости его голы и лъбъ голъ, и сълѣзъ
39,7 съ коня, посмѣя ся река: “Отъ сего ли лъба
39,8 съмьрть мънѣ възяти?” И въступи ногою
39,9 на лъбъ; и выникнучи змия, и
39,10 уклюну въ ногу. И съ того разболѣ ся умьрѣ.
39,11 И плакаша ся вьси людие плачьмь великъмь, и несоша
39,12 и, и погребоша и на горѣ, иже глаголеть ся Щековица;
39,13 есть же могыла его и до сего дьни, словеть
39,14 могыла Ольгова. И бысть вьсѣхъ лѣтъ къняжения
39,15 его 33.
39,16 Се же дивьно, яко отъ вълхвования събываеть ся
39,17 чародѣиствомь, яко же бысть цьсарьство
39,18 Доментияново; нѣкыи вълхвъ, именьмь Аполонии Тиянинъ,
39,19 знаемъ бяше шьствуя и творя
39,20 вьсюду въ градѣхъ и въ селѣхъ бѣсовьская
39,21 чюдеса. Отъ Рима бо пришьдъ въ Узантию,
39,22 умоленъ бысть отъ живущихъ ту сътворити
39,23 сия: отъгъна мъножьство змии и скорпия из
39,24 града, яко не врежати ся человѣкомъ отъ нихъ; ярость
39,25 коньскую обуздавъ, егда съхожаху ся боляре.
39,26 Такоже и въ Антиохию пришьдъ, и умоленъ бывъ
39,27 отъ нихъ; томимомъ бо Антиохомъ отъ скорпии
40,1 и отъ комаръ, сътворивъ мѣдянъ скорпии,
40,2 и погребе и въ земли, и малъ стълпъ мраморянъ
40,3 постави надъ нимь, и повелѣ тръсть дьржати
40,4 человѣкомъ и ходити по граду, зъвати, тръстьмъ
40,5 трясомамъ: “Бес комара граду”. И тако исчезоша
40,6 из града комари и скорпия. Испросиша
40,7 же пакы о лежащимь на градѣ
40,8 трусѣ; въздъхну, съписа надъщице сия: “Увы
40,9 тобѣ, оканьныи граде, яко потрясеши ся мъного,
40,10 огньмь одьржимъ будеши; оплачеть же
40,11 тя и при брезѣ сы Оренти”. О немьже и великыи
40,12 Анастасии Божия Града рече: “Аполонию же
40,13 доже и донынѣ на нѣцѣхъ мѣстѣхъ събывають ся
40,14 сътвореная, стоящая окована отъвращение
40,15 животьнъ четвероногъ пътица, могущи вредити
40,16 человѣкы; другыя же на въздьржание струямъ
40,17 рѣчьнымъ, нездьржаньно текущимъ, нъ ина
40,18 нѣкая на тьлѣние и вредъ человѣкомъ сущая на
40,19 побѣжение стоять”. Не тъчию бо за живота его
40,20 така и таковая сътвориша бѣсове его ради, нъ
40,21 и по съмьрти его, пребывающе у гроба его, знамения
40,22 творяху въ имя его на прельщение оканьнымъ
40,23 человѣкомъ, {бъшию | больма} крадомомъ на таковая
40,24 отъ диявола. Къто убо чьто речеть о творящихъ
40,25 вълшвьныхъ дѣлъ? Яко таковыи
40,26 гораздъ бысть вълшебьнымь прельщениемь, яко выину
40,27 зазьряше вѣдыи Аполонии, яко неистовъ на
41,1 ся философьскую хытрость имуща; подобашеть
41,2 бо ему, рещи, якоже и азъ словъмь тъчию творити,
41,3 ихъже хотяше, а не съвьршениемь творити
41,4 повелѣваемая отъ него. Та же вься ослаблениемь
41,5 Божиимь и творениемь бѣсовьскымь бываеть,
41,6 таковыми вещьми искушати ся нашея преславьныя
41,7 вѣры, аще твьрда есть искрь пребывающи
41,8 Господеви, ни не влекома врагъмь мьчьтныхъ
41,9 ради чюдесъ и сотонинъ дѣлъ, творимомъ отъ
41,10 рабъ и слугъ зълобие 2. Еще же нъ именьмь
41,11 Господьньмь пророчьствоваша нѣции, яко Валамъ
41,12 и Саулъ, и Каияфа, и бѣсы пакы изгънаша,
41,13 яко Июда и сынове Скевави. Убо и на не-
41,14 достоиныхъ благодѣтельствуеть мъногашьды, да
41,15 етеры съдѣтельствуеть. Ибо Валаамъ чюжь
41,16 бѣ обоихъ жития и вѣры, нъ обаче
41,17 съвѣдѣтельство въ немь благодать инѣхъ ради
41,18 съмотрения. И Фараонъ таковыи бѣ, нъ и
41,19 тому будущая показа. И Навходъносоръ
41,20 законопреступьныи, нъ и сему пакы по мънозѣхъ
41,21 сущихъ посреди же града отъкры, тѣмь
41,22 являя, яко мънози, прекостьнъ имуще умъ,
41,23 предъ образъмь Христовъмь знаменають иною
41,24 къзнию на прельсть человѣкомъ, не разумѣющимъ
41,25 добраго, якоже бысть Симонъ вълхвъ и
42,1 Менандръ ини; таковыхъ ради по истинѣ рече: не
42,2 чюдесы прельщати.
42,3 Въ лѣто 6421. Поча къняжити Игорь по
42,4 Ользѣ. Въ се же время поча цьсарьствовати Костянтинъ,
42,5 сынъ Леонтовъ. И Деревляне {затвориша ся | заратиша ся}
42,6 отъ Игоря по Ольговѣ съмьрти.
42,7 В лѣто 6422. Иде Игорь на Деревляны, и
42,8 побѣдивъ, възложи на ня дань большю
42,9 Ольговы. Въ тоже лѣто приде Семеонъ Българьскыи
42,10 на Цьсарьградъ, и сътворивъ миръ, и
42,11 иде въ свояси.
42,12 Въ лѣто 6423. Придоша Печенѣзи пьрвое
42,13 на Русьскую землю, и сътворьше миръ съ
42,14 Игорьмь, идоша къ Дунаю. Въ си же времена
42,15 приде Семеонъ, пленяя Фракию; Грьци же посълаша
42,16 по Печенѣгы. Печенѣгомъ пришьдъшемъ и
42,17 хотящимъ на Семеона, расвариша ся Грьчьскыя
42,18 воеводы. Видѣвъше Печенѣзи, яко сами на
42,19 ся реть имуть, отъидоша въ свояси, а Българе
42,20 съ Грькы съступиша ся, и посѣчени быша
42,21 Грьци. Семеонъ же прия градъ Одрѣнь,
42,22 иже пьрвое Орестовъ градъ нарицаше ся, сына
42,23 Агамемнонь; иже пьрвое въ трьхъ рѣкахъ купавъ ся, недуга
42,24 избы ту; сего градъ въ свое имя
42,25 нарече. Послѣди же Андриянъ кесарь, обновивы и,
43,1 въ свое имя нарече Андриянь, мы же зовемъ
43,2 Ондрѣньмь градъмь.
43,3 Въ лѣто 6424.
43,4 Въ лѣто 6425.
43,5 Въ лѣто 6426.
43,6 Въ лѣто 6427.
43,7 Въ лѣто 6428. Поставленъ Романъ цьсарь въ
43,8 Грьцѣхъ. Игорь же воеваше на Печенѣгы.
43,9 Въ лѣто 6429.
43,10 Въ лѣто 6430.
43,11 Въ лѣто 6431.
43,12 Въ лѣто 6432.
43,13 Въ лѣто 6433.
43,14 Въ лѣто 6434.
43,15 Въ лѣто 6435.
43,16 Въ лѣто 6436.
43,17 Въ лѣто 6437. Приде Семеонъ на Цьсарьградъ,
43,18 и поплѣни Фракию и Макидонию, и приде
43,19 къ Цьсарюграду въ силѣ велицѣ и въ гьрдости.
43,20 И сътвори миръ съ Романъмь цьсарьмь, и възврати ся
43,21 въ свояси.
43,22 Въ лѣто 6438.
43,23 Въ лѣто 6439.
43,24 Въ лѣто 6440.
43,25 Въ лѣто 6441.
43,26 Въ лѣто 6442. Пьрвое придоша Угъри
43,27 на Цьсарьградъ, и плѣняху вьсю Фракию. Романъ
43,28 сътвори миръ съ Угъры.
43,29 Въ лѣто 6443.
43,30 Въ лѣто 6444.
43,31 Въ лѣто 6445.
44,1 Въ лѣто 6446.
44,2 Въ лѣто 6447.
44,3 Въ лѣто 6448.
44,4 Въ лѣто 6449. Иде Игорь на Грькы.
44,5 И яко посълаша Българе вѣсть къ цьсарю, яко идуть
44,6 Русь на Цьсарьградъ, скѣдии 10 тысящь. Иже
44,7 придоша, и приплуша, и почаша воевати Вифаньскыя
44,8 страны, и плѣноваху по Понту до
44,9 Ираклия и до Фофлагоньскы земля, и вьсю
44,10 страну Никомидиискую поплѣнивша, и Судъ вьсь
44,11 пожьгоша. Ихъ же имъше, овѣхъ растинаху, другыя
44,12 {акы странь | же стража} поставляюще, стрѣлями растрѣляху;
44,13 въ ня и изимаху, опакы руцѣ съвязавъше, и
44,14 гвозди желѣзьны посреди главы въбивахуть
44,15 имъ; мъного же святыхъ цьркъвии огневи
44,16 предаша, манастыря и села, пожьгоша, и имѣния
44,17 немало обою страну възяша. Потомь же,
44,18 пришьдъшемъ воемъ отъ въстока, Панфиръ
44,19 деместикъ съ четырьми десять тысящь, Фока же
44,20 патрикии съ Македоняны, Феодоръ же Стратилатъ
44,21 съ Фракы, съ ними же и сановьници болярьстии,
44,22 обидоша Русь около. И съвѣщаша Русь,
44,23 изидоша, въоруживъше ся, на Грькы, и брани
44,24 межю ими бывъши зьлѣ, одъва одолѣша Грьци.
44,25 Русь же възвратиша ся къ дружинѣ своеи къ
44,26 вечеру, и на ночь, вълѣзъше въ лодия, отъбѣгоша.
44,27 Феофанъ же усърѣте я въ олядьхъ
44,28 съ огньмь, и нача пущати огнь трубами на
44,29 лодия Русьскыя. И бысть видѣти страшьно чюдо.
44,30 Русь же, видяще пламень, въмѣтаху ся въ
44,31 воду морьскую, хотяще убрьсти: и тако
45,1 прочии възвратиша ся въ свояси. Тѣмьже, пришьдъшемъ
45,2 въ землю свою, повѣдаху къжьдо
45,3 своимъ о бывъшимь и о лядьнѣмь огни:
45,4 “Якоже мълния, рече, иже на небесѣхъ, Грьци имуть
45,5 у себе, и сию пущающе жьжаху насъ; и
45,6 сего ради не одолѣхомъ имъ.” Игорь же пришьдъ,
45,7 нача съвъкупляти воя мъногы, и посъла по
45,8 Варягы за море, вабя и на Грькы,
45,9 пакы хотя поити на ня.
45,10 Въ лѣто 6450. Семеонъ иде на Хърваты,
45,11 и побѣженъ бысть Хърваты. И умьре, оставивъ
45,12 Петра, сына своего, къняжити.
45,13 Въ лѣто 6451. Пакы придоша Угъри на Цьсарьградъ
45,14 и миръ сътворивъше съ Романъмь,
45,15 възвратиша ся въ свояси.
45,16 Въ лѣто 6452. Игорь съвъкупи
45,17 воя мъногы, Варягы, и Русь, и Поляны, и Словѣни
45,18 и Кривичѣ, и Тиверьцѣ, и Печенѣгы ная, и
45,19 тали въ нихъ поемъ, поиде на Грькы въ лодияхъ и
45,20 на конихъ, хотя мьстити себе. Се слышавъше
45,21 Кърсуньци, посълаша къ Роману, глаголюще: “Се, идуть
45,22 Русь, покрыли суть море корабли, бесчисла корабль”.
45,23 Такоже и Българе посълаша вѣсть, глаголюще:
45,24 “Идуть Русь, и наяли суть къ собѣ Печенѣги”.
45,25 Се слышавъ цьсарь, посъла къ Игорю лучьшая боляры,
45,26 моля и глаголя: “Не ходи, нъ възьми дань, юже
45,27 ималъ Ольгъ, и придамь еще тои дани”. Такоже
45,28 и къ Печенѣгомъ посъла паволокы и злато
45,29 мъного. Игорь же, дошьдъ Дуная, съзъва дружину,
45,30 и нача думати, и повѣда имъ рѣчь
46,1 цьсареву. Рѣша же дружина Игорева: “Да аще
46,2 сице глаголеть цьсарь, то чьто хощемъ боле того, не бивъше ся
46,3 имати злато и сьребро и паволокы? Егда
46,4 къто вѣсть, къто одолѣеть, мы ли, они ли? Ли съ морьмь
46,5 къто съвѣтьнъ? Се бо не по земли ходимъ,
46,6 нъ по глубинѣ морьстѣи, и обьща съмьрть вьсѣмъ”. И
46,7 послуша ихъ Игорь, и повелѣ Печенѣгомъ воевати
46,8 Българьску землю. А самъ възьмъ у Грькъ
46,9 злато и паволокы, на вься воя, възврати ся
46,10 въспять, и приде къ Кыеву въ свояси.
46,11 В лѣто 6453. Присъла Романъ и Костянтинъ
46,12 и Стефанъ посълы къ Игореви построитъ мира
46,13 пьрваго. Игорь же глагола съ ними о мирѣ. Посъла
46,14 Игорь мужи свои къ Роману. Романъ же съзъва
46,15 боляры и сановьникы. И приведоша Русьскыя посълы,
46,16/17 и велѣша глаголати и пьсати обоихъ рѣчи на харатию.
46,18 “Равьно другаго съвѣщания, бывъшаго при
46,19 цьсари Романѣ, и Костянтинѣ и Стефанѣ, христолюбивыхъ
46,20 владыкахъ. Мы отъ рода Русьскаго посъли и
46,21 гостие: Иворъ, сълъ Игоревъ, великаго кънязя
46,22 Русьскаго, и обьщии посъли: Вуефастъ Святославль,
46,23 сына Игорева; Искусеви Ольгы кънягыня;
46,24 Слуды Игоревъ, нетия Игорева; Улѣбъ
46,25 Володиславль; Каницаръ Предъславинъ; Шигъбернъ
46,26 Сфандръ, жены Улѣбовы; Прастѣнъ
46,27 Туръдуви; Либи Аръфастовъ; Гримъ Сфирковъ;
46,28 Прастѣнъ Якунь, нетия Игоревъ; Кары Тудковъ;
46,29 Каршевъ Тудоровъ; Егри Ерлисковъ; Воистъ Иковъ; Истръ Яминъдовъ;
47,1 Ятвягъ Гунаревъ;
47,2 Шибридъ Алдань; Колъ Клековъ; Стегги
47,3 Етоновъ; Сфирка; Алвадъ Гудовъ; Фудри
47,4 Тулбовъ; Муторъ Утинъ; купьць Адунь,
47,5 Адолбъ, Ангивладъ, Улѣбъ, Фрутанъ, Гомолъ,
47,6 Куци, Емигъ, Турбридъ, Фуръ, Стѣнъ, Бруны,
47,7 Роалдъ, Гунастръ, Фрастѣнъ, Ингелдъ,
47,8 Турбернъ и другыи Турбернъ, Улѣбъ, Турбенъ, Моны, Руалдъ, Свѣнь, Стиръ,
47,9 Алданъ, Тилии, Апубкарь, Свѣнь, Вузелѣвъ
47,10 Исинко Биричь, посълании отъ Игоря, великаго
47,11 кънязя Русьскаго, и отъ вьсея къняжия и отъ
47,12 вьсѣхъ людии Русьския земля. И отъ тѣхъ заповѣдано
47,13 обновити ветъхыи миръ, и отъ ненавидящаго добра
47,14 и вражьдолюбьца диявола разорити отъ мъногъ
47,15 лѣтъ, утвьрдити любъвь межю Грькы и
47,16 Русию. И великыи нашь кънязь Игорь
47,17 и боляре его и людие вьси Русьстии посълаша ны
47,18 къ Роману и Стефану и Костянтину
47,19 великымъ цьсаремъ Грьчьскымъ, сътворити любъвь
47,20 съ самѣми цьсари и съ вьсѣмь болярьствъмь
47,21 и съ вьсѣми людьми Грьчьскыми на вься лѣта,
47,22 доньдеже сълньце сияеть и вьсь миръ стоить.
47,23 Иже помыслять отъ страны Русьскыя раздрушити
47,24 такую любъвь, и елико ихъ свьщение прияли
47,25 суть, да приимуть мьсть
47,26 отъ Бога вьседьржителя, осужение и на погыбѣль
47,27 и въ сь вѣкъ и въ будущии, а елико ихъ не
47,28 крьщено есть, да не имуть помощи отъ Бога, ни отъ Перуна,
48,1 да не ущитять ся щиты своими, и да
48,2 посѣчени будуть мечи своими и отъ стрѣлъ и отъ
48,3 иного оружия своего, и да будуть раби въ
48,4 сь вѣкъ и въ будущии. А великыи кънязь Русьскыи
48,5 и боляре его да посылають на то въ Грькы къ
48,6 великымъ цьсаремъ Грьчьскымъ корабля, елико хотять,
48,7 съ посълы своими и гостьми. Яко же имъ уставлено
48,8 есть, ношаху посъли печати златы, а
48,9 гостие сьребряны; нынѣ же увѣдѣлъ есть
48,10 кънязь нашь посылати грамоты къ цьсарьству вашему;
48,11 иже посылаеми бывають отъ нихъ
48,12 посъли и гостие, да приносять грамоту, пишюще
48,13 сице: яко посълахъ корабль селико; и отъ
48,14 тѣхъ да увѣмы и мы, оже съ миръмь
48,15 приходять. Аще ли без грамоты придуть, и
48,16 предани будуть намъ, дьржимъ и хранимъ,
48,17 доньдеже възвѣстимъ кънязю вашему. Аще ли
48,18 руку не дадять, и противять ся, да убиени будуть,
48,19 да не изищеть ся съмьрть ихъ отъ кънязя вашего.
48,20 Аще ли, убѣжавъше, придуть въ Русь, и мы
48,21 напишемъ къ кънязю вашему, и яко имъ любо, тако
48,22 сътворять. И аще придуть Русь бес купля, да
48,23 не възимають мѣсячьна. И да запрѣтить кънязь
48,24 словомъ своимъ и приходящимъ Руси сьде, да
48,25 не творять бещиния въ селѣхъ, ни въ странѣ
48,26 нашеи. И приходящемъ имъ, да витають у святаго
48,27 Мамы, да посълеть цьсарьство ваше, да испишеть
48,28 имена ихъ, и тъгда възьмуть мѣсячьное свое,
49,1 посъли съльбьное свое, а гостье мѣсячьное свое; пьрвое
49,2 отъ града Кыева, и пакы ис Чьрнигова и ис
49,3 Переяславля, и прочии городы. И да
49,4 въходять въ градъ единѣми враты съ цьсаревъмь
49,5 мужьмь без оружья, 50 мужь, и да творять
49,6 куплю, якоже имъ надобѣ, и пакы да исходять.
49,7 И мужь цьсарьства вашего да хранить я,
49,8 да аще къто отъ Руси или отъ Грькъ сътворить
49,9 криво, да оправляеть то. Въходя же Русь
49,10 въ градъ, да не творять пакости и не
49,11 имѣють власти купити паволокъ лише по 50
49,12 златьникъ; и отъ тѣхъ паволокъ аще къто крьнеть,
49,13 да показаеть цьсареву мужю, и ть я запечатаеть
49,14 и дасть имъ. И отъходящи Руси
49,15 отъсюду, възимають отъ насъ, еже надобѣ брашьно
49,16 на путь, и еже надобѣ лодьямъ, якоже уставлено
49,17 есть пьрвое, и да възвращають ся съ съпасениемь
49,18 въ свою страну. И да не имѣють власти зимовати
49,19 у святаго Мамы. Аще ускочить челядинъ
49,20 отъ Руси, по ньже придуть въ страну
49,21 цьсарьствия вашего, и отъ святаго Мамы, и аще будеть обрящеть ся,
49,22 да поимуть и; аще ли не обрящеть ся, да на
49,23 роту идуть наши хрьстьяная Русь,
49,24 а не хрьстьянии по закону своему, ти тъгда възимають
49,25 отъ насъ цѣну свою, якоже уставлено есть
49,26 преже, 2 паволоцѣ за челядинъ. Аще ли къто отъ
49,27 людии цьсарства вашего, или отъ рода вашего,
49,28 или отъ инѣхъ градъ ускочить челядинъ нашь
50,1 къ вамъ, и принесеть чьто, да възвратять и
50,2 опять; а еже чьто принеслъ будеть, вьсе цѣло,
50,3 да възьмуть отъ него златьника дъва имьчьнаго. Аще ли
50,4 къто покусить ся възяти отъ Руси и отъ людии
50,5 цьсарьства вашего, иже то сътворить, покажненъ будеть
50,6 вельми; аще ли възялъ будеть, да заплатить
50,7 сугубо. Аще ли сътворить тоже Грьчинъ Русину,
50,8 да прииметь ту же казнь, якоже приялъ
50,9 есть и онъ. Аще ли ключить ся украсти Русину
50,10 отъ Грькъ чьто, или Грьчину отъ Руси, достоино
50,11 есть, да възврать е не тъчью едино, нъ
50,12 и цѣну его. Аще украденое обрящеть ся
50,13 продаемо, да въдасть цѣну его сугубу, и
50,14 тъ покажненъ будеть по закону Грьчьскому
50,15 и по уставу Грьцкому, и по закону Русьскому. И елико
50,16 хрьстьянъ отъ власти нашея плѣнена приведуть
50,17 Русь, ту аще будеть уноша или дѣвица добра,
50,18 да въдадять златьникъ 10, и поиметь и. Аще
50,19 ли есть средовѣчь, да въдасть златьникъ 8, и поиметь
50,20 и. Аще ли будетъ старъ, или дѣтищь, да
50,21 въдасть златьникъ 5. Аще ли обрящуть ся
50,22 Русь работающе у Грькъ, аще суть
50,23 плѣньници, да искупають я Русь по 10 златьникъ.
50,24 Аще ли купилъ и будетъ Грьчинъ, подъ
50,25 крьстъмь достоить ему, да възьметь цѣну,
50,26 еликоже далъ будеть на немь. О Кърсуньстѣи
50,27 странѣ. Колико же есть градъ на тои
50,28 части, да не имуть власти кънязи Русьскии,
51,1 да воюеть на тѣхъ странахъ, а та страна не
51,2 покаряеть ся вамъ, и тъгда, аще просить вои
51,3 отъ насъ кънязь Русьскыи, дамы
51,4 ему, елико ему будетъ требѣ, да воюеть. И о томь. Аще
51,5 обрящють Русь кувару Грьчьску, вывьржену
51,6 на коемь любо мѣстѣ, да не преобидять ея;
51,7 аще ли отъ нея възьметь къто чьто, или человѣка поработить
51,8 или убиеть, да будеть виньнъ закону
51,9 Русьску и Грьчьску. Аще обрящють Русь
51,10 Кърсуняны рыбы ловяща въ устьи
51,11 Дънѣпра, да не творять имъ зъла никакогоже.
51,12 И да не имѣють Русь власти зимовати въ устьи
51,13 Дънѣпра, Бѣлобережии, ни у святаго Ельферья; нъ
51,14 егда придеть осень да идуть въ домы своя,
51,15 въ Русь. А о сихъ, иже то, приходять Чьрнии
51,16 Българе, и воюють въ странѣ Кърсуньстѣи.
51,17 И велимъ кънязю Русьскому, да ихъ не пущаеть и пакостять
51,18 странѣ его. Или аще ключить ся проказа
51,19 нѣкака отъ Грькъ, сущихъ подъ властию цьсарьства
51,20 нашего, да не имате власти казнити я, нъ повелѣньемь
51,21 цьсарьства нашего да прииметь, якоже
51,22 будеть сътворилъ. Аще убиеть хрьстьянинъ Русина
51,23 или Русинъ хрьстьянина,
51,24 да дьржимъ будеть сътворивыи убииство отъ
51,25 ближьнихъ убиенаго, да убиють и. Аще ли
51,26 ускочить сътворивыи убои, и убѣжить, и аще
51,27 будеть имовитъ, да възьмуть имѣние его ближьнии
51,28 убиенаго. Аще ли есть неимовитъ сътворивыи
51,29 убииство, и ускочить, да ищють его,
52,1 доньдеже обрящеть ся, аще ли обрящеть ся, да
52,2 убиенъ будеть. Или аще ударить мечьмь или
52,3 копиемь, или кацѣмь инымъ съсудомъ Русинъ
52,4 Грьчина или Грьчинъ Русина, да того дѣля
52,5 грѣха заплатить сьребра литръ 5 по закону
52,6 Русьскому; аще ли есть неимовитъ, да како можеть,
52,7 въ толико же проданъ будеть, яко да
52,8 и пърты, въ нихъже ходить, и то съ него
52,9 съняти, а опрочи да на роту ходить по своеи
52,10 вѣрѣ, яко не имѣя ничьтоже, ти тако пущенъ
52,11 будеть. Аще ли хотѣти начьнеть наше цьсарьство отъ
52,12 васъ вои на противяща ся намъ, да пишють
52,13 къ великому кънязю вашему, и посълеть къ намъ,
52,14 елико хощемъ: и отътолѣ увѣдять иныя
52,15 страны, каку любъвь имѣють Грьци съ Русью.
52,16 Мы же съвѣщание вьсе {написахомъ | положихомъ} на
52,17 дъвою харатью, и едина харатья есть у цьсарьства
52,18 нашего, на неиже есть крьстъ и имена наша написана,
52,19 а на другои посъли ваши и гостье ваши.
52,20 А отъходяще посълъмь цьсарьства нашего, да допроводять
52,21 къ великому кънязю Русьскому Игореви
52,22 и къ людемъ его. И ти приимающе харатью, на
52,23 роту идуть хранити истину, якоже мы съвѣщахомъ
52,24 и написахомъ на харатью сию, на
52,25 неиже суть написана имена наша. Мы же,
52,26 елико насъ крьстили ся есмы, кляхомъ ся цьркъвью
52,27 святаго Илиѣ въ съборьнѣи цьркъви и предълежащи
52,28 чьстьнымь крьстъмь и харатьею сею, хранити же и вьсе,
52,29 еже есть написано на неи, не преступати отъ
53,1 того ничьтоже. А иже преступить се отъ страны
53,2 нашея, или кънязь или инъ къто, или крьщенъ или
53,3 не крьщенъ, да не имать помощи отъ Бога, и да будуть
53,4 раби въ сь вѣкъ и въ будущии, и да заколенъ
53,5 будеть своимь оружьемь. А не крьщении
53,6 Русь полагають щиты своя и мечѣ своя нагы
53,7 обручѣ своѣ и прочая оружья, и да кльнуть ся
53,8 о вьсемь, и яже суть написана на харатьи
53,9 сеи, и хранити отъ Игоря и отъ всѣхъ боляръ и отъ
53,10 вьсѣхъ людии и отъ страны Русьскыя, въ прочая лѣта
53,11 и всегда. Аще ли же къто отъ кънязь и отъ
53,12 людии Русьскыхъ, или хрьстиянъ или не хрьстиянъ, преступить
53,13 се, еже написано на харатьи сеи, и
53,14 будеть достоинъ своимь оружьемь умрети,
53,15 и да будеть клятъ отъ Бога и отъ Перуна, и яко
53,16 преступи свою клятъву. Да обаче будеть добрѣ
53,17 Игорь великыи кънязь да хранить любъвь вьсю
53,18 правую, да не раздрушить ся, доньдеже сълньце сияеть,
53,19/20 и вьсь миръ стоить, въ нынѣшьняя вѣкы и въ будущая”.
53,21 Посълании же съли Игорьмь придоша къ Игореви
53,22 съ сълы Грьчьскыми, и повѣдаша вься
53,23 рѣчи цьсаря Романа. Игорь же призъва посълы
53,24 Грьчьския, рече: “Мълвите, чьто вы казалъ цьсарь?”
53,25 И рекоша сълы цьсареви: “Се посъла ны цьсарь, радъ есть
53,26 миру, и хощеть миръ имѣти съ кънязьмъ Русьскымь
53,27 и любъвь; и твои съли водили суть цьсаря нашего
53,28 ротѣ, и насъ посълаша ротѣ водити тебе и
53,29 мужь твоихъ”. И обѣща ся Игорь сице сътворити.
54,1 И наутрия призъва Игорь сълы, и приде на хълмы,
54,2 къде стояше Перунъ; и покладоша оружия
54,3 своя и щиты и злато; и ходи Игорь ротѣ и
54,4 мужи его, и елико поганыя Руси; а хрьстьяную
54,5 Русь водиша ротѣ въ цьркъви святаго Илиѣ, яже
54,6 есть надъ ручаемь, коньць Пасынъчѣ бесѣды:
54,7 и Козарѣ. Се бо бѣ съборьная цьркы, мънози бо
54,8 бѣша Варязи хрьстьяне. Игорь же, утвьрдивъ миръ
54,9 съ Грькы, отъпусти сълы, одаривъ скорою
54,10 и челядью и воскъмь, и отъпусти я. Сълы же
54,11 придоша къ цьсареви, и повѣдаша вься рѣчи Игоревы
54,12 и любъвь, юже къ Грькомъ. Игорь же
54,13 нача къняжити въ Кыевѣ, миръ имѣя къ вьсѣмъ
54,14 странамъ. И приспѣ осень, и нача мыслити
54,15 на Деревляны, хотя примыслити большюю дань.
54,16 Въ лѣто 6453. Въ {се | то} рекоша дружина
54,17 Игореви: “Отроци Свѣнелжи изодѣли ся
54,18 суть оружьемь и пърты, а мы нази. И поиди,
54,19 къняже, съ нами въ дань, да и ты добудеши и мы”.
54,20 И послуша ихъ Игорь; иде въ Дерева въ дань.
54,21 И примышляше къ пьрвои дани, и насиляше
54,22 имъ и мужи его. И възьма дань и поиде
54,23 въ свои градъ. Идущю же ему въспять, размысливъ,
54,24 рече дружинѣ своеи: “Идѣте съ данью домови,
54,25 а язъ възвращю ся и похожю еще”. И пусти
54,26 дружину свою домови, съ малъмь же дружиною
54,27 възврати ся, желая больша имѣния.
54,28 Слышавъше же Деревляне, яко опять идеть, съдумавъше
54,29 съ кънязьмь своимь Малъмь: “Аще ся
55,1 въвадить вълкъ въ овьцѣ, то выносить вьсе стадо,
55,2 аще не убиють его; тако и сь; аще не убиемъ
55,3 его, то вься ны погубить”. И посълаша
55,4 къ нему, глаголюще: “По чьто идеши опять? Поималъ еси
55,5 вьсю дань”. И не послуша ихъ Игорь, и ишьдъше
55,6 из града Искоростѣня Деревляне, и
55,7 убиша Игоря и дружину его; бѣ бо ихъ мало.
55,8 И погребенъ бысть Игорь; и есть могила его у
55,9 Искоростѣня града въ Деревѣхъ и до сего дьне.
55,10 Ольга же бяше въ Кыевѣ съ сынъмь своимь
55,11 дѣтьскъмь Святославъмь, и кърмильць его Асмудъ,
55,12 и воевода бѣ Свѣнелдъ, тъже отьць Мьстишинъ.
55,13 Рѣша же Деревляне: “Се, кънязя Русьскаго
55,14 убихомъ; поимѣмъ жену его Ольгу за
55,15 кънязь свои Малъ, и Святослава, и сътворимъ ему,
55,16 якоже хощемъ”. И посълаша Деревляне лучьшии
55,17 мужа, числъмь 20, въ лодьи къ Ользѣ. И присташа
55,18 подъ Боричевъмь въ лодьи. Бѣ бо тъгда вода
55,19 текущи възлѣ горы Кыевьскыя, и на подольи
55,20 не сѣдяху людие, нъ на горѣ; градъ же {бѣ | бяше}
55,21 Кыевъ, идеже есть нынѣ дворъ Гърдятинъ и
55,22 Никифоровъ, а дворъ къняжь бяше въ градѣ,
55,23 иде же есть нынѣ дворъ Воротиславль и
55,24 Чюдинь, а перевѣсище бѣ вънѣ града. И бѣ вънѣ града
55,25 дворъ другыи, идеже есть дворъ Деместниковъ
55,26 за святою Богородицею, надъ горою. Бѣ бо
55,27 ту теремъ камянъ. И повѣдаша Ользѣ, яко Деревляне
55,28 придоша. И възъва я Ольга къ собѣ,
55,29 и рече имъ: “Добрѣ гостие придоша”; и рѣша Деревляне:
55,30 “Придохомъ, кънягыне”. И рече имъ Ольга: “Да
55,31 глаголете, чьто ради придосте сѣмо?” Рекоша Деревляне:
56,1 “посъла ны Деревьская земля, рекущи
56,2 сице: мужа твоего убихомъ, бяше бо мужь
56,3 твои акы вълкъ, въсхищая и грабя, а наши кънязи
56,4 добри суть, иже распасли суть Деревьскую землю,
56,5 да поиди за нашь кънязь, за Малъ”; бѣ бо ему
56,6 имя Малъ, кънязю Деревьску. Рече же имъ
56,7 Ольга: “Люба ми есть рѣчь ваша, уже мънѣ
56,8 своего мужа не крѣсити; нъ хощю вы почьстити
56,9 наутрия предъ людьми своими, а нынѣ идѣте
56,10 въ лодию свою, и лязѣте въ лодии, величающе ся;
56,11 азъ утро посълю по вы, вы же рьцѣте:
56,12 не ѣдемъ на конихъ ни пѣши идемъ, нъ понесѣте
56,13 ны въ лодии; и възнесуть вы въ лодии”. И
56,14 отъпусти я въ лодию. Ольга же повелѣ ископати
56,15 яму велику и глубоку на дворѣ теремьскомъ,
56,16 вънѣ града. И заутра Ольга, сѣдящи въ теремѣ,
56,17 посъла по гости, и придоша къ нимъ, глаголюще: “Зоветь
56,18 вы Ольга на чьсть велику”. Они же рѣша: “Не
56,19 ѣдемъ на конихъ ни на возѣхъ
56,20 идемъ, нъ понесѣте ны въ лодии”. Рѣша же Кыяне:
56,21 “Намъ неволя. Кънязь нашь убиенъ а кънягыни
56,22 наша хощеть за вашь кънязь”. И понесоша я
56,23 въ лодии. Они же сѣдяху въ перегъбѣхъ, въ великыхъ
56,24 сустугахъ гърдяще ся. И принесоша я на
56,25 дворъ къ Ользѣ, и несъше, въринуша въ
56,26 яму и съ лодиею. И приникъши Ольга, и рече
56,27 имъ: “Добра ли вы чьсть?” Они же рѣша: “Пуще
56,28 ны Игоревы съмьрти”. И повелѣ засыпати я живы,
56,29 и посыпаша я. И посълавъши Ольга къ Деревляномъ,
56,30 рече: “Да аще мя право просите,
56,31 то пришлите мужи нарочиты, да въ велицѣ чьсти
57,1 поиду за вашь кънязь, еда не пустять мене
57,2 людие Кыевьстии”. Се слышавъше Деревляне, избьраша
57,3 лучьшая мужа, иже дьржаху Деревьску
57,4 землю, и посълаша по ню. Деревляномъ
57,5 же пришьдъшемъ, повелѣ Ольга мовь сътворити,
57,6 рекущи сице: “Измывъше ся, придѣте къ мънѣ”.
57,7 Они же прежьгоша истъбу, и вълѣзоша Деревляне, и
57,8 начаша ся мыти; и запьроша мовьницу о
57,9 нихъ и повелѣ зажещи я отъ двьрии, и ту
57,10 изгорѣша вьси. И посъла къ Деревляномъ, рекущи
57,11 сице: “Се, уже иду къ вамъ, да пристроите меды
57,12 мъногы у града, идеже убисте мужа моего, да
57,13 поплачю ся надъ гробъмь его, и сътворю тризну
57,14 мужю своему”. Они же, то слышавъше, съвезоша
57,15 меды мъногы зѣло, и възвариша. Ольга же,
57,16 поимъши мало дружины, и льгъко идущи приде
57,17 къ гробу его, и плака ся по мужи своемь.
57,18 И повелѣ людьмъ съсути могылу велику,
57,19 и яко съсъпоша, повелѣ тризну творити.
57,20 Посемь сѣдоша Деревляне пити, и повелѣ
57,21 Ольга отрокомъ своимъ служити предъ ними.
57,22 И рѣша Деревляне къ Ользѣ: “Къде суть дружина
57,23 наша, ихъже посълахомъ по тя?” Она же
57,24 рече: “Идуть по мънѣ съ дружиною мужа моего”. И
57,25 яко упиша ся Деревляне, повелѣ отрокомъ своимъ
57,26 пити на ня, а сама отъиде кромѣ, и повелѣ
57,27 дружинѣ сѣщи Деревляны; и исѣкоша
57,28 ихъ 5000. А Ольга възврати ся Кыеву, и пристрои
57,29 воа на прокъ ихъ.
57,30 Начало княжения Святославля.
57,31 Въ лѣто 6454. Ольга съ сынъмь
58,1 своимь Святославъмь събьра вои мъного и храбъры,
58,2 и иде на Деревьску землю. И изидоша Деревляне
58,3 противу. И съньмъшема ся обѣма
58,4 пълкома на съкупь, суну копиемь Святославъ
58,5 на Деревляны, и копие летѣ сквозѣ уши
58,6 коневи, и удари въ ногы коневи, бѣ бо дѣтьскъ.
58,7 И рече Свѣньлдъ и Асмудъ: “Кънязь
58,8 уже почалъ; потягнѣмъ, дружино, по кънязи”. И
58,9 побѣдиша Деревляны. Деревляне же побѣгоша,
58,10 и затвориша ся въ градѣхъ своихъ. Ольга
58,11 же устрьми ся съ сынъмь своимь на Искоростѣнь
58,12 градъ, яко ти бяху убили мужа ея, и ста
58,13 около града съ сынъмь своимь, а Деревляне затвориша ся
58,14 въ градѣ, и боряху крѣпъко изъ
58,15 града, вѣдяху бо, яко сами убили кънязя и на
58,16 чьто ся предати. И стоя Ольга лѣто, и не
58,17 можаше възяти града. И умысли сице: посъла къ
58,18 граду, рекущи: “Чего хощете досѣдѣти? А вьси ваши
58,19 гради предаша ся мънѣ, и яли ся по дань, и дѣлають
58,20 нивы своя и землѣ своя, а вы хощете
58,21 гладъмь измрети, не имучи ся по дань”. Деревляне
58,22 же рекоша: “Ради быхомъ ся яли по
58,23 дань, нъ хощеши мьщати мужа своего”. Рече же
58,24 имъ Ольга, яко “Азъ уже мьстила
58,25 мужа своего, къгда придоша Кыеву, и въторое,
58,26 и третьее, къгда творяхутъ тризну мужю
58,27 моему; а уже не хощю мьщати, нъ хощю дань
58,28 имати по малу, съмиривъши ся съ вами, поиду
58,29 опять”. Рекоша же Деревляне: “Чьто хощеши
58,30 у насъ? Ради даемъ медъмь и скорою”. Она
58,31 же рече имъ: “Нынѣ у васъ нѣту меду, ни скоры,
59,1 нъ мала у васъ прошю: даите ми отъ двора по
59,2 три голуби да по три воробьи. Азъ бо не
59,3 хощю тяжькы дани възложити, якоже мужь
59,4 мои, нъ сего у васъ прошю мала; изнемогли бо ся есте
59,5 въ осадѣ, да въдаите ми се
59,6 малое”. Деревляне же, ради быша, събьраша
59,7 отъ двора по три голуби и по три воробьи, и посълаша
59,8 къ Ользѣ съ поклонъмь. Ольга же рече имъ:
59,9 “Се, уже ся есте покорили мънѣ и моему дѣтяти,
59,10 а идѣте въ градъ, а заутра отъступлю отъ
59,11 града, и поиду въ градъ свои”. Деревляне же,
59,12 ради быша, вънидоша въ градъ, и повѣдаша людьмъ,
59,13 и обрадоваша ся людие въ градѣ. Ольга
59,14 же раздая воемъ комужьдо по голуби, а другымъ
59,15 по воробьеви, и повелѣ коемужьдо
59,16 голуби и воробиеви привязывати цѣрь,
59,17 обьртываючи въ платъкы малы, нитъкою повьрзываючи
59,18 къ коемужьдо ихъ. И повелѣ
59,19 Ольга, яко съмьрче ся, пустити голуби и воробиѣ
59,20 воемъ своимъ. Голубие же и воробиеве полетѣша
59,21 въ гнѣзда своя, ови въ голубьникы, воробиеве
59,22 же подъ стрѣхы. И тако загараху ся голубьници,
59,23 {ово клѣти, ово вежѣ, ово ли | и отъ нихъ клѣти и } одрины; и
59,24 не бѣ двора, идеже не горяше; и не бѣ
59,25 льзѣ гасити, вьси бо двори възгорѣша ся. И побѣгоша
59,26 людие изъ града, и повелѣ Ольга воемъ
59,27 своимъ имати я. Яко възя градъ, и пожьже и;
59,28 старѣишины же града ижьже, и прочая люди
59,29 овѣхъ изби, а другыя работѣ предасть мужемъ
59,30 своимъ, а прокъ остави ихъ платити
60,1 дань. И възложи на ня дань тяжьку, дъвѣ
60,2 части дани идета Кыеву, а третьяя Вышегороду
60,3 къ Ользѣ; бѣ бо Вышегородъ Ольжинъ
60,4 градъ. И иде Ольга по Деревьскои земли
60,5 съ сынъмь своимь и съ дружиною, уставляющи
60,6 уставы и урокы. И суть становища ея и
60,7 ловища. И приде въ градъ свои Кыевъ съ
60,8 сынъмь своимь Святославъмь, и пребывъши лѣто едино.
60,9 Въ лѣто 6455. Иде Ольга къ Новугороду,
60,10 и устави по Мъстѣ погосты и дани, и по Лузѣ
60,11 оброкы и дани; и ловища ея суть по вьсеи
60,12 земли и знамения и мѣста и погосты; и сани
60,13 ея стоять въ Пльсковѣ и до сего дьне. И по
60,14 Дънѣпру перевѣсища и по Деснѣ, и есть село ея
60,15 Ольжичи и доселѣ. И издрядивъши, възврати ся къ
60,16 сыну своему къ Кыеву; и пребываше съ нимъ
60,17 въ любъви.
60,18 Въ лѣто 6456.
60,19 Въ лѣто 6457.
60,20 Въ лѣто 6458.
60,21 Въ лѣто 6459.
60,22 Въ лѣто 6460.
60,23 Въ лѣто 6461.
60,24 Въ лѣто 6462.
60,25 Въ лѣто 6463. Иде Ольга въ Грькы,
60,26 и приде къ Цьсарюграду. И бѣ тъгда цьсарь Костянтинъ, сынъ Леоновъ.
60,27 И приде къ нему Ольга, и видѣвъ ю
60,28 добру сущю лицьмь и съмысльну, и удививъ ся
60,29 цьсарь разуму ея, бесѣдова къ неи, и рекъ
60,30 еи: “Подобьна еси цьсарьствовати въ градѣ семъ съ нами”. Она
61,1 же, разумѣвъши, рече къ цьсарю: “Азъ погана есмь; да
61,2 аще мя хощеши крьстити, то крьсти мя самъ; аще
61,3 ли, то не крьщю ся”. И крьсти ю цьсарь съ патриархъмь.
61,4 Просвѣщена же бывъши, радоваше ся душею и
61,5 тѣлъмь. И поучи ю патриархъ о вѣрѣ, и
61,6 рече еи: “Благословена ты въ женахъ Русьскыхъ, яко възлюби
61,7 свѣть, а тьму остави; благословити тя имуть
61,8 сынове Русьстии и въ послѣдьнии родъ вънукъ твоихъ”.
61,9 И заповѣда еи о цьркъвьнѣмь уставѣ и о молитвѣ и
61,10 о постѣ и о милостыни и о въздьржании тѣла
61,11 чиста. Она же, поклонивъши главу, стояше, акы
61,12 губа напаяема, вънимающи учению. И поклонивъши ся
61,13 патриарху, глаголющи: “Молитвами твоими,
61,14 владыко, да съхранена буду отъ сѣти неприязньны”.
61,15 Бѣ же имя еи наречено въ крьщении Олена, якоже
61,16 и древьняя цьсарица, мати великаго Костянтина.
61,17 И благослови ю патриархъ, и отъпусти ю. И по крьщении
61,18 призъва ю цьсарь, и рече еи: “Хощю тя пояти
61,19 женѣ”. Она же рече: “Како мя хощеши пояти, а
61,20 крьстивъ мя самъ, и нарекъ мя дъщерь? А въ
61,21 хрьстиянѣхъ того нѣсть закона, а ты самъ вѣси”. И рече
61,22 цьсарь: “Преклюкала мя Ольга”. И въдасть еи
61,23 дары мъногы, злато и сьребро и паволокы и съсуды
61,24 разьноличьныя; и отъпусти ю, нарекъ ю дъщерь
61,25 собѣ. Она же, хотящи домови, приде къ патриарху,
61,26 благословенья просящи на домъ, и рече ему: “Людие
61,27 мои погани и сынъ мои, да бы мя Богъ съблюлъ
61,28 отъ вьсего зъла”. И рече патриархъ: “Чадо вѣрьное! Въ
61,29 Христа крьстила ся еси, и въ Христа облече ся, Христосъ
62,1 имать съхранити тя: якоже съхрани Еноха
62,2 въ пьрвыя роды, и потомь Ноя въ ковьчезѣ, Аврама
62,3 отъ Авимелеха, Лота отъ Содомлянъ, Моисѣя
62,4 отъ Фараона, Давыда отъ Саула, три отрокы
62,5 отъ пещи, Данила отъ звѣрии, тако и тя избавить
62,6 отъ неприязни и отъ сѣтии его”. И благослови ю
62,7 патриархъ. И иде съ миръмь въ землю свою, и
62,8 приде къ Кыеву. Се же бысть яко при Соломанѣ:
62,9 приде цьсарица Ефиопьская къ Соломону,
62,10 слышати хотящи премудрость Соломоню
62,11 мъногу мудрость видѣти и знаменья. Тако и си
62,12 блаженая Ольга искаше добрыѣ мудрости Божия,
62,13 нъ она человѣчьски, а си Божия. “Ищющи бо премудрости
62,14 обрящють”. “Премудрость на исходищихъ поеть ся,
62,15 на путьхъ же дьрзновение водить. На краихъ
62,16 же забральныхъ проповѣдаеть ся, въ вратѣхъ же
62,17 градьныхъ дьрзающи глаголеть. Елико бо лѣтъ незълобивии
62,18 дьржать ся по правьду”. Си бо отъ възраста
62,19 блаженая Ольга искаше мудростью, вьсего въ свѣтѣ
62,20 семь; и налѣзе бисьръ мъногоцѣньнъ, еже
62,21 есть Христосъ. Рече бо Соломонъ: “Желание благовѣрьныхъ
62,22 наслажаеть душю”; и: “Приложиши сьрдьце твое
62,23 въ разумъ”. “Азъ бо любящая мя люблю, а ищющии
62,24 мене обрящуть мя”. Ибо Господь рече: “Приходящаго
62,25 къ мънѣ не иждену вънъ”.
62,26 Си же Ольга приде къ Кыеву, якоже рѣхомъ, и присъла къ неи
62,27 цьсарь Грьчьскыи, глаголя, яко “Мъного дарихъ тя; ты
62,28 глаголаше ми, яко аще възвращю ся въ Русь,
62,29 мъногы дары посълю ти: челядь и воскъ и скору,
63,1 и воя въ помощь”. Отъвѣщавъши Ольга, и рече
63,2 къ съломъ: “Аще ты, рьци, такоже постоиши у
63,3 мене въ Почаинѣ, якоже азъ въ Суду, то тъгда
63,4 ти дамь”. И отъпусти сълы, си рекъши. Живяше
63,5 же Ольга съ сынъмь своимь Святославъмь, и учашеть
63,6 и мати крьстити ся, и не брежаше того, ни
63,7 въ уши вънимаше; нъ аще къто хотяше крьстити ся,
63,8 не браняху, нъ ругаху ся тому. Невѣрьнымъ
63,9 бо вѣра хрьстияньска уродьство есть. Не съмыслиша
63,10 бо, ни разумѣша въ тьмѣ ходящии, и не
63,11 вѣдять славы Господьня. Одебелѣша бо сьрдьца ихъ, и
63,12 ушима тяжько слышати, очима видѣти.
63,13 Рече бо Соломонъ: “Дѣтѣли нечьстивыхъ далече
63,14 отъ разума. Понеже зъвахъ вы, и не послушасте
63,15 и, простьрохъ словеса, и не вънимасте, нъ отъмѣтасте
63,16 моя съвѣты, моихъ же обличении не вънимасте.
63,17 Възненавидѣша бо премудрость, а страха Господьня
63,18 не изволиша. Ни хотяху моихъ вънимати съвѣтъ,
63,19 подражаху же моя обличения. Якоже бо
63,20 Ольга часто глаголаше: “Азъ, сыну, Бога познахъ,
63,21 и радую ся. Аще ты познаеши Бога, то радовати ся
63,22 начьнеши”. Онъ же не вънимаше того, глаголя:
63,23 “Како азъ хощю инъ законъ единъ прияти? А дружина
63,24 моя сему смѣяти ся начьнуть”. Она же
63,25 рече ему: “Аще ты крьстиши ся, вьси имуть тоже
63,26 творити”. Онъ же не послуша матере; и творяше
63,27 нравы поганьскыя, не вѣды, аще къто матере
63,28 не слушаеть, въ бѣду въпадаеть, якоже рече:
63,29 “Аще къто отьца или матере не послушаеть,
64,1 съмьртию да умреть. Сь же къ тому гнѣваше ся на
64,2 матерь. Соломонъ бо рече: Кажа зълыя приемлеть
64,3 собѣ досаженье, обличая нечьстиваго поречеть
64,4 себе; обличения бо нечьстивымъ мозолие имъ
64,5 суть. Не обличаи зълыхъ, да не възненавидять
64,6 тебе. Нъ обаче любяше Ольга сына своего
64,7 Святослава, рекущи: “Воля Божия да будеть; аще
64,8 Богъ въсхощеть помиловати рода моего и землѣ Русьскыѣ,
64,9 да възложить имъ на сьрдьце обратити ся къ
64,10 Богу, якоже и мънѣ Богъ дарова”. И се рекъши, моляше ся
64,11 за сына и за люди по вься дьни и нощи,
64,12 кърмящи сына своего до мужьства его и до
64,13 въздраста его.
64,14 Въ лѣто 6464.
64,15 Въ лѣто 6465.
64,16 Въ лѣто 6466.
64,17 Въ лѣто 6467.
64,18 Въ лѣто 6468.
64,19 Въ лѣто 6469.
64,20 Въ лѣто 6470.
64,21 Въ лѣто 6471.
64,22 Въ лѣто 6472. Кънязю Святославу въздрастъшю
64,23 и възмужавъшю, нача воя съвъкупляти
64,24 мъногы и храбъры; и льгъко ходя, акы пардусъ,
64,25 воины мъногы творяше; ходя, возъ по собѣ не
64,26 возяше, ни котьла, ни мясъ варя, нъ потънъку
64,27 издрѣзавъ конину или звѣрину или говядину,
64,28 на угъльхъ испекъ, ядяше. Ни шатьра имѣяше,
64,29 нъ подъкладъ постилаше, а сѣдьло въ головахъ;
65,1 такоже и прочии вои его вьси бяху. И посылаше
65,2 къ странамъ, глаголя: “Хочю на вы ити”. И иде
65,3 на Оку рѣку и на Вългу, и налѣзе Вятичѣ, и рече
65,4 Вятичемъ: “Кому дань даете?” Они же рѣша: “Козаромъ
65,5 по щьлягу отъ рала даемъ”.
65,6 Въ лѣто 6473. Иде Святославъ на Козары.
65,7 Слышавъше же Козаре, изидоша противу съ
65,8 кънязьмь своимь Каганъмь, и съступиша ся битъ,
65,9 и бывъши брани, одолѣ Святославъ Козаромъ,
65,10 и градъ ихъ Бѣлу Вежю възя. И Ясы побѣди
65,11 и Касогы.
65,12 Въ лѣто 6474. Побѣди Вятичѣ Святославъ, и
65,13 дань на ня възложи.
65,14 Въ лѣто 6475. Иде Святославъ на Дунаи
65,15 на Българы. И бивъшемъ ся обоимъ,
65,16 одолѣ Святославъ Българомъ, и възя городъ
65,17 80 по Дунаю, и сѣде къняжа ту, въ Переяславьци,
65,18 емля дань на Грьцѣхъ.
65,19 Въ лѣто 6476. Придоша Печенѣзи на
65,20 Русьску землю пьрвое, а Святославъ бяше въ Переяславьци.
65,21 И затвори ся Ольга въ градѣ съ
65,22 вънукы своими, съ Яропълкъмь и Ольгъмь и
65,23 Володимиръмь, въ градѣ Кыевѣ. И оступиша
65,24 Печенѣзи градъ въ силѣ {велицѣ | тяжьцѣ}, бещисльно
65,25 мъножьство около града; и не бѣ льзѣ из
65,26 града вылѣсти, ни вѣсти посълати; изнемагаху
65,27 людие гладъмь и водою. Събьравъше ся людье
65,28 оноя страны Дънѣпра въ лодияхъ, об ону
65,29 страну стояху, и не бѣ льзѣ вънити въ Кыевъ
65,30 ни единому ихъ, ни из града къ онѣмъ. И
66,1 въстужиша людие въ градѣ, и рѣша: “Нѣсть ли
66,2 кого, иже бы моглъ на ону страну доити;
66,3 аще не приступите утро предати ся
66,4 имамъ Печенѣгомъ?” И рече единъ отрокъ: “Азъ
66,5a преиду”. И реша:
66,5b “Иди”. Онъ же изиде из града
66,6 съ уздою, и ристаше сквозѣ Печенѣгы, глаголя: “Не
66,7 видѣ ли коня никътоже?” Бѣ бо умѣя Печенѣжьскы,
66,8 и мьняхуть и своихъ. И яко приближи ся
66,9 къ рѣцѣ, съвьргъ пърты, суну ся въ
66,10 Дънѣпръ, и побрьде. Видѣвъше же Печенѣзи, устрьмиша ся
66,11 на нь, стрѣляюще его, и не могоша
66,12 ему ничьтоже сътворити. Они же, видѣвъше съ оноя
66,13 страны, приѣхавъше въ лодии противу ему,
66,14 възяша и въ лодию, и привезоша и къ дружинѣ.
66,15 И рече имъ: “Аще не подъступите заутра
66,16 къ граду, предати ся хотять людие Печенѣгомъ”.
66,17 Рече же воевода ихъ, именьмь Претичь: “Подъступимъ
66,18 заутра въ лодьяхъ, и попадъше кънягыню и
66,19 къняжичѣ, умъчимъ на сю страну. Аще ли сего не
66,20 сътворимъ, погубити ны имать Святославъ”. Яко
66,21 бысть заутра, въсѣдъше въ лодия противу свѣту,
66,22 въструбиша вельми, и людие въ градѣ кликоша;
66,23 Печенѣзи же, мьнѣвъше кънязя пришьдъша,
66,24 побѣгоша разьно отъ града. И изиде Ольга съ
66,25 вънукы и съ людьми къ лодиямъ. Видѣвъ же
66,26 кънязь Печенѣжьскыи, възврати ся единъ къ воеводѣ
66,27 Претичю, и рече: “Къто се приде?” И рече ему:
66,28 “Людие оноя страны”. И рече кънязь Печенѣжьскыи:
66,29 “А ты кънязь ли еси?” Онъ же рече: “Азъ есмь
66,30 мужь его, и пришьлъ есмь въ сторожихъ, а
67,1 по мънѣ идеть вои съ кънязьмь, бещисленое
67,2 мъножьство”. Се же рече, грозя имъ. Рече кънязь
67,3 Печенѣжьскыи Прѣтичю: “Буди ми другъ”. Онъ
67,4 же рече: “Тако буди”. Подаста руку межю собою;
67,5 и въдасть Печенѣжьскыи кънязь Прѣтичю конь,
67,6 саблю, стрѣлы; онъ же дасть ему брънѣ,
67,7 щитъ, мечь. И отъступиша Печенѣзи отъ града,
67,8 и не бяше льзѣ коня напоити на Лыбеди Печенѣгы.
67,9 И посълаша Кыяне къ Святославу, глаголюще: “Ты,
67,10 къняже, чюжея земли ищеши и блюдеши, а своея
67,11 ся охабивъ; малы бо насъ не възяша Печенѣзи,
67,12 и матерь твою и дѣти твоихъ. Аще не придеши,
67,13 ни обраниши насъ, да пакы ны възьмуть.
67,14 Аще ти не жаль отьчины своея и матере, стары
67,15 суща, и дѣтии своихъ?” То слышавъ Святославъ,
67,16 въбързѣ въсѣдъ на конѣ съ дружиною своею, и
67,17 приде Кыеву, и цѣлова матерь свою и дѣти своя,
67,18 съжали ся о бывъшимь отъ Печенѣгъ. И събьра
67,19 вои, и прогъна Печенѣгы въ поле. И бысть мирьно.
67,20 Въ лѣто 6477. Рече Святославъ къ матери
67,21 своеи и къ боляромъ своимъ: “Не любо ми есть
67,22 въ Кыевѣ {быти | жити}, хощю жити въ Переяславьци въ
67,23 Дунаи, яко то есть среда земли моеи,
67,24 яко ту вься благая съходять ся: отъ Грькъ паволокы,
67,25 злато, вино и овощи разьноличьнии,
67,26 и Щехъ и из Угъръ сьребро и комони,
67,27 из Руси же скора и воскъ и медъ и челядь”. И рече
67,28 ему мати: “Видиши мя больну сущю. Камо хощеши
67,29 отъ мене ити?” Бѣ бо разболѣла ся уже; рече
68,1 же ему: “Погребъ мя, иди, яможе хощеши”.
68,2 По трьхъ дьньхъ умьре Ольга. И плака ся по неи сынъ
68,3 ея и вънуци ея и людие вьси плачьмь великъмь.
68,4 и несъше, погребоша ю на мѣстѣ. И бѣ
68,5 заповѣдала Ольга не творити тризны надъ собою,
68,6 бѣ бо имущи презвутеръ, и тъ похорони
68,7 блаженую Ольгу. Си бысть предътекущия хрьстьяньстѣи
68,8 земли, акы дьньница предъ сълньцьмь
68,9 акы заря предъ свѣтъмь. Си бо сияше, акы
68,10 луна въ нощи; тако си въ невѣрьныхъ человѣцѣхъ
68,11 свѣтящи ся акы бисьръ въ калѣ; кальни бо бѣша
68,12 грѣхъмь, не омъвени святымь крьщениемь. Си бо омы ся
68,13 купѣлью святою. Съвлече ся грѣховьныя одежа
68,14 ветъхаго человѣка Адама, и въ новыи Адамъ облече ся,
68,15 еже есть Христосъ. Мы же рьцѣмъ къ неи: радуи ся,
68,16 Русьское познание къ Богу, начатъкъ примирению
68,17 быхомъ. Си пьрвое
68,18 въниде въ цьсарьство небесьное отъ Руси; сию бо хвалять
68,19 Русьстии сынове акы начальницю, ибо по съмьрти моляше
68,20 Богу за Русь. Правьдьныхъ бо душа не умирають.
68,21 Якоже рече Соломонъ: “Похвала правьдьному,
68,22 възвеселять ся людие, бесъсмьртие бо есть память
68,23 его, яко отъ Бога познаваеть ся и отъ человѣкъ”. Се бо
68,24 вьси человѣци прославляють, видяще лежащю
68,25 въ тѣлѣ за мънога лѣта. Рече бо пророкъ: “Прославляющая
68,26 мя прославлю”. О сяковыхъ бо Давыдъ
68,27 глаголаше: “Въ память вѣчьную будеть правьдьникъ, отъ
68,28 слуха зъла не убоить ся. Готово сьрдьце его упъвати
68,29 на Господа: утвьрди ся сьрдьце его, и не подвижить ся”.
69,1 Соломонъ бо рече: “Правьдьници въ вѣкы
69,2 живуть, и отъ Господа мьзда имь есть и строение отъ
69,3 Вышьняго. Сего ради приимуть цьсарьствие красотѣ и
69,4 вѣньць добротѣ отъ рукы Господьня. Яко десницею покрыеть
69,5 я, и мышьцею защитить я”. Защитилъ
69,6 бо есть сию блаженую Ольгу отъ противьника и супостата
69,7 диявола.
69,8 Въ лѣто 6478. Святославъ посади Яропълка
69,9 въ Кыевѣ, а Ольга въ Деревѣхъ. Въ сеже время
69,10 придоша людие Новъгородьстии, просяще кънязя
69,11 собѣ: “Аще не поидете къ намъ, то налѣземъ кънязя
69,12 себѣ”. И рече къ нимъ Святославъ: “А бы шьлъ къто
69,13 къ вамъ.” И отъпьрѣ ся Яропълкъ и Ольгъ. И рече
69,14 Добрыня: “Просите Володимира”. Володимиръ бо
69,15 бѣ отъ Малушѣ, милостьницѣ Ольжины; сестра же
69,16 бѣ Добрыня, отьць же бѣ има Малъко Любьчанинъ,
69,17 и бѣ Добрыня уи Володимиру. И
69,18 рѣша Новъгородьци Святославу: “Въдаи ны Володимира”.
69,19 Онъ же рече: “Ото вы есть”. И
69,20 пояша Новъгородьци Володимира къ себѣ. И иде
69,21 Володимиръ съ Добрынею, уемь своимь,
69,22 къ Новугороду, а Святославъ къ Переяславьцю.
69,23 Въ лѣто 6479. Приде Святославъ къ Переяславьцю,
69,24 и затвориша ся Българе въ градѣ. И
69,25 излѣзоша Българе на сѣчю противу Святославу, и
69,26 бысть сѣча велика, и одаляху Българе. И рече
69,27 Святославъ воемъ своимъ: “Уже намъ сьде пасти;
69,28 потягнѣмъ мужьскы, братие и дружино!” И
69,29 къ вечеру одолѣ Святославъ, и възя градъ копиемь.
69,30 И посъла къ Грькомъ, глаголя: “Хощю на вы ити и
69,31 възяти градъ вашь, яко и сии”. И рекоша Грьци:
69,32 “Мы недужи противу вамъ стати, нъ възьми дань
70,1 на насъ, и на дружину свою; и повѣжьте ны,
70,2 колико васъ, да въдамъ по числу на главы”. Се
70,3 же рѣша Грьци, льстяще подъ Русию, суть бо
70,4 Грьци льстиви и до сего дьне. И рече Святославъ:
70,5 “Есть насъ 20 тысящь”; и прирече
70,6 10 тысящь,
70,7 бѣ бо Руси 10 тысящь толико. И пристроиша
70,8 Грьци 100 тысящь на Святослава, и не
70,9 даша дани. И поиде Святославъ на Грькы, и изидоша
70,10 противу Руси. Видѣвъше же Русь, убояша ся
70,11 зѣло мъножьства вои. И рече Святославъ:
70,12 “Уже намъ нѣкамо ся дѣти. Волею и неволею
70,13 стати противу. Да не посрамимъ землѣ Русьскыѣ,
70,14 нъ лязѣмъ костию ту. Мьртвыи бо срама
70,15 не имать. Аще ли побѣгнемъ, срамъ имамъ. И
70,16 не имамъ убѣжати, нъ станѣмъ крѣпъко, азъ же
70,17 предъ вами поиду. Аще моя глава ляжеть, то
70,18 промыслите о собѣ”. И рѣша вои: “Идеже глава
70,19 твоя, ту и главы наша съложимъ”. И испълчиша ся
70,20a Русь, и Грьци противу; и съразиста ся пълка; и оступиша Грьци
70,20b Русь. И бысть сѣча велика, и одолѣ Святославъ, и
70,21 Грьци побѣгоша. И поиде Святославъ къ граду,
70,22 воюя, и грады разбивая, иже стоять и до
70,23 дьньшьняго дьне. И съзъва цьсарь въ полату
70,24 бояры своя, и рече имъ: “Чьто сътворимъ, яко не можемъ
70,25 противу ему стати”? И рѣша ему бояре:
70,26 “Посъли къ нему дары; искусимъ и, любьзнивъ ли
70,27 есть злату ли паволокамъ”? И посъла къ нему
70,28 злато и паволокы и мужа мудры, рѣша ему:
70,29 “Глядаи възора его и лица его и съмысла его”. Онъ
70,30 же, възьмъ дары, приде къ Святославу. И повѣдаша
70,31 Святославу, яко придоша Грьци съ поклонъмь.
70,32 И рече: “Въведѣте я сѣмо”. И придоша, и поклониша ся
71,1 ему, и положиша предъ нимь злато
71,2 и паволокы. И рече Святославъ, кромѣ зьря: отрокомъ
71,3 своимъ: “Съхраните”. Они же придоша ко
71,4 цьсарю. И съзъва цьсарь бояры. Рѣша же посълании,
71,5 яко “Придохомъ къ нему, и въдахомъ дары, и не
71,6 позьрѣ на ня, и повелѣ съхранити”. И рече единъ:
71,7 “Искуси и еще, посъли ему оружие”. Онъ же послуша
71,8 его; и посълаша ему мечь и ино
71,9 оружье, и принесоша ему. Онъ же, приимъ,
71,10 нача любити и хвалити, и цѣловати цьсаря. И придоша
71,11 опять къ цьсарю, и повѣдаша вься
71,12 бывъшая. И рѣша бояре: “Лютъ сь мужь хощеть
71,13 быти, яко имѣния не брежеть, а оружие емлеть;
71,14 ими ся по дань”. И посъла цьсарь, глаголя сице:
71,15 “Не ходи къ граду, нъ възьми дань, еже хощеши”;
71,16 за малъмь бо бѣ не шьлъ Цьсарюграду. И въдаша
71,17 ему дань; имашеть же и за убиеныя, глаголя,
71,18 яко “Родъ его възьметь”. Възя же и дары мъногы, и
71,19 възврати ся въ Переяславьць съ похвалою великою.
71,20 Видѣвъ же мало дружины своея, рече
71,21 въ собѣ: “Еда како, прельстивъше, изъбиють дружину
71,22 мою и мене”; бѣша бо мънози погыбли на пълку. И
71,23 рече: “Поиду въ Русь, и приведу боле дружины”. И
71,24 посъла сълы къ цьсареви въ Дерестръ, бѣ бо
71,25 ту цьсарь, река сице: “Хочю имѣти миръ съ тобою
71,26 твьрдъ и любъвь”. Се же слышавъ, радъ
71,27 бысть, и посъла дары къ нему больша пьрвыхъ. Святославъ
71,28 же прия дары, и поча думати съ дружиною
71,29 своею, река сице: “Аще не сътворимъ мира съ
72,1 цьсарьмь, а увѣсть цьсарь, яко мало насъ есть, пришьдъше,
72,2 оступять ны въ градѣ; а Русьская
72,3 земля далече, а Печенѣзи съ нами ратьни, а къто
72,4 ны поможеть? Нъ сътворимъ миръ съ цьсарьмь, се бо
72,5 ны ся по дань ялъ, и то буди довъльно намъ.
72,6 Аще ли почьнеть не управляти дани, то изнова
72,7 из Руси, съвъкупивъше воя мъножаиша, поидемъ къ
72,8 Цьсарюграду.” И люба бысть рѣчь си дружинѣ, и посълаша
72,9 лѣпшии мужы къ цьсареви. И придоша въ
72,10 Дерестръ, и повѣдаша цьсареви. Цьсарь же наутрия
72,11 призъва я, и рече цьсарь: “Да глаголють съли Русьстии”.
72,12 Они же рѣша: “Тако глаголеть кънязь нашь: хощю
72,13 имѣти любъвь съ цьсарьмь Грьцьскымь съвьршеную
72,14 прочая вься лѣта”. Цьсарь же, радъ бывъ, повелѣ
72,15 письцю писати на харатью вься рѣчи Святославля.
72,16 Начаша глаголати съли вься рѣчи, и нача письць
72,17 писати, глаголя сице:
72,18 “Равьно другаго съвѣщания, бывъшаго при Святославѣ,
72,19 велицѣмь кънязи Русьстѣмь, и при Свѣналъдѣ,
72,20 писано при Феофилѣ синкелѣ,
72,21 къ Иоанну, нарицаемому Цимьскию, цьсарю Грьцьскому,
72,22 въ Дерестрѣ, мѣсяца июлия, индикта
72,23 14, въ лѣто 6479.
72,24 Азъ Святославъ, кънязь Русьскыи, якоже кляхъ ся,
72,25 и утвьржаю на съвѣщании семь роту свою: хощю
72,26 имѣти миръ и съвьршену любъвь съ вьсякимь, и
72,27 великымь цьсарьмь Грьцьскымь, и съ Васильемь и
72,28 Костянтинъмь, и съ богодъхновеными цьсари, и съ
72,29 вьсѣми людьми вашими, иже суть подъ мъною
73,1 Русь, боляре и прочии, до коньца вѣка. Яко николиже
73,2 помышляю на страну вашю, ни събираю
73,3 людии, ни языка иного приведу на страну
73,4 вашю, и елико есть подъ властью Грьчьскою,
73,5 ни на власть Кърсуньскую, и елико есть градовъ
73,6 ихъ, ни на страну Българьскую. Да аще
73,7 инъ къто помыслить на страну вашю, да азъ
73,8 буду противьнъ ему, и борю ся съ нимь. Якоже
73,9 кляхъ ся къ цьсаремъ Грьчьскымъ, и съ мъною боляре
73,10 и Русь вься, да хранимъ правая съвѣщанья.
73,11 Аще ли отъ тѣхъ самѣхъ прежереченыхъ
73,12 не хранимъ, азъ же и съ мъною и подъ
73,13 мъною, да имѣемъ клятву отъ боговъ, въ негоже
73,14 вѣруемъ, въ Перуна и въ Волоса, бога скотия,
73,15 да будемъ злати, яко злато се, и своимь
73,16 оружьемь да исѣчени будемъ. Се же имѣите
73,17 въ истину, якоже сътворихъ нынѣ къ вамъ, и
73,18 написахъ на харатьи сеи, и своими печатьми
73,19 запечатахомъ.
73,20 Сътворивъ же миръ Святославъ съ Грькы, и поиде
73,21 въ лодияхъ къ порогомъ. И рече ему воевода отьнь
73,22 Свѣналдъ: “Поиди, къняже, на конихъ около,
73,23 стоять бо Печенѣзи въ порозѣхъ”. И не послуша его,
73,24 и поиде въ лодияхъ. Посълаша Переяславьци къ
73,25 Печенѣгомъ, глаголюще: “Идеть Святославъ
73,26 въ Русь, възьмъ имѣнье мъного у Грькъ и полонъ
73,27 бещисльнъ, съ малъмь дружины”. Слышавъше
73,28 же се Печенѣзи, заступиша порогы. И приде
73,29 Святославъ къ порогомъ, и не бѣ льзѣ проити порогъ.
73,30 И ста зимовати въ Бѣлобережьи. И не бѣ
73,31 у нихъ брашьна, и бѣ гладъ великъ, яко
74,1 по полугривьнѣ глава коняча. И зимова Святославъ
74,2 ту.
74,3 Веснѣ же приспѣвъши, поиде Святославъ въ порогы.
74,4 Въ лѣто 6480 приде Святославъ въ порогы, и нападе на нь
74,5 Куря, кънязь Печенѣжьскыи; и убиша Святослава.
74,6 И възяша главу его, и въ лъбѣ его съдѣлаша
74,7 чашю, оковавъше лъбъ его, и пияху въ немь.
74,8 Свѣналдъ же приде къ Кыеву къ Яропълку. И бысть вьсѣхъ
74,9 лѣтъ къняжения Святославля 28.
74,10 Въ лѣто 6481. Нача къняжити Яропълкъ.
74,11 Въ лѣто 6482.
74,12 Въ лѣто 6483. Ловы дѣющю Свѣналъдичю,
74,13 именьмь Лютъ; ишьдъ бо ис Кыева, гъна по
74,14 звѣри въ лѣсѣ. И узьрѣ и Ольгъ, и рече: “Къто сь
74,15 есть?” И рѣша ему: “Свѣналдичь”. И заѣхавъ, уби
74,16 и, бѣ бо ловы дѣя Ольгъ. И о томь бысть
74,17 межю има ненависть, Яропълку на Ольга,
74,18 и мълвяше вьсьгда Яропълку Свѣналдъ: “Поиди
74,19 на брата своего, и приимеши власть его”, хотя
74,20 отъмьстити сыну своему.
74,21 В лѣто 6484.
74,22 В лѣто 6485. Поиде Яропълкъ на
74,23 Ольга, брата своего, на Деревьску землю. И
74,24 изиде противу ему Ольгъ, и опълчиста ся. И съразивъшима ся
74,25 пълкома, побѣди Яропълкъ Ольга.
74,26 Побѣгъшю же Ольгу съ вои своими въ
74,27 градъ, рекомыи Вьручии, и бяше мостъ чресъ греблю
74,28 къ вратомъ градьнымъ, тѣснячи ся
74,29 другъ друга съпихаху въ греблю; и съпьхнуша
74,30 Ольга съ мосту въ дьбрь. И падаху людие мънози,
74,31 и удавиша и кони и человѣци. И въшьдъ Яропълкъ
75,1 въ градъ Ольговъ, прея власть его. И посъла
75,2 искати брата своего. И искавъше его, не
75,3 обрѣтоша. И рече единъ Деревлянинъ: “Азъ видѣхъ
75,4 вьчера, яко съпьхнуша и съ моста”. И посъла Яропълкъ
75,5 искати. И влачиша трупие из
75,6 гребля отъ утра и до полудьне, и налѣзоша
75,7 исподи Ольга подъ трупиемь. И вынесъше, положиша
75,8 и на ковьрѣ. И приде Яропълкъ надъ
75,9 нь, и плака ся, и рече Свѣналъду: “Вижь иже ты
75,10 сего хотяше”. И погребоша Ольга на мѣстѣ
75,11 у града Вьручего, и есть могыла его у Вьручего
75,12 и до сего дьне. И прея власть его Яропълкъ.
75,13 У Яропълка жена Грькыни бѣ, и бяше
75,14 была чьрницею, юже бѣ привелъ отьць его
75,15 Святославъ, и въда ю за Яропълка, красоты ради
75,16 лица ея. Слышавъ же се Володимиръ въ Новѣгородѣ,
75,17 яко Яропълкъ уби Ольга, убоявъ ся,
75,18 бѣжа за море. А Яропълкъ посади посадьникы
75,19 своя въ Новѣгородѣ, и бѣ владѣя единъ
75,20 въ Руси.
75,21 Въ лѣто 6486.
75,22 Въ лѣто 6487.
75,23 Въ лѣто 6488. Приде Володимиръ съ
75,24 Варягы Новугороду, и рече посадьникомъ Яропълчемъ:
75,25 “Идѣте къ брату моему, и рьцѣте ему:
75,26 Володимиръ идеть на тя, пристраиваи ся
75,27 противу битъ ся”. И сѣде въ Новѣгородѣ.
75,28 И посъла къ Рогъволоду Полотьску, глаголя: “Хощю
75,29 пояти дъщерь твою женѣ”. Онъ же рече
75,30 дъщери своеи: “Хощеши ли за Володимира?” Она
76,1 же рече: “Не хощю розути робичича, нъ Яропълка
76,2 хощю”. Бѣ бо Рогъволодъ пришьлъ изъ замория, и
76,3 имѣяше власть свою Полотьскѣ, а Туры Туровѣ,
76,4 отъ негоже и Туровьци прозъваша ся. И
76,5 придоша отроци Володимири, и повѣдаша
76,6 ему вьсю рѣчь Рогънѣдину, дъщере Рогъволожѣ,
76,7 кънязя Полотьскаго. Володимиръ же
76,8 събьра воя мъногы: Варягы и Словѣны, Чюдь и
76,9 Кривичѣ, и поиде на Рогъволода. Въ сеже время
76,10 хотяху вести Рогънѣдь за Яропълка. И приде
76,11 Володимиръ на Полотьскъ, и уби Рогъволода
76,12 и сына его дъва, а дъщерь Рогънѣдь поя женѣ. И поиде
76,13 на Яропълка. И приде Володимиръ къ Кыеву съ
76,14 вои мъногы. И не може Яропълкъ стати противу,
76,15 и затвори ся въ Кыевѣ съ людьми своими и
76,16 съ Блудъмь. И стояше Володимиръ, обрывъ ся
76,17 на Дорогожичи, межю Дорогожичьмь
76,18 и Капичьмь; и есть ровъ и до сего дьне. Володимиръ
76,19 же посъла къ Блуду, воеводѣ Яропълчю, съ
76,20 льстию, глаголя: “Поприяи ми; аще убию брата своего,
76,21 имѣти тя начьну въ отьца мѣсто; и мъногу чьсть
76,22 възьмеши отъ мене; не азъ бо почалъ братию
76,23 бити, нъ онъ; азъ же того убояхъ ся, придохъ
76,24 на нь”. И рече Блудъ къ посъланымъ Володимиръмь:
76,25 “Азъ буду тобѣ въ сьрдьце и въ приязньство”.
76,26 О зълая льсть человѣчьска! Якоже Давыдъ глаголеть: “Ядыи
76,27 хлѣбъ мои възвеличилъ есть на мя льсть”. Сь
76,28 бо луковаше на кънязя своего льстию. И
76,29 пакы: “Языкы своими льщаху. Суди имъ,
76,30 Боже, да отъпадуть отъ мыслии своихъ; по мъножьству
77,1 нечьстья ихъ изрини я, яко прогнѣваша тя,
77,2 Господи”. И пакы тъже рече Давыдъ: “Мужи кръве и
77,3 льсти не преполовять дьнии своихъ”. Сь есть съвѣтъ
77,4 зълъ, иже съвѣщевають на кръвопролитие; то
77,5 суть неистовии, иже приимъше отъ кънязя или отъ
77,6 господина своего чьсть или дары, ти мыслять о
77,7 главѣ кънязя своего на погубление; горьше
77,8 суть бѣсовъ таковии. Якоже и Блудъ предасть
77,9 кънязя своего, приимъ отъ него чьсти мъногы;
77,10 сь бо бысть повиньнъ кръви тои. Сь бо Блудъ, затворивъ ся
77,11 съ Яропълкъмь, сълаше
77,12 къ Володимиру часто, веля ему приступати къ
77,13 граду бранию, а самъ мысля убити Яропълка.
77,14 Гражаны же не бѣ льзѣ убити его.
77,15 Блудъ же, не възмогъ, како бы погубити, замысли
77,16 льстию, веля ему не излазити на
77,17 брань изъ града. Рече же Блудъ Яропълку:
77,18 “Кыяне сълють ся къ Володимиру, глаголюще: Приступаи
77,19 къ граду, яко предамы ти Яропълка;
77,20 побѣгни из града”. И послуша его Яропълкъ,
77,21 и избѣгъ, прешьдъ, затвори ся въ градѣ
77,22 Родьни на усть Ръси; а Володимиръ
77,23 въниде въ Кыевъ. И осѣдяху Яропълка въ Родьни. И
77,24 бѣ гладъ великъ въ немь, и есть притъча и до
77,25 сего дьне: бѣда акы въ Родьни. И рече Блудъ Яропълку:
77,26 “Видиши ли, колико вои у брата твоего? Нама
77,27 ихъ не перебороти. Твори миръ съ братъмь
77,28 своимь”; льстя подъ нимъ, се рече. И рече Яропълкъ:
77,29 “тако буди”. И посъла Блудъ къ Володимиру,
78,1 сице глаголя, яко “Събысть ся мысль твоя,
78,2 яко приведу Яропълка къ тебѣ, и пристрои
78,3 убити и”. Володимиръ же, то слышавъ,
78,4 въшьдъ въ дворъ теремьныи отьнь, о немьже
78,5 преже съказахомъ, сѣде ту съ вои и съ дружиною
78,6 своею. И рече Блудъ Яропълку: “Поиди къ
78,7 брату своему и рьци ему: чьто ми ни въдаси, то
78,8 азъ прииму”. Поиде же Яропълкъ, и рече
78,9 ему Варяжько: “Не ходи, къняже, убиють тя; побѣгни
78,10 въ Печенѣгы, и приведеши вои”. И не
78,11 послуша его. И приде Яропълкъ къ Володимиру;
78,12 яко полѣзе въ двьри, подъяста и дъва Варяга
78,13 мечема подъ пазусѣ. Блудъ же затвори
78,14 двьри, и не дасть по немъ вънити своимъ. И тако
78,15 убиенъ бысть Яропълкъ. Варяжько же, видѣвъ,
78,16 яко убьенъ бысть Яропълкъ, бѣжа съ двора въ Печенѣгы,
78,17 и мъного воева съ Печенѣгы на Володимира, и
78,18 одъва приваби и, заходивъ къ нему
78,19 ротѣ. Володимиръ же залеже жену братьню,
78,20 Грькыню, и бѣ непраздьна, отъ неяже роди Святопълка.
78,21 Отъ грѣховьнаго бо корене зълъ плодъ
78,22 бываеть, понеже была бѣ мати его чьрницею,
78,23 а въторое Володимиръ залеже ю не по браку; прелюбодѣичищь
78,24 убо бысть; тѣмь и отьць его не любяше,
78,25 бѣ бо отъ дъвою отьцю, отъ Яропълка и отъ
78,26 Володимира. Посемь рѣша Варязи Володимиру:
78,27 “Сь градъ нашь, и мы прияхомъ и; да хощемъ
78,28 имати окупъ на нихъ, по дъвѣ гривьнѣ отъ человѣка”.
78,29 И рече имъ Володимиръ: “Пожьдѣте, даже вы куны съберуть,
79,1 за мѣсяць”. И жьдаша за мѣсяць, и не дасть
79,2 имъ. И рѣша Варязи: “Съльстилъ еси нами, да покажи
79,3 ны путь въ Грькы”. Онъ же рече имъ: “Идѣте”.
79,4 И избьра отъ нихъ мужа добры и съмысльны и храбры,
79,5 и раздая имъ грады; прочии же идоша Цьсарюграду.
79,6 И посъла предъ ними сълы, глаголя сице
79,7 цьсарю: “Се идуть къ тебѣ Варязи, не мози ихъ дьржати
79,8 въ градѣ, или то сътворять ти {зъло | въ градѣ}, яко и сьде;
79,9/10 нъ расточи я разьно, а сѣмо не пущаи ни единого”.
79,11 И нача къняжити Володимиръ въ Кыевѣ единъ,
79,12 и постави кумиры на хълму, вънѣ двора теремьнаго:
79,13 Перуна древяна, а главу его сьребряну, а
79,14 усъ златъ, и Хърса и Дажьбога и Стрибога и
79,15 Сѣмарьгла и Мокошь. И жьряху имъ, наричюще
79,16 я богы, и привожаху сыны своя и
79,17 дъщери, и жьряху бѣсомъ. И осквьрняху землю
79,18 требами своими; и осквьрни ся кръвьми земля
79,19 Русьская и хълмъ тъ. Нъ преблагыи Богъ не хотя
79,20 съмьрти грѣшьникомъ, на томь хълмѣ нынѣ цьркы
79,21 есть святаго Василия, якоже послѣди
79,22 съкажемъ. Мы же на предьнее възвратимъ ся. Володимиръ
79,23 же посади Добрыню, уя своего, въ Новѣгородѣ.
79,24 И пришьдъ Добрыня Новугороду, постави
79,25 кумира надъ рѣкою Вълховъмь; и жьряху
79,26 ему людие новъгородьстии акы Богу. Бѣ же
79,27 Володимиръ побѣженъ похотию женьскою; и
79,28 быша ему водимыя: Рогънѣдь, юже посади на
80,1 Лыбеди, идеже есть ныне сельце Предъславино.
80,2 Отъ неяже роди 4 сыны: Изяслава,
80,3 Мьстислава, Ярослава, Вьсеволода и дъвѣ дъщери;
80,4 отъ Грькынѣ, Святопълка; отъ Чехынѣ, Вышеслава;
80,5 а отъ другыя, Святослава и Мьстислава; а отъ
80,6 Българынѣ, Бориса и Глѣба. И наложьниць
80,7 у него 300 Вышегородѣ, а 300 Бѣлѣгородѣ,
80,8 а 200 на Берестовѣ, въ сельци, еже
80,9 зовуть ныне Берестовое. И бѣ несыть блуда,
80,10 приводя къ себѣ мужьскыя жены, и дѣвици
80,11 растьляя, бѣ бо женолюбьць, яко и Соломонъ.
80,12 Бѣ бо, рече, у Соломона женъ 700, а
80,13 наложьниць 300. Мудръ же бѣ, а на коньць погыбе.
80,14 Сь же бѣ невѣгласъ, а на коньць обрѣте
80,15 съпасение. Велии бо Господь, и велия крѣпость его; и
80,16 разуму его нѣсть числа! Зъло бо есть женьская
80,17 прельсть, якоже рече Соломонъ, покаявъ ся, о
80,18 женахъ: “Не вънимаи зълѣ женѣ, медъ бо каплеть отъ
80,19 устъ ея, жены любодѣица, въ время наслажаеть
80,20 твои гъртань. Послѣди же горьчае жьлчи
80,21 обрящеши. Прилѣпляющая ся еи съмьртию въ
80,22 адъ. На пути бо животьныя не находить,
80,23 блудьна же течения ея не благоразумьна”. Се же
80,24 рече Соломонъ о прелюбодѣицахъ; о добрыхъ
80,25 женахъ рече: “Дражьши есть камения мъногоцѣньна.
80,26 Радуеть ся о неи мужь ея. Дѣеть бо мужеви
80,27 своему благо вьсе житие. Обрѣтъши вълну и
80,28 льнъ, сътворить благопотребьная рукама
81,1 своима. Бысть яко корабль, куплю дѣющи,
81,2 издалеча събираеть себѣ богатьство. И
81,3 въстаеть отъ нощи, и даеть брашьно дому и
81,4 дѣла рабынямъ. Видѣвъши тяжание, куповаше;
81,5 отъ дѣлъ руку своею насадить тяжание. Препоясавъши крѣпъко
81,6 чресла своя, утвьрди мышьци свои
81,7 на дѣло. И въкуси, яко добро дѣлати, и
81,8 не угасаеть свѣтильникъ ея вьсю нощь. Руцѣ
81,9 свои простираеть на пользьная, локъти же свои
81,10 утвьржаеть на вретено. Руцѣ свои {простираеть | отвьрзаеть}
81,11 убогому, плодъ же простьре нищимъ. Не печеть ся
81,12 о дому своемь мужь ея, егда къде будеть; вьси
81,13 свои ея одѣни будуть. Сугуба одѣнья
81,14 сътворить мужю своему, очьрвлена и
81,15 багъряна себѣ одѣния. Възорьнъ бываеть въ
81,16 вратѣхъ мужь ея, вънегда аще сядеть на съньмищи
81,17 съ старьци и съ жители земля. Опоны
81,18 сътвори, и отъдасть въ куплю. Уста же своя
81,19 отвьрзе съмысльно, въ чинъ мълвить языкъмь
81,20 своимь. Въ крѣпость и въ лѣпоту облече ся.
81,21 Милостыня же ея въздвигоша чада ея, и обогатѣша;
81,22 и мужь ея похвали ю. Жена бо разумьлива
81,23 благословлена есть, боязнь же Господьню да хвалить.
81,24 Дадите еи отъ плода устьну ея, да хвалять
81,25 въ вратѣхъ мужа ея.
81,26 Въ лѣто 6489. Иде Володимиръ къ Ляхомъ,
81,27 и зая грады ихъ, Перемышль, Чьрвенъ и
81,28 ины грады, иже суть и до сего дьне подъ
81,29 Русию. Семьже лѣтѣ и Вятичи побѣди, и възложи
82,1 на ня дань отъ плуга, якоже отьць
82,2 его имаше.
82,3 Въ лѣто 6490. Заратиша ся Вятичи, и иде на
82,4 ня Володимиръ, и победи я въторое.
82,5 Въ лѣто 6491. Иде Володимиръ на Ятвягы,
82,6 и побѣди Ятвягы, и възя землю ихъ. И
82,7 приде Кыеву, и творяше требу кумиромъ
82,8 съ людьми своими. И рекоша старьци и боляре: “Мечемъ
82,9 жребии на отрока и дѣвицю;
82,10 на негоже падеть, того зарѣжемъ
82,11 богомъ”. И бяше Варягъ единъ, и бѣ дворъ его идеже
82,12 есть цьркы святыя Богородица, юже съзьда Володимиръ.
82,13 Бѣ же Варягъ тъ пришьлъ отъ
82,14 Грькъ, и дьржаше вѣру хрьстьяньску; и бѣ у
82,15 него сынъ красьнъ лицьмь и душею; на сего
82,16 паде жребии по зависти дияволи. Не тьрпяше
82,17 бо дияволъ, власть имѣя надъ вьсѣми: и
82,18 сь бяше акы тьрнъ въ сьрдьци. И
82,19 тъщаше ся потребити оканьныи, и наусти
82,20 люди. И рѣша, пришьдъше, посълании къ нему,
82,21 яко “Паде жребии на сынъ твои, изволиша бо и
82,22 бози себѣ, да сътворимъ требу богомъ”. И рече Варягъ:
82,23 “Не суть то бози, нъ древо. Дьньсь есть, а
82,24 утро изгнило; не ядять бо, ни пиють, ни мълвять,
82,25 нъ суть дѣлани руками въ древѣ. А Богъ есть
82,26 единъ, емуже служать Грьци, и кланяють ся, иже
82,27 сътворилъ небо и землю и звѣзды и луну и
82,28 сълньце и человѣка, и далъ есть ему жити на земли.
82,29 А си бози чьто съдѣлаша? Сами дѣлани суть. Не
83,1 дамь сына своего бѣсомъ”. Они же, шьдъше, повѣдаша
83,2 людьмъ. Они же, възьмъше оружие, поидоша
83,3 на нь, и разъяша дворъ около его.
83,4 Онъ же стояше на сѣньхъ съ сынъмь своимь. Рѣша
83,5 ему: “Даи сына своего, да въдамы и богомъ”. Онъ
83,6 же рече: “Аще суть бози, то единого себѣ посълють бога,
83,7 да поимуть сынъ мои; а вы чему претребуете имъ?” И
83,8 кликнуша, и посѣкоша сѣни подъ нима, и тако побиша
83,9 я. И не съвѣсть никътоже, къде положиша
83,10 я. Бяху бо тъгда человѣци невѣгласи погани. И
83,11 дияволъ радоваше ся сему, не вѣды, яко
83,12 близь погыбель хотяше быти ему. Тако
83,13 бо тъщаше ся погубити родъ хрьстьяньскыи, нъ прогонимъ
83,14 бяше крьстъмь чьстьнымь въ инѣхъ странахъ;
83,15 сьде же мьняше ся оканьныи, яко “Сьде ми есть жилище,
83,16 сьде бо не суть учили апостоли, ни пророци прорекли”;
83,17 не вѣды пророка глаголюща: “И нареку не
83,18 люди моя люди моя”. О апостолѣхъ же рече: “Въ вьсю
83,19 землю изидоша вѣщанья ихъ. И въ коньць въселеныя
83,20 глаголи ихъ”. Аще бо и тѣлъмь апостоли суть
83,21 не были, нъ учения ихъ акы трубы гласять по
83,22 въселенѣи въ цьркъвахъ. Имьже учениемь побѣжаемъ
83,23 противьнаго врага, попирающе подъ
83,24 нозѣ, якоже попьраста и сия отьчьника, приимъша
83,25 вѣньць небесьныи съ святыми мученикы и правьдникы.
83,26 Въ лѣто 6492. Иде Володимиръ на Радимичѣ. И
83,27 бѣ у него воевода Вълчии Хвостъ; и
83,28 посъла предъ собою Володимиръ Вълчия
83,29 Хвоста. И сърѣте Радимичѣ на рѣцѣ Пищанѣ; и побѣди
84,1 Вълчии Хвостъ Радимичѣ. Тѣмь и Русь
84,2 корять ся Радимичемъ, глаголюще: “Пищаньци вълчия
84,3 хвоста бѣгають”. Быша же Радимичи отъ рода
84,4 Ляховъ. И прешьдъше ту ся въселиша, и платять,
84,5 дань Руси, и повозъ везуть и до сего дьне.
84,6 Въ лѣто 6493. Иде Володимиръ на Българы
84,7 съ Добрынею, уемь своимь, въ лодияхъ,
84,8 а Търкы берегъмь приведе на конихъ; и тако
84,9 побѣди Българы. И рече Добрыня Володимиру:
84,10 “Съглядахъ колодьникъ, и суть вьси
84,11 въ сапозѣхъ; симъ дани намъ не платити. Поидѣвѣ
84,12 искатъ лапътьникъ”. И сътвори миръ Володимиръ
84,13 съ Българы, и ротѣ заходиша межю собою.
84,14 И рѣша Българе: “Толи не будеть мира межю
84,15 нами, оли же камень начьнеть плавати, а хъмель
84,16 грязнути”. И приде Володимиръ Кыеву.
84,17 Въ лѣто 6494. Придоша Българе вѣры
84,18 Бохъмичи, глаголюще, “Яко ты кънязь еси мудръ и
84,19 съмысльнъ, не вѣси закона. Да вѣруи въ законъ
84,20 нашь, и поклони ся Бохъмиту”. И рече Володимиръ:
84,21 “Кака есть вѣра ваша?” Они же рѣша: “Вѣруемъ
84,22 Богу, а Бохъмитъ ны учить, глаголя: обрѣзати уды
84,23 таиныя, а свинины не ясти, а вина не пити,
84,24 и по съмьрти же, рече съ женами похоть творити
84,25 блудьную. Дасть Бохъмитъ комужьдо по семидесятъ
84,26 женъ красьнъ. И избереть едину красьну,
84,27 и вьсѣхъ красоту възложить на едину, и та будеть
84,28 ему жена. Сьдѣ же, рече, достоить блудъ творити
84,29 вьсякъ; на семь свѣтѣ аще будеть къто убогъ,
85,1 то и тамо; аще ли богатъ сьде, то и тамо”. И ина мънога льсть, еяже нѣ
85,2 льзѣ пьсати срама ради. Володимиръ же слушаше
85,3 ихъ; бѣ бо самъ любя жены и блужение мъногое;
85,4 и послушаше сладъко. Нъ се бѣ ему нелюбо
85,5 обрѣзание удовъ и о неяденьи свиныхъ мясъ,
85,6 а о питии отинудь. Рекъ: “Руси веселье
85,7 питие, не можемъ беc того быти”. Посемь
85,8 же придоша Нѣмьци отъ Рима, глаголюще, “Придохомъ посълани
85,9 отъ папежа”. И рѣша ему: “Реклъ ти тако папежь:
85,10 земля твоя яко земля наша, а вѣра
85,11 ваша не акы вѣра наша. Вѣра бо наша свѣтъ
85,12 есть. Кланяемъ ся Богу, иже сътвори небо и
85,13 землю и звѣзды и мѣсяць и вьсяко дыханье, а бози
85,14 ваши древо суть”. Володимиръ же рече: “Кака
85,15 заповѣдь ваша?” Они же рѣша: “Пощение по
85,16 силѣ. Аще къто пиеть или ясть, вьсе въ
85,17 славу Божию, рече учитель нашь Павьлъ”. Рече же
85,18 Володимиръ Нѣмьцемъ: “Идѣте опять, яко отьци
85,19 наши сего не прияли суть”. Се слышавъше Жидове
85,20 Козарьстии, придоша, рекуще: “Слышахомъ,
85,21 яко придоша Българе и хрьстьяне, учаще тя
85,22 {кътоже | къжьдо} вѣрѣ своеи; хрьстьяне бо вѣрують, егоже
85,23 мы распяхомъ, а мы вѣруемъ единому Богу Аврамову,
85,24 Исакову и Яковлю”. И рече Володимиръ:
85,25 “Чьто есть законъ вашь?” Они же рѣша: “Обрѣзати ся,
85,26 свинины не ясти, ни заячины, суботу
85,27 хранити”. Онъ же рече: “То къде есть земля ваша?”
85,28 Они же рѣша: “Въ Иерусалимѣ”. Онъ же рече: “То
85,29 тамо ли есть?” Они же рѣша: “Разгнѣва ся Богъ
86,1 на отьцѣ нашѣ, и расточи ны по странамъ грѣхъ
86,2 ради нашихъ, и предана бысть земля наша хрьстияномъ”.
86,3 Онъ же рече: “То како вы инѣхъ учите, а
86,4 сами отвьржени отъ Бога и расточени? Аще бы Богъ
86,5 любилъ васъ и законъ вашь, то не бысте расточени
86,6 по чюжимъ землямъ. Еда и намъ тоже
86,7 мыслите прияти?”
86,8 Посемь же присълаша Грьци къ Володимиру
86,9 философа, глаголюще сице: “Слышахомъ, яко приходили
86,10 суть Българе, учаще тя прияти вѣру
86,11 свою, ихъже вѣра осквьрняетъ небо и землю,
86,12 иже суть прокляти паче вьсѣхъ человѣкъ, уподобльше ся
86,13 Содому и Гомору, на няже пусти Богъ камение
86,14 горящее, и потопи я, и погрязоша; яко
86,15 и сихъ ожидаеть дьнь погыбѣли ихъ, егда придеть
86,16 Богъ судитъ на землю и погубити вься творящая
86,17 безаконие и сквьрны дѣющая. Си
86,18 бо омывають оходы своя, и въ рътъ въливають,
86,19 и по брадѣ мажють ся, наричюще Бохъмита; такоже
86,20 и жены ихъ творять туже сквьрну, и ино
86,21 пуще: отъ съвъкупления мужьска и женьска въкушають”.
86,22 Си слышавъ Володимиръ, плюну на
86,23 землю, рекъ: “Нечисто есть дѣло”. Рече же философъ:
86,24 “Слышахомъ и се, яко приходиша отъ Рима
86,25 учитъ васъ къ вѣрѣ своеи, ихъже вѣра съ нами
86,26 мало развращена: служать бо
86,27 опрѣснъкы, рекъше оплатъкы, ихъже Богъ не преда,
86,28 нъ повелѣ хлѣбъмь служити. И преда апостоломъ,
86,29 приимъ хлѣбъ, рекъ: “Се есть тѣло мое, ломимое
87,1 за вы. Такоже и чашю приимъ, рече: Се
87,2 есть кръвь моя новаго завѣта. Си же того не
87,3 творять, и суть не исправили вѣры”. Рече же
87,4 Володимиръ: “Придоша къ мънѣ Жидове, глаголюще, яко
87,5 Нѣ|мьци и Грьци вѣрують егоже мы распяхомъ”.
87,6 Философъ же рече: “Въ истину въ того вѣруемъ;
87,7 тѣхъ бо пророци прорицаху, яко Богу родити ся, а
87,8 друзии распяту быти и погребену, и третьи дьнь
87,9 въскрьснути и на небеса възити. Они же тыя
87,10 пророкы избиваху, другыя претираху. Егда же
87,11 събысть ся прореченье сихъ, съниде на землю, и
87,12 распятие прия, и въскрьсъ и на небеса възиде; на сихъ
87,13 же ожидаше покаяния за 40 и за 6 лѣтъ,
87,14 и не покаяша ся; и посъла на ня Римляны;
87,15 грады ихъ разбиша, а самихъ расточиша по
87,16 странамъ, и работають въ странахъ”. Рече же Володимиръ:
87,17 “Чьто ради съниде Богъ на землю, и
87,18 страсть такову прия?” Отъвѣщавъ же философъ, рече:
87,19 “Аще хощеши послушати, да съкажю ти из начала,
87,20 чьто ради съниде Богъ на землю”. Онъ
87,21 же рече: “Послушаю радъ”. И нача философъ
87,22 глаголати сице:
87,23 “Въ начало сътвори Богъ небо и землю въ
87,24 пьрвыи дьнь. Въ въторыи дьнь сътвори твьрдь, иже есть
87,25 посредѣ водъ; сегоже дьне раздѣлиша ся воды:
87,26 полъ ихъ възиде на твьрдь, а полъ ихъ подъ
87,27 твьрдь. Въ 3 дьнь сътвори море и рѣкы и
87,28 источьникы и сѣмена. Въ 4 дьнь сълньце и луну
87,29 и звѣзды, и украси Богъ небо. Видѣвъ же пьрвыи
87,30 отъ ангелъ, старѣишина чину ангельску, помысли въ
87,31 себѣ, рекъ: “Съниду на землю, и прииму землю,
88,1 и буду подобьнъ Богу, и поставлю столъ свои на
88,2 облацѣхъ сѣверьскыхъ”. И ту абие съвьрже и
88,3 съ небесе, и по немь съпадоша иже бѣша подъ нимь,
88,4 чинъ десятыи. Бѣ же имя противьнику Сотонаилъ,
88,5 въ негоже мѣсто постави старѣишину Михаила;
88,6 сотона же, грѣшивъ помысла своего, и
88,7 отъпадъ славы пьрвыя, нарече ся противьникъ
88,8 Богу. Посемь же въ 5 дьнь сътвори Богъ киты и
88,9 гады и рыбы и пътица перьнатыя. Въ 6
88,10 дьнь сътвори Богъ звѣри и скоты и гады земьныя;
88,11 сътвори же и человѣка. Въ 7 дьнь почи
88,12 Богъ отъ дѣлъ своихъ, еже есть субота. И насади
88,13 Богъ раи на въстоцѣ въ Едемѣ, и въведе ту
88,14 человѣка, егоже съзьда. И заповѣда ему отъ древа вьсякого
88,15 ясти, отъ древа же единого не ясти, еже
88,16 есть разумѣти добру и зълу. И бѣ Адамъ въ раи, и
88,17 видяше Бога, и славляше; егда ангели славяху. И
88,18 възложи Богъ на Адама сънъ, и усъпе Адамъ, и
88,19 възя Богъ едино ребро у Адама, и сътвори ему
88,20 жену, и приведе ю къ Адаму, и рече Адамъ:
88,21 “Се, кость отъ кости моея и плъть отъ плъти моея,
88,22 си наречеть ся жена”. И нарече Адамъ имена скотомъ и
88,23 пътицамъ и звѣрьмъ и гадомъ, и самѣма
88,24 ангелъ повѣда имени. И покори Богъ Адаму звѣри
88,25 и скоты, и обладаше вьсѣми, и послушаху его.
88,26 Видѣвъ же дияволъ, яко почьсти Богъ человѣка, позавидѣвъ
88,27 ему, преобрази ся въ змию, и приде къ
88,28 Евзѣ, и рече еи: “Почьто не яста отъ древа, сущаго
88,29 посредѣ рая?” И рече жена къ змии: “Рече Богъ: не
88,30 имата ясти; оли да умьрета съмьртью”. И рече
88,31 змия къ женѣ: “Съмьртию не умьрета; вѣдяше бо
89,1 Богъ, яко, въ ньже дьнь яста отъ него, отвьрзоста ся
89,2 очи ваю, и будета яко Богъ, разумѣвающа
89,3 добро и зъло”. И видѣ жена, яко добро древо
89,4 въ ядь, и възьмъши, сънѣсть, и въдасть мужю своему,
89,5 и яста, и отвьрзоста ся очи има. И разумѣста,
89,6 яко нага еста; и съшиста листвиемь смокъвьнымь
89,7 препоясание. И рече Богъ: “Проклята земля
89,8 въ дѣлѣхъ твоихъ, и въ печали яси вься дьни живота
89,9 твоего”. И рече Господь Богъ: “Еда како простьрета
89,10 руку, и възьмета отъ древа животьнаго, и живета
89,11 въ вѣкы”. И изъгна Господь Богъ Адама изъ рая. И
89,12 сѣде прямо раю, плача ся и дѣлая землю.
89,13 И порадова ся сотона о проклятьи земля. Се на
89,14 ны пьрвое падение и горькыи отъвѣтъ, отъпадение
89,15 ангельскаго житья. И роди Адамъ Каина и
89,16 Авеля; и бѣ Каинъ ратаи, а Авель пастухъ.
89,17 И несе Каинъ отъ плодъ земьныхъ къ Богу, и не прия
89,18 Богъ даровъ его; Авель же принесе отъ агньць пьрвеньць,
89,19 и прия Богъ дары Авелевы. Сотона же
89,20 вълѣзе въ Каина, и пострѣкаше Каина убити
89,21 Авеля. И рече Каинъ Авелю: “Изидѣвѣ на поле”;
89,22 Яко изидоша, въста
89,23 Каинъ, и хотяше убити и, не умѣяше
89,24 убити и. И рече ему сотона: “Възьми камень, и удари
89,25 и”. Камень възьмъ и уби и. И рече Богъ Каину: “Къде
89,26 есть братъ твои?” Онъ же рече: “Еда азъ стражь есмь
89,27 брату своему?” И рече Богъ: “Кръвь брата твоего въпиеть
89,28 къ мънѣ, буди стоня и трясыи ся до
89,29 живота своего”. Адамъ же и Евга плачюща ся
89,30 бяста, и дияволъ радоваше ся, рекъ: “Се, егоже
90,1 Богъ почьсти, азъ сътворихъ ему отъпасти отъ Бога, и
90,2 се, нынѣ плачь ему налѣзохъ”. И плакаста ся по
90,3 Авели лѣтъ 30, и не съгни тѣло его; и не умѣста
90,4 погрети его. И повелѣниемь Божиемь
90,5 пътеньца дъва прилетѣста, единъ ею умьре, и единъ
90,6 же ископа яму, въложи умьръшаго, и погребе.
90,7 Видѣвъша же се Адамъ и Евга, ископаста
90,8 яму, и въложиста Авеля, и погребоста и съ
90,9 плачьмь. Бысть же Адамъ лѣтъ 200 и 30 роди
90,10 Сифа и 2 дъщери; и поя едину Каинъ, а другую
90,11 Сифъ. И отъ того человѣци расплодиша ся,
90,12 умъножиша ся по земли. И не познаша сътворьшаго
90,13 я, нъ испълниша ся блуда и вьсякого скаредия
90,14 и убииства и зависти, и живяху
90,15 скотьскы человѣци. И бѣ Нои единъ правьдьнъ въ родѣ
90,16 семь, и роди 3 сыны: Сима, Хама, Афета. И
90,17 рече Богъ: “Не имать пребывати духъ мои въ человѣцѣхъ”;
90,18 и рече: “Да потреблю, человѣка егоже сътворихъ, отъ человѣка до
90,19 скота”. И рече Господь Богъ Ноеви: “Сътвори ковьчегъ въ дълготу
90,20 лакътъ 300, а въ ширину 50, а възвыше
90,21 30 лакътъ”; Егупьти бо локътьмь сажень зовуть. Дѣлаему
90,22 же ковьчегу за 100 лѣтъ, и повѣдаше
90,23 Нои, яко быти потопу, посмѣхаху ся ему.
90,24 Егда съдѣла ковьчегъ, и рече Господь Богъ Ноеви: “Вълѣзи
90,25 ты и жена твоя и сынове твои и снъхы твоя; и
90,26 въведи къ себѣ по дъвоему отъ вьсѣхъ скотъ и отъ
90,27 пътиць и отъ вьсѣхъ гадъ”. И въведе Нои, якоже заповѣда
90,28 ему Богъ. И наведе Богъ потопъ на землю, и
90,29 потопе вьсяка плъть; и ковьчегъ плаваше на
90,30 водѣ. Егда же посяче вода, излѣзе Нои и
91,1 сынове его и жена его. И отъ сихъ расплоди ся земля.
91,2 И быша человѣци мънози и единогласьни, и рѣша
91,3 другъ другу: “Съзижемъ стълпъ до небесе”. И
91,4 начаша зьдати, и бѣ старѣшина Невродъ, и рече
91,5 Богъ: “Се умъножиша ся человѣци, и помысли ихъ суетьни”.
91,6 И съниде Богъ, и размѣси языкы на 70 и дъва
91,7 языка. Адамовъ же языкъ бысть не отъятъ у
91,8 Авера; тъ бо единъ не приложи ся къ безумию
91,9 ихъ, рекъ сице: “Аще бы человѣкомъ Богъ реклъ
91,10 на небо стълпъ дѣлати, то повелѣлъ бы самъ Богъ
91,11 словъмь, якоже сътвори небеса и землю и море и вься
91,12 видимая и невидимая”. Того ради сего языкъ не
91,13 премѣни ся; отъ сего суть Еврѣи. На 70 и единъ
91,14 языкъ раздѣлиша ся, и разидоша ся по странамъ,
91,15 къжьдо свои нравъ прияша. И по дияволю
91,16 научению ови рощениемъ и кладяземъ жьряху и
91,17 рѣкамъ, и не познаша Бога. Отъ Адама же до потопа
91,18 лѣтъ 2242, а отъ потопа до раздѣления
91,19 языкъ лѣтъ 529. Посемь же дияволъ въ
91,20 больша прельщения въвьрже человѣкы; и начаша
91,21 кумиры творити, ови древяны и мѣдяны,
91,22 а друзии мраморяны и златы и сьребряны;
91,23 и кланяху ся имъ, и привожаху сыны
91,24 своя и дъщери, и закалаху предъ ними; и бѣ
91,25 вься земля осквьрнена. Начальникъ же бяше
91,26 кумиротворению Серухъ; творяше бо
91,27 кумиры въ имена мьртвыхъ человѣкъ, бывъшимъ овѣмъ
91,28 цьсаремъ, другымъ храбрымъ и вълхвомъ
91,29 и женамъ прелюбодѣицамъ. Сь же Серухъ роди
92,1 Фару, Фара же роди 3 сыны: Аврама и Нахора
92,2 и Арана. Фара же творяше кумиры,
92,3 навыкъ у отьца своего. Аврамъ же, пришьдъ
92,4 въ умъ, възьрѣ на небо, и видѣ звѣзды и небо, и
92,5 рече: “Въ истину тъ есть Богъ, иже сътворилъ
92,6 отьць мои прельщаеть человѣкы”.
92,7 И рече Аврамъ: “Искушю богы отьца своего”; и рече:
92,8 “Отьче, почьто прельщаеши человѣкы, творя кумиры древяны?
92,9 Тъ есть Богъ, иже сътворилъ небо и землю”. И
92,10 приимъ Аврамъ огнь, зажьже идолы въ храминѣ.
92,11 Видѣвъ же Аранъ, братъ Аврамовъ, рьвьнуя
92,12 по идолѣхъ, хотѣ вымъчати идолы, самъ
92,13 съгорѣ ту Аронъ, и умьре предъ отьцьмь. Предъ
92,14 симь бо не бѣ умиралъ сынъ предъ отьцьмь, нъ
92,15 отьць предъ сынымь; и отъ сего начаша умирати
92,16 сынове предъ отьцемь.
92,17 omitted
92,18 И възлюби Богъ Аврама, и рече Богъ Авраму: “Изиди
92,19 из дому отьца твоего въ землю, въ нюже ти покажю.
92,20 И сътворю тя въ языкъ великъ, и благословять тя колѣна
92,21 земьная”. И сътвори Аврамъ, якоже заповѣда ему
92,22 Богъ. И поя Аврамъ Лота, сыновьца своего; бѣ бо
92,23 ему Лотъ шюринъ и сыновьць; бѣ бо Аврамъ поялъ
92,24 братьню дъщерь Ароню Сарру. И приде въ землю
92,25 Хананѣиску къ дубу высоку. И рече Богъ къ Авраму:
92,26 “Сѣмени твоему дамь землю сию”. И поклони ся
92,27 Аврамъ Богу. Аврамъ же бяше лѣтъ 70 и 5,
92,28 егда изиде отъ Хараона. Бѣ же Сарра неплоды,
92,29 болящи неплодьскымь. Рече Сарра Авраму: “Вълѣзи убо къ
93,1 рабѣ моеи”. И поимъши Сарра Агарь, и въдасть ю
93,2 мужеви своему. И вълѣзъ Аврамъ къ Агари, и зача,
93,3 и роди сына Агарь, и прозъва Аврамъ Измаилъмь. И
93,4 Аврамъ бѣ лѣтъ 86, егда роди ся
93,5 Измаилъ. Посемь же, зачьнъши Сарра, роди сына, и
93,6 нарече имя ему Исакъ. И повелѣ Богъ Авраму обрѣзати
93,7 отроча; и обрѣза и въ 8 дьнь. И възлюби
93,8 Богъ Аврама и племя его, и нарече я въ люди
93,9 собѣ, и отълучи я отъ языкъ, нарекъ люди
93,10 своя. Сему же Исаку възмогъшю, Авраму же
93,11 живъшю лѣтъ 100 и 70 и 5, и умьре, и погребенъ
93,12 бысть. Исаку же бывъшю лѣтъ 60, роди дъва
93,13 сына, Исава и Иякова; Исавъ же бысть лукавъ, а
93,14 Ияковъ правьдивъ. Сь же Яковъ работая у
93,15 уя своего из дъщере его из мьньшѣѣ 7 лѣтъ,
93,16 и не дасть ему ея Лава, уи его, рекъ: “Старѣишюю
93,17 поими”. И въдасть ему Лию, старѣишюю,
93,18 а из другоѣ рекъ ему: “Другую
93,19 7 лѣтъ”. Онъ же работа другую 7 лѣтъ изъ
93,20 Рахили. И поя собѣ 2 сестрьници, отъ неюже
93,21 роди 8 сыновъ: Рувима, Семеона, Левгию,
93,22 Июду, Исахара, и Заулона, Иосифа и Вениямина;
93,23 а отъ робу дъвою: Дана, Нефталима, Гада,
93,24 Асира. И отъ сихъ расплодиша ся Жидове.
93,25 Ияковъ же съниде въ Егупьтъ, сы лѣтъ 130,
93,26 съ родъмь своимь, числъмь 65 душь; поживе
93,27 же въ Егупьтѣ лѣтъ 17, и усъпе; и поработиша
93,28 племя его за 400 лѣтъ. По сихъ же лѣтѣхъ
93,29 възмогоша людие Жидовьстии, и умъножиша ся;
94,1 и насиляху имъ Егупьтяне работою. Въ си же времена
94,2 роди ся Моисѣи въ Жидъхъ; и рѣша
94,3 вълсви Егыпьтьстии цьсарю, родилъ ся есть дѣтищъ
94,4 въ Жидъхъ, иже хощеть погубити Егупьтъ”. Ту
94,5 абье повелѣ цьсарь ражающая ся дѣти Жидовьскыя
94,6 въмѣтати въ рѣку. Мати же Моисѣова,
94,7 убоявъши ся сего погубления, възьмъши младеньць,
94,8 въложи въ крабицю, и несъши, постави
94,9 въ лузѣ. Въ се же время съниде дьщи Фараонова
94,10 Ферьмуфи купатъ ся, и видѣ отроча плачюще ся, и
94,11 възя е, и пощади е, и нарече имя ему Моисѣи,
94,12 и въскърми е; и бысть отроча красьно. И бысть
94,13 4 лѣтъ, и приведе и дъщи Фараоня къ отьцю
94,14 своему. Видѣвъ же Моисѣя Фараонъ, нача любити
94,15 отроча; Моисѣи же, хапая ся за шию, сърони
94,16 вѣньць съ главы цьсаревы, и попьра и. Видѣвъ же
94,17 вълхвъ, рече цьсареви: “О цьсарю! Погуби отроча се;
94,18 аще ли не погубиши, имать погубити вьсего
94,19 Егупьта”. И не послуша его цьсарь, нъ паче повелѣ
94,20 не погубити дѣтии Жидовьскыхъ. Моисѣеви же
94,21 възмогъшю, бысть великъ въ дому Фараони. И бысть
94,22 цьсарь инъ. Възавидѣша ему боляре. Моисѣи
94,23 же, убивъ Егупьтянина, обидяща Еврѣянина,
94,24 бѣжа изъ Егупьта, и приде въ землю Мадиамьску,
94,25 и ходя по пустыни, научи ся отъ ангела Гаврила
94,26 о бытьи вьсего мира и о пьрвѣмь человѣцѣ,
94,27 и яже суть была по немь, и по потопѣ, и о
94,28 съмѣшеньи языкъ, аще къто колико лѣтъ
94,29 былъ, и звѣздьное хожение и число, земльную
95,1 мѣру и вьсяку мудрость. Посемь же яви ся ему Богъ
95,2 въ купинѣ огньмь, и рече ему: “Видѣхъ бѣду людии
95,3 моихъ въ Егупьтѣ, и низълѣзохъ изяти я отъ руку
95,4 Егупьтьску, извести я отъ земля тоя. Ты же
95,5 иди къ Фараону, цьсарю Егупьтьску, и речеши ему:
95,6 пусти Издраиля, да три дьни положать требу Господу
95,7 Богу. Аще не послушаеть тебе цьсарь Егупьтьскыи,
95,8 побью и вьсѣми чюдесы моими”. И пришьдъшю Моисѣеви,
95,9 не послуша его Фараонъ. И пусти
95,10 Богъ 10 казнии на Фараона: 1. рѣкы въ кръвь;
95,11 2. жабы; 3. мышицѣ; 4. пьсья мухы; 5.
95,12 съмьрть на скотъ; 6. прыщеве горющии;
95,13 7. градъ; 8. прузи; 9. тьма три дьни; 10. моръ
95,14 въ человѣцѣхъ. Сего ради 10 казнии бысть на
95,15 нихъ, яко 10 мѣсяць топиша дѣти Жидовьскы.
95,16 Егда же бысть моръ въ Егупьтѣхъ, рече Фараонъ
95,17 Моисѣеви и брату его Арону: “Отъидѣта въскорѣ”.
95,18 Моисѣи же, събьравъ люди Жидовьскыя, поиде
95,19 отъ земля Егупьтьскыя. И ведяше я Господь путьмь
95,20 по пустыни къ Чьрмьному морю; и предъидяше
95,21 предъ ними нощью стълпъ огньнъ, а въ дьни
95,22 облачьнъ. Слышавъ же Фараонъ, яко бѣжать
95,23 людие, погъна по нихъ, и притисну я къ
95,24 морю. Видѣвъше же людие Жидовьстии, възъпиша
95,25 на Моисѣя, рекуще: “Почьто изведе ны на
95,26 съмьрть?” И възъпи Моисѣи къ Богу. И рече Господь: “Чьто
95,27 въпьеши къ мънѣ? Удари жьзлъмь въ море”. И
95,28 сътвори Моисѣи тако, и раступи ся вода на дъвое,
95,29 и вънидоша сынове Издраилеви въ море. Видѣвъ
96,1 же Фараонъ, гъна по нихъ; сынове же Издраилеви проидоша
96,2 по суху. Яко излѣзоша на брегъ, и съступи ся
96,3 море о Фараонѣ и о воихъ его. И
96,4 възлюби Богъ Издраиля. И идоша отъ моря три дьни по
96,5 пустыни, и придоша въ Меронъ. И бѣ ту вода
96,6 горька, и въздръпъташа людие на Бога, и показа
96,7 имъ Господь древо; и въложи Моисѣи въ воду; и осладиша ся
96,8 воды. Посемь же пакы въздръпъташа на
96,9 Моисѣя и на Арона, рекуще: “Луче ны бяше
96,10 въ Егупьтѣ идеже ядяхомъ мяса и лукъ и хлѣбы
96,11 до сыти”. И рече Господь къ Моисѣеви: “Слышахъ хухнание
96,12 сыновъ Издраилевъ”; и дасть имъ манну ясти.
96,13 Посемь же дасть имъ законъ на горѣ Синаистѣи.
96,14 Моисѣеви въшьдъшю на гору къ Богу, они же,
96,15 сълиявъше тельчю главу, поклониша ся акы
96,16 Богу, ихъже Моисѣи исѣче 3000 числъмь.
96,17 Посемъ пакы въздръпъташа на Моисѣя и на
96,18 Арона, еже не бѣ воды; и рече Господь къ Моисѣеви:
96,19 “Удари жьзлъмь въ камень”, рекъ: “Еда
96,20 и сего не испустивѣ воды?” И разгнѣва ся Господь
96,21 на Моисѣя, яко не възвеличи Господа; и не въниде
96,22 въ землю обѣтованую сего ради, ръпътания онѣхъ
96,23 ради, нъ възведе и на гору Вамьску, и показа
96,24 ему землю обѣтованую; и умьре Моисѣи ту на
96,25 горѣ. И прия власть Иисусъ Навгинъ. Сь
96,26 приде въ землю обѣтованую, и изби Хананѣиско
96,27 племя, и въсели въ нихъ мѣсто сыны Издраилевы.
96,28 Умьръшю же Иисусу, бысть судия въ него мѣсто Июда;
96,29 и инѣхъ судии бысть 14, при нихъ же, забывъше
97,1 Бога, изведъшаго я изъ Егупьта, начаша служити
97,2 бѣсомъ. И разгнѣвавъ ся Богъ, предаяшеть я иноплеменьникомъ
97,3 на расхыщение. И егда ся начьнуть
97,4 каяти, помиловашеть ихъ; егда избавляшеть
97,5 ихъ, и пакы укланяхуть ся на бѣсослужение.
97,6 По сихъ же служаше Илии жьрьць, и по
97,7 семь Самуилъ пророкъ. И рѣша людие Самуилу:
97,8 “Постави намъ цьсаря”. И разгнѣва ся Богъ на Издраиля,
97,9 и постави надъ ними цьсаря Саула. Таче Саулъ
97,10 не изволи ходити въ завѣтѣ Господьни. Избьра Господь Давыда,
97,11 и постави и цьсаря надъ Издраильмь. И угоди Давыдъ Богу.
97,12 Сему Давыду кля ся Богъ, яко отъ племене его родити ся
97,13 богу. Пьрвое нача пророчьствовати о въплъщении
97,14 Божии, рекъ: “Ис чрева преже дьньница родихъ
97,15 тя”. Сь же пророчьствова 40 лѣтъ, и умьре. И по
97,16 немь и пророчьствова сынъ его Соломонъ, иже възгради
97,17 цьркъвь Богу, и нарече ю Святая Святыхъ. И бысть
97,18 мудръ, нъ наконьць попълзе ся; цьсарьствова
97,19 лѣтъ 40, и умьре. По Соломонѣ же цьсарьствова сынъ
97,20 его Ровоамъ. При семь раздѣли ся цьсарьство на дъвое
97,21 Жидовьско: въ Иерусалимѣ едино, а другое въ Самарии.
97,22 Въ Самарии же цьсарьствова Иеровамъ, холопъ
97,23 Соломонь, иже сътвори дъвѣ кравѣ златѣ, и
97,24 постави едину въ Вефили на хълмѣ, а другую
97,25 въ Енданѣ, и рекъ: “Се, бога твоя, Издраилю!” И
97,26 кланяху ся людие, а Бога забыша. Таче и въ
97,27 Иерусалимѣ начаша забывати Бога и кланяти ся
97,28 Валу, рекъше ратьну богу, еже есть Арѣи, и
97,29 забыша Бога отьць своихъ. И нача Богъ посылати
98,1 къ нимъ пророкы. Пророци же начаша обличати я о
98,2 безаконьи ихъ и служеньи кумиръ. Они же
98,3 начаша пророкы избивати, обличаеми отъ нихъ. И разгнѣва ся
98,4 Богъ на Издраиля, и рече: “Отрину отъ себе, и
98,5 призову ины люди, иже мене послушають. И аще
98,6 съгрѣшать, не помяну безакония ихъ”. И нача
98,7 посылати пророкы, глаголя имъ: “Прорицаите о
98,8 отвьрженьи Жидовьстѣ и о призъвании странъ”.
98,9 Пьрвое же нача пророчьствовати Осии, глаголя:
98,10 “Преставлю цьсарьство дому Издраилева. Съкрушю лукъ
98,11 Издраилевъ, и не приложю пакы помиловати дому
98,12 Израилева, нъ отъмѣтая, отвьргу ся ихъ”, глаголеть Господь, “И будуть
98,13 блудяще въ языцѣхъ”. Иеремѣя же рече: “Аще станеть
98,14 Самуилъ и Моисѣи, не помилую ихъ”. И пакы
98,15 тъже Иеремия рече: “Тако глаголеть Господь: Се, кляхъ ся
98,16 именьмь моимь великъмь, аще будетъ отъселѣ
98,17 къде имя мое именуемо въ устѣхъ Июдѣискыхъ”.
98,18 Иезекииль же рече: “Тако глаголеть Господь Аданаи:
98,19 Расѣю вы, вься останъкы твоя въ вься вѣтры,
98,20 зане святая моя осквьрнисте вьсѣми негодовании
98,21 твоими; азъ же тя отрину, и не имамь
98,22 тя помиловати пакы”. Малахия же рече: “Тако глаголеть
98,23 Господь: Уже нѣсть ми хотѣния въ васъ, понеже отъ
98,24 въстока и до запада имя мое прослави ся въ языцѣхъ. И
98,25 на вьсякомь мѣстѣ приносить ся кадило
98,26 имени моему и жьртва чиста, зане велие имя
98,27 мое въ языцѣхъ”. “Сего ради дамь васъ на поносъ
98,28 и на пришьствие въ вься языкы”. Исаия же
98,29 великыи рече: “Тако глаголеть Господь: Простьру руку свою на
99,1 тя, истьлю тя, и расѣю тя, и пакы не приведу тя”.
99,2 И пакы тъже рече: “Възненавидѣхъ праздьникы ваша и начатъкы
99,3 мѣсяць вашихъ, и суботъ вашихъ не приемлю”.
99,4 Амосъ же пророкъ рече: “Слышите слово Господьне: Азъ
99,5 приемлю на вы плачь, домъ Издраилевъ паде ся, и
99,6 не приложи въстати”. Малахия же рече: “Тако глаголеть
99,7 Господь: Посълю на вы клятву, и прокльну благословение ваше, и
99,8 разорю, и не будеть въ васъ”. И мъного пророчьствоваша
99,9 о отвьржении ихъ.
99,10 Симъ же пророкомъ повелѣ Богь пророчьствовати о
99,11 призъвании инѣхъ странъ въ нихъ мѣсто. Нача зъвати
99,12 Исаия, тако глаголя: “Яко законъ отъ мене изидеть, и
99,13 судъ мои свѣтъ странамъ. Приближаеть ся скоро
99,14 правьда моя, изидеть, и на мышьцю мою
99,15 страны упъвають”. Иеремия же рече: “Тако глаголеть
99,16 Господь: Положю дому Июдову завѣтъ новъ. Дая законы
99,17 въ разумѣния ихъ, и на сьрдьца ихъ напишю,
99,18 и буду имъ Богъ, и ти будуть мънѣ въ люди”.
99,19 Исаия же рече: “Ветъхая мимоидоша, а новая възвѣщаю,
99,20 преже възвѣщения явлено бысть вамъ.
99,21 Поите Богу пѣснь нову. Работающимъ ми призоветь ся
99,22 имя ново, еже благословить ся по вьсеи земли”.
99,23 “Домъ мои домъ молитвѣ прозоветь ся вьсѣмъ
99,24 языкомъ”. Тъже Исаия глаголеть: “Отъкрыеть Господь
99,25 мышьцю свою святую предъ вьсѣми языкы, и
99,26 узьрять вьси коньци земля съпасение Бога нашего”.
99,27 Давыдъ: “Хвалите Господа, вьси языци, и похвалите его,
99,28 вьси людие”.
99,29 Тако Богу възлюбивъшю новыя люди, рекъ имъ
100,1 сънити къ нимъ самъ и явити ся чловѣкомъ плътию и
100,2 пострадати за Адамово преступление. И начаша
100,3 пророчьствовати о въплъщении Божии. Пьрвое Давыдъ,
100,4 глаголя: “Рече Господь Господеви моему: Сяди одесную мене,
100,5 доньдеже положю врагы твоя подъножье ногама
100,6 твоима”. И пакы “Рече Господь къ мънѣ: Сынъ мои
100,7 еси ты, азъ дьньсь родихъ тя”. Исаия же рече: “Ни сълъ,
100,8 ни вѣстьникъ, нъ самъ Господь, пришьдъ, съпасеть ны”. И
100,9 пакы: “Яко дѣтищь роди ся намъ, емуже бысть начало
100,10 на рамѣ его, и прозоветь ся велика
100,11 съвѣта ангелъ, велика власть его, и миру его
100,12 нѣсть коньца”. И пакы: “Се дѣвая въ утробѣ зачьнеть,
100,13 и прозовуть имя ему Еммануилъ”.
100,14 Михѣя же рече: “Ты Вифлеоме, доме
100,15 Ефрантовъ, еда не моглъ еси быти въ тысящахъ
100,16 Июдовахъ; ис тебе бо изидеть старѣишина
100,17 быти въ кънязихъ въ Издраили, исходъ его отъ
100,18 дьнии вѣка. Сего ради дасть ся, до времене
100,19 ражающия родить, и прочии отъ братия его
100,20 обратять ся на сыны Издраилевы”. Иеремия же рече:
100,21 “Богъ нашь, и не въмѣнить ся инъ къ нему.
100,22 Изобрѣте вьсякъ путь художьства, и дасть
100,23 Иякову отроку своему. По сихъ же на земли
100,24 яви ся, и съ чловѣкы поживе”. И пакы: “Чловѣкъ есть;
100,25 и къто увѣсть, яко Богъ есть, яко чловѣкъ умираеть”.
100,26 Захарья же рече: “Не послушаша сына моего, и
100,27 не услышю ихъ, глаголеть Господь”. И Осии рече: “Тако
100,28 глаголеть Господь: плъть моя отъ нихъ”.
100,29 Прорекоша же о страсти его, рекуще, якоже рече
101,1 Исаия: “О, лютѣ души ихъ! понеже съвѣтъ зълъ
101,2 съвѣщаша, рекуще: съвяжимъ правьдьника”. И пакы
101,3 тъже рече: “Тако глаголеть Господь: Азъ не съпротивлю ся,
101,4 ни глаголю противу. {Хрьбьтъ | Плещи} мои дахъ на раны,
101,5 а ланитѣ мои на заушение, и лица своего
101,6 не отъвратихъ отъ стыдѣнья запльвания”. Иеремия
101,7 же рече: “Придѣте, въложимъ древо въ хлѣбъ
101,8 его, истребимъ отъ земля животъ его”. Моисѣи
101,9 же рече о распятьи его: “Узьрите жизнь вашю
101,10 висящю предъ очима вашима”. И Давыдъ рече:
101,11 “Въскую шаташа ся языци”. Исаия же рече: “Яко
101,12 овьца на заколение веденъ бысть”. Ездра же рече:
101,13 “Благословенъ Богъ, распростьръ руцѣ свои, съпасъ Иерусалима”.
101,14 И о въскрьсеньи рекоша, Давыдъ: “Въстани, Боже,
101,15 суди земли, яко ты наслѣдиши въ вьсѣхъ странахъ”.
101,16 И пакы: “Въста, яко съпя, Господь”. И пакы: “Да
101,17 въскрьснеть Богъ, и разидуть ся врази его”. И пакы:
101,18 “Въскрьсни, Господи Боже мои, да възнесеть ся рука твоя”.
101,19 Исаия же рече: “Съходящии въ страну и сѣнь
101,20 съмьртьную, свѣтъ въсияеть на вы”. Захария же:
101,21 “И ты въ кръви завѣта твоего испустилъ
101,22 еси ужьникы своя отъ рова, не имуща
101,23 воды”. Мъного пророчьствоваша о немь, еже и
101,24 събысть ся вьсе”.
101,25 Рече же Володимиръ: “То въ кое время
101,26 събысть ся се? И было ли се есть? Еда ли топьрво
101,27 хощеть быти?” Онъ же, отъвѣщавъ, рече ему,
101,28 яко “Уже преже събысть ся вьсе, егда Богъ въплъти ся.
102,1 Якоже преже рекохъ, Жидомъ пророкы
102,2 избивающемъ, цьсаремъ ихъ законы преступающемъ,
102,3 предасть я на расхыщение, и въ плѣнъ и ведени
102,4 быша въ Асурию, грѣхъ ради ихъ, и работаша
102,5 тамо лѣтъ 70. И посемь възвратиша ся на землю
102,6 свою, и не бѣ у нихъ цьсаря, нъ архиерѣи обладаху
102,7 ими до Ирода иноплеменьника, иже облада
102,8 ими.
102,9 Въ сего же власть, въ лѣто 5000 и 500, посъланъ
102,10 бысть Гаврилъ въ Назарефъ къ дѣвицѣ Марии,
102,11 отъ колѣна Давыдова, рещи еи: “Радуи ся, обрадованая,
102,12 Господь съ тобою!” И отъ слова сего зачатъ Слово
102,13 Божие въ утробѣ, и породи сына, и нарече имя
102,14 ему Иисусъ. И се вълсви придоша отъ въстока,
102,15 глаголюще: “Къде есть рожии ся цьсарь Жидовьскъ? Видѣхомъ
102,16 бо звѣзду его на въстоцѣ, придохомъ
102,17 поклонитъ ся ему”. Слышавъ же се цьсарь
102,18 Иродъ, съмяте ся, и вьсь Иерусалимъ съ нимь. И призъвавъ
102,19 кънижьникы и старьца людьскыя, въпрашаше:
102,20 “Къде Христосъ ражаеть ся?” Они же рѣша:
102,21 “Въ Вифлеомѣ Июдѣистѣмь”. Иродъ же,
102,22 се слышавъ, посъла, рекъ: “Избиите младеньца, сущая
102,23 до дъвою лѣту”. Они же, шьдъше, избиша младеньца.
102,24 Марья же, убоявъши ся, съкры отроча.
102,25 Иосифъ же съ Мариею, поимъ отроча, бѣжа въ
102,26 Егупьтъ, и бысть до умьртвия Иродова. Въ
102,27 Егупьтѣ же яви ся ангелъ Иосифу, глаголя: “Въстани поими
102,28 отроча и матерь его, иди въ землю Издраилеву”.
103,1 Пришьдъшю же ему, въсели ся въ Назарефъ. Въздрастъшю
103,2 же ему, и бывъшю лѣтъ 30, нача чюдеса
103,3 творити и проповѣдати цьсарьство небесьное. И избьра
103,4 12, яже ученикы себѣ нарече. И нача чюдеса
103,5 творити велика, мьртвыя въскрѣшати, прокаженыя
103,6 очищати, хромымъ ходити, слѣпымъ прозьрѣние
103,7 творити, и ина мънога чюдеса велия,
103,8 якоже бѣша пророци прорекли о нѣмь, глаголюще:
103,9 “Тъи недуги наша исцѣли и болѣзни подъя”. И
103,10 крьсти ся отъ Иоана въ Иерданѣ, показая новымъ
103,11 людьмъ обновление. Крьстивъшю же ся ему, и се
103,12 отвьрзоша ся небеса, и Духъ съходящь зракъмь
103,13 голубинымь на нъ, и гласъ глаголя: “Сь есть Сынъ
103,14 мои възлюбленыи, о немьже благоизволихъ”. И посылаше
103,15 ученикы своя проповѣдати цьсарьство небесьное,
103,16 покаяние въ оставление грѣховъ. И хотя испълнити
103,17 пророчьство, и нача проповѣдати, яко подобаеть Сыну чловѣчьскому
103,18 пострадати и распяту быти и въ третии дьнь
103,19 въскрьснути. Учащю же ему въ цьркъви, архиерѣи
103,20 и кънижьници испълниша ся зависти, искаху
103,21 убити и. И имъше и, ведоша къ игѣмону Пилату.
103,22 Пилатъ же, испытавъ, яко без вины предаша
103,23 и, хотѣ пустити и. Они же рѣша
103,24 ему: “Аще сего пустиши, не имаши быти другъ
103,25 кесареви”. Пилатъ же повелѣ, да и распьнуть.
103,26 Они же, поимъше Иисуса, ведоша на мѣсто
103,27 Краньево, и распяша и ту. И бысть тьма по вьсеи
103,28 земли отъ шестаго часа до 9-го; и при девятѣмь часѣ
103,29 испусти духъ Иисусъ. И цьркъвьная запона раздьра ся
103,30 на дъвое, и мьртвии въсташа мънози, имъже повелѣ
104,1 въ раи ити. И съньмъше и съ крьста, положиша
104,2 и въ гробѣ, и печатьми запечатьлѣша гробъ
104,3 людье Жидовьстии, и стражи приставиша, рекуще:
104,4 “Еда украдуть ученици его”. Онъ же въ третии
104,5 дьнь въскрьсе. И яви ся ученикомъ, въскрьсъ из мьртвыхъ,
104,6 рекъ имъ: “Идѣте въ вься языкы, и научите вься
104,7 страны, крьщению въ имя Отьца и Сына и Святаго
104,8 Духа”. И пребысть съ ними 40 дьнии, являя ся имъ по
104,9 въскрьсении. Егда испълниша ся 40 дьни, повелѣ
104,10 имъ ити въ гору Елеоньскую. И ту яви ся имъ,
104,11 благословивъ я, и рече имъ: “Сядѣте въ градѣ Иерусалимѣ,
104,12 доньдеже посълю обѣтование Отьца моего”. И се
104,13 рекъ, възношаше ся на небо, они же поклониша ся
104,14 ему, и възвратиша ся въ Иерусалимъ, и бяху
104,15 въину въ цьркъви. И егда съконьчаша ся дьнье 50,
104,16 съниде Духъ Святыи на апостолы; и приимъше
104,17 обѣтование Святаго Духа, разидоша ся по въселенѣи,
104,18 учаще и крьстяще водою”.
104,19 Рече же Володимиръ: “Чьто ради отъ жены роди ся,
104,20 и на древѣ распятъ ся, и водою крьсти ся?” Онъ же
104,21 рече ему: “Сего ради, понеже испьрва родъ чловѣчьскыи
104,22 женою съгрѣши, дияволъ прельсти Евгою Адама,
104,23 и отъпаде рая; такоже и Богъ, отъмьстье дая дияволу,
104,24 женою пьрвое побѣженье бысть дияволу,
104,25 женою бо пьрвое испаде Адамъ издрая; отъ жены
104,26 въплъти ся Богъ повелѣ въ раи ити вѣрьнымъ.
104,27 А еже на древѣ распяту быти, сего
104,28 ради, яко отъ древа въкушь, и испаде породы; Богъ же
104,29 на древѣ страсть прия, да древъмь дияволъ побѣженъ
104,30 будеть, и отъ древа животьнаго приимуть
105,1 правьдьнии. А еже водою обновление: понеже
105,2 Нои умъноживъшемъ ся грѣхомъ въ чловѣцѣхъ, наведе
105,3 Богъ потопъ на землю, и потопи чловѣкы водою; сего
105,4 ради рече Богъ: “Понеже погубихъ чловѣкы, грѣхъ
105,5 ихъ ради, ныне же пакы водою очищю грѣхы
105,6 чловѣкомъ, обновлениемь водою”; ибо Жидовьскыи
105,7 родъ въ мори очистиша ся отъ Егупьтьскаго зълаго
105,8 нрава, понеже вода изначала бысть пьрвое; рече бо:
105,9 “Духъ Божии ношаше ся вьрху воды”. Еже бо и
105,10 нынѣ крьстять ся водою и Духъмь. Проображение бысть
105,11 пьрвое водою, якоже Гедеонъ прообрази по семь.
105,12 Егда приде къ нему ангелъ, веля ему ити
105,13 на Мадиямъ, онъ же, искушая, рече къ Богу:
105,14 положивъ руно на гумьнѣ, рекъ: “Аще будеть по
105,15 вьсеи земли роса, а на рунѣ суша”; и бысть тако. Се
105,16 же прообрази, яко иностраньни бѣша преже
105,17 суша, а Жидове руно; послѣ же на странахъ
105,18 роса, еже есть святое
105,19 крьщение, а на Жидъхъ суша. И пророци проповѣдаша,
105,20 яко водою обновление будеть. Апостоломъ
105,21 же учащимъ по въселенѣи вѣровати Богу, ихъже
105,22 учение Грьци прияхомъ, въселеная вѣруеть
105,23 учению ихъ. Поставилъ же есть Богъ единъ
105,24 дьнь, въ ньже хощеть судити, пришьдыи, живымъ
105,25 и мьртвымъ, и въздати комужьдо по дѣломъ
105,26 его: правьдьнымъ цьсарьство небесьное и красоту неиздреченьну,
105,27 веселие бес коньца, и не умирати въ
105,28 вѣкы, а грѣшьникомъ мука огньна и чьрвь неусыпаяи,
106,1 и муцѣ не будеть коньца. Сица же будуть
106,2 мучения, иже не вѣрують Господу нашему Иисусу Христу:
106,3 мучими будуть въ огни, иже ся не крьстить”. И се
106,4 рекъ, показа ему запону, на неиже бѣ
106,5 написано судище Господьне, показываше ему о
106,6 десную правьдьныя, въ весельи предъидуща въ раи, а
106,7 о шююю грѣшьныя идуща въ муку. Володимиръ
106,8 же, въздъхнувъ, рече: “Добро симъ о десную, горе же
106,9 симъ о шююю”. Онъ же рече: “Аще хощеши о
106,10 десную стати съ правьдьными, то крьсти ся”. Володимиръ
106,11 же положи на сьрдьци своемь, рекъ: “Пожьду еще
106,12 мало”, хотя испытати о вьсѣхъ вѣрахъ. Володимиръ
106,13 же, сему дары мъногы въдавъ, отъпусти съ чьстию
106,14 великою.
106,15 Въ лѣто 6495. Съзъва Володимиръ боляры
106,16 своя и старьца градьскыя, и рече имъ: “Се приходиша
106,17 къ мънѣ Българе, рекуще: приими законъ
106,18 нашь. По семь же придоша Нѣмьци, и ти хваляху
106,19 законъ свои. По сихъ придоша Жидове.
106,20 Сихъ же послѣ придоша Грьци, хуляще
106,21 вься законы, свои же хваляще; и мъного
106,22 глаголаша, съказающе отъ начала миру.
106,23 Суть же хытро съказающе, и чюдьно
106,24 слышати ихъ и любо комужьдо; и другыи
106,25 свѣтъ повѣдають быти: да аще къто вѣруеть
106,26 въ нашю вѣру, то пакы, умьръ, въстанеть,
106,27 и не умирати ему въ вѣкы; аще ли въ инъ
106,28 законъ ступить, то на ономь свѣтѣ въ огни горѣти.
107,1 Да чьто ума придасте? чьто отъвѣщаете?” И
107,2 рѣша боляре и старци: “Вѣси, къняже, яко своего
107,3 никътоже не хулить, нъ хвалить; аще хощеши испытати
107,4 гораздо, то имаши у себе мужѣ: посълавъ,
107,5 испытаи когожьдо ихъ служьбу, и къто како служить
107,6 Богу”. И бысть люба рѣчь кънязю и вьсѣмъ людьмъ. И
107,7 избьраша мудры и съмысльны, числъмь
107,8 10,
107,9 и рѣша имъ: “Идѣте пьрвое въ Българы, и испытаите
107,10 вѣру ихъ”. Они же идоша; и пришьдъше,
107,11 видѣша сквьрная ихъ дѣла и кланяние
107,12 въ ропати; и придоша въ землю свою. И рече имъ Володимиръ:
107,13 “Идѣте пакы въ Нѣмьцѣ, и съглядаите такоже,
107,14 и отътуду идѣте въ Грькы”. Они же придоша
107,15 въ Нѣмцѣ, и съглядавъше цьркъвь и служьбу
107,16 ихъ, и придоша Цьсарюграду, и вънидоша къ цьсарю.
107,17 Цьсарь же испыта, коея ради вины придоша. Они же
107,18 исповѣдаша ему вься бывъшая. Си слышавъ цьсарь,
107,19 радъ бысть, и чьсть велику сътвори имъ въ тъ
107,20 дьнь. Наутрия посъла къ патриарху, глаголя сице: “Придоша
107,21 Русь, пытающе вѣры нашея; да пристрои
107,22 цьркъвь и крилосъ, и самъ причини ся въ святительскыя
107,23 ризы, да видять славу Бога нашего”. Си слышавъ
107,24 патриархъ, повелѣ съзъвати крилосъ, и по
107,25 обычаю сътвориша праздьникъ, и кадила въжьгоша, и
107,26 пѣния ликы съставиша. И иде съ ними
107,27 въ цьркъвь, и поставиша я на пространьнѣ мѣстѣ,
107,28 показающе красоту цьркъвьную и пѣния и служьбы
107,29 архиерѣискы и предъстояние дияконъ, съказающе
107,30 служение Бога своего. Они же, въ изумѣнии
108,1 бывъше, удививъше ся, похвалиша служьбу ихъ. И
108,2 призъвавъша я цьсаря Василии и Костянтинъ, рѣста
108,3 имъ: “Идѣте въ землю вашю”. И отъпустиша
108,4 я съ дары великы и съ чьстию. Они же придоша
108,5 въ землю свою. И съзъва кънязь боляры
108,6 своя и старьца, рече Володимиръ: “Се придоша
108,7 посълании нами мужи, да слышимъ отъ нихъ бывъшее”.
108,8 И рече: “Съкажите предъ дружиною”. Они же рѣша
108,9 яко “Ходихомъ въ Българы, и съмотрихомъ, како
108,10 ся кланяють въ храмѣ, рекъше въ ропати,
108,11 стояще бес пояса. И поклонивъ ся сядеть, и глядить
108,12 сѣмо и онамо, акы бѣшенъ, и нѣсть веселия
108,13 въ нихъ, нъ печаль и смрадъ великъ, и нѣсть
108,14 добръ законъ ихъ. И придохомъ въ Нѣмьцѣ, и видѣхомъ
108,15 въ храмѣ служьбы творяща, а
108,16 красоты не видѣхомъ никоеяже. И придохомъ
108,17 же въ Грькы, и ведоша ны, идеже служать Богу
108,18 своему, и не съвѣмы, на небеси ли есмы были или
108,19 на земли; нѣсть бо на земли такого вида или
108,20 красоты такоя; не доумѣемъ бо съказати;
108,21 тъкъмо то вѣмы, яко отъинудь Богъ съ чловѣкы пребываеть,
108,22 и есть служьба ихъ паче вьсѣхъ странъ.
108,23 Мы убо не можемъ забыти красоты тоя;
108,24 вьсякъ бо чловѣкъ, аще въкусить сладъка, послѣди
108,25 горести не приимаеть; тако и мы не имамъ
108,26 сьде жити”. Отъвѣщавъше же боляре, рѣша: “Аще
108,27 бы лихъ законъ Грьчьскыи, то не бы баба твоя
108,28 прияла, Ольга, яже бѣ мудрѣиши вьсѣхъ человѣкъ”.
108,29 Отъвѣщавъ же Володимиръ, рече: “То къде крьщение
108,30 приимемъ?” Они же рѣша: “Къде ти любо”.
109,1 И минувъшю лѣту, въ лѣто 6496. Иде Володимиръ
109,2 съ вои на Кърсунь, градъ Грьчьскыи, и
109,3 затвориша ся Кърсуняне въ градѣ. И ста Володимиръ
109,4 объ онъ полъ града въ лимени, въдале
109,5 града стрѣлища единого. И боряху ся крѣпъко
109,6 гражане. Володимиръ же обьстоя градъ. Изнемогаху
109,7 людие въ градѣ. И рече Володимиръ къ
109,8 гражаномъ: “Аще ся не въдасте, имамь стояти
109,9 за три лѣта”. Они же не послушаша того. Володимиръ
109,10 же издряди воя своя, и повелѣ сути приспу
109,11 къ граду. Симъ же съпущимъ, Кърсуняне,
109,12 подъкопавъше стѣну градьскую, крадяху
109,13 сыплемую пьрсть, и ношаху къ собѣ въ градъ,
109,14 сыплюще посредѣ града. Вои же присыпаху
109,15 боле, и Володимиръ стояше. И се
109,16 мужь Кърсунянинъ стрѣли, именьмь Анастасъ,
109,17 напьсавъ сице на стрѣлѣ: “Кладязь, яже суть за
109,18 тобою отъ въстока, ис того вода идеть по трубѣ;
109,19 копавъ преими”. Володимиръ же, се слышавъ,
109,20 възьрѣвъ на небо, и рече: “Аще се ся събудеть,
109,21 имамь ся крьстити”. И ту абье повелѣ копати
109,22 прекы трубамъ, и преяша воду. И людие изнемогоша
109,23 жажею водьною, и предаша ся. И въниде Володимиръ
109,24 въ градъ и дружина его. И посъла Володимиръ
109,25 къ цьсарема, Василью и Костянтину, глаголя сице:
109,26 “Се градъ ваю славьныи възяхъ; слышю же и се, яко
109,27 сестру имата дѣвою; да аще ея не въдаста за
110,1 мя, сътворю граду вашему, яко и сему
110,2 сътворихъ”. Слышавъша цьсаря, быста печальна;
110,3 въздаста вѣсть, сице глаголюща: “Не достоить
110,4 хрьстияномъ за поганыя даяти. Аще ли ся крьстиши,
110,5 то и се получиши, и цьсарьство небесьное приимеши, и
110,6 съ нами единовѣрьникъ будеши; аще ли сего не
110,7 хощеши сътворити, не можемъ дати сестры
110,8 своея за тя”. Си слышавъ Володимиръ, рече
110,9 посъланымъ отъ цьсарю: “Глаголите цьсарема тако: Яко азъ
110,10 крьщю ся, яко испытахъ преже сихъ дьнии законъ
110,11 вашь, и есть ми любъ и вѣра ваша и служение,
110,12 еже ми съповѣдаша посълании нами мужи”. И
110,13 си слышавъша цьсаря, рада быста, и умолиста
110,14 сестру свою, именьмь Анну, и посъласта къ Володимиру,
110,15 глаголюща: “Крьсти ся, тъгда посълевѣ сестру
110,16 свою къ тобѣ”. И рече Володимиръ: “Да пришьдъше
110,17 съ сестрою вашею, крьстять мя”. И послушаста
110,18 цьсаря, и посъласта сестру свою и сановьникы
110,19 нѣкыя и прозвутеры. Она же не хотяше
110,20 ити: “Яко въ поганыя, рече, иду; луче бы
110,21 ми сьде умрети”. И рѣста еи брата: “Егда како
110,22 обратить Богъ Русьскую землю въ покаяние,
110,23 а Грьчьскую землю избавиши отъ лютыя рати.
110,24 Видиши ли, колико зъло сътвориша Русь Грькомъ?
110,25 и нынѣ, аще не идеши, тоже имуть сътворити
110,26 намъ”. И одъва ю принудиша. Она же,
110,27 въсѣдъши въ кубару цѣловавъши ужикы своя
111,1 съ плачьмь, поиде чресъ море. Яко приде къ
111,2 Кърсуню, и излѣзоша Кърсуняне съ поклонъмь,
111,3 и въведоша ю въ градъ, и посадиша ю въ
111,4 полатѣ. По Божию же строю въ се время разболѣ ся
111,5 Володимиръ очима, и не видяше ничьтоже, и
111,6 тужаше вельми, и не домышляше, чьто сътворити.
111,7 И посъла къ нему цьсарица, рекущи: “Аще хощеши
111,8 избыти болѣзни сея, то въскорѣ крьсти ся, аще
111,9 ли, то не имаши избыти сего”. Си слышавъ
111,10 Володимиръ, рече: “Аще истина будеть,
111,11 то по истинѣ великъ Богъ хрьстияньскъ”. И повелѣ
111,12 крьстити ся. Епископъ же Кърсуньскыи съ попы
111,13 цьсаричины, огласивъ, крьсти Володимира. Яко
111,14 възложи руку на нь, и абие прозьрѣ. Видивъ же
111,15 се Володимиръ напрасное исцѣление, и прослави
111,16 Бога, рекъ: “Топьрво увѣдѣхъ Бога истиньнаго”.
111,17 Се же видѣвъше дружина его, мънози
111,18 крьстиша ся. Крьсти же ся въ цьркъви святаго Василия;
111,19 и есть цьркы та стоящи въ Кърсуни градѣ, на
111,20 мѣстѣ посредѣ града, идѣже търгъ дѣють Кърсуняне;
111,21 полата же Володимиря въскраи
111,22 цьркъве стоить и до сего дьне, а цьсаричина полата за
111,23 олтарьмь. По крьщении же приведе цьсарицю на
111,24 обручение. Се же не съвѣдуще право, глаголють, яко
111,25 крьстилъ ся есть въ Кыевѣ, инии же рѣша: въ
111,26 Василевѣ, друзии же инако съказающе.
111,27 Крьщену же Володимиру, предаша ему вѣру хрьстияньскую,
112,1 рекуще сице: “Да не прельстять тебе нѣции
112,2 отъ еретикъ, нъ вѣруи сице, глаголя:
112,3 “Вѣрую въ единого Бога, Отьца, вьседьржителя,
112,4 творьца небу и земли”, и до коньца вѣру сию. И пакы:
112,5 “Вѣрую въ единого Бога, Отьца не рожена, и въ единого
112,6 Сына рожена, въ единъ Святыи Духъ исходящь:
112,7 три собьства съвьршена, мысльна, раздѣляема
112,8 числъмь и собьствьнымь собьствъмь, а не
112,9 божьствъмь; раздѣляеть бо ся нераздѣльно, и
112,10 съвъкупляеть ся неразмѣсьно. Отьць бо Богъ Отьць,
112,11 присно сыи пребываеть въ отьчьствѣ, не роженъ,
112,12 безначальнъ, начало и вина вьсѣмъ, единѣмь нерожениемь
112,13 старѣи сыи Сыну и Духови, отъ негоже ражаеть ся
112,14 Сынъ преже вьсѣхъ вѣкъ, исходить же Духъ
112,15 Святыи без времене и бес тѣла; въкупѣ Отьць,
112,16 въкупѣ Сынъ, въкупѣ Духъ Святыи есть. Сынъ подобьно-
112,17 сущьнъ Отьцю, рожениемь
112,18 тъчию разньствуя Отьцю и Духу. Духъ
112,19 есть пресвятыи, Отьцю и Сыну подобьносущьнъ и
112,20 присносущьнъ. Отьцю бо отьцьство, Сыну же сыновьство,
112,21 Святому Духу исхожение. И Отьць бо
112,22 въ Сынъ ли въ Духъ преступаеть, ни Сынъ въ
112,23 Отьца и Духа, и Духъ въ Сынъ ли въ Отьць; неподвижьна
112,24 бо своиствия. Не трие бози, единъ Богъ,
112,25 понеже едино божьство въ трьхъ лицихъ. Хотѣниемь
112,26 же Отьца и Духа свою съпасти тварь, отьчьскыхъ
112,27 ядръ, ихъже не отъступи, съшьдъ, и въ
113,1 {человѣчьское | дѣвичьское} ложе пречистое, акы Божие сѣмя, въшьдъ, и
113,2 плъть съдушьну, словесьну же и умьну, не преже
113,3 бывъшю, приимъ, изиде Богъ въплъщенъ, родивъ ся
113,4 неиздреченьнѣ, и дѣвьство Матери съхрани нетьлѣньно,
113,5 ни съмятение, ни размѣшение, ни измѣнения пострадавъ,
113,6 нъ пребывъ, еже бѣ, бысть еже не
113,7 бѣ, приимъ рабии зракъ истиною, а не мьчьтаниемь,
113,8 вьсячьскы, развѣ грѣха, намъ подобьнъ
113,9 бывъ. Волею бо роди ся, волею възалъка, волею
113,10 въжада, волею труди ся, волею устраши ся, волею
113,11 умьре, истиною, а не мьчьтаниемь; вься естьствьная
113,12 не оклеветаны страсти чловѣчьства. Распятъ
113,13 же ся, съмьрти въкуси безгрѣшьныи, въскрьсъ въ своеи
113,14 плъти, не видѣвъши истьлѣния на небеса възиде, и
113,15 сѣде одесную Отьца; придеть же пакы съ славою
113,16 судити живымъ и мьртвымъ; якоже възиде съ
113,17 своею и плътию, тако сънидеть. Къ симъ едино
113,18 крьщение исповѣдаю водою и Духъмь, приступаю
113,19 къ пречистымъ таинамъ, вѣрую въ истину тѣло и
113,20 кръвь. Приемлю цьркъвьная предания, и кланяю ся
113,21 чьстьнымъ иконамъ. Кланяю ся древу чьстьному, крьсту и вьсякому
113,22 крьсту и святымъ мощьмъ и святымъ съсудомъ. Вѣруи
113,23 же седми съборъ святыхъ отьць, иже есть
113,24 пьрвыи въ Никеи 300 и 18, иже прокляша
113,25 Арья, и проповѣдаша вѣру непорочьну и
113,26 праву. Въторыи съборъ въ Костянтинѣградѣ святыхъ
113,27 отьць 100 и 50, иже прокляша Македония духоборьца,
113,28 и проповѣдаша Троицю единосущьну.
114,1 Третии же съборъ въ Ефесѣ святыхъ отьць 200 на
114,2 Нестория, егоже прокльнъше, проповѣдаша святую
114,3 Богородицю. Четвьртыи съборъ въ Халкидонѣ святыхъ
114,4 отьць 600 и 30 на Евтуха и Диоскора, еюже
114,5 прокляша святии отьци, изгласивъше съвьршена
114,6 Бога и съвьршена чловѣка Господа нашего Иисуса
114,7 Христа. 5 съборъ въ Цьсарѣградѣ святыхъ отьць 100 и
114,8 60 и 5 на Оригенова предания и на Евагрия,
114,9 ихъже прокляша святии отьци. 6-и съборъ въ
114,10 Цьсариградѣ святыхъ отьць 100 и 70 на Сергия и
114,11 Кура, ихъже прокляша святии отьци. 7-и съборъ
114,12 въ Никеи святыхъ отьць 300 и 50 прокляша, иже
114,13 не поклоняють ся иконамъ.
114,14 Не преимаи же учения отъ Латынъ, ихъже
114,15 учение развращено: вълѣзъше бо въ цьркъвь, не
114,16 поклоняють ся иконамъ, нъ стоя, поклонить ся, и,
114,17 поклонивъ ся, напишеть крьстъ на земли, и цѣлуеть, и
114,18 въставъ простъ, станеть на немь ногама; да
114,19 легъ, цѣлуеть, а въставъ попираеть. Сего бо апостоли
114,20 не предаша; предали суть апостоли крьстъ поставленъ
114,21 цѣловати, и иконы предаша. Лука бо
114,22 еуангелистъ, пьрвое напьсавъ, посъла въ Римъ. Якоже
114,23 глаголеть Василии: икона на пьрвыи образъ приходить.
114,24 Пакы же и землю глаголють матерью. Да аще
114,25 имъ есть земля мати, то отьць имъ есть небо:
114,26 искони сътвори Богъ небо, таже землю. Тако
114,27 глаголють: Отьче нашь, иже еси на небеси. Аще ли по
114,28 сихъ разуму земля есть мати, то почьто плюете на
115,1 матерь свою? Да сѣмо ю лобъзаете, а сѣмо ю
115,2 осквьрняете. Сего же Римляне преже не творяху,
115,3 нъ исправляху на вьсѣхъ съборѣхъ, съходяще ся
115,4 отъ Рима и отъ вьсѣхъ престолъ. На пьрвѣмь
115,5 съборѣ, иже на Арья въ Никеи: отъ Рима Сильвестръ
115,6 посъла епископы и прозвутеры, отъ Александрия
115,7 Афанасии, отъ Цьсаряграда Митрофанъ
115,8 посъла епископы отъ себе; и тако исправливаху вѣру. На
115,9 въторѣмь же съборѣ: отъ Рима Дамасъ, а отъ
115,10 Александрия Тимофѣи, отъ Антиохия Мелетии,
115,11 Курилъ Иерусалимьскыи, Григории Богословьць. На третиемь
115,12 же съборѣ: Келестинъ Римьскыи, Курилъ Александриискыи,
115,13 Увеналии Иерусалимьскыи. На четвьртѣмь
115,14 же съборѣ: Леонтии Римьскыи, Анатолии
115,15 Цьсаряграда, Увеналии Иерусалимьскыи. На пятѣмь
115,16 съборѣ Римьскыи Вилигии, Евтухии Цьсаряграда,
115,17 Аполинарии Александриискыи, Домнинъ Антиохиискыи.
115,18 На шестѣмь съборѣ: отъ Рима Агафонъ,
115,19 Георгии Цьсаряграда, Феофанъ Антиохиискыи, отъ
115,20 Александрия Петръ мьнихъ. На седьмѣмь съборѣ:
115,21 Андрианъ отъ Рима, Тарасии Цьсаряграда, Политианъ
115,22 Алексаньдриискыи, Федоритъ Антиохиискыи,
115,23 Илия Иерусалимьскыи. Сии вьси, съ
115,24 своими епископы съходяще ся, исправляху.
115,25 По седьмѣмь же съборѣ Петръ Гугнивыи съ инѣми,
115,26 шьдъ въ Римъ, и престолъ въсхвативъ, и разъврати
116,1 вѣру, отвьргъ ся престола Иерусалимьскаго и Александриискаго
116,2 и Цьсаряграда и Антиохиискаго. И
116,3 възмутиша Италию вьсю, сѣюще учение
116,4a свое разьно. Тѣмь же дьржать не въ едино съглашение вѣру, нъ разьно:
116,4b ови бо попове, одиною женою оженивъ ся,
116,5 служать, а друзии, до седми женъ
116,6 поимающе, служать; ина же мънога разьно дьржать, ихъже блюди ся учения;
116,7 пращають же грѣхы на дару, еже есть зълѣе
116,8 вьсего. Богъ да съхранить тя отъ сего”.
116,9 Володимиръ же по семь, поимъ цьсарицю и Анастаса
116,10 и попы Кърсуньскыя съ мощьми святаго Климента
116,11 и Фива, ученика его, и поима съсуды
116,12 цьркъвьныя и иконы на благословение себѣ. Постави же
116,13 цьркъвь въ Кърсуни на горѣ, иже съсыпаша
116,14 средѣ града, крадуще присъпу, яже
116,15 цьркы стоить и до сего дьне. Възя же, ида,
116,16 мѣдянѣ дъвѣ капищи и 4 конѣ мѣдяны,
116,17 иже и нынѣ стоять за святою Богородицею, яко иже не вѣдуще
116,18 мьнять я мраморяны суща. Въдасть
116,19 же за вѣно Кърсунь Грькомъ цьсарицѣ
116,20 дѣля, а самъ приде Кыеву. И яко приде, повелѣ
116,21 кумиры испроврещи, овы исѣщи, а
116,22 другыя огневи предати; Перуна же повелѣ привязати
116,23 коневи къ хвосту и влещи съ горы
116,24 по Боричеву на Ручаи, 12 мужа пристави
116,25 бити жьзльемь. Се же не яко древу чюющю,
116,26 нъ на поругание бѣсу, иже прельщаше симь
117,1 образъмь человѣкы, да възмьстие прииметь отъ человѣкъ.
117,2 “Велии еси, Господи, чюдьна дѣла твоя!” Вьчера чьстимъ отъ
117,3 человѣкъ, дьньсь поругаемъ. Влекому же ему
117,4 по Ручаеви къ Дънѣпру, плакаху ся его невѣрьнии
117,5 людие, еще бо не бяху прияли крьщения.
117,6 И привлекъше, въринуша и въ Дънѣпръ. И пристави
117,7 Володимиръ, рекъ: “Аще къде пристанеть
117,8 вы то отрѣваите его отъ берега, доньдеже порогы
117,9 проидеть, тъгда охабите ся его”. Они
117,10 же повелѣное сътвориша. Яко пустиша и,
117,11 проиде сквозѣ порогы, извьрже и вѣтръ на
117,12 рѣнь, яко
117,13 и до сего дьне словеть Перуня Рѣнь. По семь же Володимиръ
117,14 посъла по вьсему граду, глаголя: “Аще не обрящеть ся
117,15 къто заутра на рѣцѣ, богатъ, ли убогъ,
117,16 или нищь, или работьнъ, противникъ мънѣ да будеть”.
117,17 Се слышавъше людие, съ радостию идяху,
117,18 радующе ся и глаголаху: “Аще бы се не добро было,
117,19 не бы сего кънязь и боляре прияли”. Наутрия
117,20 же изиде Володимиръ съ попы цьсаричины и
117,21 Кърсуньскыми на Дънѣпръ, и съниде ся
117,22 бещисла людии. И вълѣзоша въ воду, и стояху
117,23 ови до шиѣ, а друзии до пьрсии, младии
117,24 же отъ брега, друзии же младеньци
117,25 дьржаще, съвьршении же бродяху, попове же
117,26 стояще, молитвы творяху. И бяше видѣти
118,1 радость велику на небеси и на земли, толико душь съпасаемыхъ;
118,2 а дияволъ, стеняше, глаголя: “Увы мънѣ,
118,3 яко отъсюду прогонимъ есмь! Сьде бо мьнѣхъ
118,4 жилище имѣти, яко сьде не суть учения апостольская,
118,5 ни суть вѣдуще Бога, нъ веселяхъ ся о
118,6 служьбѣ ихъ, еже служаху мънѣ. И се уже побѣжаемъ
118,7 есмь отъ невѣгласа сего, а не отъ апостолъ и
118,8 мученикъ, и не имамь уже цьсарьствовати въ странахъ
118,9 сихъ”. Крьстивъшимъ же ся людьмъ, идоша къжьдо
118,10 въ домы своя. Володимиръ же, радъ бывъ, яко
118,11 позна Бога самъ и людие его, и възьрѣвъ на
118,12 небо и рече. “Боже, великыи сътворивыи небо и землю!
118,13 призьри на новыя люди сия, даи же имъ, Господи,
118,14 увѣдѣти тебе, истиньнаго Бога, якоже увѣдѣша
118,15 страны хрьстияньскыя; и утвьрди въ нихъ вѣру
118,16 праву и несъвратьну, и мънѣ помози, Господи, на супротивьнаго
118,17 врага, да, надѣя ся на тя и на твою
118,18 дьржаву, побѣжю къзни его”. И се рекъ, повелѣ
118,19 рубити цьркъви и поставляти по мѣстомъ,
118,20 идеже стояша кумири; и постави цьркъвь святаго
118,21 Василья на хълмѣ, идеже стояше кумиръ
118,22 Перунъ и прочии, идеже требы творяху
118,23 кънязь и людие. И нача ставити по градомъ цьркъви
118,24 и попы, и люди на крьщение приводити по
118,25 вьсѣмъ градомъ и селомъ. Посълавъ, нача поимати у
118,26 нарочитыя чади дѣти и даяти на учение
119,1 кънижьное; матере же чадъ своихъ плакаху ся по
119,2 нихъ, еще бо ся бяху не утвьрдилы вѣрою,
119,3 нъ акы по мьртвьцихъ плакаху ся.
119,4 Симъ же раздаяномъ на учение кънижьное,
119,5 събысть ся пророчьство на Русьскои земли, глаголющее: “Въ
119,6 оны дьни услышать глусии словеса кънижьная,
119,7 яснъ будеть языкъ гугнивыхъ”. Си бо не бѣша
119,8 преди слышали словеса кънижьная, нъ по
119,9 Божию строению и по милости своеи помилова Богъ,
119,10 якоже рече пророкъ: “Помилую, егоже аще
119,11 хощю”. Помилова бо ны “Пакы банею
119,12 бытья и обновлениемь Духа”, по изволению Божию,
119,13 а не по нашимъ дѣломъ. Благословенъ Господь Иисусъ Христосъ, иже възлюби
119,14 новыя люди, Русьскую землю, и просвѣти
119,15 ю крьщениемь святымь. Тѣмь же и мы припадаемъ
119,16 къ нему, глаголюще: “Господи Иисусе Христе! Чьто ти въздамы
119,17 о вьсѣхъ, яже ты въздасть намъ, грѣшьнымъ
119,18 сущимъ? Недоумѣемъ противу даромъ твоимъ
119,19 въздати. “Велии бо еси, и чюдьна
119,20 дѣла твоя, и величию твоему нѣсть коньца! Въ родъ
119,21 и родъ въсхвалимъ дѣла твоя”. Рекуще съ
119,22 Давыдъмь: “Придѣте, въздрадуимъ ся Господеви, въскликнѣмъ
119,23 Богу Съпасу нашему. Варимъ лице его
119,24 исповѣданиемь”; “Исповѣдающе ся ему, яко
119,25 благъ; яко въ вѣкы милость его”; яко “избавилъ ны
119,26 есть отъ врагъ нашихъ”, рекъше отъ идолъ служитель.
119,27 И пакы рьцѣмъ съ Давыдъмь: “Въспоите Господеви пѣснь нову,
119,28 въспоите Господеви, вься земля. Въспоите Господеви, благословите имя
119,29 его. Благовѣстите дьнь отъ дьне съпасение его. Възвѣстите
119,30 въ языцѣхъ славу его, въ вьсѣхъ людьхъ
119,31 чюдеса его. Яко велии Господь хвальнъ зѣло”, “И
120,1 величию его нѣсть коньца”. Колика ти радость!
120,2 не единъ, ни дъва съпасаеть ся. Рече бо Господь: “Яко радость
120,3 бываеть на небеси о единомь грѣшьницѣ кающемь ся”.
120,4 Се же не единъ, ни дъва, нъ бещисльное
120,5 мъножьство къ Богу приступиша, святымь крьщениемь
120,6 просвѣщени. Якоже пророкъ рече: “Въскроплю
120,7 на вы воду чисту, и очистите ся отъ идолъ вашихъ
120,8 и отъ грѣхъ вашихъ”. И пакы другыи пророкъ
120,9 рече: “Къто яко Богъ отъемля грѣхы и преступая
120,10 неправьду? Яко хотяи милостивъ есть. Тъ обратить,
120,11 и ущедрить ны, и погрузить грѣхы наша
120,12 въ глубинѣ”. Ибо Павелъ глаголеть: “Братия!
120,13 елико насъ крьсти ся въ Христа Иисуса, въ съмьрть его
120,14 крьстихомъ ся; погребохомъ ся убо съ нимь
120,15 крьщениемь въ съмьрть; да якоже въста Христосъ отъ мьртвыхъ
120,16 съ славою Отьчею, якоже и мы въ обновлении
120,17 жития поидемъ”. И пакы: “Ветъхая мимо
120,18 идоша, и се быша новая”. “Нынѣ приближи ся
120,19 намъ съпасение. Нощь успѣ, а дьнь приближи ся”. “Имь же
120,20 приведение обрѣтохомъ вѣрою въ благость сию,
120,21 имьже хвалимъ ся и стоимъ”. “Нынѣ же свободивъше ся
120,22 отъ грѣха, поработивъше ся Господеви, имате
120,23 плодъ вашь въ священие”. Тѣмь же дължьни есмы работати
120,24 Господеви, радующе ся ему. Рече бо Давыдъ: “Работаите
120,25 Господеви съ страхъмь, и радуите ся ему съ трепетъмь”.
120,26 Мы же въпиемъ къ Владыцѣ Богу нашему,
120,27 глаголюще: “Благословенъ Господь, иже не дасть насъ въ ловитву зубомъ
120,28 ихъ! Сѣть съкруши ся, и мы избавлени
120,29 быхомъ” отъ прельсти дияволя. “И погыбе память
120,30 его съ шюмъмь. И Господь въ вѣкы пребываеть”, хвалимъ
120,31 отъ Русьскыхъ сыновъ, пѣваемъ въ Троици, а дѣмони
121,1 проклинаеми отъ вѣрьныхъ мужь и отъ говѣиныхъ
121,2 женъ, иже прияли суть крьщение и покаяние
121,3 въ отъпущение грѣховъ, новии людие хрьстьяньстии,
121,4 избьрании Богъмь.
121,5 Володимиръ просвѣщенъ самъ и сынове его и
121,6 земля его. Бѣ бо у него сыновъ 12: Вышеславъ,
121,7 Изяславъ, Святопълкъ, Ярославъ, Вьсеволодъ,
121,8 Святославъ, Мьстиславъ, Борисъ, Глѣбъ, Станиславъ,
121,9 Позвиздъ, Судиславъ. И посади Вышеслава
121,10 въ Новѣгородѣ, а Изяслава въ Полотьскѣ, а
121,11 Святопълка въ Туровѣ, а Ярослава въ Ростовѣ.
121,12 Умьръшю же старѣишему Вышеславу въ Новѣгородѣ,
121,13 посади Ярослава въ Новѣгородѣ, а Бориса въ
121,14 Ростовѣ, а Глѣба въ Муромѣ, Святослава въ
121,15 Деревѣхъ, Вьсеволода въ Володимири, Мьстислава
121,16 Тьмуторокани. И рече Володимиръ: “Се не добро, есть
121,17 мало градъ около Кыева”. И нача ставити грады
121,18 по Деснѣ, и по Въстри, и по Трубешеви,
121,19 и по Сулѣ, и по Стугнѣ; и нача нарубати
121,20 мужѣ лучьшѣѣ отъ Словѣнь, и отъ Кривичь, и
121,21 отъ Чюди, и отъ Вятичь, и отъ сихъ насели
121,22 грады; бѣ бо рать отъ Печенѣгъ; и бѣ воюя ся
121,23 съ ними и одолая имъ.
121,24 Въ лѣто 6497. Въ лѣто 6498. Въ лѣто 6499. По семь же Володимиру
121,25 живушю въ законѣ хрьстьяньстѣ, помысли съзьдати
121,26 цьркъвь святыя Богородица; и посълавъ, приведе
121,27 мастеры отъ Грькъ. И начьнъшю же зьдати,
121,28 и яко съконьча зижа, украси ю иконами, и
121,29 поручивъ ю Анастасу Кърсунянину, и попы Кърсуньскыя
122,1 пристави служити въ неи; въда
122,2 ту вьсе, еже бѣ възялъ въ Кърсуни: иконы и
122,3 съсуды и крьсты.
122,4 Въ лѣто 6500. Володимиръ заложи
122,5 Бѣлъгородъ, и наруби въ нь отъ инѣхъ градъ,
122,6 и мъного людии съведе въ нь; бѣ бо любя
122,7 градъ сь.
122,8 Въ лѣто 6501. Иде Володимиръ на Хърваты.
122,9 Пришьдъшю же ему съ воины Хърватьскыя,
122,10 и се Печенѣзи придоша по онои странѣ
122,11 отъ Сулы; Володимиръ же поиде противу имъ, и
122,12 сърѣте я на Трубеши, на бродѣ, къде нынѣ
122,13 Переяславль. И ста Володимиръ на сеи странѣ,
122,14 а Печенѣзи на онои. И не смѣяху си на ону
122,15 страну, ни они на сю страну. И приѣха кънязь
122,16 Печенѣжьскыи къ рѣцѣ, и възъва Володимира, и
122,17 рече ему: “Выпусти ты свои мужь, а я свои, да ся
122,18 борета; да аще твои мужь ударить моимь,
122,19 да не воюемъ за три лѣта, и разидоша ся разьно. Аще ли нашь мужь
122,20 ударить, да воюемъ за три лѣта”.
122,21 Володимиръ же, пришьдъ въ товары,
122,22 посъла по товаромъ биричѣ, глаголя: “Нѣту ли
122,23 такого мужа, иже бы ся ялъ съ Печенѣжинъмь?”
122,24 И не обрѣте ся никъдеже. И заутра приѣхаша
122,25 Печенѣзи, и свои мужь приведоша, а
122,26 нашихъ не бысть. И поча тужити Володимиръ,
122,27 съля по вьсѣмъ воемъ. И приде единъ мужь старъ
122,28 къ нему, и рече ему: “Къняже! Есть у мене единъ
122,29 сынъ дома мьньшии, а съ четырьми есмь вышьлъ,
123,1 а онъ дома. Отъ дѣтьства своего нѣсть къто имь
123,2 ударилъ. Единою бо ми сварящю,
123,3 оному мьнущю усние, разгнѣвавъ ся на мя, претърже
123,4 череви рукама”. Кънязь же, се слышавъ,
123,5 радъ бысть, и посъла по нь, и приведоша и къ
123,6 кънязю, и кънязь повѣда ему вься. Сь же рече:
123,7 “Къняже! Не вѣмь, могу ли съ нь, да искусите
123,8 мя: нѣту ли быка велика и сильна?” И
123,9 налѣзоша быкъ сильнъ, и повелѣ раздражити
123,10 быка; и възложиша на нь желѣзо
123,11 горяче, и пустиша быка. И побѣже быкъ мимо
123,12 нь, и похвати быка рукою за бокъ, и выня
123,13 кожю съ мясы, елико ему рука зая. И рече
123,14 ему Володимиръ: “Можеши ся съ нимь бороти”.
123,15 И наутрия придоша Печенѣзи, и почаша зъвати:
123,16 “Нѣсть ли мужа? Се, нашь доспѣлъ”. Володимиръ
123,17 же повелѣ тои нощи облещи ся въ оружие,
123,18 И выпустиша Печенѣзи
123,19 мужь свои, бѣ превеликъ зѣло и страшьнъ.
123,20 И выступи мужь Володимирь, и въздрѣвъ
123,21 и Печенѣжинъ, и посмѣя ся, бѣ бо средьнии тѣлъмь.
123,22 И размѣривъше межю обѣма пълкома, и пустиша
123,23 я къ собѣ. И яста ся, и почаста ся
123,24 крѣпъко дьржати, и удави Печенѣжина въ руку
123,25 до съмьрти, и удари имь о землю. И кликнуша,
123,26 и Печенѣзи побѣгоша, и Русь погънаша по
123,27 нихъ, сѣкуще, и прогънаша ихъ. Володимиръ же,
123,28 радъ бывъ, и заложи градъ на бродѣ томь,
124,1 и нарече и Переяславль, зане перея славу отрокъ.
124,2 Володимиръ же великъмь мужьмь
124,3 сътвори того и отьца его. Володимиръ же възврати ся
124,4/5 въ Кыевъ съ побѣдою и славою великою.
124,6 Въ лѣто 6502.
124,7 Въ лѣто 6503.
124,8 Въ лѣто 6504. Володимиръ, видѣвъ цьркъвь
124,9 съвьршену, и въшьдъ въ ню, помоли ся Богу, глаголя: “Господи
124,10 Боже! Призьри съ небесе, и вижь. И посѣти винограда
124,11 своего. И съвьрши, яже насади десница твоя,
124,12 новыя люди си, имъже обратилъ еси сьрдьца въ
124,13 разумъ, познати тебе, истиньного Бога. И призьри
124,14 на цьркъвь сию, юже съзьдахъ, недостоиныи
124,15 рабъ твои, въ имя рожьшая тя Матере приснодѣвыя
124,16 Богородица. Аже къто помолить ся въ цьркъви сеи,
124,17 то услыши молитву его, и отъпусти грѣхы его, молитвы ради пресвятыя
124,18 Богородица”. И помоливъшю ся ему, рекъ сице: “Се, даю цьркъви
124,19 сеи святѣи Богородици отъ имѣния своего и отъ градъ
124,20 моихъ десятую часть”. И положи, написавъ,
124,21 клятву въ цьркъви сеи, рекъ: “Аще къто сего посудить,
124,22 да будеть проклятъ”. И въдасть десятину Анастасу
124,23 Кърсунянину. И сътвори же праздьникъ великъ въ
124,24 тъ дьнь боляромъ и старьцемъ градьскымъ, и убогымъ
124,25 раздая имѣние мъного. По сихъ же придоша
124,26 Печенѣзи къ Василеву, и Володимиръ съ малъмь
124,27 дружины изиде противу имъ. И съступивъшемъ ся,
124,28 не могъ Володимиръ стьрпѣти противу, подъбѣгъ ста
125,1 подъ мостъмь, одъва укры ся противьныхъ. И тъгда
125,2 обѣща ся Володимиръ поставити цьркъвь въ Василевѣ
125,3 святаго Преображения, бѣ бо въ тъ дьнь
125,4 Господьне, егда си бысть сѣча. Избывъ
125,5 же Володимиръ сего, постави цьркъвь, и {сътвори | творяше}
125,6 праздьникъ великъ, варя 300 проваръ меду. И
125,7 съзъваше боляры своя, и посадьникы, и старѣишины
125,8 по вьсѣмъ градомъ, и люди мъногы, и раздаваше
125,9 300 гривьнъ убогымъ. И праздьнова кънязь
125,10 дьнии 8, и възвращашеть ся Кыеву на Усъпение
125,11 святыя Богородица, и ту пакы творяше праздьникъ свѣтьлъ,
125,12 съзываше бещисльное мъножьство народа. Видя
125,13 же люди хрьстияны суща, радоваше ся душею
125,14 и тѣлъмь. И тако по вься лѣта творяше. Бѣ бо
125,15 любя кънижьная словеса. Слыша бо единою еуангелие
125,16 чьтомо: “Блажени милостивии, яко ти помиловани будуть”;
125,17 и пакы: “Продаите имѣния ваша и дадите нищимъ”;
125,18 и пакы: “Не съкрываите собѣ съкровищь на земли,
125,19 идеже тьля тьлить и татье подъкоповають; нъ съкрываите
125,20 собѣ съкровище на небесехъ, идеже ни
125,21 тьля тьлить, ни татие крадуть”; и Давыда глаголюща:
125,22 “Блаженъ мужь милуя и дая”; Соломона слыша
125,23 глаголюща: “Дая нищю, Богу въ заимъ даеть”. Си
125,24 слышавъ, повелѣ вьсяку нищю и убогу
125,25 приходити на дворъ къняжь и възимати вьсяку потребу,
125,26 питие и ядение, и отъ скотьниць кунами.
125,27 Устрои же и се, рекъ, яко “Немощьнии и больнии не
125,28 могуть долѣсти двора моего”, повелѣ пристроити
126,1 кола, и въскладъше хлѣбы, мяса, рыбы и
126,2 овощь разьноличьныи, медъ въ бъчькахъ, а въ
126,3 другыхъ квасъ, возити по граду, въпрашающемъ:
126,4 “къде больнии нищь, не могы ходити?” И тѣмъ
126,5 раздаваху на потребу. Се же пакы творяше
126,6 людьмъ своимъ: по вься недѣля устави на дворѣ
126,7 въ гридьници пиръ творити, и приходити боляромъ
126,8 и гридьмъ и сътьскымъ и десятьскымъ и
126,9 нарочитымъ мужемъ, и при кънязи и бес кънязя. И
126,10 бываше мъножьство отъ мясъ и отъ скота и отъ звѣрины, и
126,11 бяше изобилию вьсего. Егда же
126,12 подъпьяхуть ся, начьняху ръпътати на кънязя,
126,13 глаголюще: “Зъло есть нашимъ главамъ, да намъ
126,14 ясти древяными лъжицами, а не сьребряными”.
126,15 Се слышавъ Володимиръ, повелѣ исковати
126,16 лъжицѣ сьребряны ясти дружинѣ, рекъ сице,
126,17 яко “Сьребръмь и златъмь не имамь налѣсти дружины,
126,18 а дружиною налѣзу сьребро и злато, якоже
126,19 дѣдъ мои и отьць мои доиска ся дружиною злата
126,20 и сьребра”. Бѣ бо Володимиръ любя дружину, и
126,21 съ ними думая о строи земльнѣмъ и о ратьхъ
126,22 и о уставѣ земльнѣмь. И бѣ живя съ кънязи
126,23 окольними миръмь, съ Болеславъмь Лядьскымь
126,24 и съ Стефанъмь Угьрьскымь и съ Андронихъмь
126,25 Чешьскымь. И бѣ миръ межи ими и
126,26 любы. И живяше Володимиръ въ страсѣ Божьи,
126,27 и умъножиша ся разбоеве, и рѣша епископи
126,28 Володимиру: “Се умъножиша ся разбоиници; почьто
127,1 не казниши?” Онъ же рече: “Бою ся грѣха”.
127,2 Они же рѣша ему: “Ты поставленъ еси отъ Бога на
127,3 казнь зълымъ, а на милование добрымъ. Достоить
127,4 ти казнити разбоиника, нъ съ испытаниемь”. Володимиръ
127,5 же отвьргъ виры, и нача казнити
127,6 разбоиникы. И рѣша епископи и старьци: “Рать мънога,
127,7 а еже вира, то на оружии и на конихъ буди”.
127,8 И рече Володимиръ: “Тако буди”. И живяше Володимиръ
127,9 по устроению дѣдьню и отьню.
127,10 Въ лѣто 6505. Володимиру шьдъшю Новугороду
127,11 по вьрховьниѣ воѣ на Печенѣгы, бѣ
127,12 бо рать велика бес престани, въ сеже время
127,13 увѣдѣша Печенѣзи, яко кънязя нѣту, придоша,
127,14 и сташа около Бѣлагорода. И не дадяху
127,15 вылѣсти из града, и бѣ бо гладъ великъ въ градѣ,
127,16 и не бѣ льзѣ Володимиру помочи, не бѣ бо
127,17 вои, Печенѣгъ же мъножьство мъного.
127,18 И удължиша ся остояче въ градъ, и бѣ гладъ великъ.
127,19 И сътвориша вѣче въ градѣ, и рѣша: “Се
127,20 хочемъ помрети отъ глада, а отъ кънязя помощи
127,21 нѣтъ. Да луче ли ны помрети? Въдадимъ ся
127,22 Печенѣгомъ, да кого ли оживять, кого ли
127,23 умьртвять; уже помираемъ отъ глада”. И тако
127,24 съвѣтъ сътвориша. Бѣ же единъ старьць не былъ
127,25 въ вѣчи томь, и въпрашаше: “Чьто ради вѣче сътвориша
127,26 людие?” Повѣдаша ему, яко утро хотять ся
127,27 людие предати Печенѣгомъ. Сь же, слышавъ, посъла
127,28 по старѣишины градьскыя, и рече имъ: “Слышахъ,
128,1 яко хощете ся передати Печенѣгомъ”. Они же
128,2 рѣша: “Не сътьрпять людие глада”. И рече имъ:
128,3 “Послушаите мене, не предаите ся за три дьни,
128,4 и азъ чьто вы велю, то сътворите”. Они же ради
128,5 обѣщаша ся послушати. И рече имъ: “Съберѣте
128,6 по гърсти овьса, или пьшеницѣ, или отрубъ”.
128,7 Они же, шьдъше, ради сънискаху. И повелѣ женамъ
128,8 сътворити цѣжь, въ немьже варять кысель,
128,9 и повелѣ копати кладязь и въставити тамо
128,10 кадь и налья цѣжа кадь. И повелѣ копати
128,11 другыи кладязь и въставити тамо другую кадь, и
128,12 повелѣ искати меду. Они же, шьдъше, възяша
128,13 лукъно меду, бѣ бо погребено въ къняжи медуши.
128,14 И повелѣ росытити вельми и въльяти въ кадь
128,15 въ друзѣмь кладязи. Утро же посълати повелѣ
128,16 по Печенѣгы. И Гражане же рѣша, шьдъше
128,17 къ Печенѣгомъ: “Поимѣте къ собѣ таль нашь, а
128,18 васъ до 10 мужь идете въ градъ, да видите,
128,19 чьто ся дѣеть въ градѣ нашемь”. Печенѣзи же ради
128,20 бывъше, мьняще, яко хотять ся предати,
128,21 а сами избьраша лучьшиѣ мужѣ
128,22 въ градѣхъ, и посълаша въ града, да розглядають,
128,23 чьто ся дѣеть въ градѣ. И придоша въ градъ,
128,24 и рекоша имъ людие: “Почьто губите
128,25 себе, коли можете престояти насъ? Аще стоите
128,26 10 лѣтъ, чьто можете сътворити намъ? Имѣемъ
128,27 бо кърмлю отъ землѣ. Аще ли не вѣруете, да
128,28 видите своима очима”. И приведоша я къ кладязю,
129,1 идѣже цѣжь, и почьрпоша вѣдръмь, и
129,2 льяху въ латъкы. И яко вариша кысель, и поимъше я, и
129,3 придоша къ другому кладязю, и
129,4 почьрпоша сыты, и почаша ясти пьрвое сами,
129,5 потомь же Печенѣзи. И удивиша ся, и рекоша:
129,6 “Не имуть вѣры наши кънязи, аще не ядять сами”.
129,7 Людие налияша кърчагу цѣжа и сыты отъ
129,8 кладязя, и въдаша Печенѣгомъ. Они же, пришьдъше,
129,9 повѣдаша вься бывъшая. И варивъше и
129,10 яша кънязи Печенѣзьстии, и подивиша ся. И
129,11 поимъше тали своя, и онѣхъ пустивъше, въсташа
129,12 отъ града, и въ своя идоша.
129,13 Въ лѣто 6506.
129,14 Въ лѣто 6507.
129,15 Въ лѣто 6508. Престави ся Малъфридь.
129,16/17 Въ сеже лѣто престави ся и Рогънѣдь, мати Ярославля.
129,18 Въ лѣто 6509. Престави ся Изяславъ, отьць
129,19 Брячиславль, сынъ Володимирь.
129,20 Въ лѣто 6510.
129,21 Въ лѣто 6511. Престави ся Вьсеславъ, сынъ Изяславль,
129,22 вънукъ Володимирь.
129,23 Въ лѣто 6512.
129,24 Въ лѣто 6513.
129,25 Въ лѣто 6514.
129,26 Въ лѣто 6515. Пренесени святии въ святую Богородицю.
129,27 Въ лѣто 6516.
129,28 Въ лѣто 6517.
129,29 Въ лѣто 6518.
129,30 Въ лѣто 6519. Престави ся цьсариця Володимиря
129,31 Анна.
130,1 Въ лѣто 6520.
130,2 Въ лѣто 6521.
130,3 Въ лѣто 6522. Ярославу сущю Новѣгородѣ
130,4 и урокъмь дающю Кыеву 2000
130,5 гривьнъ отъ года до года, а тысящю
130,6 Новѣгородѣ гридьмъ раздаваху. И тако
130,7 даяху вьси посадьници Новъгородьстии, а
130,8 Ярославъ сего не даяше Кыеву отьцю
130,9 своему. И рече Володимиръ: “Требите путь, и
130,10 мосты мостите”; хотяшеть бо ити на Ярослава,
130,11 на сына своего, нъ разболѣ ся.
130,12 Въ лѣто 6523. Хотящю Володимиру ити на
130,13 Ярослава, Ярославъ же, посъла за море, приведе
130,14 Варягы, боя ся отьца своего. Нъ Богъ не
130,15 дасть дияволу радости. Володимиру же разболѣвъшю ся,
130,16 въ сеже время бяше у него Борисъ. И
130,17 Печенѣгомъ идущимъ на Русь, и посъла противу
130,18 имъ Бориса, самъ боляше вельми, въ неиже болести
130,19 и съконьча ся мѣсяца иуля въ 15 дьнь.
130,20 Умьре же на Берестовѣмь. И потаиша и, бѣ бо
130,21 Святопълкъ Кыевѣ. Нощию же межю
130,22 клѣтьми проимавъше помостъ, въ ковьръ опрятавъши
130,23 и, ужи съвѣсиша на землю, и възложьше
130,24 и на сани, и везъше, поставиша и въ святѣи
130,25 Богородици, юже бѣ самъ съзьдалъ. Се же увѣдѣвъше
130,26 людие, сънидоша ся бес числа, и плакаша ся
130,27 по немь, боляре акы заступьника земли ихъ,
130,28 убозии акы заступьника и кърмителя. И въложиша
130,29 и въ {кърсту мраморяну | раку мраморяну | гробъ мраморянъ}, съпрятавше тѣло
130,30 его съ плачьмь, блаженаго кънязя. Сь есть новыи
130,31 Костянтинъ великого Рима, иже крьстивъ ся
131,1 самъ, и люди своя: тако и сь сътвори подобьно ему.
131,2 Аще бо бѣ преже въ поганьствѣ, на сквьрньную похоть
131,3 желая, нъ послѣди прилежа къ покаянию,
131,4 якоже вѣщаше апостолъ: “Идеже умъножить ся
131,5a грѣхъ, ту изобильствуеть благодать”.
131,5b omitted
131,5c omitted
131,5d omitted
131,5e omitted
131,5f omitted
131,5g omitted
131,5h omitted
131,5i omitted
131,5j omitted
131,5k omitted
131,5l omitted
131,5m omitted
131,5n omitted
131,5o omitted
131,5p omitted
131,5q omitted
131,5r omitted
131,5s omitted
131,5t omitted
131,5u omitted
131,5v omitted
131,5w omitted
131,5x omitted
131,5y omitted
131,5z omitted
131,5aa omitted
131,5bb Дивьно есть
131,6 се, колико добра сътворилъ Русьскои земли,
131,7 крьстивъ ю. Мы же, хрьстияне суще, не въздаемъ почьстия
131,8 противу оного възданию. Аще бы онъ
131,9 не крьстилъ насъ, то и нынѣ быхомъ были
131,10 въ прельсти дияволи, якоже и прародители наши
131,11 погынуша. Да аще быхомъ имѣли потъщание и
131,12 мольбы приносили Богу за нь, въ дьнь преставления
131,13 его, видя бы Богъ тъщание наше къ нему,
131,14 прославилъ бы и; намъ бо достоить Бога молити
131,15 за нь, понеже тѣмь Бога познахомъ. Нъ дажь
131,16 ти Господь по сьрдьцю твоему, и вься прощения твоя
131,17 испълни, егоже желаше цьсарьства небесьнаго. Дажь
131,18 ти Господь вѣньць съ правьдьными, въ пищи раистѣи
131,19 веселие и ликъствование съ Аврамъмь и съ прочими
131,20 патриархы, якоже Соломонъ рече: “Умьръшю
131,21 правьдьну, не погибнеть упъвание”.
131,22 Сего бо въ память дьржать Русьстии людие,
131,23 поминающе святое крьщение, и прославляють Бога
131,24 въ молитвахъ и въ пѣсньхъ и въ псалъмѣхъ, поюще
131,25 Господеви, новии людие, просвѣщени Духъмь Святымь,
131,26 чающе надежа великаго Бога Съпаса нашего
131,27 Иисуса Христа въздати комужьдо противу трудомъ неиздреченьную
131,28 радость, юже буди улучити вьсѣмъ
131,29 хрьстияномъ.
132,1
132,2 Святопълкъ же сѣде въ Кыевѣ по отьци своемь,
132,3 и съзъва Кыяны, и нача даяти имѣние имъ.
132,4 Они же приимаху, и не бѣ сьрдьце ихъ съ нимь,
132,5 яко братия ихъ быша съ Борисъмь. Борису
132,6 же възвративъшю ся съ вои, не обрѣтъшю Печенѣгъ,
132,7 вѣсть приде къ нему: “Отьць ти умьрлъ”.
132,8 И плака ся по отьци вельми, любимъ бо бѣ отьцьмь
132,9 паче вьсѣхъ. И ста на Альтѣ, пришьдъ.
132,10 Рѣша ему дружина отьня: “Се дружина у
132,11 тебе отьня и вои. Поиди, сяди въ Кыевѣ на столѣ
132,12 отьни”. Онъ же рече: “Не буди мънѣ възъняти
132,13 рукы на брата своего старѣишаго: аще
132,14 отьць ми умьре, то сь ми буди въ отьца
132,15 мѣсто”. И се слышавъше вои, разидоша ся отъ
132,16 него; Борисъ же стояше съ отрокы своими.
132,17 Святопълкъ же, испълнивъ ся безакония, Каиновъ
132,18 съмыслъ приимъ, посылая къ Борису, глаголя, яко
132,19 “Съ тобою хощю любъвь имѣти, и къ отьню ти
132,20 придамь”; льстя подъ нимь, како бы погубити.
132,21 Святопълкъ же приде нощию къ Вышегороду, отаи
132,22 призъва Путьшю и Вышегородьскыѣ болярьцѣ,
132,23 и рече имъ: “Прияете ми вьсѣмъ сьрдьцьмь?” Рече
132,24 Путьша съ Вышегородьци: “Можемъ главы своя
132,25 сложити за тя”. Онъ же рече имъ: “Не повѣдуще
132,26 никомуже, шьдъше, убиите брата моего Бориса”.
132,27 Они же въскорѣ обѣщаша ся ему се сътворити.
132,28 О сяковыхъ бо Соломонъ рече:
132,29 “Скори суть пролияти кръвь бес правды. Събираютъ собѣ
133,1 зълая ти бо обьщають ся кръви. Сихъ
133,2 путие суть съконьчавающе безаконие, нечьстиемь
133,3 бо свою душю емлють”. Посълании же придоша на
133,4 Альтъ нощию, и подъступиша ближе, и слышаша
133,5 блаженаго Бориса, поюща заутрьнюю: повѣдаша
133,6 бо ему, яко хотять убити и.
133,7 И въставъ, нача пѣти, глаголя: “Господи! Чьто ся умъножиша ся
133,8 сътужающии ми? Мънози въстають на
133,9 мя”; и пакы: “Яко стрѣлы твоя уньзоша въ
133,10 мънѣ. Яко азъ на раны готовъ, и болѣзнь моя
133,11 предъ мъною есть”; и пакы глаголаше: “Господи! Услыши
133,12 молитву мою, и не въниди въ судъ съ рабъмь твоимь,
133,13 яко не оправьдить ся предъ тобою вьсякъ живыи.
133,14 Яко погъна врагъ душю мою”. И коньчавъ ексапсалъмы, и
133,15 видѣвъ, яко посълани суть губитъ
133,16 его, и нача пѣти псалтырь, глаголя, яко “Обидоша
133,17 мя уньци тучьни, и съборъ зълобивыхъ осѣде мя;
133,18 Господи Боже мои, на тя упъвахъ, и съпаси мя, и отъ вьсѣхъ
133,19 гонящихъ избави мя”. По семь же нача
133,20 канунъ пѣти; тако, въ заутрьнюю, помоли ся,
133,21 зьря на икону, глаголя, на образъ Владычьнь:
133,22 “Господи Иисусе Христе! Иже симь образъмь яви ся на
133,23 земли съпасения ради нашего, изволивъ своею
133,24 волею пригвоздити руцѣ свои на крьстѣ, и приимъ
133,25 страсть грѣхъ ради нашихъ, тако и мене съподоби
133,26 прияти страсть. Се же не отъ противьныхъ приимаю,
133,27 нъ отъ брата своего; и не сътвори ему, Господи, въ семь
133,28 грѣха”. И помоливъшю ся ему, и възлеже на одрѣ
134,1 своемь. И се нападоша на нь акы звѣрие дивии около
134,2 шатьра, и насунуша и копии. И прободоша
134,3 Бориса и слугу его, падъша на немь, прободоша
134,4 съ нимь. Бѣ бо сь любимъ Борисъмь. Бяше бо
134,5 отрокъ сь родомъ Угъринъ, именьмь
134,6 Георгии, его же любляше повелику Борисъ.
134,7 Бѣ бо възложилъ на нь гривьну велику злату,
134,8 въ неи же предъстояше ему. Избиша же
134,9 отрокы мъногы Борисовы. Георгиеви
134,10 же не могуще съняти въбързѣ гривьны
134,11 съ шиѣ, усѣкнуша главу его, и тако съняша
134,12 гривьну, а главу отвьргъше прочь. Тѣмь же
134,13 не обрѣтоша послѣ же тѣла его въ трупии.
134,14 Бориса же убивъше оканьнии, увьртѣвъше
134,15 въ шатьръ, възложьше на кола, повезоша и,
134,16 еще дышющю ему. Увѣдѣвъше се
134,17 оканьныи Святопълкъ, яко еще ему дышющю, посъла
134,18 дъва Варяга приконьчатъ его. Онѣма же пришьдъшима
134,19 видѣвъшема, яко еще ему живу
134,20 сущю, единъ ею, извлекъ мечь и проньзе и
134,21 къ сьрдьцю. И тако съконьча ся блаженыи Борисъ,
134,22 вѣньць приимъ отъ Христа Бога съ правьдьными,
134,23 причьтъ ся съ пророкы и апостолы, съ ликы мученичьскыми
134,24 въдваряя ся, Авраму на лонѣ почивая,
134,25 видя неиздреченьную радость, въспѣвая съ
134,26 ангелы, и веселя ся съ ликы святыхъ. И положиша
134,27 тѣло его, принесъше отаи Вышегороду,
134,28 у цьркъве святаго Василия. Оканьнии же
135,1 убиицѣ придоша къ Святопълку, акы хвалу имуще,
135,2 безаконьници. Суть же имена симъ законопреступьникомъ:
135,3 Путьша, Тальць, Еловичь, Ляшько,
135,4 отьць же ихъ сотона. Сици бо слугы бѣси бывають,
135,5 бѣси бо на зълое посылаеми бывають,
135,6 ангели на благое. Ангелъ бо чловѣку
135,7 зъла не сътворять, нъ благое мыслить ему
135,8 вьсьгда, паче же хрьстияномъ помагаеть, и заступають
135,9 отъ супротивьнаго врага. А бѣси на зълое
135,10 вьсьгда ловять, завидяще ему, понеже видять
135,11 чловѣка Богъмь почьщена, и завидяще ему, на зъло
135,12a сълеми скори суть.
135,12b Зълъ чловѣкъ, тъщить ся на зълое,
135,13 не хужь есть бѣса; бѣси бо Бога боять ся, а зълъ
135,14 чловѣкъ ни Бога ся боить, ни чловѣкъ ся стыдить. Бѣси
135,15 бо крьста Господьня боять ся, а зълъ чловѣкъ ни крьста
135,16a боить ся.
135,16b omitted
135,16c omitted
135,16d omitted
135,16e omitted
135,16f omitted
135,17 Святопълкъ же оканьныи помысли въ себѣ,
135,18 рекъ: “Се, убихъ Бориса; како бы убити Глѣба?”
135,19 И приимъ съмыслъ Каиновъ, съ льстию посъла
135,20 къ Глѣбу, глаголя сице: “Поиди въбързѣ, отьць тя зоветь,
135,21 незъдровить бо вельми”. Глѣбъ же, въбързѣ въсѣдъ
135,22 на конѣ, съ малъмь дружины поиде, бѣ бо послушьливъ
135,23 отьцю. И пришьдъшю ему на Вългу, на
135,24 полѣ потъче ся конь въ ровѣ, и наломи ему ногу
135,25 мало; и приде Смольньску, и поиде отъ Смольньска,
135,26 яко зьрѣимо, и ста на Смядинѣ въ кораблѣ.
135,27 Въ сеже время пришьла бѣ вѣсть къ
135,28 Ярославу отъ Передъславы о отьни съмьрти, и
135,29 посъла Ярославъ къ Глѣбу, глаголя: “Не ходи, отьць ти
136,1 умьрлъ, а братъ ти убиенъ отъ Святопълка”. Се
136,2 слышавъ Глѣбъ, възъпи вельми съ сльзами, плача ся
136,3 по отьци, паче же и по братѣ, и нача молити ся
136,4 съ сльзами, глаголя: “Увы мънѣ, Господи! Луче бы
136,5 ми умрети съ братъмь, нежели жити на свѣтѣ
136,6 семь. Аще бо быхъ, брате мои, видѣлъ лице твое
136,7 ангельское, умьрлъ быхъ съ тобою. Нынѣ же чьто
136,8 ради остахъ азъ единъ? Къдѣ суть словеса
136,9 твоя, яже глаголаше къ мънѣ, брате мои любимыи?
136,10 Нынѣ уже не услышю тихаго твоего наказания.
136,11 Да аще еси получилъ дьрзновение у
136,12 Бога, моли ся о мънѣ, да и азъ быхъ ту же
136,13 страсть приялъ. Луче бы ми съ тобою умрети,
136,14 нежели въ свѣтѣ семь прельстьнѣмь жити”. И сице
136,15 ему молящю ся съ сльзами и вънезапу придоша
136,16 посълании отъ Святопълка на погубление
136,17 Глѣба. И ту абие посълании яша корабль Глѣбовъ,
136,18 и обнажиша оружия. Отроци Глѣбови
136,19 уныша. Оканьныи же Горясѣръ
136,20 повелѣ въбързѣ зарѣзати Глѣба. Поваръ же Глѣбовъ,
136,21 именьмь Търчинъ, вынезъ ножь, зарѣза
136,22 Глѣба, акы агня непорочьно. Принесе ся на
136,23 жертву Богови, въ воню благоухания, жьртва
136,24 словесьная. И прия вѣньць, въшьдъ въ небесьныя
136,25 обители, и узрѣ желаемаго брата своего, и
136,26 радоваше ся съ нимь неиздреченьною радостию,
136,27 юже улучиста братолюбиемь своимь. “Се коль
136,28 добро и коль красьно еже жити братома
136,29 въкупѣ!” Оканьнии же възвратиша ся въспять,
137,1 якоже рече Давыдъ: “Възвратиша ся грѣшници въ
137,2a адъ”.
137,2b omitted
137,2c omitted
137,2d omitted
137,2e Онѣмъ же пришьдъшемъ и повѣдашавъшимъ.
137,3 Святопълку, яко “Сътворихомъ повелѣное тобою”. Онъ
137,4 же, се слыша, възнесе ся сьрдьце его больма, не
137,5 вѣды Давыда глаголюща: “Чьто ся хвалиши о зълобѣ,
137,6 сильне? Безаконие вьсь дьнь умысли языкъ
137,7a твои”.
137,7b
137,7c
137,7d omitted
137,7e
137,7f
137,7g omitted
137,7h omitted
137,8 Глѣбу же убиену бывъшю и повьржену на
137,9 брезѣ межю дъвѣма кладама. По семь же, възьмъше и,
137,10 везоша и, и положиша и у брата своего
137,11 Бориса, у цьркъви святаго Василия. Съвъкуплена
137,12 тѣлома паче же душама, у Владыкы вьсѣхъ цьсаря
137,13 пребывающа въ радости бесконьчьнѣи и въ
137,14 свѣтѣ неиздреченьнѣмь, подающа цѣльбьныя
137,15 дары Руськои земли. И инѣмъ приходящимъ
137,16 страньнымъ съ вѣрою даета ицѣление: хромымъ ходити,
137,17 слѣпымъ прозьрѣние, болящимъ цѣльбы, окованымъ
137,18 раздрѣшение, тьмьницамъ отвьрзение, печальнымъ
137,19 утѣху, напастьнымъ избавление. И еста заступьника
137,20 Руськои земли и свѣтильника сияюща въину и
137,21 моляща ся къ Владыцѣ о своихъ людьхъ.
137,22 Тѣмь же и мы дължьни есмы хвалити достоино
137,23 страстотьрпьца Христова, моляще ся прилѣжьно къ нима,
137,24 рекуще: “Радуита ся, страстотьрпьца Христова, заступьника
137,25 Руськои земли, ея же ицѣление подаета приходящимъ
137,26 къ вама вѣрою и любъвию. Радуита ся,
137,27 небесьная жителя. Въ плъти ангела быста,
137,28 единомысльна служителя, вьрста единообразьна,
137,29 святымъ единодушьна. Тѣмь стражющимъ
138,1 вьсѣмъ ицѣление подаета. Радуита ся,
138,2 Борисе и Глѣбе богомудрая. Яко потока точита
138,3 отъ кладязя воды живоносьныя исцѣления,
138,4 истѣкають вѣрнымъ людьмъ на ицѣление. Радуита ся,
138,5 луча
138,6 свѣтозарьна, явиста ся яко свѣтилѣ, озаряюща
138,7 вьсю землю Русьскую. Вьсьгда тьму отъгоняща,
138,8 являюща ся вѣрою неуклоньною. Радуита ся,
138,9 недрѣманьное око сътяжавъша, душа на съвьршение
138,10 Божиихъ святыхъ заповедии приимъша въ сьрдьци своемь,
138,11 блаженая. Радуита ся, брата, въкупѣ въ мѣстѣхъ
138,12 златозарьныхъ, въ селѣхъ небесныхъ, въ славѣ
138,13 не увядающии, еяже по достоянию съподобиста ся.
138,14 Радуита ся, Божиими свѣтьлостьми явѣ
138,15 облистаеми, вьсего мира обиходита, бѣсы
138,16 отъгоняща, недугы исцѣляюща, свѣтильника предобрая,
138,17 заступьника теплая, суща съ Богъмь,
138,18 божьствьньными лучами раждизаеми въину, добляя
138,19 страстьника, душа просвѣщающа вѣрьнымъ людьмъ.
138,20 Възвысила бо есть ваю свѣтоносьная небесьная
138,21 любы; тѣмь красьныхъ вьсѣхъ наслѣдоваста въ
138,22 небеснѣмь житии, славу и раискую пищю, свѣтъ
138,23 разумьныи, красьныя радости. Радуита ся, яко
138,24 вься напаяюща сьрдьца, горести и болѣзнемъ отъгоняща,
138,25 страсти зълыя исцѣляюща, каплями кръвьными
138,26 святыми очьрвивъша багъряницю, преславьная,
138,27 туже красьно носяща, съ Христосъмь цьсарьствуета
138,28 вьсьгда, моляща ся за новыя люди хрьстияньскыя
138,29 и съродьникы своя. Земля Русьская благослови ся
139,1 ваю кръвию. И мощьми положениемъ въ цьркъви
139,2 духъмь божьствьнѣ просвѣщаета, въ неи же съ
139,3 мученикы, яко мученика, за люди своя молита ся. Радуита ся,
139,4 цьркъви свѣтозарьное сълньце сътяжавъши
139,5 въсходъ вьсьгда просвѣщаеть въ страдании ваю,
139,6 въ славу мученикомъ. Радуита ся, свѣтлѣи звѣздѣ,
139,7 заутра въсходящии. Нъ христолюбивая страстотьрпця и
139,8 заступьника наша! покорита поганыя подъ
139,9 нозѣ къняземъ нашимъ, моляща ся къ Владыцѣ Богу
139,10 нашему и мирьно пребывати въ съвъкуплении и
139,11 съдравии, избавляюща отъ усобьныя рати и
139,12 отъ пронырьства дияволя. Съподобита же и
139,13 насъ, поющихъ и почитающихъ ваю чьстьное тържьство,
139,14 въ вься вѣкы до съконьчания.
139,15 Святопълкъ же оканьныи зълыи уби
139,16 Святослава, пославъ ко горѣ Угърьстѣи, бѣжащю
139,17 ему въ Угры. И нача помышляти,
139,18 яко “Избию вьсю братию свою, и прииму власть
139,19 Русьскую единъ”. Помысли высокоумиемь
139,20 своимь, не вѣдыи яко даеть Богъ власть, ему же
139,21 хощеть; поставляетъ цьсаря, и кънязя Вышьнии,
139,22 ему же хощеть, дасть. Аще бо кая земля управить ся
139,23 предъ Богъмь, поставляеть цьсаря или
139,24 кънязя правьдьна, любяща судъ и правьду, и
139,25 властеля устраяеть и судию, правяща судъ.
139,26 Аще бо кънязи правьдиви бывають на земли, то
139,27 мънога отъдають ся съгрѣшения; аще ли
139,28 зъли и лукави бывають, то большее зъло наводить
140,1 Богъ на землю ту, понеже тъ глава есть земли.
140,2 Тако бо Исаия рече: “Согрѣшиша отъ главы и до
140,3 ногу”, еже есть отъ цьсаря и до простыхъ людии.
140,4 “Лютѣ бо граду тому, въ немьже кънязь унъ,
140,5 любяи вино пити съ гусльми и съ младыми
140,6 съвѣтьникы. Сяковыя Богъ даеть за грѣхы,
140,7 а старыя и мудрыя отъемлеть”. Яко же Исаия
140,8 глаголеть: “Отъиметь Господь отъ Иерусалима крѣпость и крѣпъкаго
140,9 исполина и чловѣка храбра и судию и пророка и
140,10 съмѣрена старьца и дивьна съвѣтника и мудра
140,11 хитрьца, и разумьна послушьника. И поставлю
140,12 уношю кънязя имъ, и ругателя обладающа
140,13 ими”.
140,14 Святопълкъ же оканьныи нача къняжити Кыевѣ. И
140,15 съзъвавъ люди, нача даяти овѣмъ кързна, а
140,16 другымъ кунами, и раздая мъножьство. Ярославу
140,17 же не вѣдущю отьни съмьрти, Варязи
140,18 бяху мънози у Ярослава, и насилие творяху
140,19 Новъгородьцемъ. И въставъше Новъгородьци,
140,20 избиша Варягы въ дворѣ Поромони.
140,21 И разгнѣва ся Ярославъ, и щьдъ на Рокомъ,
140,22 сѣде въ дворѣ. Посълавъ къ Новъгородьцемъ, рече:
140,23 “Уже мънѣ сихъ не крѣсити”. И позъва къ собѣ
140,24 нарочитыя мужа, иже бяху иссѣкли Варягы,
140,25 и обльсти я и исѣче. Въ туже нощь приде
140,26 ему вѣсть ис Кыева отъ сестры его Передъславы:
140,27 “Отьць ти умьрлъ, а Святопълкъ сѣдить
140,28 въ Кыевѣ, убивъ Бориса, а на Глѣба
141,1 посъла; а блюди ся сего повелику”. И се слышавъ Ярославъ,
141,2 печальнъ бысть по отьци, и по браты и о дружинѣ.
141,3 Заутра же събьравъ избытъкъ Новъгородьцевь,
141,4 Ярославъ рече: “О, любимая дружино,
141,5 юже вьчера избихъ, а нынѣ быша надобе”.
141,6 Утьре сльзъ, и рече имъ на вѣчи: “Отьць
141,7 мои умьрлъ, а Святопълкъ сѣдить Кыевѣ,
141,8 избивая братию свою”. И рѣша Новъгородьци: “Аще,
141,9 къняже, братия наша исѣчена суть, можемъ по тобѣ
141,10 бороти”. И събьра Ярославъ Варягъ тысящю,
141,11 а прочихъ вои 40 тысящь, и поиде на Святопълка, нарекъ
141,12 Бога, рекъ: “Не азъ почахъ избивати братию, нъ
141,13 онъ. Да будеть Богъ отъмьстьникъ кръви братия
141,14 моея, зане без вины пролия кръвь Борисову и
141,15 Глѣбову правьдьную. Еда и мънѣ сице же
141,16 сътворить? Нъ суди ми, Господи, по правьдѣ, да съконьчаеть ся
141,17 зълоба грѣшьнаго”. И поиде на Святопълка.
141,18 Слышавъ же Святопълкъ идуща Ярослава, и
141,19 пристрои бес числа вои, Руси и Печенѣгъ,
141,20 и изыде противу Любьчю объ онъ
141,21 полъ Дънѣпра, а Ярославъ объ сюду.
141,22 omitted
141,23 Въ лѣто 6524. Приде Ярославъ, и сташа
141,24 противу обаполъ Дънѣпра, и не смѣяху ни си
141,25 онѣхъ, ни они на сихъ, и стояша за
141,26 3 мѣсяцѣ противу собѣ. И воевода нача Святопълчь,
142,1 ѣздя възлѣ брегъ, укаряти Новъгородьци,
142,2 глаголя: “Чьто придосте съ хромьцьмь симь, а вы
142,3 плътьници суще? А приставимъ вы хоромъ
142,4 рубити нашихъ”. Се слышавъше Новъгородьци,
142,5 рѣша Ярославу, яко “Заутра перевеземъ ся на
142,6 ня; аще къто не поидеть съ нами, сами потьнемъ”.
142,7 Бѣ бо уже въ заморозъ. И
142,8 стояше межю дъвѣма озерома, и
142,9 вьсю нощь упивь ся съ дружиною своею. Ярославъ
142,10 же заутра, испълчивъ дружину, противу
142,11 свѣту перевезе ся. И высѣдъше на брегъ,
142,12 отринуша лодия отъ брега, и поидоша противу
142,13 собѣ, и съвъкупиша ся на мѣстѣ. И бысть сѣча зъла,
142,14 не бѣ льзѣ озеръмь Печенѣгомъ помогати,
142,15 и притиснуша Святопълчь съ вои
142,16 къ озеру. И въступиша на ледъ,
142,17 и одолати нача Ярославъ. Видѣвъ
142,18 же Святопълкъ, побеже, и одолѣ Ярославъ.
142,19 Святопълкъ же бѣжа въ Ляхы, Ярославъ же
142,20 сѣде Кыевѣ на столѣ отьни.
142,21 Бѣ же тъгда Ярославъ
142,22 лѣтъ 28.
142,23 Въ лѣто 6525. Ярославъ въиде въ Киевъ,
142,24 и погорѣша цьркъви.
142,25 Въ лѣто 6526. Поиде Болеславъ съ
142,26 Святопълкъмь на Ярослава съ Ляхы. Ярославъ же, мъножьство
143,1 съвъкупи Руси, Варягы, Словѣны,
143,2 поиде противу Болеславу и Святопълку, и
143,3 приде Волыню, и сташа обаполъ рѣкы Буга.
143,4 И бѣ у Ярослава кърмильць и воевода,
143,5 Буды, и нача Буды укаряти Болеслава, глаголя:
143,6 “Да чьто ти пропоремъ трѣскою черево твое
143,7 тълстое”. Бѣ бо великъ и тяжькъ Болеславъ,
143,8 яко ни на кони могы сѣдѣти, нъ бяше
143,9 съмысльнъ. И рече Болеславъ:
143,10 “Аще вы сего укора не жаль, азъ единъ погыну”. И
143,11 въсѣдъ на конь, въбрьде въ рѣку, и по немь
143,12 вои его. Ярославъ же не утягну испълчити ся,
143,13 и побѣди Болеславъ Ярослава. Ярославъ же
143,14 убѣжа съ четырьми мужи къ Новугороду, Болеславъ
143,15 же въниде въ Кыевъ съ Святопълкъмь. И рече
143,16 Болеславъ: “Разведѣте дружину мою по городомъ
143,17 на къръмъ”. И бысть тако. Ярославу же
143,18 прибѣгъшю къ Новугороду, хотяше бѣжати за
143,19 море, и посадьникъ Костятинъ, сынъ Добрынь,
143,20 съ Новъгородьци расѣкоша лодия Ярославля,
143,21 рекуще: “Можемъ ся еще бити съ Болеславъмь
143,22 и съ Святопълкъмь”. Начаша скотъ брати
143,23 отъ мужа по четыри куны, а отъ старостъ по
143,24 10 гривьнъ, а отъ боляръ по 80 гривьнъ. И приведоша
143,25 Варягы, и въдаша имъ скотъ, и съвъкупи
143,26 Ярославъ воя мъногы. Болеславъ же бѣ въ Кыевѣ
143,27 сѣдя, безумьныи же Святопълкъ рече: “Елико же
143,28 Ляховъ по городомъ, избиваите я”. И избиша
144,1 Ляхы; Болеславъ же побѣже ис Кыева,
144,2 възьмъ имѣние и боляры Ярославлѣ и сестрѣ
144,3 его, и Настаса пристави Десятиньнаго къ
144,4 имѣнию, бѣ бо ся ему въвѣрилъ льстию. И людии
144,5 мъножьство веде съ собою, и грады Чьрвеньскыя
144,6 зая собѣ, и приде въ свою землю. Святопълкъ же
144,7 нача къняжити Кыевѣ. И поиде Ярославъ на
144,8 Святопълка, и побѣди Ярославъ Святопълка, и бѣжа Святопълкъ въ Печенѣгы.
144,9 Въ лѣто 6527. Приде Святопълкъ съ Печенѣгы
144,10 въ силѣ тяжьцѣ, и Ярославъ събьра
144,11 мъножьство вои, и възиде противу ему на
144,12 Альто. Ярославъ ста на мѣстѣ, идеже убиша
144,13 Бориса, въздѣвъ руцѣ на небо, и рече: “Кръвь брата
144,14 моего въпиеть къ тобѣ, Владыко! Мьсти отъ кръве
144,15 правьдьнаго сего, якоже мьстилъ еси кръвь Авелевы,
144,16 положивъ на Каинѣ стенание и трясение;
144,17 тако положи и на семь”. Помоливъ ся,
144,18 рекъ: “Брата моя, аще еста тѣлъмь отъшьла
144,19 отьсюда, нъ молитвою помозита ми на противьнаго
144,20 сего убиицю гърдаго”. И се ему
144,21 рекъшю, поидоша противу собѣ, и покрыша
144,22 поле Льтьское обои отъ мъножьства вои.
144,23 Бѣ же пятъкъ тъгда, въсходящю сълньцю, и
144,24 {съступиша | съвокупиша} ся обои. И бысть сѣча зъла, акаже не
144,25 была въ Руси, и за рукы емлюще сѣчаху ся,
144,26 и съступаша ся тришьды, яко по удолиемъ
144,27 кръви течаще. Къ вечеру одолѣ Ярославъ,
144,28 а Святопълкъ бѣжа. И бѣжащю ему,
145,1 нападе на нь бѣсъ, и раслабѣша кости его, и
145,2 не можаше сѣдѣти на кони, и {несяхуть | ношахуть} и
145,3 въ носилахъ. И принесоша и къ Берестию, бѣгающе
145,4 съ нимь. Онъ же глаголаше: “Побѣгнѣте съ мъною,
145,5 женуть по насъ”. Отроци же его сылаху противу:
145,6 “Еда къто женеть по немь?”. И не бѣ никогоже
145,7 въ слѣдъ {женущаго | гонящаго}, и бѣжаху съ нимь. Онъ же
145,8 въ немощи лежа, и въсхапивъ ся глаголаше: “Осе
145,9 женуть, оно женуть, побѣгнѣте”. И не можаше
145,10 стьрпѣти на единомь мѣстѣ, и пробѣже Лядьскую
145,11 землю, гонимъ гнѣвъмь Божиимъ. И пробѣже
145,12 въ пустыню межю Чехы и Ляхы,
145,13 испровьрже животъ свои зълѣ.
145,14 Его же по правьдѣ, яко неправьдьна, суду пришьдшю
145,15 по отшьствии сего свѣта прияша мукы,
145,16 оканьнаго”. Показоваше явѣ посланая пагубьная
145,17 рана, въ съмьрть немилостивьно въгна, и по
145,18 съмьрти вѣчьно мучимъ есть и съвязанъ. Есть же
145,19 могыла его въ пустыни и {до сего дьне | до сихъ дьнии}. Исходить же
145,20 отъ неи смрадъ зълъ. Се же Богъ показа на
145,21 показание къняземъ Русьскымъ, да аще
145,22 сице же сътворять, се слышавъше, туже казнь
145,23 приимуть; нъ и больши сея, понеже, се {вѣдая | вѣдуще}, сътворять
145,24 такоже зъло братоубииство. 7 бо мьстии
145,25 прия Каинъ, убивъ Авеля, а Ламехъ 70; понеже
145,26 {бѣ | бо} Каинъ не вѣды мьщения прияти
145,27 отъ Бога, а Ламехъ, вѣды казнь, бывъшюю на
145,28 прародителю его, сътвори убииство. “Рече бо
146,1 Ламехъ къ своима женама: мужа убихъ
146,2 въ вредъ мънѣ и уношю въ язву мънѣ, тѣмь же,
146,3 рече, 70 мьстии на мънѣ, понеже, рече, вѣдая
146,4 сътворихъ се”. Ламехъ уби дъва брата Енохова,
146,5 и поя собѣ женѣ ею. Сьи же Святопълкъ,
146,6 новыи Ламехъ, иже ся бѣ родилъ отъ прелюбодѣяния,
146,7 иже изби братию свою, сыны Гедеоновы.
146,8 Тако и сь бысть. Ярославъ же сѣде въ Кыевѣ,
146,9 утьръ пота съ дружиною своею, показавъ побѣду
146,10 и трудъ великъ.
146,11 Въ лѣто 6528. Роди ся у Ярослава сынъ,
146,12 и нарече имя ему Володимиръ.
146,13 Въ лѣто 6529. Приде Брячиславъ, сынъ
146,14 Изяславль, вънукъ Володимиръ, на Новъгородъ,
146,15 и зая Новъгородъ, и поимъ Новъгородьцѣ и
146,16 имѣние ихъ, поиде Полотьску опять. И пришьдъшю
146,17 ему къ Судомири рѣцѣ, Ярославъ
146,18 ис Кыева въ 7 дьнь постиже и ту. И побѣди
146,19 Ярославъ Брячислава, и Новъгородьцѣ вороти к
146,20/21 Новугороду, а Брячиславъ бѣжа къ Полотьску.
146,22 Въ лѣто 6530. Приде Ярославъ къ Берестию.
146,23 Въ си же времена Мьстиславу сущю
146,24 Тьмуторокани и поиде на Касогы. Слышавъ
146,25 же се, кънязь Касожьскыи Редедя изыде
146,26 противу ему. И ставъшема обѣма пълкома
146,27 противу собѣ, и рече Редедя къ Мьстиславу: “Что
146,28 ради губивѣ дружину межи собою? Но сънидѣвѣ
147,1 ся сама боротъ. Да аще одолѣеши ты, и
147,2 възьмеши имѣние мое и жену мою
147,3 и землю мою. Аще ли азъ одолѣю, то възьму
147,4 твое вьсе”. И рече Мьстиславъ: “Тако буди”. И рече
147,5 Редедя къ Мьстиславу: “Не оружиемь ся биевѣ,
147,6 нъ борьбою”. И яста ся бороти крѣпъко, и надълзѣ
147,7 борющима ся има, и нача изнемагати Мьстиславъ:
147,8 бѣ бо великъ и сильнъ Редедя. И рече Мьстиславъ:
147,9 “О пречистая Богородице! помози ми. Аще бо одолѣю
147,10 сему, съзижю цьркъвь въ имя твое”. И се рекъ
147,11 удари имь о землю. И выньмь ножь, и зарѣза
147,12 Редедю. И въшьдъ въ землю его, възя вьсе
147,13 имѣние его, и жену его и дѣти его, и
147,14 дань възложи на Касогы. И пришьдъ Тьмутороканю,
147,15 заложи цьркъвь святыя Богородица, и съзьда ю,
147,16 яже стоить и до сего дьне Тьмуторокани.
147,17 Въ лѣто 6531. Поиде Мьстиславъ на
147,18 Ярослава съ Козары и съ Касогы.
147,19 Въ лѣто 6532. Ярославу сущю въ Новѣгородѣ,
147,20 приде Мьстиславъ ис Тъмутороканя
147,21 Кыеву, и не прияша его Кыяне. Онъ же
147,22 сѣде на столѣ Чьрниговѣ, Ярославу
147,23 сущю въ Новѣгородѣ тъгда. Въ се же лѣто
147,24 въсташа вълсви въ Суждали, избиваху старую
147,25 чадь по дияволю научению и бѣсованию,
147,26 глаголюще, яко си дьржать гобино. И мятежь великъ
147,27 и гладъ въ вьсеи тои странѣ. Идоша по Вълзѣ
147,28 вьси людие въ Боъгары, и привезоша жито, и
147,29 тако ожиша. Слышавъ же Ярославъ вълхвы,
148,1 приде Суждалю; изъима вълхвы, расточи, а
148,2 другыя показни, рекъ сице: “Богъ наводить
148,3 по грѣхомъ на куюжьдо землю гладъмь, или моръмь,
148,4 или ведръмь, или иною казнию, а чловѣкъ не
148,5 вѣсть ничьтоже”. И възвративъ ся Ярославъ, приде
148,6 Новугороду, и посъла Ярославъ за море по Варягы.
148,7 И приде Якунъ съ Варягы, и бѣ Якунъ
148,8 сь лѣпъ, и луда бѣ у него златъмь истъкана.
148,9 И приде къ Ярославу; и иде Ярославъ
148,10 съ Якунъмь на Мьстислава. Мьстиславъ же
148,11 слышавъ изыде противу има къ Листвьну.
148,12 Мьстиславъ же съ вечера испълчи дружину, и
148,13 постави Сѣверъ въ чело противу Варягомъ, а
148,14 самъ ста съ дружиною своею по крилома. И
148,15 бывъши нощи, бысть тьма, громъ и мълния и
148,16 дъждь. И рече Мьстиславъ дружинѣ своеи:
148,17 “Поидѣмъ на нѣ”. И поиде Мьстиславъ, и
148,18 Ярославъ противу, и съступиша ся въ чело
148,19 Варязи съ Сѣверъ, и трудиша ся Варязи, сѣкуще
148,20 Сѣверъ, и по семъ наступи Мьстиславъ съ
148,21 дружиною своею и нача сѣчи Варягы. И бысть сѣча
148,22 сильна. Яко посвѣтяше мълния, блисташа ся
148,23 оружие, и бѣ гроза велика и сѣча сильна и
148,24 страшна. Видѣвъ же Ярославъ, яко побѣжаемъ
148,25 есть, побѣже съ Якунъмь, кънязьмь Варяжьскымь,
148,26 и Якунъ ту отъбѣже луды златыѣ. Ярославъ
148,27 же приде Новугороду, а Якунъ иде за
148,28 море. Мьстиславъ же, освьтъ заутра,
148,29 видѣ лежачи исѣчены отъ своихъ Сѣверъ
149,1 и Варягы Ярославлѣ, и рече: “Къто сему не радъ?
149,2 Се лежить Сѣверянинъ, а се Варягъ, а своя
149,3 дружина цѣла”. И посъла Мьстиславъ по Ярославѣ,
149,4 глаголя: “сѣди на столѣ своемь Кыевѣ: понеже ты еси старѣишеи
149,5 братъ, а мънѣ буди си сторона”. И не
149,6 смѣяше Ярославъ въ Кыевъ ити, доньле же
149,7 съмириста ся. И сѣдяше Мьстиславъ Чьрниговѣ,
149,8 а Ярославъ въ Новѣгородѣ, и бѣяху сѣдяще въ Кыевѣ
149,9 мужи Ярославли. Въ семъ же лѣтѣ роди ся
149,10 другыи сынъ, и нарече имя ему
149,11 Изяславъ.
149,12 Въ лѣто 6534. Ярославъ съвъкупи воя
149,13 мъногы, и приде Кыеву, и сътвори миръ съ братъмь
149,14 своимь Мьстиславъмь у Городьца. И раздѣлиста
149,15 по Дънѣпръ Русьскую землю: Ярославъ прия
149,16 су страну, а Мьстиславъ ону. И начаста жити
149,17 мирьно и въ братолюбьствѣ, и преста усобица
149,18 и мятежь, и бысть тишина велика въ земли.
149,19 Въ лѣто 6535. Роди ся 3-и сынъ Ярославу,
149,20 и нарече имя ему Святославъ.
149,21 Въ лѣто 6536.
149,22 omitted
149,23 Въ лѣто 6537. Мирьно бысть.
149,24 Въ лѣто 6538. Ярославъ възялъ Белъзы.
149,25 И роди ся Ярославу 4-тыи сынъ, и нарече имя ему
149,26 Вьсеволодъ. Сего лѣта иде Ярославъ
149,27 на Чюдь, и побѣди я, и постави градъ Юриевъ.
149,28 Въ сеже время умьре Болеславъ Великыи
149,29 въ Ляхѣхъ, и бысть мятежь въ Лядьскѣ земли:
150,1 въставше людие избиша епископы, и попы, и
150,2 боляры своя, и бысть мятежь въ нихъ.
150,3 Въ лѣто 6539. Ярославъ и Мьстиславъ
150,4 събраста воя мъногъ, идоста на Ляхы, и заяста
150,5 грады Чьрвеньскыя опять, и повоеваста Лядьскую
150,6 землю, и мъногы Ляхы приведоста, и раздѣлиста
150,7 я. Посади Ярославъ своя по
150,8 Ръси, и суть до сего дьне.
150,9 Въ лѣто 6540. Ярославъ поча ставити грады
150,10 по Ръси.
150,11 Въ лѣто 6541. Мьстиславичь Еустафии
150,12 умьре.
150,13 Въ лѣто 6542.
150,14 Въ лѣто 6543.
150,15 Въ лѣто 6544. Мьстиславъ изыде на ловы и,
150,16 разболѣ ся и умьре. И положиша и въ цьркъви
150,17 у святаго Съпаса, юже самъ {заложилъ | създалъ} бѣ бо
150,18 възьдано ея при немь възвыше, яко на кони
150,19 стоячи рукою досячи. Бѣ же Мьстиславъ
150,20 дебелъ тѣлъмь, чьрмьнъ лицьмь, великома
150,21 очима, храбръ на рати, милостивъ, и любяше
150,22 дружину по велику, имѣния не щадяше, ни пития,
150,23 ни ядения браняше. По семь же прия власть
150,24 его вьсю Ярославъ, и бысть единовластьць Русьскои
150,25 земли. Иде Ярославъ къ Новугороду, и
150,26 посади сына своего Володимира въ Новѣгородѣ,
150,27 епископа постави Жидяту. И въ се время роди ся
150,28 Ярославу сынъ, и нарекоша имя ему Вячеславъ.
150,29 Ярославу же сущю въ Новѣгородѣ приде
151,1 ему вѣсть, яко печенѣзи остоять Кыевъ. Ярославъ
151,2 събра воя мъногы. Варягы и словѣни, приде
151,3 Кыеву, и въниде въ градъ свои. И бѣ печенѣгъ
151,4 бещисла. Ярославъ же выступи из града,
151,5 испълчи дружину, и постави Варягы посредѣ,
151,6 а на правѣи странѣ Кыяне, а на
151,7 лѣвѣмь крилѣ Новгородьци. И сташа предъ
151,8 градъмь. Печенѣзи приступати начаша, и
151,9 съступиша ся на мѣстѣ, иде же есть нынѣ
151,10 святая София, митрополия Русьская; бѣ бо тъгда
151,11 поле внѣ града. И бѣ сѣча, зла, и одъва
151,12 одолѣ къ вечеру Ярославъ. И побѣгоша Печенѣзи
151,13 разьно, и не вѣдяху ся, камо бѣжаче,
151,14 и овии бѣгающе тоняху въ Сѣтомли, инѣи же
151,15 въ инѣхъ рѣкахъ, а прокъ ихъ пробѣгоша
151,16 и до сего дьне. Въ сеже лѣто въсади Ярославъ
151,17 Судислава въ порубъ, брата своего, Плесковѣ,
151,18 оклеветанъ къ нему.
151,19 Въ лѣто 6545. Заложи Ярославъ градъ
151,20 великыи, у негоже града суть Златая врата;
151,21 заложи же и цьркъвь святыя София, митрополию;
151,22 и по семь цьркъвь на Златыхъ вратѣхъ, святыя Богородица
151,23a Благовѣщение,
151,23b
151,23c omitted
151,23d по семь святаго Георгия манастырь
151,24 и святыя Ирины. И при семь нача вѣра хрьстияньская
151,25 плодити ся и раширяти, и чьрноризьци
151,26 почаша мъножити ся, и манастыреве починаху
151,27 быти. И бѣ Ярославъ любя цьркъвьныя уставы, и
151,28 попы любяше повелику, излиха же чьрноризьцѣ,
151,29 и кънигамъ прилежа, и почитая часто
152,1 въ дьне и въ нощи. И съьбра письцѣ мъногы, и
152,2 прекладаше отъ Грекъ на Словѣньское письмо;
152,3 и съписаша кънигы мъногы, и съниска имиже
152,4 поучають ся вѣрьнии людие наслажають ся учения
152,5 божьствьнаго. Якоже бо се нѣкъто землю разореть,
152,6 другыи же насѣеть, ини же пожинають,
152,7 и ядять пищю бескудьну, тако и сь:
152,8 отьць бо сего Володимиръ землю разора
152,9 и умякъчи, рекъше крьщениемь просвѣтивъ;
152,10a сь же
152,10b насѣя кънижьными словесы сьрдьца вѣрьныхъ
152,11 людии, а мы пожинаемъ, учение приемлюще
152,12 кънижьное. Велика бо польза бываеть отъ учения
152,13 кънижьнаго; кънигами бо кажеми и учими есмы
152,14 пути покаянию, и мудрость бо обрѣтаемъ и въздьржание
152,15 отъ словесъ кънижьныхъ; се бо суть рѣкы, напаяюще
152,16 въселеную, се суть исходяща мудрости;
152,17 кънигамъ бо есть неищьтьная глубина;
152,18 сими бо въ печали утѣшаеми есмы, си
152,19 суть узда въздьржанию. Мудрость бо велика
152,20 есть, якоже и Соломонъ, хваля ю глаголаше: “Азъ,
152,21 премудрость, въселихъ съвѣтъ, и разумъ и съмыслъ
152,22 азъ призъвахъ. Страхъ Господьнь Мои съвѣти, моя
152,23 мудрость, мое утвьржение. Мъною
152,24 цьсари цьсарьствують, и сильнии пишють правьду;
152,25 Мъною вельможи величають ся, и мучители дьржать
152,26 землю. Азъ любящая мя люблю, ищющии мене
152,27 обрящють”. Аще бо поищеши
152,28 въ кънигахъ мудрости прилѣжьно, то обрящеши
152,29 велику пользу души своеи; иже бо часто чьтеть
153,1 кънигы, тъ бесѣдуеть съ Богъмь или съ святыми мужи;
153,2 почитаяи пророчьскыя бесѣды и еуангельская
153,3 учения и апостольская и жития святыхъ отьць,
153,4 въсприемлеть души пользу велику. Ярославъ же
153,5 сь, якоже рекохомъ, любимъ бѣ кънигамъ, и мъногы
153,6 съписавъ, положи въ цьркъви святѣи Софии, юже
153,7 съзьда самъ; и украси ю златъмь и сьребръмь и
153,8 съсуды цьркъвьными, въ неиже обычьныя пѣсни
153,9 Богу въздають въ годы обычьныя. И ины цьркъви
153,10 ставляше по градомъ и по мѣстомъ, поставляя
153,11 попы, и дая имъ отъ имѣния своего урокъ,
153,12 веля имъ учити люди
153,13a omitted
153,13b попомъ бо часто достоить учити люди,
153,13c понеже тѣмъ есть поручено Богъмь.
153,14 И умъножиша ся прозвутери и людие
153,15 хрьстияньстии. И радоваше ся Ярославъ, вида
153,16 мъногы цьркъви и люди хрьстияны зѣло, а
153,17 врагъ сѣтоваше, побѣжаемъ новыми
153,18 людьми хрьстияньскыми.
153,19 В лѣто 6546. Иде Ярославъ на Ятвягы.
153,20 В лѣто 6547. Священа бысть цьркы святыя Богородица,
153,21 юже съзьда Володимиръ, отьць Ярославль, митрополитъмь
153,22 Феопемптъмь.
153,23 В лѣто 6548. Ярославъ иде на Литъву.
153,24 В лѣто 6549. Иде Ярославъ на Мазовъшаны
153,25 въ лодияхъ.
153,26 В лѣто 6550. Иде Володимиръ, сынъ Ярославль,
153,27 на Ямь, и побѣди я. И помьроша
153,28 кони у Володимирь вои, яко и еще дышющемъ
154,1 конемъ съдираху хъзы съ нихъ: толикъ
154,2 бѣ моръ въ конихъ.
154,3 В лѣто 6551. Посъла Ярославъ сына своего
154,4 Володимира на Грькы, и да ему вои мъногы,
154,5 а воеводьство поручи Вышатѣ, отьцю Яневу.
154,6 И поиде Володимиръ въ лодияхъ, и придоша въ Дунаи,
154,7 и поидоша къ Цѣсарюграду. И бысть буря велика,
154,8 и разби корабли Руси, и къняжь корабль разби
154,9 вѣтръ, и възяша кънязя въ корабль Ивань Творимирича,
154,10 воевода Ярославля. Прочии же
154,11 вои Володимири вывьржени быша на брегъ,
154,12 числъмь 6000, и хотящемъ поити въ Русь, и
154,13 не иде съ ними отъ дружины
154,14 къняжа. И рече: “Азъ поиду съ ними”.
154,15 И высѣде ис корабля къ нимъ, рекъ: “Аще
154,16 живъ буду съ ними, аще ли погыну, то
154,17 съ дружиною”. И поидоша, хотяще въ Русь.
154,18 И бысть вѣсть Грькомъ, яко избило море Русь,
154,19 и посъла цьсарь, именьмь Мономахъ, по Руси
154,20 олядии 14. Володимиръ же, видѣвъ съ дружиною,
154,21 яко идуть по нихъ, въспятивъ ся,
154,22 изби оляди Грьчьскыя, и възврати ся
154,23 въ Русь, съсѣдавъши ся въ кораблѣ своѣ. Вышату
154,24 же яша съ извьржеными на брегъ, и
154,25 приведоша я Цьсарюграду, и слѣпиша Руси
154,26 мъного. По трьхъ же лѣтѣхъ миру бывъшю,
154,27 пущенъ бысть Вышата въ Русь къ Ярославу.
154,28 Въ сиже времена въдасть Ярославъ сестру свою
155,1 за Казимира, и въдасть Казимиръ за вѣно
155,2 людий 8 сътъ, еже бѣ полонилъ Болеславъ,
155,3 победивъ Ярослава.
155,4 В лѣто 6552. Выгребоша 2 кънязя,
155,5 Яропълка и Ольга, сына Святославля, и крьстиша
155,6 кости ею, и положиша я въ цьркъви святыя Богородица.
155,7 Въ тоже лѣто умьре Брячиславъ, сынъ Изяславль,
155,8 вънукъ Володимирь, отьць Вьсеславль, и
155,9 Вьсеславъ, сынъ его, сѣде на столѣ его. Его же
155,10 роди мати отъ вълхвования, матери бо родивъши
155,11 его, бысть ему язва на главѣ его, рекоша же
155,12 вълсви матери его: “Се язвьно навяжи на нь, да
155,13 носить е до живота своего”, еже носи Вьсеславъ
155,14 и до сего дьне на собѣ; сего ради немилостивъ
155,15 есть на кръвопролитие.
155,16 В лѣто 6553. Заложи Володимиръ святую
155,17 Софию въ Новѣгородѣ.
155,18 В лѣто 6554.
155,19 В лѣто 6555. Ярославъ иде на Мазовъшаны,
155,20 и побѣди я, и кънязя ихъ уби Моислава, и
155,21 покори я Казимиру.
155,22 В лѣто 6556.
155,23 В лѣто 6557.
155,24 В лѣто 6558. Престави ся жена Ярославля
155,25 кънягыни.
155,26 В лѣто 6559. Постави Ярославъ Лариона
155,27 митрополитъмь Руси въ святѣи Софии, събьравъ
155,28 епископы.
155,29 И се да съкажемъ, чего ради прозъва ся Печерьскыи
155,30 манастырь. Боголюбивому кънязю
155,31 Ярославу любящю Берестовое и цьркъвь ту
156,1 сущюю святыхъ Апостолъ, и попы мъногы набъдящю,
156,2 въ нихъже бѣ прозвутеръ, именьмь Ларионъ, мужь
156,3 благъа и кънижьнъ и постьникъ. И хожаше
156,4 съ Берестоваго на Дънѣпръ, на хълмъ, къдѣ нынѣ
156,5 ветъхыи манастырь Печерьскыи, и ту молитву
156,6 творяше, бѣ бо лѣсъ ту великъ. Ископа печеръку
156,7 малу, дъву сажену, и приходя съ Берестоваго,
156,8 отъпѣваше часы и моляше ся ту Богу въ таинѣ.
156,9 По семь же Богъ кънязю къняжю въ сьрдьце, постави
156,10 митрополитъмь святѣй Софии, а си печеръка
156,11 тако ста. И не по мънозѣхъ дьньхъ бѣ
156,12 нѣкыи человѣкъ, именьмь мирьскымь, отъ града
156,13 Любьча, и възложи сему Богъ въ страну
156,14 ити. Онъ же устрьми ся въ Святую Гору, ити и
156,15 видѣ ту монастыря сущая, и възлюби
156,16 чьрньчьскыи образъ, и приде въ манастырь
156,17 ту, и моли игумена того, да бы на нь възложилъ
156,18 образъ мьнишьскыи. Онъ же послушавъ его,
156,19 постриже и, нарекъ имя ему Антонии, наказавъ
156,20 его и научивъ чьрньчьскому образу. И
156,21 рече ему: “иди опять въ Русь, и буди благословение отъ
156,22 Святыя Горы, и мънози отъ тебе
156,23 чьрноризьци быти имуть”. И благослови его, и отъпусти,
156,24 рекъ ему: “Иди съ миръмь”. Антонии же
156,25 приде Кыеву, и мышляше, къдѣ жити; и
156,26 походи по манастыремъ, и не възлюби, Богу не
156,27 хотящю. И поча ходити по дьбрьмъ и по горамъ,
156,28 ища, къдѣ бы ему Богъ показалъ. И приде на хълмъ,
156,29 идѣже бѣ Ларионъ ископалъ печерку, и възлюби
156,30 мѣстьце се, и въсели ся въ не. И нача молити ся
156,31 Богу съ сльзами, глаголя: “Господи! Утвьрди мя въ мѣстьци
157,1 семь, и да будеть на мѣстьци семь благословение
157,2 Святыя Горы и моего игумена, иже мя постриглъ”.
157,3 И поча жити ту, моля Бога, яды хлѣбъ
157,4 сухъ, и то чресъ дьнь, и воды въ мѣру
157,5 въкушая, и копая печеру, и не да собѣ покоя ни
157,6 дьнь ни нощь, въ трудѣхъ пребывая, въ
157,7 бъдѣньи и въ молитвахъ. По семь же увѣдавша
157,8 добрии человѣци, и приходяху къ нему, приносяще
157,9 ему, на потребу. И прослу
157,10 же великыи Антонии; и приходяще къ нему,
157,11 просаху у него благословения. По семь же, преставльшюся
157,12 великому кънязю Ярославу, прия власть
157,13 сынъ его Изяславъ, и сѣде Кыевѣ. Антонии же
157,14 прославленъ бысть въ Русьскѣи земли; Изяславъ же,
157,15 увѣдавъ житие его, и приде съ дружиною
157,16 своею, прося у него благословения и молитвы. И увѣданъ
157,17 бысть вьсѣми великыи Антонии и чтимъ, и
157,18 начаша приходити къ нему братия, и нача приимати
157,19 и постригати я. И събьра ся братия
157,20 къ нему числъмь 12, и ископаша печеру
157,21 велику, и цьркъвь, и кѣлия, яже суть и до сего
157,22 дьне въ печерѣ подъ ветъхымь манастырьмь.
157,23 Съвъкупленѣ же братии, рече имъ Антонии: “Се
157,24 Богъ васъ, съвъкупи, братие, и отъ благословения есте
157,25 Святыя Горы, имьже мене постриже игуменъ
157,26 Святыя Горы, а язъ васъ постригалъ; да буди
157,27 благословение на васъ пьрвое отъ Бога, а въторое отъ
157,28 Святыя Горы”. И се рекъ имъ: “Живѣте же о
157,29 собѣ, поставлю вы игумена, а самъ хощю
158,1 въ ону гору сѣсти единъ, якоже и преже бяхъ
158,2 обыклъ, уединивъ ся”. И постави имъ
158,3 игумена именьмь Варлама, а самъ иде въ гору,
158,4 ископа печеру, яже есть подъ новымь манастырьмь,
158,5 въ неиже съконьча животъ свои, живъ
158,6 въ добродѣтели, не выходя ис печеры лѣтъ 40
158,7 никаможе, въ неиже лежать мощи его и до сего
158,8 дьне. Братия же игуменъмь живяху въ печерѣ.
158,9 И умъоживъшимъ ся братии
158,10 и не могущимъ ся въмѣстити, и помыслиша
158,11 поставити вънѣ печеры манастырь. И приде
158,12 игуменъ и братия къ Антонию, и рекоша ему:
158,13 “Отъче! Умъножило ся братии, а не можемъ ся въмѣстити
158,14 въ печерѣ; да бы Богъ повелѣлъ и твоя
158,15 молитва, да быхомъ поставили цьркъвьцю малу вънѣ
158,16 печеры”. И повелѣ имъ Антонии. Они же поклониша ся
158,17 ему, и поставиша цьркъвьцю малу
158,18 надъ печерою въ имя Святыя Богородица Усъпение. И
158,19 нача Богъ умъножати чьрноризьцѣ молитвами святыя
158,20 Богородица, и съвѣтъ сътвориша братия съ игуменъмь
158,21 поставити манастырь. И идоша братия къ
158,22 Антонию, и рѣша: “Отъче! Братия умъножаеть ся, а
158,23 хотѣли быхомъ поставити манастырь”. Антонии
158,24 же, радъ бывъ, рече: “Благословенъ Богъ о вьсемь,
158,25 и молитва святыя Богородица и сущихъ отьць иже въ Святѣи
158,26 Горѣ да будеть съ вами”. И се рекъ, посъла
158,27 единого отъ братия къ Изяславу кънязю, река
158,28 тако: “Къняже мои! Се Богъ умъножаеть братию, а
158,29 мѣстьце мало; да бы ны далъ гору ту, яже
159,1 есть надъ печерою”. Изяславъ же, се слышавъ, и
159,2 радъ бывъ, мужь свои посъла, и въда имъ гору ту.
159,3 Игуменъ же и братия заложиша цьркъвь велику, и
159,4 манастырь оградиша стълпиемь, и кѣлиѣ
159,5 поставиша мъногы, и цьркъвь съвьршиша, и украсиша
159,6 иконами. И отътолѣ начаша ся манастырь Печерьскыи,
159,7 имьже бѣша жили чьрньци преже
159,8 въ печерѣ, и отъ того прозъва ся Печерьскыи
159,9 манастырь. Есть же Печерьскыи манастырь
159,10 отъ благословения Святыя Горы пошьлъ. Манастыреви же
159,11 съвьршену, игуменьство дьржащю Варламови,
159,12 Изяславъ же постави манастырь святаго Дьмитрия,
159,13 и выведе Варлама на игуменьство къ святому Дьмитрию,
159,14 хотя сътворити вышии сего манастыря,
159,15 надѣя ся богатьствѣ. Мънози бо манастыри отъ
159,16 цьсарь и отъ боляръ и отъ богатьства поставлени,
159,17 нъ не суть таци, каци суть поставлени сльзами и
159,18 пощениемь и молитвою и бъдѣниемь. Антонии бо не
159,19 имѣ злата, ни сьребра, нъ сътяжа и пощением
159,20 сльзами, якоже глаголахъ. Варламу же шьдъшю
159,21 къ святому Дьмитрию, съвѣтъ сътворьше братия,
159,22 идоша къ старьцю Антонию и рекоша: “Постави
159,23 намъ игумена”. Онъ же рече имъ: “Кого хощете?”
159,24 Они же рѣша: “Кого хощеть Богъ и ты”. И рече имъ:
159,25 “Къто болии въ васъ, акъже Федосии, послушьливыи
159,26 кротъкыи, съмѣреныи, да сь будеть
159,27 игуменъ вамъ”. Братия же, ради бывъше, поклониша ся
159,28 старьцю, и поставиша Феодосия игуменъмь,
159,29 братии числъмь 20. Феодисиеви же
159,30 приимшю манастырь, поча имѣти въздьржание,
159,31 велико пощение и молитвы съ сльзами, и
160,1 съвъкупляти нача мъногы чьрноризьци, и съвъкупи
160,2 братии числъмь 100. И нача искати правила
160,3 чьрньчьскаго, и обрѣте ся тъгда Михаилъ
160,4 чьрньць манастыря Студиискаго, иже бѣ
160,5 пришьлъ изъ Грькъ съ митрополитъмь Георгиемь,
160,6 и нача у него искати устава чьрньць Студиискыхъ.
160,7 И обрѣтъ у него, исписа, и устави
160,8 въ манастыри своемь, како пѣти пѣния манастырьская,
160,9 и поклонъ како дьржати, и чьтения
160,10 почитати, и стояние въ цьркъви, и вьсь рядъ
160,11 цьркъвьныи, на тряпезѣ сѣдание, и чьто ясти
160,12 въ кыя дьни, вьсе съ уставлениемь. Феодосии
160,13 вьсе то изъобрѣтъ, предасть манастырю своему.
160,14 Отъ негоже манастыря переяша вьси манастыри
160,15 уставъ; тѣмь же почьтенъ есть манастырь
160,16 Печерьскыи стареи вьсѣхъ. Феодосиеви
160,17 же живущю въ манастыри, и правящю добродѣтельное
160,18 житие и чьрньчьское правило, и
160,19 приимающю вьсякого приходящаго къ нему,
160,20 къ немуже и азъ придохъ, худыи и недостоиныи
160,21 рабъ, и приятъ мя, лѣтъ ми сущю 17
160,22 отъ рожения моего. Се же написахъ и положихъ,
160,23 въ кое лѣто почалъ быти манастырь, и чьто ради
160,24 зоветь ся Печерьскыи. А о Феодосиевѣ
160,25 житии пакы съкажемъ.
160,26 Въ лѣто 6560. Престави ся Володимиръ, сынъ
160,27 Ярославль стареишии, въ Новѣгородѣ, и положенъ
160,28 бысть въ святѣи Софии, юже бѣ самъ създалъ.
160,29 Въ лѣто 6561. У Вьсеволода роди ся
160,30 сынъ, Володимиръ, отъ цьсарицѣ
160,31 Грькынѣ.
161,1 Въ лѣто 6562. Престави ся великыи кънязь
161,2 Русьскый Ярославъ. И еще бо живу сущю ему,
161,3 наряди сыны своя, рекъ имъ: “Се азъ отъхожю
161,4 свѣта сего, сынове мои; имѣите въ собѣ любъвь,
161,5 понеже вы есте братия единого отьца и матере. Да
161,6 аще будете въ любъви межю собою, Богъ будеть
161,7 въ васъ, и покорить вы противьныя подъ
161,8 вы. И будѣте мирьно живуще. Аще ли будете
161,9 ненавистьно живуще, въ распьряхъ которающе ся,
161,10 то погибнете сами, и
161,11 землю отьць своихъ и дѣдъ своихъ, иже налѣзоша
161,12 трудъмь великъмь; нъ пребываите мирьно,
161,13 послушающе братъ брата. Се же поручаю въ себе
161,14 мѣсто столъ старѣишему сыну своему и брату
161,15 вашему Изяславу Кыевъ; сего послушаите, якоже
161,16 послушасте мене, да тъ вы будеть въ мене
161,17 мѣсто; а Святославу Чьрниговъ, а Вьсеволоду
161,18 Переяславль, а Вячеславу
161,19 Смолиньскъ”. И тако раздѣли имъ грады,
161,20 заповѣдавъ имъ не преступати предѣла братня,
161,21 ни съгонити, рекъ Изяславу: “Аще къто хощеть
161,22 обидѣти брата своего, то ты помагаи, егоже
161,23 обидять”. И тако наряди сыны своя пребывати
161,24 въ любъви. Самому же больну сущю, и пришьдъшю къ
161,25 Вышегороду, разболѣ ся вельми, Изяславу тъгда
161,26 сущю, а Святославу въ Володимири, Вьсеволоду
161,27 же тъгда сущю у отьця, бѣ бо любимъ отьцьмь
161,28 паче вьсея братии, егоже имяше присно у
162,1 себе. Ярославу же приспѣ коньць жития, и
162,2 предасть душю свою, въ суботу 1 поста святаго
162,3 Феодора. Вьсеволодъ же съпрята тѣло отьца
162,4 своего, възложи на сани, везоша Кыеву,
162,5 попове, поюще обычьныя пѣсни. И плакаша ся
162,6 по немь людие. И принесъше положиша и
162,7 въ рацѣ мраморянѣ, въ цьркъви святыя София. И
162,8 плака ся по немь Вьсеволодъ и людие вьси. Живе
162,9 же вьсѣхъ лѣтъ 70 и 6.
162,10 Начало къняжения Изяславля въ Кыевѣ.
162,11 Пришьдъ Изяславъ сѣде въ Кыевѣ, Святославъ бъ
162,12 Чьрниговѣ, Вьсеволодъ въ Переяславли, Игорь въ
162,13 Володимири, Вячеславъ въ Смолиньстѣ. Въ сеже
162,14 лѣто иде Вьсеволодъ на Търкы зимѣ къ Воиню,
162,15 и побѣди Търкы. Въ семьже лѣтѣ приходи
162,16 Болушь съ Половьци, и сътвори Вьсеволодъ миръ
162,17 съ ними, и възвратиша ся въ
162,18 отънюду же бѣ пришли.
162,19 Въ лѣто 6564.
162,20 В лѣто 6565. Престави ся Вячеславъ, сынъ
162,21 Ярославль, Смолиньстѣ, и посадиша Игоря въ
162,22 Смолиньстѣ, изъ Володимиря выведъше.
162,23 Въ лѣто 6566. Побѣди Изяславъ Голядь.
162,24 Въ лѣто 6567. Изяславъ и Святославъ и
162,25 Въсеволодъ высадиша стрыя своего ис поруба,
162,26 сѣдѣвъша 20 и 4 лѣтѣ, заводивъше крьсту, и
162,27 бысть чьрньцьмь.
162,28 Въ лѣто 6568. Престави ся Игорь, сынъ Ярославль.
163,1 Въ семьже лѣтѣ Изяславъ и Святославъ
163,2 и Вьсеволодъ и Вьсеславъ, съвъкупише воя
163,3 бещисльны, и поидоша на конихъ и въ лодияхъ,
163,4 бещисльно мъножьство, на Търкы. Се слышавъше
163,5 Търци убоявъше ся, пробѣгоша и до сего
163,6 дьне, и помьроша бѣгающе, Божиимь гнѣвъмь
163,7 гоними, ови отъ зимы, друзии же гладъмь, ини
163,8 же моръмь и судъмь Божиимъ. Тако Богъ избави
163,9 хрьстияны отъ поганыхъ.
163,10 Въ лѣто 6569. Придоша Половьци пьрвое на
163,11 Русьскую землю воеватъ; Вьсеволодъ же изиде
163,12 противу имъ, мѣсяца февраля въ 2 дьнь.
163,13 И бивъшимъ ся имъ, побѣдиша Вьсеволода, и
163,14 воевавъше отъидоша. Се бысть пьрвое зъло отъ поганыхъ
163,15 и безбожьныхъ врагъ. Бысть же кънязь ихъ
163,16 Сокалъ.
163,17 Въ лѣто 6570.
163,18 Въ лѣто 6571. Судиславъ престави ся,
163,19 Ярославль брать, и погребоша и въ цьркъви святаго
163,20 Георгия. Въ сеже лѣто Новѣгородѣ иде
163,21 Вълховъ въспять дьнии 5. Се же знамение не
163,22 добро бысть, на 4-е лѣто пожьже Вьсеславъ
163,23 градъ.
163,24 Въ лѣто 6572. Бѣжа Ростиславъ Тьмутороканю,
163,25a сынъ Володимирь, вънукъ Ярославль,
163,25b и съ нимъ бѣжа Порѣи и
163,25c Вышата, сынъ Остромиръ, воеводы Новъгородьского. И пришедъ, выгъна
163,25d Глѣба ис Тьмуторокана, а самъ сѣде въ него мѣсто.
163,25e Въ лѣто 6573. Иде Святославъ на Ростислава къ
163,25f Тьмутороканю.
163,26 Ростиславъ же отъступи кромѣ изъ града, не
163,27 убоявъ ся его, нъ не хотя противу стрыеви
163,28 своему оружия възяти. Святославъ же пришьдъ
164,1 Тьмутороканю, посади сына своего пакы, Глѣба,
164,2 и възврати опять. Ростиславъ же пакы,
164,3 пришьдъ выгъна Глѣба, и приде Глѣбъ
164,4 къ отьцю своему, Ростиславъ же сѣде Тьмуторокани.
164,5 Въ сеже лѣто Вьсеславъ рать почалъ.
164,6 Въ сиже времена бысть знаменлие на западѣ,
164,7 звѣзда превелика, лучѣ имущи акы кръвавы,
164,8 въсходящи съ вечера по заходѣ сълньчьнѣмь,
164,9 и пребысть за 7 дьнии. Се же проявляше не на
164,10 добро. По семь бо быша усобицѣ мъногы и
164,11 нашьствие поганыхъ на Русьскую землю, си бо
164,12 звѣзда бѣ акы кръвава, проявляющи кръвипролитие.
164,13 Въ сиже времена бысть дѣтищь
164,14 въвьрженъ въ Сѣтомль; его же дѣтища выволокоша
164,15 рыболове въ неводѣ, егоже позоровахомъ
164,16 до вечера, и пакы въвьргоша и въ воду.
164,17 Бяше бо сиць: на лици ему срамьнии удове,
164,18 иного нѣ льзѣ казати срама ради. Предъ симьже
164,19 временьмь и сълньце премѣни ся, и не бысть свѣтло,
164,20 нъ акы мѣсяць бысть, егоже невѣгласи глаголють сънѣдаему
164,21 сущю. Се же бывають сица знамения
164,22 не на добро, мы бо по сему разумѣмъ, якоже
164,23 древле, при Антиосѣ, въ Иерусалимѣ ключи ся вънезапу
164,24 по въсему граду за 40 дьнии являти ся
164,25 на въздусѣ на конихъ рищющимъ, въ оружии,
164,26 златы одежа имущемъ, и пълкы объявьляющемъ
164,27 и оружиемъ двизающимъ ся. Се же
164,28 проявляше нахожение Антиохово
165,1 на Иерусалимъ. По семь же при Неронѣ цьсари въ томьже
165,2 Иерусалимѣ въсия звѣзда въ образъ копииныи
165,3 надъ градъмь: се же проявляше нахожение рати
165,4 отъ Римлянъ. И паки сице же бысть при Устиниянѣ
165,5 цьсари, звѣзда въсия на западѣ, испущающи
165,6 луча, юже прозываху блистальницю, и бысть сияющи
165,7 дьнии 20; по семь же бысть звѣздамъ
165,8 течение, съ вечера до утрия, яко мьнѣти вьсѣмъ,
165,9 яко падають звѣзды, и пакы сълньце без лучь
165,10 сияше: се же проявляше крамолы, недузи
165,11 чловѣкомъ умьртвие бяше. Пакы же при Маврикии
165,12 цьсари бысть сице: жена дѣтищь роди безъ
165,13 очию и безъ руку, въ чресла бѣ ему рыбии
165,14 хвостъ прирослъ; и пьсъ роди ся шестоногъ; въ
165,15 Африкии же 2 дѣтища родиста ся, единъ
165,16 о 4-хъ ногахъ, а другыи о дъвою главу.
165,17 По семь же бысть при Костянтинѣ иконоборьци,
165,18 сына Леонова: течение звѣздьное бысть на
165,19 небесе, отътъргаху бо ся на землю, яко видящимъ
165,20 мьнѣти коньчину; тъгда же въздухъ възлия ся
165,21 по велику; въ Сурии же бысть трусъ великъ, земли
165,22 расѣдъши ся трии попьрищь, изиде дивьно изъ землѣ
165,23 мьска, чловѣчьскымь гласъмь глаголющи и
165,24 проповѣдающи наитие языка, еже и бысть:
165,25 наидоша бо Срацини на Палестиньскую землю.
165,26 Знамения бо въ небеси, или звѣздахъ, или сълньци, или
165,27 пътицами, ли етеръмь чимъ не благо бывають;
165,28 нъ знамения сиця на зъло бывають,
165,29 ли проявление рати, ли гладу, ли съмьрть проявляють.
166,1 В лѣто 6574. Ростиславу сущю Тьмуторокани
166,2 и емлющю дань у Касогъ и
166,3 у инѣхъ странъ, сего же убоявъше ся Грьци,
166,4 посълаша съ льстию котопана. Оному же пришьдъшю
166,5 къ Ростиславу и въвѣривъшю ся ему,
166,6 чьтяшеть и Ростиславъ. Единою же пиющю
166,7 Ростиславу съ дружиною своею, рече котопанъ:
166,8 “Къняже! Хочю на тя пити.” Оному же рекъшю: “Пии.”
166,9 Онъ же испивъ половину, а половину дасть кънязю
166,10 пити, дотиснувъ ся пальцьмь въ чашю, бѣ бо
166,11 имѣя подъ ногътьмь растворение съмьртьное, и дасть
166,12 кънязю, урекъ съмьрть до дьне осми. Оному же
166,13 испивъшю, котопанъ же пришьдъ Кърсуню повѣдаше,
166,14 яко въ сии дьнь умьреть Ростиславъ,
166,15 якоже и бысть. Сего же котопана побиша камениемь
166,16 Кърсуньстии людие. Бѣ же Ростиславъ
166,17 мужь добръ на рати, възрастъмь же лѣпъ и
166,18 красьнъ лицьмь и милостивъ убогымъ.
166,19 Умьре же мѣсяца февраля въ 3 дьнь, и тамо
166,20 положенъ бысть въ цьркъви святыя Богородица.
166,21 Въ лѣто 6575. Зарати ся Вьсеславъ, сынъ
166,22 Брячиславль, Полотьскыи, и зая Новъгородъ.
166,23 Ярославичи же трие, Изяславъ, Святославъ,
166,24 Вьсеволодъ, съвъкупивъше вои, идоша на Вьсеслава,
166,25 зимѣ сущи велицѣ. И придоша къ Мѣньску, и
166,26 Мѣняне затвориша ся въ градѣ. Си же братия
166,27 възяша Мѣньскъ, и исѣкоша мужѣ, а жены
166,28 и дѣти възаша на щиты. И поидоша къ Немизѣ,
166,29 и Вьсеславъ поиде противу. И съвъкупиша ся обои
166,30 на Немизѣ, мѣсяца марта въ 3 дьнь; и бяше
167,1 снѣгъ великъ, и поидоша противу собѣ. И
167,2 бысть сѣча зъла, и мънози падоша, и одолѣша
167,3 Изяславъ, Святославъ, Вьсеволодъ, Вьсеславъ
167,4 бѣжа. По семь же, мѣсяца иуля въ 10 дьнь,
167,5 Изяславъ, Святославъ и Вьсеволодъ цѣловавша
167,6 крьстъ чьстьныи къ Вьсеславу, рекъше ему: “Приди
167,7 къ намъ, яко не сътворимъ ти зъла”. Онъ же, надѣя ся
167,8 цѣловании крьста, преѣха въ лодии
167,9 чресъ Дънѣпръ. Изяславу же въ шатьръ предъидущю,
167,10 и тако яша Вьсеслава на Ръши у
167,11 Смольньска, преступивъше крьстъ. Изяславъ же
167,12 приведе Вьсеслава Кыеву, и вьсади и въ порубъ
167,13 съ дъвѣма сынъма.
167,14 Въ лѣто 6576. Придоша иноплеменьници
167,15 на Русьску землю, Половьци мънози.
167,16 Изяславъ же и Святославъ и Вьсеволодъ изидоша
167,17 противу имъ на Льто. И бывъши нощи, поидоша
167,18 противу собѣ. Грѣхь же ради нашихъ
167,19 попусти Богъ на ны поганыя, и побѣгоша Русьстии
167,20 кънязи, и побѣдиша Половьци.
167,21 Новодить Богъ по гнѣву своему иноплеменьникы
167,22 на землю, и тако съкрушеномъ имъ
167,23 въспомянуть ся къ Богу; усобьная же рать бываеть
167,24 отъ съважнения дияволя. Богъ бо не
167,25 хощеть зъла чловѣкомъ, нъ блага; а дияволъ радуеть ся
167,26 зълому убииству, кръвопролитию,
167,27 въздвизая съвары, зависти, братоненавидѣния,
167,28 клеветы. Земли же съгрѣшивъши
167,29 которѣи любо, “казнить Богъ съмьртию, ли гладъмъ,
168,1 ли наведениемъ поганыхъ, ли ведръмь, ли
168,2 гусѣницею, ли инѣми казньми. Аще ли покаявъше ся
168,3 будемъ, въ немьже ны Богъ велить быти,
168,4 глаголеть бо намъ пророкъмь: “Обратите ся къ мънѣ вьсѣмъ
168,5 сьрдьцьмь вашимь, постъмь и плачьмь”. Да аще сице
168,6 сътворимъ, вьсѣхъ грѣхъ прощени будемъ: нъ мы
168,7 на зълое възращаемъ ся, акы свиния въ калѣ
168,8 грѣховьнѣмь присно {каляюще | валяюще} ся, и тако пребываемъ.
168,9 Тѣмь же пророкъмь намъ глаголеть: “Разумѣхъ,
168,10 рече, яко жестокъ еси, и шия желѣзьна выя
168,11 твоя”; того ради “Удьржахъ отъ васъ дъждь,
168,12 предѣлъ единъ одъждихъ, а другаго не одъждихъ,
168,13 исъше”; “И поразихъ вы зноемь и различьными
168,14 казньми; то и тако не обратисте ся къ
168,15 мънѣ”. Сего ради винограды ваша и смокъвь
168,16 вае, нивы и дубравы ваша истьрохъ,
168,17 глаголеть Господь, а зълобъ вашихъ не могохъ истьрти.
168,18 “Посълахъ на вы различьныя болѣзни и съмьрти
168,19 тяжькыя”, и на скоты казнь свою посълахъ, “то и
168,20 тако не обратисте ся”, но рѣсте: “Мужаимъ ся”.
168,21 Доколѣ не насытисте ся зълобъ вашихъ? Вы бо
168,22 уклонисте ся отъ пути моего, глаголеть Господь, и съблазнисте
168,23 мъногы; сего ради “Съвѣдѣтель скоръ
168,24 на противьныя, на прелюбодѣица, и на
168,25 кльнущая ся именьмь моимь въ лъжю, и на
168,26 лишающая мьзды наимьника, насильствующая
168,27 сиротѣ и въдовици, и на укланяющая
168,28 судъ криво. Почьто не зъдьрзасте ся въ грѣсѣхъ
168,29 вашихъ? Нъ уклонисте законы моя, и не
169,1 съхранисте ихъ. Обратите ся къ мънѣ, и обращю ся
169,2 къ вамъ, глаголеть Господь. И азъ отвьргу вамъ
169,3 хляби небесныя, и възращю отъ васъ гнѣвъ
169,4 свои, доньдеже вьсе обилуеть вамъ, и не имуть
169,5 изнемощи виногради ваши и нивы. Нъ вы
169,6 отяжасте на мя словеса ваша, глаголюще: суетьнъ
169,7 работая Богу”. Тѣмь же “Усты чьтуть мя,
169,8 а сьрдьце ваше далече отъстоить отъ мене, глаголеть Господь”. Того
169,9 ради ихъже просимъ, не улучимъ; “Будеть бо,
169,10 рече, егда призовете мя, азъ же не послушаю
169,11 васъ”. Възищете мене зълии, и не обрящете; не
169,12 въсхотѣша бо ходити по путьмъ моимъ; да того
169,13 ради затворяеть ся небо, ово ли зълѣ отъверзаеть ся,
169,14 градъ въ дъждя мѣсто пущая, ово ли сланою
169,15 плоды узнабляя и землю зноемь томя, нашихъ
169,16 ради зълобъ. Аще ли ся покаемъ о зълобахъ
169,17 своихъ, то “Акы чадомъ своимъ подасть намъ вься
169,18 прошения, и одъждить намъ дъждь ранъ и поздьнъ.
169,19 И напълнять ся гумьна ваша пьшеници. И
169,20 пролѣють ся точила виньная и маслиньная. И
169,21 въздамь вамъ за лѣта, яже пояша прузи и хрустове
169,22 и гусѣниця; сила моя великая, юже
169,23 посълахъ на вы”, глаголеть Господь Вьседьржитель. Си
169,24 слышаще, въстягнѣмъ ся на добро, възищѣте
169,25 суда, избавите обидимаго, на покаяние придѣмъ,
169,26 не въздающе зъла за зъло, ни клеветы за клевету,
169,27 нъ любъвию прилѣпимъ ся Господи Бозѣ нашемь,
170,1 постъмь, и рыданиемь и сльзами омывающе
170,2 вься прегрѣшения, не словъмь нарицяюще ся
170,3 хрьстияни, а поганьскы живуще. Се бо
170,4 не поганьски ли живемъ, аще въ сърѣчю
170,5 вѣрующе? Аще бо къто усърящеть чьрноризьца,
170,6 то възвращаеть ся, ли единьць, ли свинию; то
170,7 не поганьскы ли есть се? Се бо по дияволю
170,8 научению кобь сию дьржать; друзии же
170,9 закыханию вѣрують, еже бываеть на
170,10 зъдравие главѣ. Нъ сими дияволъ льстить и
170,11 другыми нравы, вьсякыми льстьми превабляя
170,12 ны отъ Бога, трубами и скомрахы и гусльми и
170,13 русалиями. Видимъ бо игрища утолочена, и
170,14 людии мъножьство на нихъ, яко упихати
170,15 начьнуть другъ друга, позоры дѣюще отъ бѣса
170,16 замышленаго дѣла, а цьркъви стоять; егда же
170,17 бываеть годъ молитвы, мало ихъ обрѣтаеть ся
170,18 въ цьркъви. Да сего ради казни приемлемъ отъ Бога
170,19 вьсякыя, нахожение ратьныхъ, по Божию
170,20 повелѣнию приемлемъ казнь грѣхъ ради нашихъ”. И
170,21 мы же на предълежащее възвратимъ ся.
170,22 Изяславу же съ Вьсеволодъмь Кыеву
170,23 пришедъшю, а Святославу Чьрнигову, и людие
170,24 Кыевьстии прибѣгоша Кыеву, и сътвориша
170,25 вѣче на търговищи, и рѣша, посълавъше ся къ
170,26 кънязю: “Се Половьци росули ся по земли; да въдаи,
170,27 къняже, оружия и кони, и еще биемъ ся съ ними”.
171,1 Изяславъ же сего не послуша. И начаша
171,2 людие говорити на воеводу, на Къснячьа; и
171,3 идоша съ вѣча на гору, и придоша на дворъ
171,4 Къснячьковъ, и не обрѣтъше его, сташа
171,5 у двора Брячиславля и рѣша: “Поидѣмъ, высадимъ
171,6 дружину ис погреба”. И раздѣлиша ся
171,7 на дъвое: половина ихъ иде къ погребу, а
171,8 половина иде по мосту; сии же придоша
171,9 на къняжь дворъ. Изяславу сѣдящю на
171,10 сѣнехъ съ дружиною своею, и начаша пьрѣти ся
171,11 съ кънязьмъ, стояще долѣ. Кънязю изъ окъньця
171,12 зьрящю и дружинѣ стоящи у кънязя, рече Тукы,
171,13 братъ Чюдинь, Изяславу: “Видиши, къняже, людие
171,14 възвыли; посъли, ать блюдуть Вьсеслава”. И се
171,15 ему глаголющю, другая половина людии приде отъ
171,16 погреба, отътворивъше погребъ. И рѣша дружина
171,17 кънязю: “Се зъло есть; посъли къ Вьсеславу, ать
171,18 призъвавъше льстию къ окъньцю, проньзуть и
171,19 мечьмь”. И не послуша сего кънязь. Людие же
171,20 кликнуша, и идоша къ порубу Вьсеславлю. Изяславъ
171,21 же, се видѣвъ, съ Вьсеволодъмь побѣгоста
171,22 съ двора. Людие же высѣкоша Вьселава ис поруба,
171,23 въ 15 дьнь семтября, и {прославиша | поставиша} и средѣ
171,24 двора къняжа. Дворъ къняжь разграбиша,
171,25 бещисльное мъножьство злата и сьребра, кунами
171,26 и {бѣлию | скорою}. Изяславъ же бѣжа въ Ляхы.
171,27 По семь же, Половьцемъ воюющимъ по землѣ
171,28 Русьстѣ, Святославу сущю Чьрниговѣ, и Половьцемъ
172,1 воюющимъ около Чьрнигова, Святославъ же,
172,2 събравъ дружины нѣколико, изиде на ня
172,3 къ Снъвьску. И узьрѣша Половци идуща
172,4 воя, пристроиша ся противу. И видѣвъ Святославъ
172,5 мъножьство ихъ, и рече дружинѣ своеи:
172,6 “Потягнѣмъ, уже намъ не льзѣ камо ся дѣти”. И
172,7 удариша въ конѣ, и одолѣ Святославъ въ трьхъ
172,8 тысячахъ, а Половьць бѣ 12 тысящь;
172,9 и тако биеми, а друзии потопоша въ Снъви,
172,10 а кънязя ихъ яша рукама, въ 1 дьнь ноября.
172,11 И възврати ся съ побѣдою въ градъ свои
172,12 Святославъ. Вьсеславъ же сѣде Кыевѣ. Се же
172,13 Богъ яви силу крьстьную, понеже Изяславъ цѣловавъ
172,14 крьстъ, и я и; тѣмь же наведе Богъ
172,15 поганыя, сего же явѣ избави крьстъ чьстныи.
172,16 Въ дьнь бо Въздвижения Вьсеславъ, въздъхнувъ,
172,17 рече: “О крьсте чьстныи! Понеже къ тобѣ вѣровахъ,
172,18 избави мя отъ рова сего”. Богъ же показа силу
172,19 крьстьную на показание землѣ Русьстѣи, да
172,20 не преступають чьстнаго крьста, цѣловавъше его;
172,21 аще ли преступить, то и зьдѣ приимуть
172,22 казнь и на придущимь вѣцѣ казнь вѣчьную.
172,23 Понеже велика есть сила крьстьная; крьстъмь бо
172,24 побѣжени бывають силы бѣсовьскыя, крьстомъ
172,25 бо къняземъ пособить въ браньхъ, крьстъмь
172,26 огражаеми вѣрьнии побѣжають супостаты
172,27 противьныя, крьстъмь бо въскорѣ избавляетъ
172,28 отъ напастии призывающимъ его съ вѣрою, ничего
173,1 же ся бѣси боять, тъкъмо крьста. Аще бо бывають
173,2 отъ бѣсовъ мьчьтания, знаменавъше лице
173,3 крьстъмь, прогоними бывають. Вьсеславъ же сѣде
173,4 Кыевѣ мѣсяць 7.
173,5 Въ лѣто 6577. Поиде Изяславъ съ Болеславъмь
173,6 на Вьсеслава; Вьсеславъ же поиде противу.
173,7 Приде къ Бѣлугороду Вьсеславъ, и бывъши
173,8 нощи, утаивъ ся Кыянъ бѣжа из Бѣлагорода
173,9 Полотьску. Заутра же видѣвъше людие бѣжавъша
173,10 кънязя, възвратиша ся Кыеву, и сътвориша
173,11 вѣче, посълаша ся къ Святославу и къ Вьсеволоду,
173,12 глаголюще: “Мы уже зъло сътворили есмы, кънязя
173,13 своего прогънавъше, а се ведеть на ны Лядьскую
173,14 землю, а поидѣта въ градъ отьца своего;
173,15 аще ли не хощета, то намъ неволя: зажьгъше
173,16 градъ свои, ступимъ въ Грьчьску землю”. И рече
173,17 имъ Святославъ: “Вѣ посълевѣ къ брату своему;
173,18 аще поидеть на вы съ Ляхы губити васъ,
173,19 то вѣ противу ему ратию, не дадивѣ бо
173,20 погубити града отьца своего; аще ли хощеть
173,21 съ миръмь, то въ малѣ придеть дружинѣ”. И
173,22 утѣшиста Кыяны. Святославъ же и Вьсеволодъ
173,23 посъласта къ Изяславу, глаголюща “Вьсеславъ ти бѣжалъ,
173,24 а не води Ляховъ Кыеву, противьна
173,25 ти нѣту; аще ли хощеши гнѣвъ имѣти и
173,26 погубити градъ, то вѣси, яко нама жаль отьня
173,27 стола”. То слышавъ Изяславъ, остави Ляхы и
173,28 поиде съ Болеславъмь, мало Ляховъ поимъ; посъла же
173,29 предъ собою сына своего Мьстислава Кыеву.
173,30 И пришьдъ Мьстиславъ, исѣче Кияны, иже
174,1 бѣша высѣкли Вьсеслава, числъмь 70 чади,
174,2 а другыя слѣпиша, другыя же без вины
174,3 погуби, не испытавъ. Изяславу же идущю къ
174,4 граду, изидоша людие противу съ поклонъмь, и
174,5 прияша кънязь свои Кыяне; и сѣде Изяславъ
174,6 на столѣ своемь, мѣсяца мая въ 2 день.
174,7 И распуща Ляхы на покърмъ, и избиваху
174,8 Ляхы отаи; и възврати ся Болеславъ
174,9 въ землю свою. Изяславъ же възгъна търгъ на
174,10 гору, и прогъна Вьсеслава ис Полотьска, посади
174,11 сына своего Мьстислава Полотьскѣ; иже
174,12 въскорѣ умьре ту. И посади въ него мѣсто брата
174,13 его Святопълка, Вьсеславу же бѣжавъшю.
174,14 Въ лѣто 6578. Роди ся у Вьсеволода сынъ, и
174,15 нарекоша именьмь Ростиславъ. Въ сеже лѣто
174,16 заложена бысть цьркы святаго Михаила въ манастырѣ
174,17 Вьсеволожи.
174,18 Въ лѣто 6579. Воеваша Половьци у Растовьца
174,19 и у Неятина. Въ сеже лѣто выгъна
174,20 Вьсеславъ Святопълка ис Полотьска. Въ сеже лѣто
174,21 побѣди Яропълкъ Вьсеслава у Голотичьска.
174,22 Въ сиже времена приде вълхвъ, прельщенъ
174,23 бѣсъмь; пришьдъ бо Кыеву, глаголаше: “явила ми ся пять богъ, глаголюще сице: `повѣдаи
174,24 людьмъ, яко на пятое лѣто Дънѣпру
174,25 потещи въспять, а землямъ преступати на
174,26 ина мѣста, яко стати Грьчьстои земли на
174,27 Русьскои, а Русьскои на Грьчьскои, и прочимъ
174,28 землямъ измѣнити ся”'. Егоже невѣгласи
174,29 послушаху, вѣрьнии же на смѣяху ся, глаголюще ему:
174,30 “Бѣсъ тобою играеть на пагубу тобѣ”. Еже
175,1 и бысть ему: въ едину бо нощь бысть без вѣсти.
175,2 Бѣси бо, подътъкше на зъло въводять; по семъ же
175,3 насмисають ся, {въвьргъше | въринуша} и въ пропасть съмьртьную,
175,4 научивъше глаголати. Яко се съкажемъ бѣсовьское
175,5 наущение и дѣиство. Бывъши бо единою
175,6 скудости въ Ростовьстѣи области, въстаста дъва
175,7 вълхва отъ Ярославля, глаголюща, яко “Вѣ съвѣмы,
175,8 къто обилие дьржить”. И поидоста по Вълзѣ; и къдѣ
175,9 придуча въ погостъ, ту же нарекаста лучьшая
175,10 жены, глаголюща, яко си жито дьржить, а си
175,11 медъ, а си рыбы, а си скору. И привожаху
175,12 къ нима сестры своя и матере и жены
175,13 своя. Она же въ мьчьтѣ прорѣзавъша за плечемь,
175,14 вынимаста любо жито, любо рыбу, и
175,15 убивашета мъногы жены, имѣния ихъ
175,16 имашета собѣ. И придоста на Бѣлоозеро, и
175,17 бѣ о нею людии инѣхъ 300. Въ сеже время
175,18 приключи ся прити отъ Святослава дань емлющю
175,19 Яневи, сыну Вышатину; повѣдаша ему Бѣлозерьци,
175,20 яко дъва кудесьника избила мъногы
175,21 жены по Вълзѣ и по Шекъснѣ, и пришьла еста
175,22 сѣмо. Янь же, испытавъ, чия еста смьрда, и
175,23 увѣдѣвъ, яко своего кънязя, посълавъ къ нимъ,
175,24 иже около ею суть, и рече имъ: “Выдаите вълхва
175,25 та сѣмо, яко смьрда еста моего кънязя”.
175,26 Они же сего не послушаша. Янь же поиде самъ
175,27 безъ оружия, и рѣша ему отроци его: “Не
176,1 ходи безъ оружия, осоромять тя”. Онъ же
176,2 повелѣ възяти оружие отрокомъ, и бяста
176,3 12 отрока съ нимь, и поиде къ нимъ къ лѣсу.
176,4 Они же сташа испълчивъше ся противу. Яневи
176,5 же идущю съ топорьцьмь, выступиша отъ нихъ
176,6 3 мужи придоша къ Яневи, рекуще ему:
176,7 “Вида идеши на съмьрть, не ходи”. Оному же повелѣвъшю
176,8 бити я, къ прочимъ же поиде. Они
176,9 же сунуша ся на Яня, единъ грѣши ся Яня
176,10 топоръмь. Янь же оборотя топоръ удари и
176,11 тылиемь, повелѣ отрокомъ сѣщи я. Они же
176,12 бѣжаша въ лѣсъ, убиша же ту попа
176,13 Янева. Янь же, въшьдъ въ градъ къ Бѣлозерьцемъ, рече
176,14 имъ, “Аще не имете вълхву сею, не иду отъ васъ
176,15 за лѣто”. Бѣлозерьци же, шьдъше, яша и,
176,16 и приведоша я къ нему. И рече има: “Чьто ради
176,17 погубиста толико человѣкъ?” Онѣма же рекъшема,
176,18 яко “Ти дьржать обилие; да аще
176,19 истребивѣ и избиевѣ сихъ, будеть гобино; аще ли хощеши,
176,20 то предъ тобою выемѣве жито, или рыбу,
176,21 или ино чьто”. Янь же рече: “По истинѣ лъжета;
176,22 сътворилъ бо есть Богъ человѣка отъ земля, съставленъ костьми
176,23 и жилами отъ кръве и нѣсть въ немь ничьтоже, и
176,24 не вѣсть никътоже, тъкъмо Богъ единъ вѣсть”.
176,25 Она же рекоста: “Вѣ вѣвѣ, како есть человѣкъ
176,26 сътворенъ”. Онъ же рече: “Како?”. Она же рекоста:
176,27 “Богъ мывъ ся въ мовьници и въспотивъ ся,
177,1 отьре ся вехътьмь, и съ вьрже съ небесе на землю.
177,2 И распрѣ ся сотона съ Богъмь, кому въ немь сътворити
177,3 человѣка. И сътвори дияволъ человѣка, а Богъ душю
177,4 въ нь въложи. Тѣмь же, аще умьреть человѣкъ, въ землю
177,5 идеть тѣло, а душа къ Богу”. Рече има Янь: “По истинѣ
177,6 прельстилъ васъ есть бѣсъ; коему богу вѣруета?”
177,7 Она же рекоста: “Антихрьсту”. Онъ же рече има: “То
177,8 къдѣ есть?” Она же рекоста: “Сѣдить въ бездьнѣ”.
177,9 Рече има Янь: “То кыи есть богъ, сѣдяи въ бездьнѣ? То
177,10 есть бѣсъ, а Богъ есть сѣдяи на небеси на престолѣ,
177,11 славимъ отъ ангелъ, иже предъстоять ему съ страхъмь,
177,12 не могуще на нь зьрѣти. Сихъ бо ангелъ съвьрженъ
177,13 бысть, егоже вы глаголета антихрьстъ, за величание
177,14 его съвьрженъ бысть съ небесе, и есть въ бездьнѣ
177,15 якоже вы глаголета, жьда, егда придеть Богъ съ небесе. И
177,16 сего имъ антихрьста съвяжеть узами и
177,17 посадить и въ огни вѣчьнѣмъ съ слугами его и
177,18 иже къ нему вѣрують. Вама же и сьде муку
177,19 прияти отъ мене, и по съмьрти тамо”. Онѣма же
177,20 рекъшема: “Нама бози повѣдають: не можеши
177,21 нама сътворити ничьтоже”. Онъ же рече има: “Лъжють
177,22 вама бози”. Она же рекоста: “Нама прѣдъстати
177,23 предъ Святославъмь, а ты не можеши сътворити
177,24 ничьтоже”. Янь же повелѣ бити я и потъргати
177,25 брадѣ ею. Сима же тепенома и брадѣ ею потърганѣ
177,26 проскѣпъмь, рече има Янь: “Чьто вама бози
177,27 мълвять?” Онѣма же рекъшема: “Стати намъ предъ
178,1 Святославъмь”. И повелѣ Янь въложити рубля въ уста
178,2 има и привязати я къ упругомъ, и пусти предъ
178,3 собою въ лодии, и самъ по нихъ иде. И сташа
178,4 на устии Шекъсны, и рече има Янь: “Чьто вамъ
178,5 бози мълвять?” Она же рекоста: “Сице нама бози
178,6 мълвять: не быти нама живымъ отъ тебе”. И рече
178,7 има Янь: “То вамъ право повѣдали”. Она же
178,8 рекоста: “Аще на пустиши, мъного ти добра
178,9 будеть; аще ли наю погубиши, мъногу печаль
178,10 приимеши и зъло”. Онъ же рече има: “Аще ваю
178,11 пущю, то зъло ми будеть отъ Бога; аще ли васъ погублю,
178,12 то мьзда ми будеть”. И рече Янь повозьникомъ: “Ци
178,13 кому васъ къто родинъ убиенъ отъ сею?” Они же
178,14 рѣша: “Мънѣ мати, другому сестра, иному рожение”.
178,15 Онъ же рече имъ: “Мьстите своихъ”. Они же поимъше,
178,16 убиша я и повѣсиша я на дубѣ: отъмьстие
178,17 приимъша отъ Бога по правьдѣ. Яневи же идущю
178,18 домови, въ другую нощь медвѣдь възлѣзъ,
178,19 угрызе я, и сънѣсть. И тако погыбнуста
178,20 наущениемь бѣсовьскымь, инѣмъ вѣдуща и гадающа, а
178,21 своея пагубы не вѣдуща. Аще ли быста
178,22 вѣдала, то не быста пришьла на мѣсто се, идеже
178,23 ятома има быти; аще ли ята быста, то
178,24 почьто глаголаста: “Не умрети нама”, оному мыслящю
178,25 убити я? Нъ се есть бѣсовьское наущение;
178,26 бѣси бо не вѣдять мысли чловѣчьскыя, нъ вълагають
178,27 помыслъ въ чловѣка, таины не съвѣдуще.
179,1 Богъ же единъ съвѣсть помышления чловѣчьская,
179,2 бѣси бо не съвѣдають ничьтоже; суть бо немощьни
179,3 и худи възоръмь. Яко и се съкажемъ о възорѣ
179,4 ихъ и о омрачении ихъ. Въ си бо времена,
179,5 въ лѣта си, приключи ся нѣкоему Новъгородьцю
179,6 прити въ Чюдь, и приде къ кудесьнику, хотя
179,7 вълхвования отъ него. Онъ же по обычаю своему
179,8 нача призывати бѣсы въ храмину свою. Новъгородьцю
179,9 же сѣдящю на порозѣ тоя храмины,
179,10 кудесьникъ же лежаше оцѣпъ; и шибе имь
179,11 бѣсъ. Кудесьникъ же въставъ рече Новъгородьцю:
179,12 “Бози не смѣють прити, нѣчьто имаши на собѣ,
179,13 егоже боять ся”. Онъ же помяну на собѣ
179,14 крьстъ, и отъшьдъ, постави кромѣ храмины тоя.
179,15 Онъ же нача изнова призывати бѣсы. Бѣси
179,16 же мьтьвъше имь, повѣдаша, чьто ради пришьлъ
179,17 есть. По семь же поча прашати его: “Что ради
179,18 боять ся его, егоже носимъ на собѣ крьста?”
179,19 Онъ же рече: “То есть знамение небесьнаго Бога,
179,20 егоже наши бози боять ся”. Онъ же рече: “То каци
179,21 суть бози ваши, къде живуть?” Онъ же рече: “Бози наши живуть
179,22 въ бездьнахъ. Суть же образъмь чьрни, крилати,
179,23 хвосты имуще; въсходять же и подъ небо,
179,24 слушающе вашихъ Боговъ. Ваши бо Бози на небеси
179,25 суть. Аще къто умьреть отъ вашихъ людии, то възносимъ
179,26 есть на небо; аще ли отъ нашихъ умираеть,
179,27 то носимъ есть къ нашимъ Богомъ въ бездьну”. Якоже и
179,28 есть: грѣшьници бо въ адѣ суть, жьдуще мукы
180,1 вѣчныя, а правьдьници въ небесьнѣмь жилищи въдворяють ся
180,2 съ ангелы. Сица ти есть бѣсовьская
180,3 сила и лѣпота и немощь. Тѣмь же прельщають
180,4 чловѣкы, веляще имъ глаголати видѣния, являюще ся
180,5 имъ, не съвьршенымъ вѣрою, являюще ся въ сънѣ,
180,6 инѣмъ въ мьчьтѣ, и тако вълхвують научениемь
180,7 бѣсовьскымь. Паче же женами бѣсовьская вълшвения
180,8 бывають; искони бо бѣсъ жену
180,9 прельсти, си же мужа; тако въ си роды
180,10 мъного вълхвують жены чародѣиствъмь и
180,11 отравою и инѣми бѣсовьскыми къзньми. Нъ и
180,12 мужи прельщени бывають отъ бѣсовъ невѣрьнии,
180,13 яко се въ пьрвыя роды, при апостолѣхъ
180,14 бо бысть Симонъ вълхвъ, иже творяше
180,15 вълшьствъмь пьсомъ глаголати человѣчьскы, и самъ
180,16 премѣняшеть ся, ово старъ, ово молодъ, ово ли
180,17 иного премѣняше въ иного образъ въ мьчьтании.
180,18 Сице творяшета Аньнии и Амврии вълшвениемь
180,19 чюдеса противу Моисѣеви,
180,20 нъ въскорѣ не възмогоста противу
180,21 Моисѣеви. Нъ и Кунопъ творяше мьчьтаниемь
180,22 бѣсовьскымь, яко и по водамъ ходити, и ина
180,23 мьчьтания творяше, бѣсъмь льстимъ, на пагубу
180,24 собѣ и инѣмъ. Сиць бѣ вълхвъ въсталъ при
180,25 Глѣбѣ Новѣгородѣ; глаголашеть бо людьмъ, творя ся
180,26 акы Богъ, и мъногы прельсти, мало не весь
180,27 града, глаголашеть бо, яко {провѣде вся | все вѣдаю}
180,28 хуля вѣру хрьстияньскую, глаголашеть бо, яко “Преиду
181,1 по Вълхову предъ вьсѣми”. И бысть мятежь въ градѣ,
181,2 и вьси яша ему вѣру, и хотяху побити
181,3 епископа. Епископъ же, възьмъ крьстъ и обълкъ ся въ ризы,
181,4 ста, рекъ: “Иже хощеть вѣру яти вълхву, тъ да
181,5 за нь идеть; аще ли вѣруеть къто крьсту, да
181,6 идеть”. И раздѣлиша ся надъвое: кънязь бо Глѣбъ
181,7 и дружина его сташа у епископа, а людие
181,8 вьси идоша за вълхва. И бысть мятежь великъ
181,9 межю ими. Глѣбъ же възьма топоръ подъ
181,10 скутъ, и приде къ вълхву и рече ему: “То вѣси ли,
181,11 чьто утро хощеть быти, чьто ли до вечера?”
181,12 Онъ же рече: “Провѣде вься” И рече Глѣбъ: “То
181,13 вѣси ли, чьто хощеть дьньсь быти?” “Чюдеса
181,14 велика сътворю”. Глѣбъ же, выня топоръ,
181,15 ростя и, и паде мьртвъ, и людие разидоша ся.
181,16 Онъ же погыбе тѣлъмь и душею, предавъ ся
181,17 дияволу.
181,18 Въ лѣто 6580. Принесоша святая страстотьрпьца
181,19 Бориса и Глѣба. Съвъкупивъше ся Ярославичи,
181,20 Изяславъ, Святославъ, Вьсеволодъ, митрополитъ
181,21 же бѣ тъгда Георгии, епископъ Петръ Переяславьскыи,
181,22 Михаилъ Юриевьскыи, Феодосии
181,23 игуменъ Печерьскыи, Софронии святаго
181,24 Михаила игуменъ, Германъ святаго Съпаса игуменъ,
181,25 Никола игуменъ Переяславьскыи, и игумени вьси,
181,26 сътворьше праздьникъ,
181,27 свѣтьлъ, преложиша я въ новую цьркъвь,
181,28 юже съдѣла Изяславъ, яже стоить и нынѣ. Възьмъше
181,29 пьрвое Бориса въ древянѣ рацѣ Изяславъ, Святославъ,
181,30 Вьсеволодъ, възьмъше на рама своя понесоша,
182,1 предъидущимъ чьрноризьцемъ, свеща дьржаще
182,2 въ рукахъ, и по нихъ диякони съ кадилы,
182,3 и по семь презвутери, и по нихъ епископи съ митрополитъмь,
182,4 по нихъ съ ракою идяху. И принесъше въ новую
182,5 цьркъвь, отвьрзоша раку, испълни ся цьркъви
182,6 благоуханиѣ воня благы; видѣвъше се, прославиша
182,7 Бога. И митрополита ужась обиде, бѣ бо нетвьрдо
182,8 веруя къ нима; и падъ ниць, просяше
182,9 прощения. И цѣловавъше мощи его, въложиша и
182,10 въ раку камену. По семъ же, възьмъше Глѣба въ рацѣ
182,11 каменѣ, въставиша на сани, и емъше за ужа,
182,12 везоша. И яко быша въ двьрьхъ, ста рака,
182,13 не поидущи. И повелѣша народу зъвати: “Господи,
182,14 помилуи”, и повезоша и. И положиша я
182,15 мѣсяца мая въ 20. И отъпѣвъше литургию,
182,16 обѣдаша братия накупь, къжьдо съ бояры
182,17 своими, и съ любъвию великою. Бѣ тъгда
182,18 дьржа Вышегородъ Чюдинъ, а цьркъвь Лазорь.
182,19 По семъ разидоша ся въ свояси.
182,20 Въ лѣто 6581. Въздвиже дияволъ котору
182,21 въ братии сеи Ярославичихъ. Бывъши распьре
182,22 межи ими, быста съ себе Святославъ съ Вьсеволодъмь
182,23 на Изяслава. И изиде Изяславъ ис Кыева,
182,24 Святославъ же и Вьсеволодъ вънидоста въ Кыевъ,
182,25 мѣсяца марта 22, и сѣдоста на столѣ на Берестовѣмь,
182,26 преступивъша заповѣдь отьню. Святославъ
182,27 же бѣ начало выгънанию братьню, желая
182,28 большая власти; Вьсеволода бо прельсти, глаголя,
182,29 яко “Изяславъ сватаеть ся съ Вьсеславъмь, мысля
182,30 на наю; да аще его не варивѣ, имать
183,1 насъ прогънати. И тако възостри Вьсеволода на
183,2 Изяслава. Изяславъ же иде въ Ляхы съ имѣниемь
183,3 мъногымь и съ женою, уповая богатьствъмь мъногымь, глаголя, яко “Симь налѣзу вои”. Еже вьсе
183,4 възяша у него Ляхове, показаша ему путь
183,5 отъ себе. А Святославъ сѣде въ Кыевѣ, прогънавъ
183,6 брата своего, преступивъ заповѣдь отьню, паче
183,7 же Божию. Велии бо есть грѣхъ преступати
183,8 заповѣдь отьца своего: ибо испьрва преступиша
183,9 сынове Хамови на землю Сифову, по 400 лѣтъ
183,10 отъмьщение прияша отъ Бога, отъ племене бо Сифова
183,11 суть Еврѣи, иже избише Хананѣиско
183,12 племя, въсприяша свои жребии и свою землю. И
183,13 пакы преступи Исавъ заповѣдь отьца своего,
183,14 и прия убииство: не добро есть преступати
183,15 предѣла чюжаго. Въ сеже лѣто основана
183,16 бысть цьркы. Печерьская игуменъмь Феодосиемь
183,17 и епископъмь Михаилъмь, митрополиту
183,18 Георгию тъгда сущю въ Грьцѣхъ,
183,19 Святославу въ Кыевѣ сѣдящю.
183,20 Въ лѣто 6582. Феодосии, игуменъ
183,21 Печерьскыи, престави ся. Съкажемъ о
183,22 усъпении его мало. Феодосии бо обычаи
183,23 имяше приходящю постьному времени,
183,24 въ недѣлю Масльную, вечеръ, по обычаю цѣловавъ
183,25 братию и поучивъ ихъ, како проводити
183,26 постьное время, въ молитвахъ нощныхъ и дьневьныхъ, и
183,27 блюсти ся отъ помыслъ сквьрньныхъ, отъ
183,28 бѣсовьскаго насѣяния. “Бѣси бо, рече, {насѣвають | въсѣвають}
183,29 чьрноризьцемъ помышления, похотѣния лукава,
184,1 въжагающе ему помыслы, и тѣми врежаеми
184,2 бывають имъ молитвы. Да приходящая таковыя
184,3 мысли възбраняти знамениемь крьстьнымь,
184,4 глаголюще сице: Господи Иисусе Христе, Боже нашь, помилуи насъ,
184,5 аминь. И къ симъ въздьржание имѣти отъ мъногаго
184,6 брашьна; въ ядении бо мънозѣ и питии
184,7 безмѣрьнѣ въздрастають помысли лукавии,
184,8 помысломъ же въздрастъшемъ сътваряеть ся грѣхъ”.
184,9 “Тѣмь же, рече, противити ся бѣсовьскому дѣиству
184,10 и пронырьству ихъ, блюсти ся отъ лѣности и
184,11 отъ мъногаго съна, и бъдру быти на пѣние цьркъвьное,
184,12 и на предания отьчьская и почитания кънижьная.
184,13 Паче же имѣти въ устѣхъ Псалтырь Давыдовъ
184,14 подобаеть чьрноризьцемъ, симь прогонити
184,15 бѣсовьское уныние. Паче же имѣти
184,16 любъвь въ собѣ къ мьньшимъ и къ старѣишимъ
184,17 покорение и послушание, старѣишимъ же
184,18 къ мьньшимъ любъвь и наказание, и образъ бывати
184,19 собою въздьржаниемь и бъдѣниемь и хожениемь и
184,20 съмѣрениемь, и тако наказывати мьньшая, и утѣшати
184,21 я, и тако проводити постъ”. Глаголашеть бо
184,22 сице, яко “Богъ далъ есть намъ 40 днии сию
184,23 на очищение души. Се бо есть десятина, даема
184,24 отъ лѣта даема Богу. Дьнии бо есть отъ года до года
184,25 300 и 60 и 5, и отъ сихъ дьнии десятыи дьнь
184,26 въздаяти Богу десятину, еже есть постъ
184,27 четыридесятьныи, въ няже дьни очистивъши ся душа, праздьнуеть
184,28 свѣтьло на Въскрьсение Господьне, веселяще ся
184,29 о Бозѣ. Постьное бо время очищаеть умъ
185,1 чловѣку. Пощение бо испьрва проображено бысть,
185,2 Адаму не въкусити отъ древа единого;
185,3 пости бо ся Моисѣи дьнии 40, съподоби ся
185,4 прияти законъ на горѣ Синаистѣи, и видѣвъ
185,5 славу Божию; постъмь Самуила мати роди;
185,6 постивъше ся Ниневгитяне гнѣва Божия избыша;
185,7 постивъ ся Данилъ видѣния съподоби ся;
185,8 постивъ ся Илия акы на небо възятъ бысть въ пищю
185,9 породьную; постивъше ся трие отроци угасиша силу
185,10 огньную; постивъ ся Господь дьнии 40, намъ
185,11 показа постьное время; постъмь апостоли искорениша
185,12 бѣсовьское учение; постъмь явиша ся отьци наши
185,13 акы свѣтила въ мирѣ, и сияють и по съмьрти,
185,14 показавъше труды великыя и въздьржание,
185,15 яко сеи великыи Антонии и Еуфимии и
185,16 Сава и прочии отьци, ихъже мы порьвьнуимъ,
185,17 братие”. Сице поучивъ братию и цѣловавъ вься
185,18 по имени, и тако изидяше изъ манастыря,
185,19 възимая мало коврижькъ; и въшьдъ въ пещеру,
185,20 и затворяше двьри пещерѣ и засыпаше пьрстию,
185,21 и не глаголаше никомуже; аще ли будяше
185,22 нужьное орудие, то окъньцьмь мало бесѣдоваше
185,23 въ суботу или въ недѣлю, а по ины дьни
185,24 пребываше въ постѣ и въ молитвахъ, въздьржа ся
185,25 крѣпъко. И приходяше въ манастырь въ пятъкъ
185,26 на канунъ Лазаревъ; въ сии бо дьнь коньчаеть ся
185,27 постъ 40 дьнии, начинаемъ отъ пьрваго понедѣльника
185,28 наставъши Феодоровѣ недѣли, коньчаеть
185,29 ся въ пятъкъ Лазаревъ; а страстьная недѣля
186,1 уставлена есть постити ся страстии ради Господьня.
186,2 Феодосиеви же пришьдъшю по обычаю цѣлова
186,3 братию, и праздьнова съ ними недѣлю Цвѣтьную.
186,4 И дошьдъ великаго дьне Въскрьсения, по обычаю
186,5 праздьнова свѣтьло, въпаде въ болѣзнь. Разболѣвъшю
186,6 ся ему и болѣвъшю дьнии 5,
186,7 по семь, бывъшю вечеру, повелѣ изнести ся на
186,8 дворъ; братия же, възьмъше и на саньхъ, поставиша
186,9 и прямо цьркъви. Онъ же повелѣ съзъвати
186,10 братию вьсю, братия же ударише въ било,
186,11 и събьраша ся вьси. Онъ же рече имъ: “Братие моя и
186,12 отьци мои и чада моя! Се азъ отъхожю отъ васъ,
186,13 якоже яви ми Господь въ постьное время, въ пещерѣ
186,14 сущю ми, изити отъ свѣта сего. Вы же кого
186,15 хощете игуменъмь имѣти себѣ, да и азъ благословление
186,16 подалъ быхъ ему?” Они же рекоша ему: “Ты
186,17 еси отьць намъ вьсѣмъ, да егоже изволиши самъ,
186,18 тъ намъ буди отьць и игуменъ, и послушаемъ
186,19 его, яко и тебе”. Отьць же нашь Феодосии рече:
186,20 “Шьдъше кромѣ мене нарьцѣте, егоже хощете,
186,21 кромѣ дъвою брату, Николы и Игната; въ прочихъ
186,22 кого хощете, отъ старѣишихъ и до мьньшихъ”. Они же
186,23 послушавъше его, отъступиша мало къ цьркъви,
186,24 съдумавъше, посълаша дъва брата, глаголюще сице: “Егоже
186,25 изволить Богъ и твоя чьстьная молитва, егоже тобѣ
186,26 любо, того нарьци”. Феодосии же рече имъ: “Да
186,27 аще отъ мене хощете игумена прияти, то азъ
186,28 сътворю вамъ не по своему изволению, нъ по
186,29 Божию строению”. И нарече имъ Якова презвитера.
187,1 Братии же нелюбо бысть, глаголюще яко “Не
187,2 сьдѣ есть постриганъ”. Бѣ бо Ияковъ пришьлъ
187,3 съ Льтьца съ братъмь своимъ Павлъмь. И начаша
187,4 братия просити Стефана деместьника, суща тъгда
187,5 ученика Феодосиева, глаголюще, яко “Сьсь възраслъ
187,6 есть подъ рукою твоею, и у тебе послужилъ
187,7 есть; сего ны въдаи”. Рече же имъ Феодосии:
187,8 “Се азъ, по Божию повелѣнию, нареклъ бѣхъ
187,9 Иякова; се же вы свою волю сътворити
187,10 хощете”. И послушавъ ихъ, предасть имъ Стефана,
187,11 да будеть имъ игуменъ. И благослови Стефана,
187,12 и рече ему: “Чадо! Се предаю ти манастырь, блюди
187,13 съ опасениемь его, и яже устроихъ въ
187,14 служьбахъ, то дьржи. Предания манастырьская
187,15 и устава не измѣняи, нъ твори вься по закону
187,16 и по чину манастырьску”. И по семь възьмъше и
187,17 братия, и несоша и въ кѣлию и положиша на
187,18 одрѣ. И шестому дьни наставъшю, больну сущю вельми,
187,19 приде къ нему Святославъ съ сынъмь своимъ Глѣбъмь.
187,20 И съѣдящема има у него, рече ему
187,21 Феодосии: “Се отъхожю свѣта сего, и се предаю
187,22 ти манастырь на съблюдение, еда будеть
187,23 чьто съмятение въ немь. И се поручаю игуменьство
187,24 Стефану, не даи его въ обиду”. Кънязь
187,25 цѣловавъ его, и обѣща ся пещи ся манастырьмь,
187,26 и иде отъ него. Семому же дьни пришьдъшю, изнемагающю,
187,27 Феодосиеви, призъва Стефана и братию, и нача
187,28 имъ глаголати сице: “Аще по моемь ошьствии свѣта
187,29 сего, аще буду Богу угодилъ и приялъ мя
187,30 будеть Богъ, то по моемь ошьствии манастырь
187,31 ся начьнеть строити и прибывати въ немъ: то
187,32 вѣжьте, яко приялъ мя есть Богъ. Аще ли, по моеи
187,33 животѣ, оскудѣвати начьнеть манастырь чьрноризьци
188,1 и потребами манастырьсками, то вѣдуще
188,2 будете, яко не угодилъ буду Богу”. И се ему
188,3 глаголющю, плакаху ся братия, глаголюще: “Отьче! Моли за ны
188,4 къ Богу; вѣмы бо, яко Богъ труда твоего не презьрить”.
188,5 И пресѣдящи братия у него ту нощь вьсю, и
188,6 наставъшю дьни осмому, въ 2-ю суботу по Пасцѣ,
188,7 въ часъ 2 дьне, предасть душю въ руцѣ Божии,
188,8 мѣсяця мая въ 3 дьнь, индикта въ 11 лѣто.
188,9 Плакаша ся по немь братия. Бѣ же Феодосии
188,10 заповѣдалъ положити ся въ пещерѣ, идѣже показа
188,11 труды мъногы, рекъ сице: “Въ нощь похороните
188,12 тѣло мое”, якоже и сътвориша. Вечеру бо
188,13 приспѣвъшю, братия възьмъше тѣло его, и положиша
188,14 и въ пещерѣ, проводивъше съ пѣсньми, съ свѣщами,
188,15 чьстьно, на хвалу Господу нашему Иисусу Христу.
188,16 Стефану же предьржащю манастырь и
188,17 блаженое стадо, еже бѣ съвъкупилъ Феодосии,
188,18 такы чьрньцѣ, якы свѣтила въ Руси сьяють: ови
188,19 бо бяху постьници крѣпъци, ови же на бъдѣние,
188,20 ови на кланяние колѣньное, ови на пощение
188,21 чресъ дьнь и чресъ дъва дьни, {ини | овии} же ядуще
188,22 хлѣбъ съ водою, ини же зелие варено, а друзии сыро.
188,23 Въ любъви пребывающе, мьньшии покаряюще ся
188,24 старѣишимъ, не смѣюще предъ ними глаголати, нъ вьсе
188,25 съ покорениемь и съ послушаниемъ великъмь. Такоже
188,26 и старѣишии имяху любъвь къ мьньшимъ,
188,27 наказаху, утѣшающе, яко чада възлюбленая.
188,28 Аще которыи брать въ етеро прегрѣшение въпадаше,
188,29 утѣшаху, и епитемию
188,30 3 ли 4, за великую любъвь:
188,31 тако бо бяше любы въ братии тои и въздьржание
188,32 велико. Аще братъ етеръ выидяше из
188,33 манастыря, вься братия имяху о томь печаль
189,1 велику, посылаючи по нь, приводяху брата
189,2 къ монастырю, шьдъше вьси кланяху ся игумену,
189,3 и моляху игумена, и приимаху брата въ манастырь
189,4 съ радостию. Таци бо бѣша любъвьници и въздьржьници,
189,5 отъ нихъже намѣню нѣколико мужь
189,6 чюдьныхъ.
189,7 Пьрвыи Демиянъ презвутеръ бяше
189,8 тако постьникъ и въздьржьникъ, яко развѣ хлѣба и
189,9 воды ясти ему до съмьрти своея. Аще къто коли
189,10 принесяше дѣтищь больнъ, кацѣмь любо недугъмь
189,11 одьржимъ, приношаху въ манастырь, ли съвьршенъ
189,12 человѣкъ, кацѣмь любо недугъмь одьржимъ, приходяще
189,13 въ манастырь къ блаженому Феодосью, повелѣваше
189,14 сему Демияну молитву творити болящему; и
189,15 абие творяше молитву, и маслъмь помазаше,
189,16 приимаху ицѣление приходящии къ нему. Разболѣвъшю
189,17 же ся и коньць прияти лежащю ему
189,18 въ немощи, приде къ нему ангелъ въ образѣ
189,19 Феодосиевѣ, даруя ему цьсарьство небесьное за
189,20 труды его. По семъ же приде Феодосии съ братиею,
189,21 и сѣдоша у него, оному же изнемагающю,
189,22 възьрѣвъ на игумена, рече: “Не забываи, игумене,
189,23 еже ми еси обѣщалъ”. И разумѣ великыи
189,24 Феодосии, яко видѣние видѣ, и рече ему:
189,25 “Брате Демияне! Еже есмь обѣщалъ, то ти
189,26 буди”. Онъ же съмѣживъ очи, предасть духъ
189,27 въ руцѣ Божии. Игуменъ же и братия похорониша
189,28 тѣло его.
189,29 Такъже и другыи братъ, именьмь Еремия,
189,30 иже помьняше крьщение землѣ Русьскыя. Сему
190,1 бѣ даръ данъ отъ Бога: провидѣ будущая,
190,2 и аще кого видяше въ помышлении,
190,3 обличаше и въ таинѣ, и наказаше блюсти ся
190,4 отъ диявола. Аще которыи братъ мышляше
190,5 ити из манастыря, узьряше и, пришьдъ къ нему,
190,6 обличаше мысль его и утѣшаше брата.
190,7 Аще кому чьто речаше, ли добро, ли зъло,
190,8 събывашеть ся старьче слово.
190,9 Бѣ же и другыи старьць, именьмь Матфѣи,
190,10 бѣ прозорьливъ. Единою бо ему стоящю въ
190,11 цьркъви на мѣстѣ своемь, възведъ очи свои,
190,12 позьрѣ по братии, иже стоять поюще по обѣма
190,13 странама, и видѣ обиходяща
190,14 бѣса, въ образѣ Ляха, въ лудѣ, и носяща
190,15 въ приполѣ цвѣтъкъ, иже глаголеть ся лѣпъкъ. И обиходя
190,16 подълѣ братию, възимая изъ лона цвѣтъкъ,
190,17 вьржаше на кого любо. Аще прильняше кому
190,18 цвѣтъкъ поющихъ отъ братия, мало стоявъ
190,19 и раслабленъ умъмъ, вину сътворь каку любо, исхожаше
190,20 изъ цьркъви, шьдъ въ кѣлию, и спаше,
190,21 и не възвратяшеть ся въ цьркъвь до отъпѣтия. Аще
190,22 ли вьржаше на другаго, и не прильняше къ нему
190,23 цвѣтъкъ, стояше крѣпъко въ пѣнии, доньдеже
190,24 отъпояху утрьнюю, и тъгда идяше въ кѣлию
190,25 свою. Се же вида старьць, повѣда братии
190,26 своеи. Пакы же сии старьць видѣ се: по обычаю
190,27 бо сему старьцю отъстоявъшю утрьнюю, братия, отъпѣвъше заутрьнюю,
190,28 предъ зорями идоша по кѣлиямъ своимъ,
190,29 сь же старьць послѣ исхожаше ис цьркъви.
190,30 Идущю же ему единою, сѣде почивая
191,1 подъ билъмь, бѣ бо кѣлия его подале цьркъве, и
191,2 видѣ се, акы тълпа поиде отъ вратъ; възведъ
191,3 очи свои, видѣ единого сѣдяща на свинии,
191,4 а другыя текуща около его. И рече имъ старьць:
191,5 “Камо идете?”. И рече бѣсъ сѣдяи на свинии: “По Михаля
191,6 по Тольбековича”. Старьць же знамена ся
191,7 крьстьнымь знамениемь, и приде въ кѣлию свою. Яко
191,8 бысть свѣтъ и разумѣ старьць, рече кѣлиинику:
191,9 “Иди, въпроси, есть ли Михаль въ кѣлии?”. И рѣша
191,10 ему, яко “Выскочилъ есть чресъ стълпие по
191,11 заутрьни”. И повѣда старьць видѣние се игумену
191,12 и братии. При семь бо старьци Феодосии престави ся,
191,13 и бысть Стефанъ игуменъ, и по Стефанѣ
191,14 Никонъ и сему старцю и еще сущю. Единою
191,15 ему стоящю на утрьни, възведъ очи свои,
191,16 хотя видѣти игумена Никона, и видѣ осьла,
191,17 стояща на игумени мѣстѣ; и разумѣ, яко не
191,18 въсталъ есть игуменъ. Такоже и ина мънога видѣния
191,19 провидя старьць, и почи въ старости добрѣ
191,20 въ манастыри семь.
191,21 Яко се бысть другыи чьрноризьць, именьмь
191,22 Исакии, яко еще сущю
191,23 въ мирьскомь житии, и богату сущю ему,
191,24 бѣ бо купьць, родъмь Торопьчанинъ, и помысли
191,25 быти мьнихъ, и раздая имѣние свое требующимъ
191,26 и манастыремъ, и иде къ великому Антонию
191,27 въ пещеру, моля ся ему, да бы и сътворилъ
191,28 чьрноризьцьмь. И приять и Антонии, и
191,29 възложи на нь пърты чьрньчьскыя, нарекъ
192,1 имя ему Исакии, бѣ бо имя ему Чьрнь. Сь
192,2 же Исакии въсприя житие крѣпъко: облече
192,3 бо ся въ власяницю, и повелѣ купити собѣ
192,4 козьлъ, и одьра мѣхъмь козьлъ, и възвлече
192,5 на власяницю, и осъше около его кожа сыра.
192,6 И затвори ся въ печерѣ, въ единои улици, въ
192,7 кѣлиици малѣ, яко 4 лакътъ, и ту моляше
192,8 Бога съ сльзами. Бѣ же ядь его проскура едина,
192,9 и та же чресъ дьнь, и воды въ мѣру пияше.
192,10 Приношаше же ему великыи Антонии, и
192,11 подаваше окъньцьмь ему, яко ся въмѣстяше
192,12 рука, и тако приимаше пищю. И того сътвори
192,13 лѣтъ 7, на свѣтъ не вылазя, ни на ребрѣхъ
192,14 лѣжа, нъ сѣдя мало приимаше съна. И
192,15 единою, по обычаю, наставъшю вечеру, поча
192,16 кланяти ся, поя псалмы, оли и до полунощия;
192,17 яко трудяшеть ся, сѣдяше на сѣдалѣ своемь.
192,18 Единою же ему сѣдящю, по обычаю, и свѣщю
192,19 угасивъшю, вънезапу свѣтъ въсия, яко сълньца
192,20 въ пещерѣ, яко зракъ вынимая человѣку.
192,21 И поидоста дъвѣ уноши къ нему красьна, и блистаста
192,22 лице има, акы сълньце, и глаголаща къ нему: “Исакие,
192,23a вѣ есвѣ ангела, а се идеть къ тобѣ Христосъ съ ангелы”.
192,23b и въставъ Исакии, видѣ тълпу и лица ихъ паче
192,23c сълньца, и единъ посредѣ ихъ, и сияху отъ лица его
192,23d паче вьсѣхъ; и глаголаста ему: “Исакие, то ти Христосъ; падъ,
192,24 поклони ся ему”. Онъ же не разумѣ бѣсовьскаго
192,25 дѣиства, ни памяти прекрьстити ся, и выступя,
192,26 поклони ся, акы Христу, бѣсовьску дѣиству. Бѣси
192,27 же кликнуша и рекоша: “Нашь еси уже, Исакие”.
192,28 И въведъше и въ кѣлиицю, и посадиша и. И
192,29 начаша садити ся около его, пълна кѣлия
193,1 ихъ и улица Печерьская. И рече единъ отъ бѣсовъ,
193,2 глаголемыи Христосъ: “Възмѣте сопѣли и бубьны и гусли,
193,3 и ударяите атъ ны Исакии съпляшеть”. И удариша
193,4 въ сопѣли и въ гусли и въ бубьны,
193,5 и начаша имъ играти. И утомивъше и, оставиша
193,6 и еле жыва, и отъидоша, поругавъше ся
193,7 ему. Заутра же бывъшю свѣту и приспѣвъшю
193,8 въкушению хлѣба, приде Антонии по обычаю
193,9 по обычаю, и глагола: “Господи, благослови, отьче Исакие!”. И
193,10a не бысть гласа, ни послушания. И мъногашьды глагола Антонии, и не бысть
193,10b отъвѣта. И рече Антонии: “Се уже преставилъ ся
193,11 есть”. И посъла въ манастырь по Феодосия
193,12 и по братию. И отъкопаша, къде бѣ загражено
193,13 устие, и пришьдъше, възяша и, мьняще мьртва
193,14 и вынесъше положиша и предъ пещерою. И
193,15 узьрѣша, яко живъ есть. И рече игуменъ Феодосии,
193,16 яко “Се имать быти отъ бѣсовьскаго
193,17 дѣиства”. И положиша и на одрѣ и служаше
193,18 около его Антонии. Въ сиже времена приключи ся
193,19 Изяславу прити из Ляховъ, и нача
193,20 гнѣвати ся Изяславъ на Антония за Вьсеслава.
193,21 И присълавъ Святославъ, нощию поя
193,22 Антония Чьрнигову. Антонии же пришьдъ къ Чьрнигову
193,23 възлюби Болъдины горы; ископавъ
193,24 печеру, ту ся въсели. И есть ту манастырь
193,25 святыя Богородица, на Болъдинахъ горахъ и до сего
193,26 дьни. Феодосии же, увѣдавъ, яко Антонии
194,1 шьлъ къ Чьрнигову, шьдъ съ братиею възя Исакия
194,2 и принесе и къ собѣ въ кѣлию, и служаше
194,3 около его, бѣ бо раслабленъ тѣлъмь и умъмь, яко не
194,4 мощи ему обратити ся на другую страну,
194,5 ни въстати, ни сѣдѣти, нъ лежаше на единои
194,6 странѣ, и подъ ся поливаше мъногашьды, и
194,7 чьрвие кыняху ся подъ бедру ему съ мочения
194,8 и съ полѣвания. Феодосии же самъ своима
194,9 рукама омываше и съпряташеть и; за 2 лѣтѣ
194,10 се сътвори около его. Се же бысть дивьно чюдьно;
194,11 яко за 2 лѣтѣ лежа, сии ни хлѣба въкуси,
194,12 ни воды, ни отъ какаго брашьна, ни отъ овоща, ни
194,13 языкъмь проглагола, нъ нѣмъ и глухъ лежа за 2 лѣтѣ.
194,14 Феодосии же моляше Бога за нь, и молитву
194,15 творяше надъ нимь нощь и дьнь, доньдеже
194,16 на 3-ее лѣто проглагола, и слыша, и на ногы
194,17 нача въстаяти акы младеньць, и нача ходити.
194,18 И не брежаше въ цьркъвь ити, нужею привлечахуть
194,19 и къ цьркъви; и тако по малу научиша
194,20 и. И по семъ научи и на тряпезьницю
194,21 ходити, и посажаше и кромѣ братия, и
194,22 положаху предъ нимъ хлѣбъ, и не възьмяше его,
194,23 ольны въложити въ руцѣ ему. Феодосии же
194,24 рече: “Положите хлѣбъ предъ нимь, и не въкладаите
194,25 въ руцѣ ему, атъ самъ ясть”. И не бреже
194,26 за недѣлю ясти. И по малу оглядавъ ся
195,1 кусаше хлѣба, и тако научи ся ясти. И тако
195,2 избави и Феодосии отъ къзни дияволя и отъ прельсти его.
195,3 Исакии же въсприя пакы дьрзновение и въздьржание
195,4 жестоко. Феодосию же преставльшю ся, и
195,5 Стефану въ него мѣсто бывъшю, Исакии же
195,6 рече: “Се уже прельстилъ мя еси дияволе,
195,7 сѣдяща на единомь мѣстѣ; а уже не имамь ся затворити
195,8 въ печерѣ, нъ имамь тя побѣдити, ходя
195,9 въ манастырѣ”. И облече ся въ власяницю, и на
195,10 власяницю свиту вотоляну, и нача уродьство
195,11 творити, и помагати поча поваромъ, варити на
195,12 братию. И на заутрьню ходя преже вьсѣхъ,
195,13 стояше крѣпъко и неподвижимо. Егда же
195,14 приспѣяше зима и мрази лютии, стояше въ прабошьняхъ
195,15 въ черевиихъ въ протъпътаныхъ, яко примьрзняшета
195,16 нозѣ его къ камени, и не двигняше
195,17 ногама, доньдеже отъпояху заутрьню. И по
195,18 заутрьни идяше въ поварьницю, и приготоваше
195,19 огнь, воду, дръва, и приходяху
195,20 прочии повари отъ братия. Единъ же поваръ
195,21 такоже бѣ именьмь, Исакии, и рече
195,22 посмихая ся Исакию: “Оно сѣдить вранъ
195,23 чьрныи, иди, ими его”. Онъ же, поклонивъ ся ему
195,24 до земля, шьдъ, я врана, и принесе ему
195,25 предъ вьсѣми повары, и ужасоша ся, и повѣдаша
195,26 игумену и братии, и начаша и братия чтити.
195,27 Онъ же, не хотя славы чловѣчьскыя, нача уродьствовати
196,1 и пакостити нача ово игумену,
196,2 ово братии, ово мирьскымъ человѣкомъ.
196,3 Друзии раны ему даяху. И поча по миру ходити,
196,4 такоже уродъмь ся творя. И въсели ся въ печеру,
196,5 въ неиже былъ, уже бо бѣ Антонии
196,6 преставилъ ся, и съвъкупи собѣ уныхъ, и
196,7 въскладаше пърты чьрньчьскыя, да ово
196,8 отъ игумена Никона приимаше раны, ово ли
196,9 отъ родитель дѣтьскыхъ. Сь же то вьсе
196,10 тьрпяше, подъимаше раны и наготу, и
196,11 студень дьнь и нощь. Въ едину бо нощь въжьгъ
196,12 пещь въ истъбъцѣ у пещеры, яко разгорѣ ся
196,13 пещь, бѣ бо утьла, и нача палати пламень
196,14 утьлизнами. Оному же нѣчимь заложити,
196,15 въступль ногама босыма, ста на пламени,
196,16 доньдѣже изгорѣ пещь, и сълѣзе. И ина мънога
196,17 повѣдаху о немь, а другому и самовидьци
196,18 быхомъ. И тако възя побѣду на бѣсы, яко
196,19 и мухы ни въ чьтоже имяше устрашения
196,20 ихъ и мьчьтания ихъ, глаголашеть бо къ нимъ:
196,21 “Аще бо мя бѣсте первое прельстили,
196,22 понеже не вѣдяхъ къзнии вашихъ, и лукавьства;
196,23 нынѣ же имамъ Господа Иисуса Христа и Бога нашего
196,24 и молитву отьца моего Феодосия, надѣю ся на
196,25 Христа, имамь побѣдити васъ”. Мъногашьды бѣси
196,26 пакости дѣяху и глаголаху ему: “Нашь еси,
196,27 поклонилъ ся еси нашему старѣишинѣ и намъ”.
197,1 Онъ же глаголаше: “Вашь старѣишина есть
197,2 антихрьстъ, а вы бѣси есте”. И прекрьсти ся
197,3 и тако ищезняху.
197,4 Овъгда же пакы въ нощи прихожаху къ нему,
197,5 страхъ ему творяще, ово въ мьчьтѣ, яко се мъногъ
197,6 народъ съ мотыками и лыскари, глаголюще: “Раскопаимъ
197,7 печеру сию, и сего сьдѣ загребѣмъ”. Ини
197,8 же глаголаху: “Бѣжи, Исакие, хотять тя загрести”.
197,9 Онъ же глаголаше къ нимъ: “Аще бысте человѣци были,
197,10 то въ дьне бысте ходили, а вы есте тьма,
197,11 и въ тьмѣ ходите. И знамена
197,12 ся крьстъмъ и ищезнуша. А другоичи страшахуть
197,13 и въ образѣ медвѣжии, овъгда же
197,14 лютъмь звѣрьмь, овъгда же волъмъ, ово змия пълзяху
197,15 къ нему, ово ли жабы, и мыши и
197,16 вьсякъ гадъ. И не възмогоша ему ничьтоже
197,17 сътворити, и рекоша ему: “Исакие! Побѣдилъ ны
197,18 еси”. Онъ же рече: “Яко вы пьрвое
197,19 мене побѣдили бысте въ образѣ Иисусъ Христовѣ и
197,20 въ ангельскъмъ, недостоини суще того видѣния.
197,21 Являете ся топьрво
197,22 въ образѣ звѣринъмъ и скотьемь, и змиями,
197,23 и гадъмь, ациже и сами бысте сквьрни и зъли
197,24 въ видѣнии. И абие погыбоша бѣси отъ него,
197,25 и отътолѣ не бысть ему пакости отъ бѣсовъ, якоже
197,26 самъ повѣдаше, яко “Се бысть ми за 3 лѣта
198,1 брань си”. По томь поча крѣплѣе жити и
198,2 въздержание имѣти пощение и бъдѣние. И
198,3 тако живущю ему, сконьча житие свое. И разболѣ ся
198,4 въ пещерѣ, и несоша и больна въ манастырь,
198,5 и до осмаго дьни съконьча ся о Господѣ. Игуменъ же
198,6 Иоанъ и братия съпрятавъше тѣло его, и погребоша
198,7 и. Таци же бѣша чьрноризьци Феодосиева
198,8 манастыря, иже сияють и по съмьрти,
198,9 яко свѣтила, и молять Бога за сьдѣ сущюю братию
198,10 и за приносящая въ манастырь, и за мирьскую братию,
198,11 въ немьже и нынѣ добродѣтельное
198,12 житие живуть, и обьще въкупѣ, въ пѣнии и
198,13 въ молитвахъ и въ послушании, на славу Богу вьсемогущему,
198,14 и Феодосиевами молитвами съблюдаеми,
198,15 емуже слава въ вѣки, аминь.
198,16 Въ лѣто 6583. Почата бысть цьркы Печерьская
198,17 надъ основаниемь Стефанъмь игуменъмь;
198,18 изъ основания бо Феодосии поча,
198,19 а на основании Стефанъ поча; и коньчана
198,20 бысть на третиее лѣто, мѣсяца иулия 10 дьнь.
198,21 В сеже лѣто придоша посъли изъ Нѣмьць къ
198,22 Святославу; Святославъ же, величаше ся, показа
198,23 имъ богатьство свое. Они же видѣвъше бещисльное
198,24 мъножьство злата и сьребра и паволокъ,
198,25 рѣша: “Се ни въ чьтоже есть, се бо лежить
198,26 мьртво. Сего суть къметие лучьше. Мужи бо ся
199,1 доищють и больше сего”. Сице ся похвали
199,2 Иезекии, цьсарь июдѣискии, къ съломъ цьсаря
199,3 асурииска, егоже вься възята быша въ Вавилонъ:
199,4 тако и по сего съмьрти вьсе имѣние расъсыпа ся
199,5 разьно.
199,6 Въ лѣто 6584. Ходи Володимиръ, сынъ Вьсеволожь,
199,7 и Ольгъ, сынъ Святославль, Ляхомъ въ
199,8 помощь на Чехы. Въ сеже лѣто престави ся
199,9 Святославъ, сынъ Ярославль, мѣсяца декабря 27,
199,10 отъ рѣзания жьлъве, и положенъ бысть у
199,11 Съпаса. И сѣде по немь Вьсеволодъ на столѣ,
199,12a мѣсяца генваря.
199,12b omitted
199,13 Въ лѣто 6585. Поиде Изяславъ съ Ляхы,
199,14 Вьсеволодъ же поиде противу ему. Сѣде Борисъ въ
199,15 Чьрниговѣ мѣсяца мая 4 дьнь, и бысть
199,16 къняжения его 8 дьнии, и бѣжа Тьмутороканю
199,17 къ Романови. Вьсеволодъ же възиде противу брату
199,18 Изяславу на Волынь, и сътвори миръ. И
199,19 пришьдъ Изяславъ сѣде Кыевѣ, мѣсяца
199,20 иулия 15 дьнь, Ольгъ же, Святославль сынъ,
199,21 бѣ у Вьсеволода въ Чьрниговѣ.
199,22 Въ лѣто 6586. Бежа Ольгъ, сынъ Святославль,
199,23 Тьмутороканю отъ Вьсеволода, мѣсяца
199,24 априля 10. Въ сеже лѣто убиенъ бысть
199,25 Глѣбъ, Святославль сынъ, въ Заволочии. Бѣ же
199,26 Глѣбъ милостивъ на убогия и страньнолюбивъ,
199,27 тъщание имѣя къ цьркъвамъ, теплъ на вѣру и
199,28 кротъкъ, възоръмь красьнъ. Егоже тѣло положено
200,1 бысть Чьрниговѣ за Съпасъмь, мѣсяца
200,2 иуля 23 дьнь. Сѣдящю въ него мѣсто
200,3 Святопълку въ Новѣгородѣ, сыну Изяславлю, Яропълку
200,4 сѣдящю Вышегородѣ, а Володимиру сѣдящю въ
200,5 Смолиньскѣ, приведе Ольгъ и Борисъ поганыя
200,6 на Русьскую землю, и поидоста на Вьсеволода
200,7 съ Половьци. Вьсеволодъ же изиде противу
200,8 има на Съжици и побѣдиша Половьци Русь,
200,9 и мънози убиени быша ту: убиенъ бысть Иванъ
200,10 Жирославичь и Тукы, Чюдинь братъ,
200,11 Порѣй и ини мънози, мѣсяца августа
200,12 25. Ольгъ же и Борисъ придоста
200,13 Чьрнигову, мьняще одолѣвъше, а земли Русьскои
200,14 мъного зъло сътворьша, пролиявъше кръвь
200,15 хрьстияньску, еяже кръве възищеть Богъ отъ руку
200,16 ею, отъвѣтъ дати за погубленыа душа
200,17 хрьстияньскѣ. Вьсеволодъ же приде къ брату
200,18 своему Изяславу Киеву, цѣловавъша ся
200,19 сѣдоста. Вьсеволодъ же исповѣда вься бывъшая.
200,20 И рече ему Изяславъ: “Брате! Не тужи. Видиши
200,21 бо, колико ся мънѣ съключи: пьрвое бо, не выгънаша
200,22 ли мене и имѣние мое раграбиша? И пакы,
200,23 кую вину створилъ есмь? Не изгънанъ
200,24 ли бѣхъ мене, брата своя? И не блудихъ ли
200,25 по чюжимъ землямъ, имѣния лишенъ быхъ?
200,26 Не сътворихъ зъла ничьтоже. И нынѣ, брате, не
200,27 туживѣ. Аще будеть нама причастие въ Русьскои
200,28 земли, то обѣма; аще лишена будевѣ, то оба.
201,1 Азъ сложю главу свою за тя”. И се рекъ, утѣши
201,2 Вьсеволода, и повелѣ събирати вои отъ мала до
201,3 велика. И поиде Изяславъ съ Яропълкъмь,
201,4 сынъмь своимъ, и Вьсеволодъ съ Володимиръмь, сынъмь
201,5 своимь. И поидоша къ Чьрнигову, и Чьрниговьци
201,6 затвориша ся въ градѣ. Ольгъ же и Борисъ
201,7 бяшета. Чьрниговьцемъ же не отъворящимъ ся,
201,8 приступиша къ граду. Володимиръ же приступи
201,9 къ вратомъ въсточьнымъ, отъ Стрьжене, и отъя
201,10 врата, и възяша градъ окольнии, и пожьгоша,
201,11 людьмъ въбѣгъшемъ въ дънѣшьнии градъ.
201,12 Изяславъ же и Вьсеволодъ слышаста, яко иде
201,13 Ольгъ и Борисъ противу, Изяславъ же и Вьсеволодъ
201,14 уранивъ ся, поидоста отъ града противу
201,15 Ольгови. И рече Олегъ къ Борисови: “Не ходивѣ
201,16 противу, не можевѣ стати противу четырьмъ
201,17 къняземъ, нъ посъливѣ съ мольбою къ стрыема
201,18 своима”. И рече ему Борисъ: “Ты зьри готова, азъ
201,19 имъ противьнъ вьсѣмъ”; и похваливъ ся вельми, не
201,20 вѣдыи, яко Богъ гърдымъ противить ся, съмѣренымъ
201,21 благодать даеть, да не хвалить ся сильныи
201,22 силою своею. И поидоста противу, и бывъшимъ
201,23 имъ на мѣстѣ на Нѣжатинѣ нивѣ, и
201,24 съступивъшимъ ся обоимъ, бысть сѣча зъла. Пьрвое
201,25 убиша Бориса, сына Вячеславля, похваливъша ся
201,26 вельми. Изяславу же стоящю въ пѣшьцихъ,
201,27 вънезапу приѣхавъ единъ, удари
201,28 копиемъ за плече. И тако убиенъ бысть Изяславъ,
201,29 сынъ Ярославль. Продълженѣ бывъши сѣчи,
201,30 побѣже Ольгъ въ малѣ дружинѣ. Едъва
202,1 утече, и бѣжа Тьмутороканю. Убиенъ бысть
202,2 кънязь Изяславъ мѣсяца октямбря въ 3 дьнь.
202,3 Възьмъше тѣло его, привезоша въ лодии, и
202,4 поставиша противу Городьцю. Изидоша противу
202,5 ему вьсь градъ Кыевъ, и възложивъша
202,6 на сани повезоша и, съ пѣсньми попове и
202,7 чьрноризьци и понесоша и въ градъ. И не бѣ лзѣ
202,8 слышати пѣния въ плачи велицѣ и въпли;
202,9 плака бо ся по немь вьсь градъ Киевъ, Яропълкъ
202,10 же идяше по немь, плача ся съ дружиною своею:
202,11 “Отьче, отьче мои! Чьто еси бес печали пожилъ на
202,12 свѣтѣ семь, мъногы напасти приимъ отъ людѣи и
202,13 отъ братия своея? Се же погыбе не отъ брата, нъ
202,14 за брата своего положи главу свою”. И принесъше
202,15 положиша тѣло его въ цьркъви святыя Богородица, въложивъше
202,16 и въ раку мраморяну. Бѣ же Изяславъ
202,17 мужь възоръмь красьнъ и тѣлъмь великъ,
202,18 незълобивъ нравъмь, кривьды ненавидя, любя
202,19 правьду, клюкъ же въ немь не бѣ, ни льсти, нъ простъ
202,20 умъмь, не въздая зъла за зъло. Колико бо
202,21 ему сътвориша Кыяне: самого выгънаша, а домъ
202,22 его разграбиша, и не възда противу тому зъла.
202,23 Аще ли къто дѣеть вы: “Сѣчець исѣче, то не сь
202,24 то сътвори, нъ сынъ его. Пакы же брата своя
202,25 выгнаста и, и ходи по чюжеи земли, блудя. И
202,26 сѣдящю ему пакы на столѣ своемь, Вьсеволоду
202,27 пришьдъшю побѣжену къ нему, не рече ему:
202,28 “Колико подъяхъ отъ ваю зъла за зъло?”
202,29 нъ утѣши и, рек: “Ельмаже ты, брате мои, показа
202,30 къ мънѣ любъвь, въведъ мя на столъ мои и
203,1 нарекъ мя старѣишину собѣ, се азъ не помяну
203,2 зълобы пьрвыя, ты ми еси братъ, а я тобѣ,
203,3 и положю главу свою за тя”, еже и бысть. Не
203,4 рече бо ему: “Колико зъла сътвориста мънѣ, и се
203,5 нынѣ тобѣ ся съключи”, не рече: “Се кромѣ мене”;
203,6 нъ на ся перея печаль братьню, показа любъвь
203,7 велику, съвьршая апостола, глаголюща: “Утѣшаите печальныя”.
203,8 По истинѣ, аще чьто сътворилъ есть на
203,9 свѣтѣ семь, етеро съгрѣшение, отъдасть ся ему,
203,10 зане положи главу свою за брата своего,
203,11 не желая большая части, ни имѣния хотя
203,12 большаго, нъ за братьню обиду. О сяковыхъ
203,13 бо Господь рече: “Да къто положить душю свою за другы
203,14 своя”. Соломонъ же рече: “Братие, въ бѣдахъ пособиви
203,15 бываите”. Любы бо есть выше вьсего. Якоже
203,16 Иоанъ глаголеть: “Богъ любы есть; пребываяи
203,17 въ любъви, въ Бозѣ пребываеть, и Богъ въ немь пребываеть.
203,18 О семь съвьршаеть ся любы, да
203,19 достояние имамъ въ дьнь судьныи, да якоже онъ
203,20 есть, и мы есмы въ мирѣ семь. Боязни нѣсть
203,21 въ любъви, нъ съвьршена любы вънъ измещеть
203,22 боязнь, яко боязнь мучение имать. “Бояи же
203,23 ся нѣсть съвьршенъ въ любъви. Аще къто речеть:
203,24 Бога люблю, а брата своего ненавидя, лъжь
203,25 есть. Не любяи бо брата своего, егоже видить,
203,26 Бога, егоже не видить, како можеть любити? Сию
203,27 заповѣдь имамъ отъ него, да любяи Бога любить
203,28 брата своего”. Въ любъви бо вьсе съвьршаеть ся.
203,29 Любъве бо ради и грѣси расыпають ся. Любъве бо
203,30 ради Господь съниде на землю и распятъ ся за ны
204,1 грѣшьныя, възьмъ грѣхы наша, пригвозди на
204,2 крьстѣ, давъ намъ крьстъ свои на помочь и на прогънание
204,3 бѣсомь. Любъве ради мученици пролияша
204,4 кръвь свою. Любъве же ради сии кънязь пролия
204,5 кръвь свою за брата своего, съвьршая заповѣдь
204,6 Господьню.
204,7 Начало къняжения Вьсеволожа въ Киевѣ.
204,8 Вьсеволодъ же сѣде Кыевѣ на столѣ отьца
204,9 своего и брата своего, преимъ вьсю власть Русьскую.
204,10 И посади сына своего Володимира въ
204,11 Чьрниговѣ, а Яропълка Володимири, придавъ
204,12 ему Туровъ.
204,13 Въ лѣто 6587. Приде Романъ съ Половьци къ
204,14 Воиню. Вьсеволодъ же ста у Переяславля, и
204,15 сътвори миръ съ Половьци. И възврати ся Романъ
204,16 въспять, и бывъшю ему,
204,17 убиша и Половьци, мѣсяца августа 2 дьнь. И
204,18 суть кости его и досего лѣта тамо лежаче,
204,19 сына Святославля, и вънука Ярославля. А Ольга
204,20 емше Козаре поточиша за море Цьсарюграду.
204,21 Вьсеволодъ же посади посадьника Ратибора
204,22 Тьмуторокани.
204,23 Въ лѣто 6588. Заратиша ся Търци Переяславьстии
204,24 на Русь, Вьсеволодъ же посъла
204,25 на ня сына своего Володимира. Володимиръ
204,26 же шьдъ побѣди Търкы.
204,27 Въ лѣто 6589. Бѣжа Игоревичь Давыдъ
204,28 съ Володарьмь Ростиславичьмь, мѣсяца мая
204,29 18 дьнь. И придоста Тьмутороканю, и яста
204,30 Ратибора, и сѣдоста Тьмутороканю.
205,1 Въ лѣто 6590. Осень умьре, Половьцьскыи
205,2 кънязь.
205,3 Въ лѣто 6591. Приде Ольгъ изъ Грькъ
205,4 Тьмутороканю, и я Давыда и Володаря Ростиславича,
205,5 и сѣде Тьмуторокани. И исѣче Козары,
205,6 иже бѣша съвѣтьници на убиение брата его
205,7 и на самого, а Давыда и Володаря пусти.
205,8 Въ лѣто 6592. Приходи Яропълкъ къ Вьсеволоду
205,9 на Великъ дьнь. Въ сеже время выбѣгоста
205,10 Ростиславича дъва отъ Яропълка,
205,11 и пришьдъша прогънаста Яропълка, и посъла
205,12 Вьсеволодъ сына своего, Володимира, и выгъна
205,13 Ростиславича, и посади Яропълка Володимири.
205,14 Въ сеже лѣто Давыдъ зая грьчьникы въ Ольшии,
205,15 и зая въ нихъ вьсе имѣние. Вьсеволодъ же, посълавъ
205,16 приведе и, и въдасть ему Дорогобужь.
205,17 Въ лѣто 6593. Яропълку хотяшю
205,18 на Вьсеволода, послушавъшю ему зълыхъ съвѣтьникъ.
205,19 Се увѣдавъ Вьсеволодъ, посъла противу ему
205,20 сына своего Володимира. Яропълкъ же, оставивъ
205,21 матерь свою и дружину свою въ Лучьскѣ, а самъ бѣжа въ Ляхы.
205,22 Володимиру же пришьдъшю къ Лучьску, въдаша ся
205,23 Лучане. Володимиръ же посади Давыда въ
205,24 Володимири въ Яропълка мѣсто, а матерь
205,25 Яропълчю и жену его и дружину его приведе
205,26 Кыеву, и имѣние его възьмъ.
205,26a omitted
205,26b omitted
205,26c omitted
205,26d omitted
206,1 Въ лѣто 6594. Приде Яропълкъ из Ляховъ,
206,2 и сътвори миръ съ Володимиръмь, и иде Володимиръ
206,3 опять Чьрнигову. Яропълкъ
206,4 сѣде Володимири. И пересѣдѣвъ мало дьнии,
206,5 иде Звьнигороду. И не дошьдъшю ему града,
206,6 прободенъ бысть отъ проклятаго Нерадьца, отъ
206,7 дияволя научения и отъ зълыхъ человѣкъ. Лежащю
206,8 на санкахъ а онъ съ коня саблею прободе я,
206,9 мѣсяца ноямбря въ 22. И тъгда въздвигнувъ ся
206,10 Яропълкъ, вытъргну изъ себе саблю,
206,11 и рече великымъ гласъмь: “Охъ, тотъ мя, враже,
206,12 поруби”. И бѣжа Нерадьць проклятыи до Перемышлю
206,13 къ Рюрикови, а Яропълка възьмъше
206,14 отроци на конь предъ ся, Радъко и Воикина
206,15 и инии отроци, несоша къ Володимирю, а
206,16 отътуду Кыеву. И изиде противу ему
206,17 благовѣрьныи кънязь Вьсеволодъ съ сынъма своима,
206,18 Володимиръмь и Ростиславъмь, и вьси боляре,
206,19 и блаженыи митрополитъ Иоанъ и чьрноризьци и
206,20 прозвутеры. И вьси Кыяне великъ плачь
206,21 сътвориша надъ нимъ, съ псалъмы и пѣсньми проводиша
206,22 и до манастыря святаго Дьмитрия, съпрятавъше тѣло
206,23 его, съ чьстию положиша и въ рацѣ
206,24 у цьркъви святаго апостола Петра, юже бѣ самъ
206,25 началъ зьдати, мѣсяца декабря въ 5 дьнь.
206,26 Мьногы бѣды приимъ без вины, изгонимъ
207,1 отъ братия своея, обидимъ, и разграбленъ,
207,2 на коньць и съмьрть горькую прия, нъ вѣчьнѣи
207,3 жизни и покою съподоби ся. Такъ бо бяше блаженыи
207,4 кънязь Ярополкъ, кротъкъ, съмѣренъ, братолюбивъ и нищелюбьць,
207,5 десятину дая отъ вьсѣхъ скотъ своихъ святѣи Богородици и
207,6 отъ жита по вься лѣта, и моляше Бога вьсьгда,
207,7 глаголя: “Господи Боже мои! Иисусе Христе! Приими молитву мою, и даи жь
207,8 ми съмьрть, якоже въдалъ еси братома моима Борису и
207,9 Глѣбу отъ чюжею руку, да омыю грѣхы вься
207,10 своею кръвию, и избуду суетьнаго сего свѣта
207,11 и сѣти вражии”. Егоже прошения не
207,12 лиши его благыи Богъ: въсприя благая она,
207,13 ихъже око не видѣ, ни ухо слыша, ни на
207,14 сьрдьце человѣку не възиде, яже уготова Богъ любящимъ
207,15 его.
207,16
207,17 Въ лѣто 6596. Священа бысть цьркы святаго
207,18 Михаила манастыря Вьсеволожа митрополитъмь
207,19 Иоанъмь и епископы Лукою, Исаиемь,
207,20 игуменьство тъгда дьржащю
207,21 того манастыря Лазореви. Томьже лѣтѣ иде
207,22 Святопълкъ из Новагорода къ Турову къняжение.
207,23 Въ сеже лѣто умьре Никонъ Печерьскыи игуменъ.
207,24 Въ сеже лѣто възяша Българе Муромъ.
207,25 Въ лѣто 6597. Священа бысть цьркви Печерьская
207,26 святыя Богородица манастыря Феодосиева
208,1 Иоанъмь митрополитъмь и Лукою Бѣлогордьскымь
208,2 епископъмь и епискомъмь Ростовьскымь Исаиемь и Иоанъмь Чьрниговьскымь епископъмь и Антониемь Гурьгевьскымь игуменъмь,
208,3 при благородьнѣмь кънязи Вьсеволодѣ, дьржавьному
208,4 Русьскыя земля, и чадома его Володимирѣ
208,5 и Ростиславѣ, воеводьство дьржащю Кыевьскыя
208,6 тысяща Яневи, игуменьство дьржащю
208,7 Иоану. Въ сеже лѣто престави ся Иоанъ
208,8 митрополитъ. Бысть же Иоанъ мужь хытръ
208,9 кънигамъ и учению, милостивъ убогымъ и вьдовицамъ,
208,10 ласковъ же къ вьсякому, богату и убогу,
208,11 съмѣренъ же и кротъкъ и мълчаливъ, рѣчистъ
208,12 же, кънигами святыми утѣшая печальныя, и
208,13 сякого не бысть преже въ Руси, ни по немь не
208,14 будеть сякъ. Въ се лѣто иде Янъка въ Грькы,
208,15 дъщи Вьсеволожа, нареченая преже. Приведе
208,16 Янъка митрополита Иоана скопьчину, егоже
208,17 видѣвъше людие вьси рекоша: “Се мьртвьць
208,18 пришьлъ”. Отъ года бо до года пребывъ умре.
208,19 Бѣ же сь мужь не кънижьнъ, нъ умъмь
208,20 простъ и просторѣкъ. Въ сеже лѣто священа
208,21 бысть цьркы святаго Михаила Переяславьская
208,22 Ефрѣмъмь, тоя цьркъви митрополитъмь, юже бѣ
208,23 съзьдалъ велику сущю,
208,24 и пристрою въ неи велику
208,25 сътвори, украсивъ ю вьсякою красотою,
208,26 цьркъвьными съсуды. Сь бо Ефрѣмъ
209,1 въ си лѣта мънога зьдания
209,2 въздвиже: доконьчавъ цьркъви святаго Михаила,
209,3 заложи цьркъвь на воротѣхъ
209,4 святаго Феодора, и святаго Андрѣя
209,5 у цьркъве у воротъ и градъ камянъ и строение баньное
209,6 камяно, сего же не бысть въ Руси.
209,7 omitted
209,8 и украси градъ Переяславьскыи зьдании
209,9 цьркъвьными и прочими зьдании.
209,10 Въ лѣто 6599. Игуменъ и чьрноризьци съвѣтъ
209,11 сътворьше, рѣша: “Не добро есть лежати отьцю
209,12 нашему Феодосиеви кромѣ манастыря и
209,13 цьркъве своея, понеже тъ есть основалъ цьркъвь
209,14 и чьрноризьцѣ съвъкупилъ”. Съвѣтъ сътворьше,
209,15 повелѣша устроити мѣсто, идѣже положити
209,16 мощи его. И приспѣвъшю праздьнику Усъпения
209,17 Богородицѣ трьми дьньми, и повелѣ игуменъ рушити
209,18 къдѣ лежать мощи отьца нашего Феодосия,
209,19 егоже повелѣнию быхъ азъ грѣшьныи пьрвое
209,20 самовидьць. Се же и съкажю, не слухъмь бо слышавъ,
209,21 нъ самъ о собѣ начальникъ. Пришьдъшю
209,22 бо игумену къ мънѣ и рекъшю ми: “Поидѣвѣ
209,23 въ пещеру къ Феодосиеви”. Азъ же пришьдъ
209,24 съ игуменъмь, не вѣдущю никомуже, разглядавша,
209,25 куда копати, и знаменавъша мѣсто, къдѣ
209,26 копати кромѣ устия. Рече же къ мънѣ игуменъ:
209,27 “Не мози повѣдати никомуже отъ братия, да не
209,28 увѣсть никътоже, нъ поими, егоже хощеши,
210,1 да ти поможеть”. Азъ же пристроихъ семь дьни
210,2 рогалия, имже копати. И въ въторьникъ, вечеръ
210,3 въ суморокъ, пояхъ съ собою 2 брата, не
210,4 вѣдущю никомуже, придохъ въ пещеру, и отъпѣвъ
210,5 псалъмы, почахъ копати. И трудивъ ся въдахъ
210,6 другому брату, копахомъ до полуночия, и трудихомъ ся,
210,7 не могуще ся докопати, начахъ
210,8 тужити, еда како на страну копаемъ. Азъ же
210,9 възьмъ рогалию начахъ рамяно копати, другу
210,10 моему опочивающю предъ пещерою. И рече ми:
210,11 “Удариша въ било”. И азъ въ тъ {чинъ | часъ} протяхъ
210,12 на мощи Феодосиевы. И оному глаголющю
210,13 къ мънѣ: “Удариша въ било”. Мънѣ же рекущю:
210,14 “Прокопахъ уже”. Егда же прокопахъ, обьдьржашеть
210,15 мя ужасть, начахъ зъвати: “Господи помилуй!”
210,16 {О сь чинъ же | Въ тъ же часъ} сѣдяста два брата въ манастыри,
210,17 егда игуменъ, утаивъ ся, нѣ съ кымь пренесеть
210,18 его отаи зьряста къ пещерѣ. И егда
210,19 удариша въ било, видѣста три стълпы, акы
210,20 дугы зарьны, и стоявъше и приидоша надъ
210,21 вьрхъ цьркъве, идеже положенъ бысть Феодосии.
210,22 Въ сеже время видѣ Стефанъ, иже бысть въ него
210,23 мѣсто игуменъ, въ се же время бысть епископъ, видѣ
210,24 въ своемь манастыри чресъ поле зарю велику
210,25 надъ пещерою, мьнѣвъ, яко несуть Феодосия, бѣ
210,26 бо ему възвѣщено преже дьньмь единѣмь, и
210,27 съжаливъ си, яко без него преносять и, въсѣдъ
210,28 на конь, въбързѣ поѣха, поимъ съ собою
211,1 Климента егоже постави игумена по собѣ.
211,2 И идяста, видяста зарю велику. И
211,3 яко придоста близь, видѣста свѣщѣ мъногы надъ
211,4 пещерою, и придоста къ пещерѣ, и не видѣста
211,5 ничьто же, и придоста дъну въ пещеру, намъ сѣдящимъ
211,6 у мощии его. Егда бо прокопахъ,
211,7 посълахъ къ игумену: “Приди да възмемъ и”.
211,8 Игуменъ же приде съ дъвѣма братома. И прокопахъ
211,9 вельми, и вълѣзохъ, и видѣхомъ мощи его
211,10 лежащѣ, нъ състави не распали ся бѣша, и
211,11 власи главьнии притяскли бяху. И възложьше
211,12 и на вариманътию,
211,13 вынесоша и предъ пещеру. На другыи же
211,14 дьнь {събьраша | съвокупиша} ся епископи: Ефрѣмъ Переяславьскыи,
211,15 Стефанъ Володимирьскыи, Иоанъ Чьрниговьскыи,
211,16 Маринъ Гурьгевьскии, игумени вьси отъ вьсѣхъ
211,17 манастыревъ съ чьрноризьци; придоша и
211,18 людие благовѣрьнии, и възяша мощи Феодосиевы
211,19 съ свѣщами и съ тьмьяномъ. И принесъше и положиша
211,20 и въ своеи цьркъви, въ притворѣ на
211,21 деснѣи странѣ, мѣсяца августа въ 14,
211,22 въ четвьртъкъ, въ часъ 1 дьне, индикта
211,23 14, лѣта. И праздьноваша свѣтьло въ
211,24 тъ дьнь.
211,25 Се же повѣмь мало нѣчьто, еже ся събысть
211,26 проречение Феодосиево. Игуменьство бо Феодосиеву
211,27 дьржащю въ животѣ своемь и правящю
211,28 стадо, порученое ему Богъмь, чьрноризьцъ,
211,29 не тъкъмо же си единимъ нъ и мирьскыми
212,1 печаше ся душами, како быша съпасли ся,
212,2 паче же о сынѣхъ своихъ душевьныхъ, утѣшая
212,3 и наказая приходящая къ нему, другоичи
212,4 въ домы ихъ приходя и благословение имъ подавая.
212,5 Единою бо ему пришьдъшю въ домъ Яневъ
212,6 къ Яневи и къ женѣ его Марии, Федосии
212,7 бо бѣ любя я, занеже живяста по
212,8 заповѣди Господьни и въ любъви живяста,
212,9 единою же ему пришьдъшю къ нима,
212,10 и учашеть я о милостыни къ убогымъ, и о цьсарьствии
212,11 небесьнѣмь, еже прияти правьдьникомъ, а
212,12 грѣшьникомъ муку, и о съмьртьнѣмь часѣ. И се
212,13 ему глаголющю и о положении тѣла въ гробѣ има,
212,14 рече ему Яневая: “Къто вѣсть, къдѣ си мя
212,15 положать?” Рече же еи Феодосии: “По истинѣ
212,16 идѣже азъ лягу, ту и ты положена будеши”.
212,17 Се же събысть ся. Игумену бо преставльшю ся
212,18 преже, о 18 лѣто се събысть ся: въ се бо
212,19 лѣто престави ся Яневая, именьмь Мария,
212,20 мѣсяца августа 16 дьнь, и пришьдъше чьрноризьци,
212,21 пѣвъше обычьныя пѣсни, и принесъше
212,22 положиша ю въ цьркъви святыя Богородиця, противу
212,23 гробу Феодосиеву, на лѣвои странѣ.
212,24 Феодосии бо положенъ бысть въ 14, а сия
212,25 въ 16.
212,26 Се же сбысть ся проречение блаженаго отьца нашего
212,27 Феодосия, добраго пастуха, иже пасяше
212,28 словесьныя овьця нелицемѣрьно, съ кротостию и
212,29 съ расъмотрениемь, блюда ихъ и бъдѣниемъ,
213,1 моля ся за порученое ему стадо и за люди
213,2 хрьстияньскыя и за землю Русьскую, иже по
213,3 ошьствии его моля ся
213,4 за люди вѣрьныя и за своя ученикы, иже, възирающе
213,5 на раку твою, поминають учение твое
213,6 и въздьржание твое, и прославляють Бога.
213,7 Азъ же грѣшьныи твои рабъ и ученикъ недоумѣю,
213,8 чимь похвалити добраго твоего жития и
213,9 въздьржания. Нъ се реку мало нѣчьто: “Радуи ся,
213,10 отьче нашь и наставьниче, Феодосии мирьскыя плища
213,11 отринувъ, мълчание възлюбивъ, Богу послужилъ
213,12 еси, въ мьнишьскомь житии, вьсяко
213,13 собѣ принесение принеслъ еси божьствьное, пощениемь
213,14 превъзвыси ся, плътьскыхъ
213,15 сластии възненавидѣвъ, и мирьскую красоту и желание
213,16 вѣка сего отринувъ, въслѣдуя стопамъ
213,17 высокомысльнымъ отьцемь, рьвьнуя, мълчаниемъ
213,18 възвышая ся, съмѣрениемь украшая ся.
213,19 Радуи ся, укрѣпль ся
213,20 надежею и вѣчьныхъ благъ приимъ, умертвивъ
213,21 плътьскую похоть, источьникъ безакония и
213,22 мятежь, преподобьне, и бѣсовьскыхъ къзнии избѣгъ
213,23 и отъ сѣти его, съ правьдьными, отьче, почилъ еси,
213,24 въсприимъ противу трудомъ своимъ възмьздие,
213,25 отьцемь наслѣдьникъ бывъ, послѣдовавъ
213,26 учению ихъ и нраву ихъ, въздьржанию
213,27 ихъ, и правило ихъ правя”. Паче же рьвьноваше
213,28 великому Феодосию житиемь и нравъмь,
213,29 и въздьржанию рьвьнуя, и
214,1 послѣдьствуя обычаю его, и преходя отъ дѣла
214,2 въ дѣло уньшее, и обычьныя мольбы Богу въздая,
214,3 въ воню благоухания принося кадило молитвьное,
214,4 тьмиянъ благовоньныи. Побѣдивъ
214,5 мирьскую похоть и миродьржьца кънязя вѣка
214,6 сего, супротивьника попьравъ диявола и его
214,7 къзни, побѣдьникъ яви ся, противьнымъ его стрѣламъ
214,8 и гърдымъ помысломъ ставъ супротивьно, укрѣпивъ ся
214,9 оружиемь крьстьнымь и вѣрою непобѣдимою
214,10 и Божиею помощию. Моли ся за мя, чьстьныи
214,11 отьче, избавлену быти отъ сѣти неприязнены,
214,12 и отъ противьника врага съблюди мя твоими
214,13 молитвами.
214,14 Въ сеже лѣто знамение въ сълньци,
214,15 яко погыбе, и мало ся его оста,
214,16 акы мѣсяць бысть, въ часъ 2 дьне, мѣсяца маия
214,17 21. Въ сеже лѣто бысть, Вьсеволоду ловы
214,18 дѣющю звѣриныя за Вышегородъмь, заметавъшимъ
214,19 тенета и {кличаномъ | людьмъ} кликнувъшимъ,
214,20 съпаде превеликъ змии съ небесе, и ужасоша ся
214,21 вьси людие. Въ сеже время земля стукну,
214,22 яко мънози слышаша. Въ сеже лѣто
214,23 вълхвъ яви ся Ростовѣ, и
214,24 погыбе.
214,25 Въ лѣто 6600. Предивьно бысть въ Полотьскѣ
214,26 въ мьчьтѣ: въ нощи бывъши
214,27 тутънъ станяше, {по улици | полунощи} яко человѣци рыщуть
214,28 бѣси. Аще къто вылѣзяше ис хоромины, хотя
214,29 видѣти, абие уязвенъ бяше невидимо отъ
215,1 бѣсовъ, и съ того умираху, и не смяху
215,2 излазити ис хоромъ. По семь же начаша въ дьне
215,3 являти ся на конихъ, и не бѣ ихъ видѣти самѣхъ,
215,4 нъ конь ихъ видѣти копыта. И тако уязвляху
215,5 люди Полотьскыя и его область. Тѣмь и
215,6 человѣци глаголаху: яко навие биють Полочаны.
215,7 Се же знамение поча быти отъ Дрьютьска.
215,8 Въ сиже времена бысть знамение въ небеси, яко
215,9 кругъ бысть посредѣ неба превеликъ. Въ сеже лѣто
215,10 ведро бяше, яко изгараше земля, и мънози
215,11 борове изгараху ся сами и болота;
215,12 мънога знамения бываху по {мѣстомь | землѣ}; и рать
215,13 велика бяше отъ Половьць и отвьсюду, и възяша
215,14 3 грады: Пѣсъчьнъ, Прилукъ,
215,15 и мънога села повоеваша.
215,16 Въ сеже лѣто воеваша Половьци Ляхы
215,17 съ Василькъмь Ростиславичьмь. Въ сеже лѣто
215,18 умьре Рюрикъ, сынъ Ростиславль. Въ сиже времена
215,19 мънози человѣци умираху различьными недугы,
215,20 якоже глаголаху продающе кърсты, яко “Продахомъ
215,21 кърсты отъ Филипова дьне до мясопущь
215,22 7 тысящь”. Се же бысть за грѣхы наша, яко
215,23 умъножиша ся грѣси наши и неправьды. Се же
215,24 наведе на ны Богъ, веля намъ имѣти покаяние
215,25 и въстягнути ся отъ грѣха и зависти и отъ
215,26 прочихъ зълыхъ дѣлъ неприязнинъ.
215,27 Въ лѣто 6601, индикта 1 лѣто, престави ся
215,28 великыи кънязь Вьсеволодъ, сынъ Ярославль,
216,1 вънукъ Володимирь, мѣсяца априля
216,2 13 дьнь, а погребенъ бысть 14 дьнь, недѣли
216,3 сущи тъгда страстьнѣи и дьни сущю четвьртъку,
216,4 въ ньже положенъ бысть въ гробѣ въ велицѣи
216,5 цьркъви святыя София. Сии благовѣрьныи
216,6 кънязь Вьсеволодъ бѣ {издѣтьска | измлада},
216,7 любя правьду, набъдя убогыя и въздая чьсть
216,8 епископомъ и презвутеромъ, излиха же любяше
216,9 чьрноризьцѣ, и подаваше требование имъ.
216,10 Бѣ же и самъ въздьржа ся отъ пияньства
216,11 и отъ похоти, тѣмь любимъ бѣ отьцьмь своимь,
216,12 яко глаголати отьцю къ нему: “Сыну мои! Благо тобѣ,
216,13 яко слышю о тобѣ кротость, и радую ся, яко
216,14 ты покоиши старость мою. Аще ти Богъ
216,15 подасть прияти власть стола моего по братии
216,16 своеи, съ правьдою, а не съ насилиемь, то егда
216,17 Богъ отъведеть тя отъ жития твоего, то ляжеши,
216,18 идеже азъ лягу, у гроба моего, понеже люблю
216,19 тя паче братия твоея”. Се же събысть ся отьца
216,20 его, еже глаголалъ бѣ. Сему приимъшю послѣже
216,21 вьсея братия столъ отьца своего, по съмьрти брата
216,22 своего сѣде Кыевѣ, къняжа, и быша ему
216,23 печали большѣ, паче неже сѣдящю ему въ
216,24 Переяславли. Сѣдящю бо ему Кыевѣ,
216,25 печаль бысть ему отъ сыновьць своихъ, яко начаша
216,26 ему сътужати, хотяще власти овъ сея, овъ же
216,27 другия; се же, омиряя ихъ, раздаваше власти
216,28 имъ. Въ сихъ печали въсташа и недузи ему,
217,1 и приспѣваше старость къ симъ. И нача любити
217,2 съмыслъ уныхъ, съвѣтъ творя съ ними; си же
217,3 начаша и заводити и, негодовати дружины своея
217,4 пьрвыя и людьмъ не хотѣти къняже правьды. И
217,5 начаша тиуни грабити, людии продаяти,
217,6 сему не вѣдущу въ болѣзньхъ своихъ. И разболѣвъшю ся
217,7 ему вельми, посъла по сына своего
217,8 Володимира Чьрнигову. И пришьдъшю Володимиру,
217,9 видѣвъ отьца больна суща, плака ся вельми. и
217,10 пресѣдящю Володимиру и Ростиславу, сыну мьньшему
217,11 его, пришьдъшю же часу, престави ся
217,12 тихо и кротъко и приложи ся къ отьцемъ своимъ,
217,13 къняживъ въ Кыевѣ лѣтъ 15, а въ Переяславли
217,14 лѣто, а въ Черниговѣ лѣто. Володимиръ же
217,15 плакавъ ся съ Ростиславъмь, братъмь своимь, съпрятаста
217,16 тѣло его. И събьраша ся епископи и игумени
217,17 съ чьрноризьци и попове и боляре и простии
217,18 людие, възьмъше тѣло его, съ обычьными
217,19 пѣсньми положиша у святѣи Софии, якоже
217,20 рекохомъ преже.
217,21 Володимиръ нача рамышляти, река: “Аще азъ
217,22 сяду на столѣ отьца своего, то имамь рать съ
217,23 Святопълкъмь възяти, яко тъ есть столъ отьца его
217,24 преже былъ”. И тако размысливъ посъла по Святопълка
217,25 Турову, а самъ иде Чьрнигову, а
217,26 Ростиславъ Переяславлю. И минувъшю Велику
218,1 дьни, и прешьдъши Праздьнѣи недѣли,
218,2 въ дьнь антипаскы, мѣсяца априля 24.
218,3 Начало къняжения Святопълча въ Кыевѣ. Приде Святопълкъ къ Кыеву. И изидоша
218,4 противу ему Кияне съ поклонъмь, и прияша
218,5 съ радостию, и сѣде на столѣ отьца своего и
218,6 стрыя своего. Въ сеже время поидоша Половьци
218,7 на Русьскую землю; слышавъше яко умьрлъ
218,8 есть Вьсеволодъ, посълаша посълы къ Святопълку о
218,9 мирѣ. Святопълкъ же, не съдума съ большею дружиною
218,10 отьнею и стрыя своего, нъ съвѣтъ
218,11 сътвори съ пришьдъшими съ нимъ, изъимавъ
218,12 посълы, въсажа и въ истъбъку. Слышавъше же се
218,13 Половьци, почаша воевати. И придоша Половьци
218,14 мънози, и оступиша Търчьскыи градъ. Святопълкъ
218,15 же слышавъ Половьцѣ, посъла прося
218,16 мира. И не въсхотѣша Половьци мира, и пустиша
218,17 по земли воююще. Святопълкъ же нача събирати
218,18 воя, хотя на нѣ. И рѣша ему мужи
218,19 съмысльнии: “Не кушаи ся противу имъ, яко
218,20 мало имаши вои”. Онъ же рече: “Имѣю отрокъ
218,21 своихъ 8 сътъ, иже могуть противу имъ стати”.
218,22 Начаша же друзии несъмысльнии мълвити: “Поиди,
218,23 къняже”. Съмысльнии же глаголаху: “Аще бы
218,24 пристроилъ 8 тысячь, не лихо ти есть:
218,25 наша земля оскудѣла есть отъ рати и
218,26 продажь. Нъ посъли ся къ брату своему Володимиру,
219,1 да бы ти помоглъ”. Святопълкъ же,
219,2 послушавъ ихъ, и посъла къ Володимиру, да
219,3 бы помоглъ ему. Володимиръ же събьра вои
219,4 свои и посъла по Ростислава, брата своего, до
219,5 Переяславлю, веля ему помагати Святопълку.
219,6 Володимиру же пришьдъшю Кыеву, и съвъкупи ся
219,7 у святаго Михаила, и възяста межи собою
219,8 распьря и которы, и уладивъша ся, цѣловаста
219,9 крьстъ межи собою, а Половьцемъ воюющимъ по земли.
219,10 И рѣша ему мужи съмысльнии: “Почьто вы распьрю
219,11 имата межи собою? А погании губять землю
219,12 Русьскую. Послѣди ся съмирита, а нынѣ
219,13 поидита противу имъ любо съ миръмь,
219,14 любо ратию”. Володимиръ же хотяше мира,
219,15 Святопълкъ же хотя ратию. И поиде Святопълкъ
219,16 и Володимиръ и Ростиславъ къ Трьполю, и
219,17 придоша къ Стугнѣ. Святопълкъ же и Володимиръ
219,18 и Ростиславъ съзъваша дружину свою
219,19 на съвѣтъ, хотяче поступити чресъ рѣку,
219,20 и начаша думати. И глаголаше Володимиръ, яко
219,21 “Сьдѣ стояще чресъ рѣку, у грозѣ сеи, сътворимъ
219,22 миръ съ ними”. И присташа съвѣту сему съмысльнии
219,23 мужи, Янь и прочии. Кыяне же не
219,24 въсхотѣша съвѣта сего, нъ рекоша: “Хощемъ
219,25 ся бити; поступимъ на ону страну рѣкы”.
219,26 И възлюбиша съвѣтъ сь, и преидоша
219,27 Стугну рѣку. Бѣ бо тъгда наводьнила ся вельми.
219,28 Святопълкъ же и Володимиръ и Ростиславъ,
220,1 испълчивъше ся, поидоша. Идяше на
220,2 деснои странѣ Святопълкъ, а на шюеи Володимиръ,
220,3 а посредѣ Ростиславъ. И минувъше
220,4 Трьполь, проидоша валъ. И се Половьци идяху
220,5 противу, и стрѣльци противу предъ ними; нашимъ же
220,6 ставъшимъ межи валъма, поставиша стяги
220,7 своя, и поидоша стрѣльци из валу. И Половьци,
220,8 пришьдъше къ валови, поставиша стягы своя, и
220,9 налегоша пьрвое на Святопълка, и възломиша
220,10 пълкъ его. Святопълкъ же стояше крѣпъко, и
220,11 побѣгоша людие, не тьрпяще ратьныхъ противления
220,12 и послеже побѣже Святопълкъ.
220,13 И налегоша на Володимира, и бысть
220,14 брань люта; и побѣже и Володимиръ съ Ростиславъмь
220,15 и вои его. И прибѣгоша къ рѣцѣ
220,16 Стугнѣ, и въбрьде Володимиръ съ Ростиславъмь,
220,17 и нача утапати Ростиславъ предъ очима
220,18 Володимирима. И хотѣ похватити брата своего
220,19 и мало не утону самъ. И тако утопе Ростиславъ,
220,20 сынъ Вьсеволожь. Володимиръ же пребрьдъ рѣку
220,21 съ малъмь дружины, мънози бо падоша отъ пълка
220,22 его, и боляре его ту падоша, и пришьдъ на
220,23 ону страну Дънѣпра, плака ся по братѣ
220,24 своемъ и по дружинѣ своеи, и иде Чьрнигову
220,25 печальнъ вельми. Святопълкъ же убѣже
220,26 въ Трьполь, и затвори ся ту, и бѣ ту до вечера,
220,27 и въ ту нощь приде Кыеву. Половьци же
220,28 видѣвъше съдолѣвъше пустиша по земли воююче,
221,1 а друзии възвратиша ся къ Търчьскому. Си же ся
221,2 зълоба съключи въ дьнь Възнесения Господа нашего
221,3 Иисуса Христа, мѣсяца мая 26. Ростислава же
221,4 искавъше обрѣтоша въ рѣцѣ; и въземше и принесоша
221,5 и Киеву. И плака ся по немь мати его,
221,6 и вьси людие плакаша по немь по велику,
221,7 уности его ради. И събьраша ся епископи и попове
221,8 и чьрноризьци, и пѣсни обычьныя пѣвъше, и положиша
221,9 и въ цьркъви святыя София у отца своего.
221,10 Половьцемъ же осѣдящемъ Търчьскыи, противящемъ
221,11 же ся Търкомъ и крѣпъко борющимъ
221,12 изъ града, убиваху мъногы отъ противьныхъ.
221,13 Половьци же начаша налѣгати, и отъимати
221,14 воду, и изнемогати начаша въ градѣ людие жажею
221,15 водною и гладъмь. И присълаша Търци
221,16 къ Святопълку, глаголюще: “Аще не пришлеши брашньа,
221,17 предати ся имамъ”. Святопълкъ же посъла имъ, и не
221,18 бѣ льзѣ въкрасти ся въ градъ мъножьствъмь
221,19 ратьныхъ. И стояша около града недѣлъ 9,
221,20 и раздѣлиша ся на дъвое: едини сташа у града,
221,21 рать борюще, а друзии поидоша Кыеву,
221,22 и пустиша на воропъ межи Киевъ и Вышегородъ.
221,23 Святопълкъ же выиде на Желаню,
221,24 и поидоша обои противу собѣ, и съступиша ся,
221,25 и укрѣпи ся брань. Побѣгоша наши предъ
221,26 иноплеменьникы, и падаху язвьнии предъ
221,27 врагы нашими, и мънози погыбоша, и быша
221,28 мьртви, паче неже у Трьполя. Святопълкъ же
222,1 приде Киеву самъ третии, а Половьци възвратиша ся
222,2 къ Търцьскому. Быша же си зълая мѣсяца
222,3 иуля 23. Наутрия же въ 24,
222,4 у святую мученику Бориса и Глѣба, бысть плачь
222,5 великъ въ градѣ, грѣхъ ради
222,6 нашихъ великихъ, за умъножение
222,7 безаконии нашихъ.
222,8 Се на ны Богъ попусти поганыя, не
222,9 милуя ихъ, нъ насъ казня, да быхомъ ся
222,10 въстягнули отъ зълыхъ дѣлъ. Симь казнить ны
222,11 нахожениемъ поганыхъ; се бо есть батогъ Божии,
222,12 да нѣколи съмиривъше ся въспомянемъ ся отъ
222,13 зълаго пути своего. Сего ради въ праздьникы
222,14 Богъ намъ наводить сѣтование, якоже ся сътвори
222,15 въ се лѣто пьрвое зъло на Възнесение Господне, еже
222,16 у Трьполя, въторое же въ праздьникъ Бориса
222,17 и Глѣба, еже есть праздьникъ новыи Русьскыи.
222,18 Сего ради пророкъ глаголаше: “Преложю
222,19 праздьникы ваша въ плачь и пѣсни ваша
222,20 въ рыдание”. Сътвори бо ся плачь великъ въ
222,21 земли нашеи, и опустѣша села наша и гради
222,22 наши, быхомъ бѣгающе предъ врагы нашими.
222,23 Якоже пророкъ глаголаше: “Падете предъ врагы вашими,
222,24 и поженуть вы ненавидящии васъ, и побѣгнете,
222,25 никому женущю васъ. И съкрушю ругание гърдѣния
222,26 вашего. И будеть въ тъщету крѣпость ваша. И
222,27 убиеть вы приходяи мечь, и будеть
222,28 земля ваша пуста, и двори ваши пусти будуть.
223,1 Яко вы {худи | зъли} есте и лукави, и азъ поиду
223,2 къ вамъ яростию лукавою”. Глаголеть Господь Богъ
223,3 Израилевъ. Ибо лукавии сынове Измаилови пожигаху
223,4 села и гумьна, и мъногы цьркъви запалиша
223,5 огньмь. Да не чюдить ся никътоже о семь: “Идеже
223,6 мъножьство грѣховъ, ту вьсякого видѣния показание”.
223,7 Сего ради въселеная предасть ся, сего
223,8 ради гнѣвъ простре ся, сего ради земля мучена
223,9 бысть: ови ведуть ся полонени, а друзии посѣкаеми
223,10 бывають, друзии на мьсть даеми бывають,
223,11 горькую приемлюще съмьрть, друзии трепещють,
223,12 зьряще убиваемыхъ, друзии гладъмь уморяеми
223,13 и водьною жажею. Едино прѣщение, едина казнь,
223,14 мъноговещьныя имуще раны и различьныя
223,15 печали и страшныя мукы, овы {вяжеми | вязани} и
223,16 пятами пьхаеми и на {зимѣ | морозѣ} дьржими и ураняеми.
223,17 И се притранѣе и страшьнѣе, яко на
223,18 хрьстияньстѣ родѣ страхъ и колѣбание и бѣда
223,19 упространи ся. Правьдьно и достоино, тако
223,20 да накажемъ ся, и тако веру имемъ, кажеми есмы:
223,21 подобаше намъ “Въ руцѣ языку
223,22 страньну и безаконьну земля”.
223,23 Рьцѣмъ велегласьно: “Правьдьнъ еси, Господи, и прави
223,24 суди твои”. Рьцѣмъ по оному разбоинику: “Мы
223,25 достоиная, яже съдѣяхомъ, прияхомъ”. Рьцѣмъ
223,26 съ Иевъмь: “Яко Господеви любо, тако и бысть;
223,27 буди имя Господьне благословено въ вѣкы”. Да нахожениемь
223,28 поганыхъ мучими Владыку познаемъ, егоже
223,29 мы прогнѣвахомъ; прославлени бывъше, не прославихомъ;
223,30 почьтени бывъше, не почьтохомъ; освятивъше ся,
224,1 не разумѣхомъ; куплени бывъше, не поработахомъ;
224,2 породивъше ся, не яко отьца постыдѣхомъ ся.
224,3 Съгрѣшихомъ, и казними есмы; якоже сътворихомъ,
224,4 тако и стражемъ: гради вьси опустѣша, села;
224,5 преидемъ поля, идеже пасома
224,6 бѣша стада конь, овьця и волове, вьсе тъще
224,7 нынѣ видимъ, нивы поростъше звѣрьмъ жилище
224,8 быша. Нъ обаче надѣемъ ся на милость Божию;
224,9 кажеть бо ны добрѣ благыи Владыка, “Не по безаконию
224,10 нашему сътвори намъ и по грѣхомъ нашимъ
224,11 въздасть намъ”; тако подобаеть благому Владыцѣ казати
224,12 не по мъножьству грѣховъ. Тако Господь сътвори намъ:
224,13 падъшая въставить, Адамле преступление
224,14 прости, баню нетьлѣния дарова свою
224,15 кръвь за ны излия. Такоже ны видѣ не право
224,16 пребывающа, нанесе намъ сущюю рать и скърбь,
224,17 да не хотяще, вьсяко въ будущии вѣкъ
224,18 обрящемъ милость; душа бо, сьде казнима, вьсяко
224,19 въ будущии вѣкъ обрящемь милость и льготу отъ мукъ,
224,20 не мьстить бо Господь дъвоиче о томь. О неиздреченьному
224,21 чловѣколюбию! якоже видѣ ны неволею
224,22 къ собѣ обращающа ся. О тьмами любъве, еже
224,23 къ намъ! понеже хотяще уклонити ся отъ заповѣдии
224,24 его. Се уже не хотяще тьрпимъ,
224,25 съ нужею, и понеже неволею, се уже
224,26 волею. Гдѣ бо бѣ умиление въ насъ? Ныне
224,27 же вься пълна суть сльзъ. Къдѣ бѣ въ насъ
224,28 въздыхание? Нынѣ же плачь по вьсѣмъ улицамъ
224,29 {упространи | умъножи} ся избиеныхъ ради, иже избиша
224,30 безаконьнии Половьци. И воеваша мъного, и
225,1 възвратиша ся къ Търчьскому, и изнемогоша
225,2 людие въ градѣ отъ гладъмь, и предаша ся ратьнымъ.
225,3 Половьци же, приимъше градъ, запалиша огньмь,
225,4 и люди раздѣлиша, и ведоша въ вежѣ къ сьрдоболямъ
225,5 своимъ и съродьникомъ своимъ.
225,6 Мучими, зимою
225,7 оцѣпляеми, въ алъчи и въ жажи и въ бѣдѣ,
225,8 побледѣвъше лици, почьрнѣвъше телесы; незнаемою
225,9 страною, языкъмь испаленъмь, нази
225,10 ходяще и боси, ногы имуще избодены тьрниемь;
225,11 съ сльзами отвѣщеваху другъ къ другу, глаголюще:
225,12 “Азъ бѣхъ сего града,” а другыи: “И язъ сего села”;
225,13 тако съвъпрашаху ся съ сльзами, родъ свои
225,14 повѣдающе, очи възводяще на
225,15 небо къ Вышьнему, вѣдущему таиная. Да никътоже
225,16 дьрзнеть рещи, яко ненавидими Богъмь есмы!
225,17 Кого бо тако любить, якоже ны възлюбилъ
225,18 есть? Кого тако почьтилъ есть, якоже ны
225,19 прославилъ есть и възнеслъ? Никогоже. Имьже
225,20 паче ярость свою въздвиже на ны, яко паче
225,21 вьсѣхъ почьтени бывъше, горѣе вьсѣхъ съдѣяхомъ грѣхы.
225,22 Якоже паче вьсѣхъ просвѣщени бывъше, Владычню
225,23 волю вѣдуще, и презьрѣвъше, въ лѣпоту паче
225,24 инѣхъ казними есмы. Се бо азъ грѣшьныи
225,25 мъного и часто Бога прогнѣвахъ, и часто съгрѣшая бываю
225,26 по вься дьни. Въ сеже лѣто престави ся Ростиславъ,
225,27 сынъ Мьстиславль, вънукъ Изяславль,
225,28 мѣсяца октямбря въ 1 дьнь, а погребенъ
226,1/2 бысть ноямбря въ 16, въ цьркъви святыя Богородиця Десятиньныя.
226,3 Въ лѣто 6602. Сътвори миръ Святопълкъ съ Половьци,
226,4 и поя собѣ жену дъщерь Тугортъканю, кънязя
226,5 Половьчьскаго.